ᐱᒋᐊᕐᓱᒍ 2017-ᒥ, ᓄᓇᕕᒻᒥᐅᑦ ᐊᑦᔨᐅᖏᑦᑐᒥᒃ ᐱᔪᓐᓇᖃᑦᑕᓯᒪᔪᑦ ᐱᒍᓐᓇᓱᑎᑦ ᐊᕐᕌᒍᒥ ᐊᑕᐅᓯᕐᒥ ᐳᕐᑐᓂᕐᓭᑦ-ᑐᖔᓂ ᐃᓕᓐᓂᐊᕈᑎᒥᒃ ᐃᓕᖓᑐᐃᓐᓇᑐᒥᒃ ᐃᓕᓐᓂᐊᓂᕐᒧᑦ ᐃᓄᐃᑦ ᐊᒻᒪᓗ ᓯᓚᕐᔪᐊᑉ ᐅᑭᐅᕐᑕᑐᖓᓂᒥᐅᑦ ᓯᕗᓪᓕᖃᕐᓯᒪᓂᖏᓐᓂᒃ, ᐱᓂᐊᕐᓂᓕᕆᐅᑎᖏᓐᓂᒃ, ᐊᐅᓚᑕᐅᓂᖏᓐᓂᒃ, ᐃᓗᕐᖁᓯᖏᓐᓂᒃ ᐊᒻᒪᓗ ᐅᖃᐅᓯᖏᓐᓂᒃ.

ᓄᓇᕕᒃ ᓯᕗᓂᑦᓴᕗᑦ, ᐃᓄᒃᑎᑐᑦ ᑐᑭᓕᒃ “ᓄᓇᕕᒻᒥ ᓯᕗᓂᑦᓴᕗᓐᓂᒃ”, ᐃᑲᔪᓲᖑᕗᖅ ᐃᓕᓐᓂᐊᑐᓂᒃ ᐱᕙᓪᓕᐊᒍᑕᐅᑦᓱᓂ ᐱᓇᓱᕝᕕᒥ ᐱᔪᓐᓇᕈᑎᓂᒃ ᒥᑦᓯᖃᓛᕐᑐᓂᒃ ᐱᓇᓱᒐᕐᓄᑦ ᓄᓇᕕᒻᒥ ᑎᒥᐅᔪᓂ, ᐊᒻᒪᓗ ᐱᖕᖑᐃᒍᑕᐅᒻᒥᓱᓂ ᐊᑕᖏᕐᑐᓂᒃ ᐃᓗᕐᖁᓯᕐᒥᓂᒃ-ᐃᑉᐱᒋᔭᓕᓐᓂᒃ ᓄᓇᕕᒻᒥᐅᓂᒃ ᖃᐅᔨᒪᓂᓕᓐᓂᒃ ᓯᕗᓕᕈᓐᓇᓛᕐᓱᑎᒃ ᐱᓂᐊᕐᓂᓕᕆᐅᑎᑎᒍᑦ ᐃᓄᑦᑎᒍᓪᓗ ᓄᓇᖓᑕ ᓯᕗᓂᑦᓴᖓᓂ. ᑖᓐᓇ ᐃᓕᓐᓂᐊᕈᑎ ᑲᒪᒍᑕᐅᒻᒥᔪᖅ ᐅᓪᓗᒥᓂᑕᕐᓂᒃ ᐃᓱᒪᒋᒋᐊᓕᓐᓂᒃ ᐃᓄᐃᑦ ᑕᐅᑐᒍᓯᖓᓂᒃ ᑕᑯᓐᓇᓱᒋᑦ, ᓄᐃᑦᓯᓱᑎᒃ ᐊᑐᕐᑐᒪᕆᐊᓗᒻᒥᒃ ᖃᐅᔨᒪᐅᑎᒥᒃ ᓄᓇᕕᒻᒥᒃ, ᐃᓄᖏᓐᓂᒃ ᐊᒻᒪᓗ ᐃᓗᕐᖁᓯᖓᓐᓂᒃ.

ᑖᓐᓇ ᐃᓕᓐᓂᐊᕈᑎ ᐊᑦᑐᑐᐃᓐᓇᔭᖏᑦᑐᖅ ᐃᓕᓐᓂᐊᑏᑦ ᑲᔪᓯᑦᓯᐊᓂᖓᓄᑦ ᐳᕐᑐᓂᕐᓭᑦ-ᑐᖔᓂ ᐃᓕᓐᓂᐊᕈᑎᓂ, ᐃᓕᓐᓂᐊᕈᑎᖓ ᐃᓕᑕᕐᓯᒍᑕᐅᓚᖓᔪᓂᒃ ᐱᑕᖃᕐᒪᑦ, ᑕᒪᓐᓇ ᑐᑭᖃᕐᑎᓗᒍ ᐃᓕᓐᓂᐊᕈᑎᓕᒫᑦ ᐱᔭᕇᕐᑕᐅᓯᐊᕐᑐᑦ ᑭᓯᖃᑕᐅᓛᕐᓂᖓᓂᒃ ᑐᕌᕈᑕᐅᓗᑎᒃ ᓇᐅᑐᐃᓐᓇᒧᑦ CEGEP-ᒥ ᐃᓕᑦᓯᒍᑎᒧᑦ ᐃᓕᓐᓂᐊᑎᐅᑉ ᐱᒍᒪᑐᐃᓐᓇᕆᐊᓕᖓᓄᑦ ᓯᕗᓂᕐᒥ. ᐃᓕᓐᓂᐊᕈᑎᖏᑦ ᐃᓗᓕᓖᑦ ᐃᓄᐃᑦ ᐊᓪᓚᓕᓂᖏᓐᓂᒃ, ᐃᓄᒃᑎᑐᑦ, ᐃᓄᐃᑦ ᐱᖕᖑᐊᕈᓯᖏᓐᓂᒃ, ᐃᓗᕐᖁᓯᕐᓯᐅᑎᓂᒃ ᑕᑯᓐᓇᑎᑦᓯᓂᕐᒥᒃ ᐊᒻᒪᓗ ᐊᒥᓱᒋᐊᓪᓛᓗᓐᓂᒃ ᐊᓯᖏᓐᓂᒃ.

ᑕᒡᒐᓂ ᐊᐅᒡᒍᔅᑎᒥ, ᐊᓯᒋᓕᕇᕐᒥᔭᖏᑦ ᐊᔪᐃᓐᓇᑐᑦ ᐃᓕᓐᓂᐊᑏᑦ ᓄᓂᑐᐃᓐᓇᒥᐅᑦ ᓄᓇᕕᒻᒥ ᓅᓚᐅᓕᓚᐅᔪᒻᒥᔪᑦ ᒪᓐᑐᔨᐊᒧᑦ ᐱᒋᐊᕆᐊᕐᑐᓱᑎᒃ ᐊᕐᕌᒍᓕᒫᖅ ᐃᓕᓐᓂᐊᕈᑎᓂᒃ ᓄᓇᕕᒃ ᓯᕗᓂᑦᓴᕗᓐᓂ. ᑐᖕᖓᓱᑦᑎᑕᐅᓚᐅᔪᔪᑦ ᓱᖏᐅᓴᐅᑎᓂᒃ ᐊᑐᕐᑎᑕᐅᖃᑦᑕᓱᑎᒃ ᐃᓚᖃᕐᑎᓗᒋᑦ ᐳᓛᕐᑕᐅᒍᑎᓂᒃ ᖃᐅᔨᒪᔭᐅᑦᓯᐊᑑᓐᓄᑦ ᐃᓄᒻᒪᕇᓐᓄᑦ ᐃᔪᒃᑲ ᐱᖕᖑᐊᑐᖅ ᑲᖏᕐᓱᔪᐊᕐᒥᐅᖅ ᐊᒻᒪᓗ ᑭᐊᓂᐊᑦ ᑎᐊ ᖃᐅᑐᓄᓴᐅᓃ ᒨᖃᒃ ᓄᓇᕐᔪᐊᖓᓂᒥᐅᖅ.

ᑖᓐᓈ ᐃᓕᓐᓂᐊᕈᑎ ᐃᓕᓐᓄᑦ ᐊᓕᐊᓇᕈᓇᐅᕙ? ᖃᑦᓯᓂᒃ ᐅᑭᐅᖃᕐᓂᑎᒍᑦ ᐃᓱᖃᑦᔭᖏᑦᑐᖅ ᐃᓚᐅᒍᒪᒍᕕᑦ! ᐃᓚᐅᒍᒪᒍᕕᑦ ᖃᐅᔨᒪᒍᕕᓪᓘᓃᑦ ᐃᓚᐅᒍᒪᔪᒥᒃ ᑖᑦᓱᒧᖓ ᐊᕐᕌᒍᒥ ᐊᑕᐅᓯᕐᒥ ᐊᔪᐃᓐᓇᕈᑎᑦᓴᒧᑦ, ᐳᓛᕐᓗᒍ ᓄᓇᕕᒃ ᓯᕗᓂᑦᓴᕗᑦ.

ᐱᑐᕝᕕᖓ https://sivunitsavut.ca/