ᒪᓐᑐᔨᐊᓪ, ᑯᐯᒃ (ᑏᓯᒻᐱᕆ 7, 2020) – ᑲᑎᖕᖓᔩᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑎᓂ ᓅᕕᒻᐱᕆ 18-ᖑᑎᓪᓗᒍ ᓂᕈᐊᕐᑕᕕᓃᑦ ᓯᕗᓪᓕᐹᒥᒃ ᑲᑎᒪᓂᖃᓛᓯᔪᑦ ᑰᒃᔪᐊᒥ ᑕᒡᒐᓂ ᐱᓇᓱᐊᕈᓯᕐᒥ, ᑲᑎᒪᓗᑎᒃ ᑏᓯᒻᐱᕆ 7-ᒥᑦ 10-ᒧᑦ.

ᑌᑲᓂ ᓯᕗᓪᓕᐹᒥ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᑲᑎᖕᖓᒋᐊᖕᖓᑎᓪᓗᒋᑦ, ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᓂᕈᐊᕐᑐᕕᓃᑦ ᐊᖓᔪᕐᖄᒥᒃ, ᐊᖓᔪᕐᖄᑉ-ᑐᖓᓕᖓᓂᒃ ᐊᒻᒪᓗ ᒪᕐᕈᒋᐊᓪᓛᓂᒃ ᑲᑎᖕᖓᔩᓐᓂᒃ ᐳᕐᑐᓂᕐᓴᓂ ᑲᑎᖕᖓᔨᐅᓚᖓᑎᓪᓗᒋᒃ. ᐊᒻᒪᓗ ᖃᐅᔨᒪᔭᐅᖁᒻᒥᔭᕗᑦ ᓅᕕᒻᐱᕆ 24-ᒥ, ᐃᓕᓴᐱ ᐊᓕᖁ ᕿᐅᐳᑦ ᓂᕈᐊᕐᑕᐅᓚᐅᔪᒻᒪᑦ ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑎᐅᓂᕐᒧᑦ ᐊᑯᓕᕕᒻᒥ.

ᖁᕕᐊᕙᕗᑦ ᑐᓴᕐᑕᐅᑎᒋᐊᖏᑦ ᓂᕈᐊᕐᑕᐅᒪᓚᖓᓯᔪᑦ ᐊᑎᖏᑦ:

• ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᖓᔪᕐᖄᖅ ᐊᒻᒪᓗ ᐳᕐᑐᓂᕐᓴᓂ ᑲᑎᖕᖓᔨ: ᓯᐊᔭ ᐋᓗᐸ (ᖁᐊᕐᑕᖅ)
• ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᖓᔪᕐᖄᑉ ᑐᖓᓕᖓ ᐊᒻᒪᓗ ᐳᕐᑐᓂᕐᓴᓂ ᑲᑎᖕᖓᔨ: ᐋᑕᒥ ᐹᓪᓚᔮᑦ (ᐃᓄᑦᔪᐊᖅ)
• ᐳᕐᑐᓂᕐᓴᓂ ᑲᑎᖕᖓᔨ: ᓯᐊᔭ ᐴᓐ (ᐳᕕᕐᓂᑐᖅ)
• ᐳᕐᑐᓂᕐᓴᓂ ᑲᑎᖕᖓᔨ: ᒫᑎᓐ ᓯᑳᑦ (ᐊᐅᐸᓗᒃ)
• ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑭᒡᒐᑐᕐᑐᖓ ᐊᒻᒪᓗ ᐳᕐᑐᓂᕐᓴᓂ ᑲᑎᖕᖓᔨ: ᔨᐊᓂᕗ ᖃᓐᑐ (ᑰᒃᔪᐊᕌᐱᒃ)

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:
ᔮᑦ ᑐᓯᓅ-ᐱᐊᕐᓃ
ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ
publicrelations@kativik.qc.ca