ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐅᐱᒋᔭᖃᕐᓱᑎᒃ ᑐᓴᕐᑎᓯᒍᒪᔪᑦ ᑦᔫᓕ ᐱᕆᓴᐅᒥᒃ, ᐃᓕᓐᓂᐊᑎᑦᓯᔨᐅᖃᑕᐅᔪᖅ ᔮᓂᒻᒪᕆᒃ ᐃᓕᓐᓂᐊᕕᖓᓂ, ᓂᕈᐊᕐᑕᐅᔪᕕᓂᖅ ᑭᖑᓪᓕᐸᐅᖃᑕᐅᑦᓱᓂ 2023-ᒥ ᐊᑕᓂᐊᓘᑉ ᑭᒡᒐᑐᕐᑎᖓᑕ ᐱᐅᓯᒋᓯᒪᔭᖏᓐᓂᒃ ᐃᓕᑕᕆᔭᐅᒍᑎᑖᕐᓱᓂ ᐱᑦᓯᐊᓂᕐᒧᑦ ᐃᓕᓐᓂᐊᑎᑦᓯᓱᓂ!

ᐊᕐᕌᒍᑕᒫᑦ, 15 ᐃᓕᓐᓂᐊᑎᑦᓯᔩᑦ ᑲᓇᑕᓕᒫᒥ ᐊᓪᓚᑕᐅᒪᓲᑦ ᐊᑕᓂᐊᓘᑉ ᑭᒡᒐᑐᕐᑎᖓᑕ ᐱᐅᓯᒋᓯᒪᔭᖏᓐᓂᒃ ᐃᓕᑕᕆᔭᐅᒍᑎᑖᕐᓂᒧᑦ ᐱᑦᓯᐊᓂᕐᒧᑦ ᐃᓕᓐᓂᐊᑎᑦᓯᓱᓂ. ᑭᖑᓪᓕᐹᖑᔪᕕᓃᑦ ᑕᑯᑦᓴᐅᑎᑦᓯᓲᑦ ᓱᓕᑦᓯᐊᑐᒥᒃ ᐃᓕᓐᓂᐊᑎᑦᓯᓲᖑᓂᕐᒥᓄᑦ, ᑫᓪᓗᑐᕐᑕᐅᖁᓪᓗᒋᑦ ᐱᐅᓯᐅᓯᒪᔪᓂ ᖃᐅᔨᓴᕐᓃᑦ ᐊᒻᒪᓗ ᐃᓱᒪᑦᓯᐊᒐᓱᐊᕐᓃᑦ, ᐅᐊᕈᑦᔨᑐᕐᓱᒋᑦ ᐱᐅᓯᐅᓯᒪᔪᐃᑦ ᐃᓱᒪᒍᓰᑦ ᐃᓗᐊᓂ, ᐊᒻᒪᓗ ᓄᓇᖃᕐᖄᓯᒪᔪᐃᑦ ᐃᓱᒪᒋᔭᖏᑦ ᐊᒻᒪᓗ ᓯᓚᕐᔪᐊᒥᐅᓕᒫᑦ ᐃᓱᒪᒋᔭᐅᖁᓪᓗᒋᑦ.

ᐊᔪᐃᓐᓇᒍᑎᖃᕐᓂᖓᓄᑦ ᐱᕐᖁᓯᐅᓯᒪᔪᓂᑦ ᑐᑭᓯᐅᕆᓂᕐᒥᒃ ᐃᓕᑕᕆᔭᐅᓂᖃᕐᓯᒪᔪᖅ ᓂᕈᐊᕐᑏᑦ ᑲᑎᒪᔨᖏᓐᓄᑦ. ᑦᔫᓕ ᐃᓕᓐᓂᐊᑎᑦᓯᓂᖃᓲᖅ ᑐᑭᓯᐅᕆᓂᕐᒥᒃ ᐱᐊᕋᕐᓄᑦ ᐊᕐᕌᒍᓂ ᑕᓪᓕᒪᒐᓛᓂᑦ, ᐊᒻᒪᓗ ᑭᖑᓪᓕᐹᓕᒍᑎᒋᑦᓱᓂᐅᒃ ᐱᓇᓱᐊᕐᓂᖃᕐᓱᓂ ᐃᓕᑕᕆᔭᐅᒍᑎᑖᕋᓱᐊᕐᓂᒧᑦ ᐳᕐᑐᓂᕐᓴᐅᑉ ᐊᓪᓕᖓᓄᑦ. “ᑐᑭᓯᐅᕆᓂᖅ ᐃᑲᔪᕐᓯᐅᑎᑦᓯᐊᖑᓲᖅ ᐃᓅᓱᑦᑐᓂᑦ ᐊᑐᐃᓐᓇᕈᕐᑎᕆᓂᒃᑯᑦ ᐊᒻᒪᓗ ᐃᓚᐅᑎᑦᓯᓂᒃᑯᑦ ᐃᓱᒪᒐᓱᐊᕐᓂᑯᑦ. ᖁᑉᐹᒍᑦ, ᑐᑭᓯᐅᕆᓂᐅᑉ ᑐᑭᓪᓚᕆᖓ ᐃᓕᓐᓂᐊᑎᓂᒃ ᑫᓪᓗᑐᐃᒍᑎᑦᓯᐊᖑᕗᖅ ᐃᓚᐅᓂᖃᑦᓯᐊᖁᓪᓗᒋᑦ, ᐃᓕᑦᓯᒐᓱᐊᕐᓂᑯᑦ ᐊᒻᒪᓗ ᐃᓱᒪᒐᓱᐊᕐᓂᑯᑦ”.

ᑦᔫᓕᐅᑉ ᐱᐅᓯᒋᔭᐅᑎᓲᖏᑦ ᓇᓗᓇᖕᖏᑐᑦ ᑭᖑᓂᐊᒍᑦ. ᐊᑦᔨᐅᖏᑦᑐᓂᒃ ᐱᐅᓯᐅᓯᒪᔪᓂᑦ ᐊᑐᕐᓂᖃᓲᖅ ᐅᑉᐱᒋᔭᒥᓂᒃ ᐅᖄᕈᑎᖃᕈᒪᓯᓂᐊᕐᒪᑕ ᐊᒻᒪᓗ ᐃᓅᖃᑎᒌᑦᓯᐊᓂᒃᑯᑦ ᐃᓱᒪᑦᓴᓯᐅᖃᑎᒌᓪᓗᑎᒃ ᐃᓕᓐᓂᐊᑏᑦ ᐊᑐᓂ. ᐆᑦᑑᑎᒋᓗᒍ ᓱᖃᑦᓯᑎᑦᓯᓂᖃᕐᑎᓗᒍ ᑦᔫᓕ ᐊᑐᕐᓯᒪᔪᖅ 1955-ᒥᐅᔭᒥᒃ ᕋᐅᓴ ᐹᒃᔅ ᐃᑦᓯᕙᕕᒋᔭᒥᓂᒃ ᓅᑦᑌᓕᑦᓱᓂ. ᑌᒫᒃ ᐱᐅᓯᖃᕐᓱᓂ ᑎᒍᔭᐅᓂᖃᓚᐅᕐᓯᒪᔪᖅ ᓈᓚᖕᖏᑐᕕᓂᐅᓂᕐᒥᓄᑦ ᕉᓴ ᐱᖁᔭᒥᒃ ᓯᖁᒥᑦᓯᔪᕕᓂᐅᒐᒥ, ᖁᑉᐹᒍᑦ, ᓄᐃᑦᓯᓯᒪᔪᖅ ᐅᓯᑲᑦᑕᐅᑎᒥ ᐊᕕᑦᑐᓯᒪᑎᑕᐅᓂᖅ ᐱᖁᔭᐅᑦᓯᐊᓂᖕᖏᒪᑦ ᐊᒻᒪᓗ, ᑭᖑᓂᐊᒍᑦ ᐃᑦᔭᕋᑦᓴᓯᐊᖑᓂᐊᓕᕐᓱᓂ ᑭᖑᕚᖑᔪᓄᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂ ᓴᐳᒻᒥᔨᓄᑦ.

ᑌᒣᒻᒪᑦ ᑕᒪᒃᑯᐊ ᐅᖄᖃᑎᒌᓐᓃᑦ ᑦᔫᓕᐅᑉ ᐱᓇᓱᐊᕐᑕᐅᑎᓲᖏᑦ ᐃᓕᓐᓂᐊᑎᒥᓄᑦ ᐊᑐᕐᓱᒋᑦ ᐊᓪᓗᒋᐊᕈᑏᑦ ᐅᖄᖃᑎᒌᓐᓂᑎᒍᑦ ᓱᓕᔪᓂᑦ, ᖃᐅᔨᓴᕐᓂᑯᑦ ᓱᓕᑦᓯᐊᑑᔪᓂᑦ ᐱᐅᓯᐅᓯᒪᔪᓂᑦ, ᐃᑲᔪᕐᓯᓱᓂ ᐃᓕᓐᓂᐊᑎᓂᑦ ᐃᓱᒪᒋᔭᒥᓂᒃ ᐅᖄᕈᑎᖃᕈᓐᓇᓂᒃᑯᑦ ᐊᒻᒪᓗ ᐊᐱᕐᓲᑎᓂᑦ ᐊᐱᕐᓱᖃᑦᑕᓂᒃᑯᑦ.. ᐃᓱᒪᒋᖕᖑᐊᓱᒋᑦ ᐊᑑᑎᔭᐅᖃᑦᑕᓯᒪᔪᑦ ᐊᑦᔨᐸᓱᒋᑦᓱᓂᒋ ᐅᓪᓗᒥᐅᓕᕐᑐᖅ ᐱᐅᓯᐅᓲᓄᑦ ᐊᒻᒪᓗ ᖃᓄᖅ ᑭᐅᒍᓐᓇᓂᖃᕐᒪᖔᑕ ᐅᕝᕙᓘᓐᓃᑦ ᐱᐅᓯᖃᕋᔭᕐᒪᖔᑕ. ᑦᔫᓕᐅᑉ ᑐᕌᒐᓪᓚᕆᖓ ᐃᓕᓐᓂᐊᑏᑦ ᐱᒍᓐᓇᓯᑦᓯᐊᖁᓪᓗᒋᑦ ᐃᓱᒪᒍᓐᓇᓯᐊᕐᓂᑯᑦ ᓇᒻᒥᓂᖅ ᐱᒻᒪᕆᐅᖁᑎᖏᑎᒍᑦ, ᐊᒻᒪᓗ ᐃᑲᔪᕐᓯᐅᑎᓂᒃ ᑐᓂᖃᑦᑕᓱᒋᑦ ᑭᖕᖒᒪᒋᔭᖏᓐᓂᑦ ᐃᓱᒪᖕᖑᐊᓂᒃᑯᑦ ᓱᓕᓪᓚᕆᑦᑐᓂᒃ ᓱᒋᐊᕐᓂᐅᒐᔭᕐᑐᓂ.

“ᐅᕙᓐᓄᓕ ᐱᒻᒪᕆᐅᕗᖅ ᐊᑐᐃᓐᓇᖃᑦᑕᓗᓂ [ᐱᐅᓯᐅᓯᒪᔪᓂᑦ] ᐊᑑᑎᖃᑦᑕᓯᒪᔪᓂᑦ ᐅᓪᓘᑉ ᓈᓂᖓᓂ ᐱᐅᔪᒥᒃ ᓄᐃᑦᓯᓂᖃᖃᑦᑕᓯᒪᔪᑦ, ᐱᐅᔪᓄᑦ ᐊᓯᑦᔨᑐᐃᒍᑎᐅᖃᑦᑕᓯᒪᔪᑦ, ᐊᑐᕐᓱᒋᑦ ᐱᓗᑲᑦᑌᓕᒪᓂᕐᒧᑦ ᐱᐅᓰᑦ. ᑐᕌᒐᕆᔭᕋ ᐃᓕᓐᓂᐊᑎᖁᑎᒃᑲ ᑐᑭᓯᓕᐅᒥᖁᓪᓗᒋᑦ ᒥᑭᔫᒐᓗᐊᒥ ᓱᒐᓗᕐᐸᑕ ᓲᖑᓂᖃᑦᓯᐊᒪᑕ, ᐃᓱᒪᒋᔭᒥᓂᒃ ᐅᖄᓕᕈᑎᒃ ᓲᖑᓂᖃᑦᓯᐊᒪᑕ, ᓲᖑᓂᒋᔭᖓᑦ ᐊᓯᑦᔩᒍᓐᓇᑐᖅ ᓯᓚᕐᔪᐊᒥ ᒥᑭᔫᒐᓗᐊᕐᐸᑦ”.

ᓄᐃᑕᐅᓯᒪᔪᖅ 1996-ᖑᑎᓪᓗᒍ, ᐊᑕᓂᐊᓘᑉ ᑭᒡᒐᑐᕐᑎᖓᑕ ᐱᐅᓯᐅᓯᒪᔪᓂᒃ ᐃᓕᑕᕆᔭᐅᒍᑎ ᐃᓕᑕᕐᓯᓂᖃᓛᕐᑐᖅ ᐱᖓᓲᔪᕐᑐᓂᒃ ᐃᓚᐅᔪᓂᑦ $2,500-ᑖᕐᓗᑎᓗ ᐊᑐᓂ, $100-ᓂᑦ ᐃᓕᓐᓂᐊᕕᒻᒥᓅᕐᑐᓴᓂᒃ ᐊᒻᒪᓗ ᖃᖓᑦᑕᐅᑎᒥᒃ ᒪᕐᕉᓄᑦ ᐃᓅᓐᓄᑦ ᐋᑐᒑᒧᑦ ᑐᓂᔭᐅᕆᐊᕐᑐᖁᓪᓗᒋᑦ ᐊᑕᓂᐊᓘᑉ ᑭᒡᒐᑐᕐᑎᖓᑕ ᐱᐅᓯᐅᓯᒪᔪᓂᒃ ᐃᓕᑕᕆᔭᐅᒍᑎᒥᒃ.

ᐅᖃᐅᓯᑦᓴᖅ: ᐅᐱᒍᓱᒃᑯᒍᑦ ᐃᓕᓐᓂᒃ, ᑦᔫᓖ! ᑐᓴᕐᑎᓯᒍᑎ ᓄᐃᑕᕕᓂᐅᑎᓪᓗᒍ ᐱᖓᓲᔪᕐᑐᐃᑦ ᑐᓴᕐᑎᓯᐅᑎᐅᓯᒪᖕᖏᑐᑦ.

ᑐᑭᓯᒋᐊᑦᓯᐊᒍᒪᕈᕕᑦ ᑕᑯᓂᐊᕐᓗᑎᑦ ᑲᓇᑕᐅᑉ ᐱᐅᓯᒋᓯᒪᔭᖏᓐᓂ ᐅᕗᖓ ᐱᑐᑦᓯᒪᐅᑎ https://www.canadashistory.ca/home