ᐅᑭᐅᖑᓚᖓᓕᕐᒥᔪᕐᓗ ᐃᓱᒪᐅᓪᓗ ᖃᓄᐃᖕᖏᓯᐊᕐᑐᓴᐅᓂᖓᓂᒃ ᑐᑭᓯᒪᒐᓱᓐᓂᖅ
ᐅᑭᐅᓪᓚᕆᒃ, ᑖᕐᑐᓯᓂᖅ, ᐋᖃᓕ. ᐅᑭᐅᒃᑯᑦ ᖃᐅᒪᑯᑖᖕᖏᓂᕐᓴᐅᖃᑦᑕᓕᑐᐊᕐᒪᑦ, ᐊᒥᓱᑦ ᐊᑑᑎᓱᖑᕗᑦ ᖃᓄᐃᑦᑐᑐᐃᓐᓇᓂᒃ ᓯᓚᐅᑉ ᐊᓯᑦᔨᓂᖓᓄᑦ ᑲᑕᖓᑎᑕᐅᓇᕐᑐᓂᒃ. ᑖᒪᓐᓇ ᑕᐸᓇᖕᖏᓗᐊᑦᓴᒪᑦ ᐃᓚᐅᓕᕐᒥᔪᖅ ᖃᓂᒪᓐᓇᔪᐊᖅ-19, ᐅᖁᒣᓪᓕᐅᕆᐊᓪᓚᓇᕐᑐᖅ ᐳᑦᑕᖓᔮᓐᓇᓱᓂᓗ, ᑖᒃᑯᐊ ᑲᑎᖕᒪᑕ ᐱᐅᖕᖏᒋᐊᓪᓚᒥᔪᕐᒦᓂᐊᓕᕋᑦᑕ.
ᑖᒃᑯᓇᓂ ᕿᒥᕐᕈᐊᓂ, ᑲᒪᒋᔭᖃᕆᐊᕐᐳᒍᑦ ᐊᐱᕆᐅᑎᓂᒃ, ᐊᔪᖀᒋᐊᕈᑎᓂᒃ ᐃᓱᒪᒋᔭᐅᔪᓂᓪᓗ ᑕᒪᑐᒥᖓ ᑌᒣᓕᖓᔪᒥᓐᓂᐅᓕᕐᑐᒥᒃ ᐊᒻᒪᓗ ᖃᓄᖅ ᒪᑭᒋᐊᕐᔪᒥᓂᖃᕈᓐᓇᕆᐊᑦᑕ ᑕᒪᑐᒥᖓ ᐅᖁᒣᑦᑐᒪᕆᒻᒥᒃ ᓵᖕᖓᓯᓂᖃᓕᕐᓗᑕ.
ᓂᑦᔮᒍᑎᖃᕆᐊᖃᕐᐳᒍᑦ ᐅᑭᐅᖑᓚᖓᓕᕐᒥᔪᒥᒃ ᐃᓱᒪᐅᓪᓗ ᖃᓄᐃᖕᖏᓯᐊᕐᑐᓴᐅᓂᖓᓂᒃ ᑐᑭᓯᒪᒐᓱᓐᓂᒥᒃ
ᐅᖃᕐᑕᖏᑦ ᑲᓇᑕᒥ ᑭᓯᑦᓯᔨᒃᑯᑦ, ᑐᖕᖓᕕᒋᑦᓱᒋᑦ 10%-ᒥᒃ ᐊᒥᓱᓂᓖᑦ ᑲᓇᑕᒥᐅᑦ ᐅᑭᐅᓖᑦ 12-ᓂᑦ ᐅᖓᑖᓄᓪᓗ. ᑕᒪᒃᑯᐊ ᐅᓄᕐᓂᖏᑦ ᑎᑭᐅᑎᒍᓐᓇᑐᑦ 50%-ᓄᑦ ᐃᓱᒪᓐᓈᖏᓐᓇᕈᓐᓇᖏᒻᒪᑕ, ᐃᓚᖃᕐᑎᓗᒋᑦ ᐅᓪᓗᐃᑦ ᓇᓪᓕᐅᑎᓂᖏᑕ ᓇᓪᓕᖏᓐᑦ ᑲᑕᖓᑎᑕᐅᓐᓇᑐᒥᒃ ᐱᑕᖃᕐᒪᑕ ᐅᕝᕙᓘᓐᓃᑦ ᐅᓪᓗᐃᑦ ᓇᓪᓕᖏᓐᓂ ᓯᓚᒧᑦ ᓱᕐᕋᑕᐅᒪᓂᕐᒥᒃ ᓲᕐᓗ ᐅᖃᕐᐸᒪᑕ ᓱᑯᐃᔦᔩᑦ ᐃᓚᖏᑦ.
ᑕᒪᓐᓇ ᓇᓪᓕᐅᑎᑦᑕᑐᒥᒃ ᐅᓪᓗᐃᑦ ᐊᓯᑦᔨᓂᖏᓐᓄᑦ ᒪᓕᑦᓱᒋᑦ ᓱᕐᕋᑕᐅᒪᓐᓇᑐᖅ ᐊᑑᑎᔭᐅᓕᕋᒥ ᐃᑉᐱᓂᐊᕐᓇᐳᖅ ᓇᓪᓕᖁᐊᕇᓐᓂᖃᖕᖏᑐᒥᒃ, ᐸᕝᕕᓕᕈᐊᕐᓯᓯᒪᓇᕐᓱᓂ ᓱᕐᕃᓂᖃᕈᓐᓇᑐᓂᒃ ᐃᓅᓯᕐᒥᒃ ᐃᓅᖃᑎᒌᑎᒍᑦ ᐊᒻᒪᓗ ᐱᓇᓱᕝᕕᒥ. ᑌᒣᒻᒪᑕᐅᖅ, ᖃᓂᒪᓐᓇᔪᐊᖅ-19 ᓯᓚᕐᔪᐊᒧᑦ ᐃᕐᐸᓯᒪᓂᖓ ᓱᕐᕃᓯᒪᒍᓐᓇᖁᖅ ᐃᓄᓐᓂᒃ ᑎᒥᖏᑎᒍᓪᓗ ᐃᓱᒪᖏᑎᒍᓪᓗ ᐃᒻᒥᓂᒃ ᓄᐃᑦᓱᓂ ᐊᒥᓱᓂᒃ ᐊᑑᑎᒍᑎᐅᒍᓐᓇᑐᖅ ᐃᒫᒃ: ᓯᓂᑦᓯᐊᓇᖕᖏᑐᖅ, ᓂᕆᒍᓱᓐᓇᖏᑦᑐᖅ, ᑕᖃᒪᓇᕐᑐᖅ, ᓱᕐᖃᔭᖕᖏᑑᔪᕆᓕᕐᓇᑐᖅ, ᐊᓕᐊᓱᖕᖏᑑᓂᖅ, ᐅᒋᐊᖕᖑᓂᖅ, ᑲᖐᓱᐋᖕᖏᓂᖅ, ᕿᑲᕐᖃᔭᖕᖏᓂᖅ.
ᑖᒃᑯᓇᓂ ᑌᒣᑦᑐᓂᒃ, ᓄᓇᖃᕐᖄᓯᒪᔪᑦ ᑯᐯᖕᒥᐅᑦ ᐊᒻᒪᓗ ᓛᐸᑐᐊᕐᒥᐅᑦ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᐅᓂᕐᓄᑦ ᑲᑎᖕᖓᔨᒃᑯᖏᑦ ᐅᖃᕐᓯᒪᕗᑦ ᐊᑦᑕᓀᑦᑐᓯᐊᖑᖁᔨᑦᓱᑎᒃ: ᐅᖃᕐᓱᑎᒃ “ᐊᑦᑕᓀᑦᑑᓂᖅ, ᐃᓚᖏᑦ ᐃᓄᐃᑦ ᐃᓅᓕᓲᑦ ᐱᑕᖃᕇᕐᓱᑎᒃ ᐊᑦᑕᓀᓐᓂᒥᒃ, ᐱᔭᐅᒍᓐᓇᑐᖅ ᐱᕙᓪᓕᐊᑎᑕᐅᓂᖃᕐᓗᓂ”, ᑎᑭᐅᑎᓇᓱᑦᓱᑎᒃ ᓄᓇᖃᕐᖄᓯᒪᔪᑦ ᑯᐯᖕᒥᐅᑦ ᐊᒻᒪᓗ ᓛᐸᑐᐊᕐᒥᐅᑦ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᐅᓂᕐᓄᑦ ᑲᑎᖕᖓᔨᒃᑯᖏᑦ ᑐᕌᒐᖃᕐᐳᑦ ᐊᒥᓱᓂ ᐊᑑᑎᒍᓐᓇᑕᑎᓐᓂᒃ ᐃᒻᒥᓂᕿᓗᑎᑦ ᐱᓇᓱᕝᕕᓂᓗ. ᐅᑯᐊᑕᒃᒐ ᐊᑑᑎᒍᓐᓇᑕᕐᐱᑦ ᐃᓚᒐᓛᐱᖏᑦ
- ᐱᐅᓯᕐᑖᓗᑎᑦ ᓈᒻᒪᓈᕐᓯᒪᔪᒥᒃ ᐅᓪᓗᒥᐅᔪᖅ ᐱᐅᓯᕐᑕᖃᒻᒥᐅᓕᕐᑐᓄᑦ, ᐃᓚᐅᑎᓪᓗᒋᑦ ᐱᓇᓱᒋᐊᕐᑐᓀᑦ ᖃᖓᐅᓂᖏᑦ;
- ᑕᙯᕐᓯᓂᖃᑦᓯᐊᖃᑦᑕᓂ, ᓄᒃᑭᕆᐊᕐᓂᖅ ᓂᒪᔭᕐᓂᓴᐅᓕᕐᓗᑎᓪᓗ;
- ᐱᓇᓱᐊᖃᑦᑕᓗᑎ ᐱᐅᓯᑐᖃᒃᑯᑦ ᖃᓄᓘᕈᑎᐅᓲᓂᓪᓗ ᓇᓪᓕᐅᓂᕐᓯᐅᕈᓯᕐᓂᓗ ᐃᓱᕐᕆᓕᕐᓇᑐᓂᒃ ᐊᑑᑎᖃᑦᑕᓗᑎᑦ;
- ᐃᓄᑐᖃᕐᓂᒃ ᐅᖄᕕᖃᖃᑦᑕᓗᑎᑦ ᐃᓕᑦᓯᕕᑦᓴᓯᐊᖑᒻᒪᑕ;
- ᐱᓇᓱᑦᑎᐅᖃᑎᑎᑦ ᓴᐳᒻᒥᖃᑦᑕᓗᒋᑦ ᓂᑦᔮᓕᕐᐸᑕᓗ ᓈᓚᖃᑦᑕᓗᒋᑦ;
- ᒪᓕᑦᓯᐊᓗᒋᑦ ᐱᓂᕐᓗᑲᓪᓚᒌᒃᑯᑎᑦᓴᓕᐊᖑᒪᔪᑦ ᐃᓱᒫᓗᓪᓗᐊᖁᖕᖏᒧᑦ ᑭᓇᓕᒫᒃᑯᓗ ᐱᓂᕐᓗᑲᓪᓚᖁᓇᒋᑦ;
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᐱᕕᑦᓴᐅᒥᔪᑦ ᐅᑯᓂᖓ ᐊᔪᖀᒋᐊᕈᑏᑦ ᐃᓕᖓᔪᑦ ᖃᓄᐃᓘᕐᑕᐅᔪᑦᓴᐅᓂᖏᓐᓄᑦ ᐃᓱᒪᔮᕈᑎᖃᕐᓃᓗ ᓱᕐᖁᐃᓯᓯᒪᑦᓯᐊᓇᖕᖏᑐᒦᓐᓃᓗ. ᓇᓗᓇᖕᖏᑑᓂᕐᒥᓄᑦ ᓈᒻᒪᓈᕐᓯᒪᑦᓯᐊᑐᑦ:
- ᐃᓄᑐᐊᑲᓪᓚᐅᒐᓗᐊᕈᕕᑦ ᐃᓅᖃᑎᑎᓐᓂᒃ ᑲᖐᒋᔭᖃᑦᓯᐊᖏᓐᓇᕆᑦ;
- ᓇᒻᒥᓂᖅ ᐊᐅᓚᒍᓐᓇᑕᑎᑦ ᐃᑉᐱᒋᑦᓯᐊᓗᒋᑦ;
- ᐃᒻᒥᓂᒃ ᑲᒪᒋᑦᓯᐊᕆᑦ ᓄᓇᓖᓪᓗ ᑲᒪᒋᑦᓯᐊᒥᓗᒍ;
- ᑐᓴᐅᒪᑦᓯᐊᖏᓐᓇᕆᑦ… ᑐᓴᐅᒪᑦᓯᐊᓗᐊᕌᓗᒍᓐᓀᓗᑎᐅᓐᓃᑦ!
ᑌᒣᒻᒪᑕ ᑕᒐ, ᐱᐅᓂᕐᐸᐅᕗᖅ ᖃᓄᐃᓘᕈᑎᒋᒋᐊᖓ ᐅᖄᓂᖅ ᐊᑐᐊᕐᓯᓂᕐᓗ (ᐊᑐᐊᕐᓯᓱᑎᒃ ᑕᒪᐅᖓ ᑎᑭᐅᑎᒍᕕᑦ ᓯᕗᒧᐊᑦᓯᐊᐳᑎᑦ). ᑫᓪᓚᑐᕐᐸᑎᒋᑦ ᑐᑭᓯᓂᐊᖁᓪᓗᑎᑦ ᑕᑉᐱᑯᑎᒎᓇ ᐱᑐᑦᑕᐅᑎᑎᒍᑦ ᑕᑯᒋᐊᖃᑦᑕᓗᑎᑦ. ᐊᒻᒪᓗ ᐊᑐᕐᑌᓕᖃᑦᑕᓇᒋᑦ ᐱᓇᓱᑦᑎᓂᒃ ᐃᓚᖏᓐᓂᓗ ᐃᑲᔪᕐᓯᒪᔩᑦ (EFAP) ᑭᖕᖒᒪᓇᕐᓯᐸᑕ, ᑖᒃᑯᐊ ᐅᖃᔭᐅᑎᖃᕐᓂᐅᔭᖕᖏᑐᑦ ᐃᓕᓐᓄᓗ ᐃᓚᑎᓐᓄᓗ ᐊᑮᑦᑐᓱᑎᒃ.
ᖃᓄᐃᖕᖏᓯᐊᕆᑦᓯ ᑲᒪᒋᑦᓯᐊᓗᓯᓗ.
ᐅᖄᖃᑎᖃᕈᒪᓕᕐᖀᑦ?
- ᐱᓇᓱᑦᑎᓂᒃ ᐃᓚᖏᓐᓂᓗ ᐃᑲᔪᕐᓯᒪᔩᑦ: 1 (800) 663-1142 or TTY 1(888) 384-1152 / homeweb.ca
- ᑲᒪᑦᓯᐊᑐᖅ ᐃᑲᔪᕐᓯᒪᔩᑦ: 1-800-265-3333 (ᖃᓪᓗᓈᕐᑎᑐᑦ/ᐃᓄᒃᑎᑐᑦ)
- ᓄᓇᖃᕐᖄᓯᒪᔪᓪᓗ ᐃᓄᑐᐃᓐᓀᓗ ᓂᕆᐅᓐᓂᖃᕐᕕᖓᑦ ᖃᓄᐃᖕᖏᓯᐊᕐᓂᓴᒥᒃ ᐅᖄᓚᐅᑎᒃᑯᑦ ᐃᑲᔪᕐᑕᐅᕕᖓᑦ: 1-855-242-3310 (ᖃᓪᓗᓈᕐᑎᑐᑦ/ᒍᐃᒍᐃᑎᑐᑦ)
- Revivre-ᑯᓄᑦ ᐅᖄᓚᐅᑎᒃᑯᑦ ᐃᑲᔪᕐᑕᐅᕕᒃ (ᐃᓱᒪᔮᕐᓂ, ᐅᖁᒣᓪᓕᐅᓂᖅ, ᐊᓯᖏᓪᓗ.): 1-866-738-4873