ᐊᑐᐃᓐᓇᕈᕐᑎᐸᓪᓕᐊᓕᕐᓱᑕ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒧᑦ, ᐃᑦᓯᕙᖃᑕᐅᒋᑦ ᐅᕙᑦᑎᓄᑦ ᐃᓚᖏᓪᓗ ᐃᓕᓐᓂᐊᑎᑦᓯᔨᐅᓚᐅᔪᑦ ᐊᕐᕌᓂ ᐃᓕᓐᓂᐊᑕᐅᔪᓂ. ᔪᓓ 2018-ᒥ, ᐊᐱᕆᓚᐅᔪᔪᒍᑦ ᕉᑕ ᐃᔨᑭᐅᓪᒥᒃ, ᕕᓂ ᐹᕋᓐᒥᒃ, ᓕᓯ ᑑᒪᓯᒥᒃ, ᖂᑉᐱᐊ ᑫᑦᑕᖅ ᐊᒻᒪᓗ ᑳᓓ ᐃᓄᑉᐸᖅ. ᐅᕙᑦᑎᓂᒃ ᐅᖃᐅᑦᔩᓚᐅᔪᑦ ᓱᓇᓂᒃ ᐃᓕᓐᓂᐊᑎᑦᓯᒍᑎᖃᓛᕐᓂᒥᓂᒃ, ᐊᒻᒪᓗ ᐅᖄᕐᓱᑎᒃ ᐃᓱᒪᒋᔭᒥᓂᒃ ᖃᓄᖅ ᐱᒻᒪᕆᐅᓂᕕᓂᖏᓐᓂᒃ ᐃᓄᐃᑦ ᐃᓕᓐᓂᐊᑎᑦᓯᔨᐅᖃᑎᒌᑦ ᐊᕐᕌᒍᓂ ᐊᓂᒍᕐᑐᓂ. ᐅᓪᓗᒥ ᑲᑎᓯᓚᖓᕗᒍᑦ ᕉᓴ ᐃᔨᑭᐅᓪᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐅᖃᐅᑎᓚᐅᕐᑎᒍᑦ ᑭᓇᐅᓂᕐᓂᒃ ᐊᒻᒪᓗ ᓇᓂᒥᐅᖑᒻᒪᖔᕐᐱᑦ…
ᕉᑕ ᐃᔨᑭᐅᓪ: ᕉᑕ ᐃᔨᑭᐅᓪᖑᕗᖓ. ᖁᐊᕐᑕᐅᒥᐅᖑᑦᓱᖓ ᐊᒻᒪᓗ ᐱᓇᓱᐊᕐᓯᒪᓕᕐᑐᖓ ᐃᓕᓴᕐᓂᓕᕆᓂᕐᒥ 29-ᓂᒃ ᐊᕐᕌᒍᓂᒃ. ᒫᓐᓇᐅᔪᖅ ᐃᓕᓐᓂᐊᑎᑦᓯᔨᑦ ᐱᒋᐅᕐᓴᑎᑕᐅᓂᖏᓐᓄᑦ ᐃᓱᐊᕐᓭᔨᐅᔪᖓ, ᑭᓯᐊᓂ ᐃᓕᓐᓂᐊᑎᑦᓯᓯᒪᓕᕐᑐᖓ ᐊᑯᓂᐅᓕᕐᑐᖅ ᑕᒃᑲᓃᓚᐅᕐᓇᖓ, ᐃᓘᓐᓇᑲᓴᖏᓐᓂᒃ ᐳᕐᑐᓂᓕᓐᓂ!
*ᖃᐅᔨᒪᔭᐅᒋᐊᓕᒃ: ᕉᑕ ᐊᐱᕆᔭᐅᓯᒪᔪᑦ ᔪᓓ 2018-ᒥ ᐊᒻᒪᓗ ᑕᒃᑲᓂ ᐅᐱᕐᖔᒥ ᐅᑭᐅᖏᑦ ᓈᒻᒪᓯᒻᒪᑕ ᓄᕐᖃᓛᓯᔪᖅ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓇᓪᓕᐊᓃᒃ ᐃᓕᓐᓂᐊᑎᑦᓯᓚᐅᔪᕕᑦ ᐅᐱᕐᖔᒥ ᐃᓕᓐᓂᐊᑎᑦᓯᒍᑎᒥᒃ ᑕᒃᑲᓂ ᐊᕐᕌᒍᒥ?
ᕉᑕ ᐃᔨᑭᐅᓪ: ᐃᓕᓐᓂᐊᑎᑦᓯᓚᐅᔪᕗᖓ ᐃᓕᓐᓂᐊᑎᓄᑦ ᐱᐅᓯᕐᓱᑎᓄᑦ ᐱᓀᓗᑕᓕᓐᓄᑦ. ᐃᓕᓐᓂᐊᒐᑦ ᐋᕐᕿᓱᕐᑕᐅᓯᒪᔪᖅ ᑯᑦᓴᓇᕐᑐᒨᕐᑎᓯᑦᑌᓕᔨᓄᑦ, ᐃᓕᓐᓂᐊᑎᓂᒃ ᐃᓱᐊᕐᓭᔨᓄᑦ ᐊᒻᒪᓗ ᐃᓕᓐᓂᐊᑎᑦᓯᔨᓄᑦ. ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᑕ ᑐᖓᓕᖓ ᐃᓕᓐᓂᐊᓚᐅᔪᒻᒥᔪᖅ, ᑲᔅᑏᓇ ᑭᐊᑌᓐᓇᖅ ᑲᖏᕐᓱᔪᐊᕐᒥᐅᖅ. ᐃᓕᓐᓂᐊᒐᖅ ᑕᑯᓐᓇᓂᖃᓚᐅᔪᖅ ᖃᐅᔨᓴᕐᑕᐅᓂᖓᓂᒃ ᐱᓀᓗᑕᓖᑦ ᐱᐅᓯᕐᓲᑎᖏᓐᓂᒃ ᐃᓕᓐᓂᐊᑎᓂᒃ ᐊᒻᒪᓗ ᐱᕙᓪᓕᐊᔭᐅᓂᖓᓂᒃ ᐱᓀᓗᑕᖃᕐᑎᓯᑦᑌᓕᓂᕐᒧᑦ ᐅᕝᕙᓘᓐᓃᑦ ᐱᓇᓱᐊᖃᑎᖃᕐᓂᒧᑦ ᐸᕐᓇᓯᒪᐅᑏᑦ. ᐱᒻᒪᕆᐅᔪᖅ ᓇᓗᓀᕐᓗᒋᑦ ᓱᓀᑦ ᐱᑦᔪᑎᐅᒻᒪᖔᑕ ᐱᓀᓗᑕᖃᕐᓂᒧᑦ ᐱᐅᓯᖃᕐᓂᒥᒃ, ᐊᑦᔨᒌᖕᖏᑐᓂᒃ ᐋᕐᕿᓱᕐᓯᒪᐅᑎᖃᕐᒪᑕ ᐊᑐᕈᓐᓇᑕᕗᓐᓂᒃ ᐱᓇᓱᐊᕈᑎᒋᓗᒋᑦ ᑖᒃᑯᓂᖓ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᒦᒃ ᓂᕆᐅᒋᔭᖃᕐᕿᑦ ᐃᓚᐅᔪᐃᑦ ᐱᑖᕆᓚᖓᔭᖓᓂᒃ ᑕᒃᑲᖓᑦ ᐃᓕᓐᓂᐊᒐᕐᒥᑦ?
ᕉᑕ ᐃᔨᑭᐅᓪ: ᐃᓱᕐᕆᖁᔭᒃᑲ ᓴᓇᓕᑐᐊᕈᑎᒃ ᐃᒻᒥᒎᓈᕐᑎᑐᒥᒃ ᐱᓇᓱᐊᕈᑎᑦᓴᒥᓂᒃ ᐸᕐᓀᓕᑐᐊᕈᑎᒃ ᐃᑲᔪᓚᖓᔪᒥᒃ ᐃᓕᓐᓂᐊᑎᒥᒃ ᐋᕐᕿᓱᐃᔪᒥᒃ ᐱᐅᓯᕆᖃᑦᑕᑕᖓᑕ ᐱᓀᓗᑕᖓᓂᒃ. ᐃᓕᓐᓂᐊᓱᑕ ᑕᑯᓐᓇᓚᐅᔪᒻᒥᔪᒍᑦ ᐊᑦᔨᒌᖕᖏᑐᓂᒃ ᐊᑐᕈᓐᓇᑕᖏᓐᓂᒃ ᐃᓕᓐᓂᐊᑎᓂᒃ ᐱᓇᓱᐊᕈᑎᒋᓗᒋᑦ. ᐆᑦᑐᑎᒋᓗᒍ, ᐃᓚᖏᑦ ᐱᐅᓯᕐᓲᑏᑦ ᐃᓱᒪᒨᓕᖓᓂᖃᕐᒪᑕ ᐊᒻᒪᓗ ᑲᒪᒋᔭᐅᒋᐊᖃᕐᓱᑎᒃ ᐃᓗᓯᓕᕆᔨᓄᑦ. ᑕᒪᓐᓇ ᐃᑲᔪᕐᓯᓚᕆᒍᓐᓇᑐᖅ ᐱᐊᕋᐅᑉ ᐃᓅᓯᖓᓂᒃ. ᑌᒣᒻᒪᑦ ᐃᓚᐅᔪᓂᒃ ᓄᓇᓕᒻᒥᓄᑦ ᐅᑎᖁᔨᕗᖓ ᐱᓇᓱᐊᕈᑎᑦᓴᑖᕆᐊᓪᓚᓗᑎᒃ ᐃᑲᔪᕐᓯᓚᖓᔪᓂᒃ ᑖᒃᑯᓂᖓ ᐃᑲᔪᕐᑎᓗᒋᑦ ᐃᓕᓐᓂᐊᑎᓂᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᒦᒃ ᐊᐅᓚᔨᔭᖃᓚᖓᕕᑦ ᑖᑦᓱᒥᖓ ᐃᓕᓐᓂᐊᑎᑦᓯᓂᕕᓂᕐᓄᑦ ᐊᒻᒪᓗ ᐱᓇᓱᐊᖃᑎᕕᓂᑎᓐᓄᑦ ᑖᒃᑯᓇᓂ ᐃᓕᓐᓂᐊᑐᓂ?
ᕉᑕ ᐃᔨᑭᐅᓪ: ᐃᓕᓐᓂᐊᑎᑦᓯᒍᑎ ᐱᑦᓯᐊᓂᖃᓚᐅᔪᖅ ᔪᕆᓚᐅᔭᕋᓕ. ᓄᑖᖑᑦᓱᓂ ᐃᓕᓐᓂᐊᒐᖅ. ᐱᓇᓱᐊᕈᑎᑦᓴᓂᒃ ᐊᑐᐃᓐᓇᕈᐃᕕᐅᒪᒐᑦᑕ ᐱᕙᓪᓕᐊᑎᒋᐊᓕᕗᓐᓂᒃ, ᑭᓯᐊᓂ ᐃᓘᓐᓇᑎᒃ ᖃᓪᓗᓈᑎᑑᓚᐅᔪᒻᒪᑕ. ᑌᒣᒻᒪᑦ ᐅᕙᖓ, ᐋᓂ ᑎᕐᑎᓗᒃ ᐊᒻᒪᓗ ᒪᔨᐊ, ᒪᑭᐅᓪᒥ ᖃᐅᔨᒋᐊᕐᕕ, ᐱᓇᓱᐊᓚᐅᔪᒍᑦ ᐱᕕᑦᓴᑭᑦᑐᐹᓗᒻᒥ ᓇᓗᓀᕐᓯᓱᑕ ᐃᓗᓕᖏᓐᓂᒃ ᐱᓇᓱᐊᕈᒪᔭᕗᓐᓂᒃ. ᐃᑉᐱᒍᓱᒐᓱᐊᓚᐅᔪᒍᑦ ᑕᒪᓐᓇ ᐱᓇᓱᐊᕐᓂᕗᑦ ᐃᓅᓯᖏᓐᓂ ᐊᑐᓲᖏᓐᓄᑦ ᐱᓇᓱᐊᕐᓱᑎᒃ ᐃᓚᐅᔪᐃᑦ ᐃᓕᓐᓂᐊᑎᑦᓯᒍᑎᒋᓚᐅᔭᕗᑦ. ᐊᐅᓚᔨᔭᕋ ᑕᒃᑲᓂ ᐃᓕᓐᓂᐊᒐᕐᒥ ᐅᒃᑯᐃᖔᕐᓂᕆᓚᐅᔭᖏᑦ ᐃᓘᓐᓇᑎᒃ ᐃᓚᐅᓚᐅᔪᐃᑦ ᐱᓇᓱᐊᕐᓂᕗᓐᓂ ᒪᓂᔨᒍᑎᒋᓚᐅᔭᕗᓐᓂᒃ. ᐱᕚᓪᓕᔭᐅᓚᐅᔪᒍᑦ ᐃᓘᓐᓇᖏᑦᑕ ᐅᖄᒍᑎᒋᓚᐅᔭᖏᓐᓄᑦ, ᖃᓄᐃᓘᕐᓂᕆᓲᖏᓐᓄᑦ ᐃᓗᓕᖏᓐᓄᑦ ᐃᓕᓐᓂᐊᑎᑦᓯᒍᑎᒋᓚᐅᔭᕗᑦᑕ. ᑕᒪᓐᓇ ᐱᓪᓚᕆᐊᓗᒃ, ᐱᐅᓯᐅᒥᑎᑦᓯᓚᖓᔪᖅ ᐃᑲᔪᕐᓯᓗᓂ ᐃᓕᓐᓂᐊᑕᐅᔪᒥᒃ ᑭᖑᓪᓕᒥ ᐊᑐᕐᑕᐅᓕᕐᒥᐸᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᒪᑭᐅᓪᒦ ᐃᓕᓐᓂᐊᕕᕐᔪᖓᓂ ᐱᔭᕇᕈᑎᑖᕐᓯᒪᒋᕕᑦ?
ᕉᑕ ᐃᔨᑭᐅᓪ: ᐊᐊ ᓯᒪᕗᖓ. ᐃᓚᐅᓯᒋᐊᖕᖓᓯᒪᔪᖓ ᐃᓕᓐᓂᐊᑎᑦᓯᓂᕐᒧᑦ ᓇᓗᓀᕐᑕᐅᒍᑎᑖᕈᒪᑦᓱᖓ ᑯᐯᒻᒥ ᐃᓕᓐᓂᐊᓂᕐᒧᑦ ᑐᕐᖃᑕᕐᕕᖓᓂᑦ. ᑕᒪᓐᓇ ᑐᕌᒐᕆᓯᒪᔭᕋ. ᐱᑖᕆᑐᐊᕋᒃᑯ, ᐃᓕᓐᓂᐊᖃᑦᑕᕇᕐᓯᒪᔪᖓ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ. ᐊᓕᐊᒋᓯᒪᔭᒃᑲ. ᐃᓕᓐᓂᐊᑎᑦᓯᔨᐅᖃᑎᒃᑲᓃᒋᐊᒥᒃ ᓄᓇᕕᒻᒥᐅᓂ ᐱᑕᖃᕐᑎᓯᓲᖅ ᐃᓕᑦᓯᓂᕐᒥᒃ. ᑌᒣᒻᒪᑦ ᑲᔪᓯᓯᒪᔭᕋ! ᐱᔭᕇᕐᓯᒪᔭᒃᑲ ᖁᕝᕙᕆᐊᕈᑎᑖᕆᒋᐊᓕᓕᒫᒃᑲ ᑕᐃᒪ ᐁᑦᑐᑕᐅᓚᐅᕐᓯᒪᔪᖓ ᒪᑭᐅᓪᒥ ᐃᓕᓐᓂᐊᕕᕐᔪᐊᖓᓂ ᐳᕐᑐᓂᕐᓴᐅᑉ ᐊᓪᓕᖓᓂ ᐃᓕᓐᓂᐊᓂᕐᒨᓕᖓᔪᒧᑦ ᓇᓗᓀᕐᑕᐅᒍᑎᒥᒃ 1998-ᖑᑎᓪᓗᒍ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐃᓚᐅᖃᑦᑕᓯᒪᓕᕐᑐᑎᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐊᒥᓱᓂ ᐊᕐᕌᒍᕐᓂ ᒫᓐᓇᐅᔪᖅ, ᐊᒻᒪᓗ ᐊᒥᓱᓂᒃ ᐱᓇᓱᐊᕐᓯᒪᑦᓱᑎᑦ….
ᕉᑕ ᐃᔨᑭᐅᓪ: ᐊᐊ, ᐊᐅᓚᔨᖕᖏᑐᖓᓘᓐᓃᑦ ᖃᖓ ᐱᒋᐊᕐᓂᕕᓂᕋᓂᒃ ᐃᓕᓐᓂᐊᑐᓄᑦ! ᓯᕗᓪᓕᐹᒥ ᐃᓕᓐᓂᐊᑎᐅᓯᒪᔪᖓ, ᑌᒪ ᐃᓕᓐᓂᐊᑎᑦᓯᒍᑎᖏᓐᓂ ᐃᓕᓐᓂᐊᑎᐅᖃᑦᑕᓯᒪᔪᖕᖑᓱᖓ ᐊᒻᒪᓗ ᐃᓕᓐᓂᐊᑎᑦᓯᔨᐅᖃᑦᑕᓯᒪᒻᒥᔪᖓ ᐃᓕᓐᓂᐊᑕᐅᔪᓄᑦ. ᐊᐅᓚᔨᔪᖓ ᐊᐱᕆᔭᐅᑦᓱᖓ ᑐᑭᒧᐊᑦᑎᓯᔨᐅᖃᑦᑕᓯᒪᔪᒧᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐊᐱᕐᓱᓱᓂ ᐃᓕᓐᓂᐊᑎᑦᓯᒍᓐᓇᒪᖔᕐᒪ ᐃᓄᑦᑎᑐᑦ ᐊᓪᓚᒍᓯᕐᒥᒃ. ᐊᐅᓚᔨᔪᖓ ᐃᓱᒪᑦᓱᖓ ᐃᒻᒥᓄᑦ “ᐊᐊ ᑕᒪᓐᓇ ᐱᒍᓐᓇᑕᕋ” ᑌᒫᑕᒐ ᐱᒋᐊᓚᐅᕐᓯᒪᕗᖓ ᐃᓕᓐᓂᐊᑎᑦᓯᔨᐅᓂᕐᒥᒃ. ᑭᖑᓂᐊᓂ, ᐃᓕᓐᓂᐊᑎᑦᓯᖃᑦᑕᓯᒪᔪᖓ ᐃᓅᑦᔪᓯᖏᑦᑕ ᐊᒻᒪᓗ ᐃᑉᐱᓂᐊᕐᓂᖏᑦᑕ ᐱᕈᕐᐸᓕᐊᓂᖏᓐᓄᑦ ᐱᐊᕋᐅᑉ. ᐊᓕᐊᒋᔭᕋ ᑕᒪᓐᓇ ᐃᓕᓐᓂᐊᑎᑦᓯᒍᑎᒋᑦᓱᒍ ᐊᒻᒪᓗ ᐊᓕᐊᒋᑦᓱᒋᑦ ᐃᓗᓕᖏᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᖃᓄᐃᓕᕋᔭᕐᖃᑏᑦ ᐅᕕᒐᕐᑐᐃᑦ ᐃᓕᓐᓂᐊᑎᑦᓯᔨᖕᖑᕈᒪᔪᑦ ᓄᓇᕕᒻᒥᐅᑦ ᐃᓕᓐᓂᐊᑎᑦᓯᔨᐅᓂᕐᒥᒃ ᐱᓇᓱᒐᕐᑖᕈᒪᑦᒪᐸᑕ?
ᕉᑕ ᐃᔨᑭᐅᓪ: ᐅᕕᒐᕐᓂᓴᓄᑦ ᐃᓕᓐᓂᐊᑎᑦᓯᔨᓄᑦ ᐅᕝᕙᓘᓐᓃᑦ ᐃᓕᓐᓂᐊᑎᑦᓯᔨᖕᖑᕋᑖᕐᑐᓄᑦ, ᐅᖃᐅᑎᒍᒪᔭᒃᑲ: ᐃᓇᖐᕙᓪᓕᐊᖁᓗᒋᑦ ᐅᕙᑦᑎᓂᒃ. ᓇᓗᓀᕐᑕᐅᒍᑎᑖᕐᓯᒪᔪᑦ ᐊᒻᒪᓗ ᐃᓕᓐᓂᐊᑎᑦᓯᔨᐅᓕᓃᑦ ᐅᑭᐅᖏᑦ ᓈᒻᒪᓯᕙᓪᓕᐊᒪᑕ ᓄᕐᖃᓂᑦᓴᖏᓐᓄᑦ. ᑌᒣᒻᒪᑦ ᐅᕕᒐᕐᓂᓭᑦ ᒪᓕᒐᓱᐊᕆᐊᓖᑦ ᐅᕙᑦᑎᓂᒃ. ᑌᒃᑯᐊᓗ ᓄᑖᖑᖏᓐᓇᑐᑦ ᐱᓇᓱᒐᕐᒥᓄᑦ ᐱᓇᓱᒐᕐᒥᓂᒃ ᐱᒻᒪᕆᐅᓂᖓᓂᒃ ᖃᐅᔨᒪᒋᐊᓖᑦ, ᐱᒐᓱᐊᓪᓚᕆᓐᓂᓴᐅᒋᐊᓖᑦ ᐱᒻᒪᕆᐅᒻᒪᑦ ᑕᓐᓇ ᐱᓇᓱᒐᖅ. ᐆᑦᑐᑎᒋᓗᒍ, ᐱᒍᒪᓂᖃᕐᑐᖓ ᐱᐅᓯᕐᓲᑎᓄᑦ ᐱᕈᕐᐸᓕᐊᓂᖓ ᐊᒻᒪ ᐅᖃᐅᓯᕐᒧᑦ. ᑖᒃᑯᓄᖓ ᐃᓕᓐᓂᐊᒐᕐᓄᑦ ᖃᐅᔨᒪᓂᖃᕐᑐᖓ ᐃᓅᓯᕋᓂ ᐊᒻᒪᓗ ᑕᒪᓐᓇ ᐱᒍᒪᓂᕋ ᐊᑐᓲᕋ ᑐᖕᖓᕕᒋᑦᓱᒍ ᐱᕈᕐᐸᓕᐊᒍᑎᒋᑦᓱᒍ ᖃᐅᔨᒪᓂᕋ ᐊᒻᒪᓗ ᖃᐅᔨᒪᔭᕆᑦᓱᒍ ᐃᓕᓐᓂᐊᑎᑦᓯᔨᐅᑦᓱᖓ. ᑕᒪᓐᓇᑕᒐ ᐅᖃᐅᓯᑦᓴᕆᒐᔭᕐᑕᕋ ᐃᓕᓐᓂᐊᑎᑦᓯᔨᓄᑦ.