ᑌᒪᖕᖓᓂᐊᓗᒃ, ᐃᓚᖏᓪᓗ ᐅᖃᐅᓯᖃᕐᒥᒃ ᐱᑕᖃᓚᐅᕐᑎᓇᒍᓪᓘᓃᖑᓂᕃᒐᔭᕐᑐᑦ, ᐃᓄᐃᑦ ᓴᓇᖕᖑᐊᓂᒃᑯᑦ ᑐᑭᓯᒪᐅᑎᒍᑎᖃᓲᖑᕗᑦ.  ᑌᑦᓱᒪᓂᑕᕐᔪᐊᑦ ᐊᓪᓚᖑᐊᕐᓯᒪᔪᑦ ᓴᓇᖕᖑᐊᓯᒪᔪᓪᓗ ᓇᓂᑐᐃᓐᓇᓕᒫᖅ ᓄᓇᕐᔪᐊᒥ ᑕᑯᔭᐅᒍᓐᓇᑐᑦ, ᐃᓚᖏᓪᓗ ᑕᒪᒃᑯᐊ ᖃᖓᓂᕐᔪᐊᓂᑕᐅᓂᖏᑦ ᓱᕐᖁᐃᑕᐅᓯᒪᔪᑦ 500,000 ᐊᕐᕌᒍᓄᑦ ᑌᑦᓱᒪᓂᑕᐅᒋᐊᖏᑦ.  ᑌᒫᑦᓭᓇᕐᓗ ᓱᓀᑦ ᓴᓇᖕᖑᐊᒐᐅᓂᕋᕐᑕᐅᒍᓐᓇᒪᖔᑕ ᐁᕙᒍᑕᐅᓲᖑᓂᖓ ᐊᑯᓂᓂᑕᐅᖃᑎᐅᒐᓗᐊᕐᒥᑎᓪᓗᒍ, ᖁᓚᕐᓇᖏᑦᑐᖅ ᓄᐃᑦᓯᖃᑦᑕᓂᖅ ᑕᒪᓐᓇ ᓴᓇᖕᖑᐊᓯᒪᔪᓕᐅᕈᓐᓇᓂᐅᑉ ᐃᓚᓪᓚᕆᐊᓗᒋᒻᒪᐅᒃ, ᑕᒐ ᑕᑯᑦᓴᐅᒍᓐᓇᒪᑕ ᐆᒃᑐᕋᐅᑎᒋᓗᒍ ᐊᑭᓐᓇᒥ ᒥᖑᐊᕐᓯᒪᔪᓂ, ᒪᕐᕋᓕᐊᖑᓯᒪᔪᓂ, ᓴᓇᐅᒐᓕᐊᖑᓯᒪᔪᓂ, ᓴᐸᖓᓂ/ᐱᖁᑎᐊᐱᓐᓂᑦ, ᐊᓯᖏᓐᓂᓗ.

ᐃᓄᐃᑦ ᓴᓇᖕᖑᐊᓂᕐᒥ ᖃᓄᓪᓗᐊᑎᒋ ᐃᓅᓯᕐᒥᓂ ᐃᓚᐅᑎᑦᓯᖃᑦᑕᓯᒪᓂᖏᑦ ᑌᒫᓪᓗᐊᓭᓐᓇᖅ ᑌᑦᓱᒪᓂᑕᐅᒋᕗᖅ ᑌᒫᑲᓪᓚᑐᐃᓐᓇᐅᒐᓂᓗ. ᖃᔭᕐᑕᓕᒃ, ᐅᖓᓯᓐᓂᓕᒃ 40 km-ᒐᓚᓐᓂᒃ ᑲᖏᕐᓱᔪᐊᑉ ᓯᕿᓂᖓᓃᑦᑐᖅ, ᖃᐅᔨᒪᔭᐅᒍᑎᓕᒃ 180+ ᐅᖓᑖᓃᑦᑐᓂᒃ ᑮᓇᖕᖑᐊᑕᖃᕐᒪᑦ ᐅᔭᕋᕐᒥ ᓴᓇᔭᐅᓂᑯᓂᒃ ᑐᓂᕕᓂᕐᓄᑦ ᓄᓇᕕᐅᑉ ᓯᑦᔭᖓᓂᒥᐅᕕᓂᕐᓄᑦ 2200ᓂᑦ 1000ᓄᑦ ᐊᕐᕌᒍᓂᑦ ᑭᖑᓂᕐᒥ. ᖃᐅᔨᒪᔨᒻᒪᕇᑦ ᐃᓱᒪᔪᑦ ᑖᒃᑯᐊ ᓴᓇᖕᖑᐊᓯᒪᔪᑦ, ᑮᓇᖕᖑᐊᓂᒃ ᐆᒪᔪᐃᓪᓗ ᑮᓇᖕᖑᐊᖏᓐᓂᒃ, ᐊᖓᒃᑯᓄᐊᖓᔪᓂᒃ-ᐅᑉᐱᓂᕐᒧᐊᖓᔪᓂᒃ ᐅᑉᐱᕆᓯᒪᔭᖏᓐᓂᒃ ᓄᐃᑕᑎᑦᓯᒍᑎᐅᒋᐊᖏᑦ. ᒪᓐᓇᓕ ᓱᕐᖁᐃᑑᒐᓗᐊᖅ:  ᑖᒃᑯᐊ ᑮᓇᖕᖑᐊᑦ ᐱᑕᖃᕐᓯᒪᓕᕐᑐᑦ ᐊᕐᕌᒍᐃᑦ ᐊᕙᑎᑦ ᑕᓪᓕᒪᖏᓐᓃᑐᓂᒃ ᐊᒥᓱᓂᒃ ᐅᓂᒃᑳᕈᑎᐅᒍᓐᓇᓱᑎᒃ ᓯᕗᓪᓕᕕᓂᑦᑕ ᓴᓇᖕᖑᐊᕈᓐᓇᓂᕕᓂᖏᓐᓂᒃ ᐊᒻᒪᓗ ᐅᑉᐱᓂᒃᑯᑦ ᓯᓚᕐᔪᐊᕆᓯᒪᔭᖏᓐᓂᒃ.

ᐅᓪᓗᒥᐅᓕᕐᑐᖅ, ᐃᓄᐃᑦ ᓴᓇᖕᖑᐊᓯᒪᔭᖏᑦ ᓄᓇᕐᔪᐊᓕᒫᒥ ᐃᓕᑕᕆᔭᐅᓯᒪᕗᑦ ᐊᒻᒪᓗ ᓴᓇᖕᖑᐊᒐᓕᕆᔨᒻᒪᕆᓄᑦ ᓄᓇᓕᕐᔪᐊᓂᓗ ᖃᐅᔨᒪᔭᐅᓕᕐᓯᒪᔪᒻᒪᕆᐅᑦᓱᑎᒃ.  ᖃᓄᐃᑦᑐᑐᐃᓐᓀᑦ ᓴᓇᖕᖑᐊᒉᑦ – ᐊᓪᓚᖑᐊᕐᓯᒪᔪᑦ ᐊᒥᓲᓕᕐᑎᓯᒪᔪᓂᑦ, ᓴᓇᐅᒐᕐᓂᑦ, ᖃᓪᓗᓈᕐᑕᔭᓂᑦ, ᖃᕆᑕᐅᔭᒃᑯᑦ ᓴᓇᖕᖑᐊᓯᒪᔪᓂᑦ, ᐊᐅᓚᔫᓂᒃ ᑕᕐᕋᓕᔮᓂᑦ, ᐊᑦᔨᖑᐊᓂᑦ, ᓂᑦᔭᓗᑦᑖᕈᑎᓂᑦ, ᐊᒻᒪᓗ ᑕᑯᓐᓇᐅᔮᕐᑎᓯᓂᕐᓂᑦ – ᑕᑯᑦᓴᐅᑎᑦᓯᕗᑦ ᐊᒥᓱᐊᓘᒋᐊᖏᑦ ᓴᓇᖕᖑᐊᑏᑦ ᐱᓇᓱᐊᕐᑐᑦ ᖁᕕᐊᒋᓪᓚᕆᑦᑕᒥᒍᑦ, ᓴᓇᖕᖑᐊᕈᓐᓇᓂᕐᒥᒍᑦ, ᐃᓗᕐᕈᓯᕐᒥᑎᒍᓪᓗ ᐱᓇᐊᖃᑎᖃᕐᓱᑎᒃ ᖃᐅᔨᒪᔭᐅᒍᑎᑦᓴᕆᓂᐊᕐᑕᒥᓂᒃ.  ᖃᓄᐃᑦᑐᑐᐃᓐᓇᒥᒃ ᐊᑐᕐᓂᐊᕋᓗᐊᕈᓂ ᓴᓇᖕᖑᐊᑎ, ᑐᕌᒐᓪᓚᕆᖃᓲᖑᒻᒪᑦ ᐃᑉᐱᓂᐊᕐᓂᒥᒃ ᐊᒻᒪᓗ ᐅᖃᐅᓯᑦᓴᒥᒃ ᑐᑭᓯᔭᐅᑎᑦᓯᓂᕐᒥᒃ.

ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐃᓕᑕᕐᓯᒐᑦᑕ ᓴᓇᖕᖑᐊᓂᒃᑯᑦ ᓄᐃᑦᓯᒍᓐᓇᓂᐅᑉ ᐱᒻᒪᕆᐅᓂᖓᓂᒃ.  ᐃᓕᓐᓂᐊᑎᕗᓐᓂᒃ ᐱᒍᓐᓇᕕᖃᕐᑎᓯᓲᖑᕗᒍᑦ ᐊᑦᔨᒌᖕᖏᑐᓄᑦ ᐱᓇᓲᑎᑦᓴᓄᑦ ᓴᐳᑦᔭᐅᒍᑎᓄᓪᓗ ᖃᐅᔨᓴᕈᑎᐅᒍᓐᓇᑐᓂᒃ ᓴᓇᖕᖑᐊᕈᓐᓇᓂᕐᒥᒃ, ᐊᒻᒪᓗ ᓴᓇᖕᖑᐊᓂᕐᒥᒃ ᐃᓕᓐᓂᐊᑎᑦᓯᔩᑦ ᑕᒪᑦᓱᒥᖓ ᐱᓇᓱᐊᖃᑎᐅᓪᓚᕆᓲᖑᑦᓱᑎᒃ.

ᓇᑕᓖ ᑯᓘᑦ ᐱᓇᓱᐊᓕᓂᖅ ᓴᓇᖕᖑᐊᓂᕐᒥ ᐃᓕᓐᓂᐊᑎᑦᓯᔨᐅᓂᕐᒥᒃ.  ᑲᑎᕕᒃ ᐃᓕᓴᕐᓂᓕᕆᓂᕐᒥ ᐱᓇᓱᐊᓯᓚᐅᔪᖅ ᓴᓇᖕᖑᐊᓂᕐᒥ ᐃᓕᓐᓂᐊᑎᑦᓯᔨᐅᓯᑦᓱᓂ ᐃᒍᐊᕐᓯᕕᒃ ᐃᓕᓐᓂᐊᕕᒻᒥ ᑕᒡᒐᓂ ᐊᕐᕌᒍᒥ.  ᐱᓇᓱᐊᕐᓯᒪᓕᕐᑕᒥᓂᒃ ᐃᓕᓐᓂᐊᑎᒥᓂᒃ ᐱᓇᓱᐊᖃᑎᖃᕐᓯᒪᓕᕐᓱᓂ ᐳᕕᕐᓂᑐᒥ, ᐃᒫᒃ ᐅᖃᕐᑐᖅ:

“ᓱᓇᓕᒫᑦ ᐱᒍᓐᓇᖁᑦ ᓴᓇᖕᖑᐊᓂᖅ ᐊᑐᕐᓱᒍ.  ᐊᒥᓱᐊᓘᕗᑦ ᐱᓇᓱᐊᕈᓐᓇᑕᑎᑦ.  ᓱᓇᑐᐃᓐᓇᐅᒍᓐᓇᑐᖅ ᐊᓐᓄᕌᓕᐅᕐᓂᒥᑦ ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐱᖕᖑᐊᕈᑎᓕᐅᕐᓂᒥᑦ ᓂᑦᔭᓗᑦᑖᕈᑎᒥᓪᓘᓃᑦ ᐱᖕᖑᐊᓂᕐᒧᑦ ᐅᕝᕙᓘᓐᓃᑦ ᐃᖕᖏᕈᓯᓕᐅᕐᓂᒥᑦ ᑕᕐᕋᓕᔮᓕᐊᒧᑦ ᐱᖕᖑᐊᑎᓄᑦ ᐃᖕᖏᑕᐅᔪᑦᓴᒥᓪᓘᓃᑦ.  ᓴᓇᖕᖑᐊᕈᓐᓇᓂᖅ ᐊᕐᖁᑎᐅᕗᖅ ᐃᒻᒥᓂᒃ ᐱᕙᓪᓕᐊᓂᕐᒧᑦ.  ᐃᒻᒥᓂ ᐊᑏ ᐆᒃᑐᓚᐅᕆᑦ. ᐊᑲᕐᕆᔮᕐᕕᒋᓕᓂᕐᓂ ᕿᒣᒋᐊᒥᒃ ᑲᑉᐱᐊᓱᒍᓐᓀᓗᑎᑦ.”

ᐃᓕᓴᐱ ᕈᓘ, ᓴᓇᖕᖑᐊᓂᕐᒥ ᐃᓕᓐᓂᐊᑎᑦᓯᔨ ᔮᓂᒻᒪᕆᒃ ᐃᓕᓐᓂᐊᕕᒻᒥ, ᐊᖏᖃᓕᒃ ᓇᑕᓖᒥᒃ.  ᐊᑦᔨᒐᓚᖏᓐᓂᒃ ᐅᖃᐅᓯᓕᒃ:

“ᓴᓇᖕᖑᐊᓂᒃᑯᑦ, ᐱᓇᓱᐊᕐᑕᐅᓂᖓ ᑕᒐ ᐱᒻᒪᕆᐅᓂᖓ.  ᑌᒪᖕᖓᓭᓐᓇᖅ ᑕᑯᒥᓇᕐᑐᐊᐱᑐᐃᓐᓇᐅᓲᖑᖕᖏᒥᔪᑦ ᐅᕝᕙᓘᓐᓃᑦ ᐃᓂᖁᓇᕐᑐᐊᐱᑐᐃᓐᓇᐅᓲᖑᒐᑎᒃ.  ᐅᓪᓗᐃᑦ ᐃᓚᖏᓐᓂ ᑕᖃᒪᓲᖑᔪᒍᑦ ᐊᕐᓱᕈᓪᓗᐊᕈᒪᖕᖏᑑᑦᓱᑕ.  ᑭᓯᐊᓂ ᐱᒻᒪᕆᐅᕗᖅ ᐃᓕᓐᓂᐊᕕᒻᒧᑦ ᐁᓗᑎᑦ ᖃᐅᔨᒋᐊᕐᑐᓗᓂ ᓱᓇᓱᐊᕈᓐᓇᒪᖔᕐᐱᑦ.  ᐃᓕᓐᓂᐊᕕᒃ ᐅᐸᒐᑦᓴᐅᕗᖅ ᐊᑦᑕᓇᕐᑐᑕᖃᖕᖏᑐᒥᒃ ᐃᑉᐱᓂᐊᕕᒋᒍᓐᓇᓱᒍ, ᐃᒻᒥᓂᒃ ᖃᐅᔨᒋᐊᓪᓚᕕᑦᓴᐅᓱᓂ ᐱᓇᓱᐊᓚᖓᔭᕐᓂᓗ ᐊᑐᐃᓐᓇᐅᓕᕈᕕᑦ ᐱᒋᐊᕐᑎᓯᕕᒋᒍᓐᓇᓱᒍ.  ᐆᒃᑐᕋᑐᐃᓐᓇᓗᑎᑦ.  ᐃᒻᒥᓂᒃ ᐊᔪᒉᓪᓕᐅᑐᐃᓐᓇᕆᐊᖃᕐᑐᑎᑦ ᖃᓄᐃᓕᖓᔪᒥᒃ ᓄᐃᑦᓯᒍᓐᓇᓂᕆᒐᔭᕐᑕᓄᑦ.”

ᐊᑐᓂ ᐃᓕᓐᓂᐊᕖᑦ ᐃᒻᒥᒍᑦ ᐱᓇᓱᐊᕐᑕᐅᔪᓂᒃ ᐊᒻᒪᓗ ᖃᐅᔨᒪᒍᑎᑦᓴᓂᒃ ᐱᑕᖃᕋᓗᐊᕐᑎᓗᒋᑦ, ᓄᓇᓕᓕᒫᓄᐊᖓᔪᓂᒃ ᐱᓇᓱᐊᕐᑕᐅᔪᖃᕆᕗᖅ ᐃᓘᓐᓀᑕ ᐃᓕᓐᓂᐊᑏᑦ ᐃᓚᐅᕕᒋᒐᓱᐊᕈᓐᓇᑕᖏᓐᓂᒃ, ᐆᒃᑐᕋᐅᑎᒋᓗᒍ ᐊᕐᕌᒍᑕᒫᖅ ᓴᓇᖕᖑᐊᓂᕐᒧᐊᖓᔪᓂᒃ ᐊᐅᓪᓚᑫᓐᓇᑎᑕᐅᓂᖅ.  ᑖᓐᓇ ᓂᕈᐊᕐᑕᐅᔪᓂᒃ ᐃᓕᓐᓂᐊᑎᓂᒃ ᐱᕕᑦᓴᖃᕐᑎᓯᓲᖅ ᐊᐅᓪᓚᕈᓐᓇᓯᑎᑦᓱᒋᑦ ᐃᓚᐅᒍᓐᓇᓯᑎᑦᓱᒋᓗ ᓱᓇᓱᐊᕐᑎᓯᒍᑎᐅᔪᓄᑦ ᐱᑦᔪᑎᖃᕐᓱᑎᒃ ᑲᓇᑕᒥ ᓴᓇᖕᖑᐊᓂᕐᒧᑦ ᐃᓕᖓᔪᓂᒃ, ᑕᑯᔭᒐᖃᕐᕕᓄᑦ ᕿᒥᕐᕈᒋᐊᕐᑐᓂᕐᓂ, ᐃᓕᓐᓂᐊᕆᐊᓪᓚᓂᕐᒥᓗ ᐃᓄᐃᑦ ᐃᓗᕐᕈᓯᖓᓄᐊᖓᔪᓂᒃ.

ᓱᓕᒋᐊᓪᓚᒃ, ᓄᓇᕕᒃ-ᓯᑯ (Nunavik-Ice), ᐃᓕᓐᓂᐊᓂᕐᒧᐊᖓᔪᓄᑦ ᐱᓇᓱᒍᑎᑦᓴᓄᑦ ᐊᕐᖁᑎᕗᑦ, ᐱᑕᖃᕐᒥᔪᖅ ᐊᑦᔨᒌᖕᖏᑐᓂᒃ ᖃᕆᑕᐅᔭᓅᕐᑕᐅᒍᓐᓇᑐᓂᒃ ᐱᓇᓱᒍᑎᑦᓴᓂᒃ ᓵᖕᖓᔭᖃᓗᐊᕐᑐᓂᒃ ᐃᓄᑐᐃᓐᓇᓂᒃ ᓴᓇᖕᖑᐊᑎᓂᒃ ᓴᓇᖕᖑᐊᕈᓯᓂᓪᓗ, ᐃᓚᐅᑎᓪᓗᒋᑦ ᒪᓕᑦᑕᐅᓗᑎᒃ ᐊᑐᕐᑕᐅᒍᓐᓇᑐᓂᒃ ᖃᐅᔨᒪᒍᑎᓂᒃ.

ᑐᑭᓯᒋᐊᓪᓚᒍᒪᑐᐊᕈᕕᑦ ᐃᓄᐃᑦ ᓴᓇᖕᖑᐊᒐᖏᓐᓂᒃ, ᐱᕕᑦᓴᖃᓚᑳᑉᐳᑎᑦ.  ᐋᑐᒑᒥ, ᑲᓇᑕᒥ ᓴᓇᔭᐅᓯᒪᖕᖏᑐᓂᒃ ᑕᑯᔭᒐᖃᕐᕕᖓ ᑕᑯᑦᓴᐅᑎᑦᓯᕉᑕᕆᒻᒪᑦ “ᓄᓇᕗᑦ, ᓴᓇᖕᖑᐊᒐᕗᑦ” ᑐᑭᓕᓐᓂᒃ ᑕᑯᑦᓴᐅᔪᓂᒃ.  ᑖᒃᑯᐊ ᑕᑯᑦᓴᐅᑎᑌᑦ, ᐱᓇᓱᐊᖃᑎᒋᑦᓱᒍ ᐊᕙᑕᖅ ᐱᐅᓯᑐᖃᓕᕆᕕᖓ, ᓴᓇᖕᖑᐊᑎᓂᒃ ᓄᓇᕕᓕᒫᒥᑦ ᙯᕐᖁᔨᓚᐅᔪᒻᒪᑦ ᓴᓇᖕᖑᐊᓯᒪᔪᓕᐅᖁᑦᓱᒋᑦ ᐊᕙᑕᒃᑯᑦ ᐱᐅᓕᐊᕐᓯᒪᔭᖏᓐᓂᒃ ᐃᓱᒪᑖᕐᕕᖃᕐᓗᑎᒃ.  ᑕᒪᓐᓇ ᑲᔪᓯᔪᖅ ᐆᒃᑑᐱᕆ 14, 2024-ᒧᑦ.  ᐱᑕᖃᕐᒥᔪᖅ “ᖃᐅᒪᔪᖅ” ᑌᔭᐅᔪᒥᒃ ᒍᐃᓂᐯᒃ ᓴᓇᖕᖑᐊᓯᒪᔪᓂᒃ ᑕᑯᑦᓴᐅᑎᑦᓯᕕᖓᓂ.  ᑖᓐᓇ ᓴᓇᖕᖑᐊᒐᕐᓂᒃ ᐱᓇᓱᐊᕐᕕᒃ ᐃᓂᒋᔭᐅᕗᖅ 14,000-ᓃᒐᓚᑦᑐᓄᑦ ᐃᓄᑐᐃᓐᓀᑦ ᓴᓇᖕᖑᐊᓯᒪᔭᖏᓐᓄᑦ ᐊᑦᔨᒌᖕᖏᑐᑦᑎᒍᑦ ᓴᓇᖕᖑᐊᒍᓯᑦᑎᒍᑦ.  ᐊᓯᐊᒎᒻᒥᔪᖅ, ᐊᒥᓱᓂᒃ ᖃᕆᑕᐅᔭᒃᑰᑐᓂᒃ ᐱᓇᓱᒍᑎᑦᓴᓂᒃ ᐊᑐᐃᓐᓇᖃᕐᒥᔪᖅ ᑐᑭᓯᒍᑎᑦᓴᑕᓕᓐᓂᒃ, ᐆᒃᑐᕋᐅᑎᒋᓗᒋᑦ ᑖᒃᑯᐊ ᐃᓄᐃᑦ ᓴᓇᖕᖑᐊᒐᖏᓐᓄᑦ ᑎᒥᖁᑎᐅᑉ ᓈᓴᕐᓯᒪᔭᖏᑦ 10 ᓄᓇᕕᒻᒥ ᓴᓇᖕᖑᐊᑏᑦ ᖃᐅᔨᒪᒐᓱᐊᕋᑦᓭᑦ ᑕᑯᑦᓴᐅᑎᑕᖏᑦ.

ᐃᓕᓭᔨᐅᓂᕐᒨᑦ ᐱᔪᓐᓇᐅᑎᑖᕈᑎᓂᒃ ᐃᓕᓐᓂᐊᕇᓕᕐᖀᑦ? ᐅᕝᕙᓘᓐᓃᑦ ᐃᓕᓭᔨᐅᒍᓐᓇᐅᑎᖃᕐᖀᑦ ᕿᓂᕐᓱᑎᑦ ᓄᑖᒥᒃ ᐆᒃᑐᕋᑦᓴᓂᒃ ᐱᓇᓱᑦᑕᑎᓐᓂᒃ? ᐱᓇᓱᑦᑐᓴᕐᓯᐅᐳᒍᑦ!

ᖃᐅᔨᒋᐊᓛᕆᕗᓯ ᐊᖑᒻᒪᑎᑎᑦᓯᒋᐊᕈᑎᖏᓐᓂᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᓴᓇᖕᖑᐊᓂᕐᒧᐊᖓᔪᓂᒃ ᓱᓇᓱᐊᕐᑎᓯᓂᕆᓛᕐᑕᖏᓐᓂᒃ!