ᓅᕕᒻᐱᕆ 20 ᐊᒻᒪᓗ 21, ᐃᓚᑦᔪᒍᓱᓐᓂᒥᒃ ᐃᓕᓐᓂᐊᕕᖃᕐᓂᒥ ᐱᓇᓱᖃᑎᒌᑦ ᑲᑎᓚᐅᔪᕗᑦ ᑲᖏᕐᓱᐊᓗᑦᔪᐊᒥ, ᑐᓴᖃᑎᒌᓐᓂᒧᑦ ᐱᓇᓱᐊᕐᑕᐅᔪᓂᒃ ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᖃᕐᓂᒥ ᖃᐅᔨᒪᔨᒥᒃ ᐃᓕᓐᓂᐊᑎᑦᓯᔨᒥᒃ ᖃᓄᐃᓘᕐᓂᖏᓐᓂᒃ. ᑲᑎᖕᖓᓂᖓ ᐱᐅᔫᓂᖃᓚᐅᔪᕗᖅ ᐊᒻᒪᓗ ᐊᑐᐃᓐᓇᐅᑎᑦᓯᓱᓂ ᐅᖄᖃᑎᒌᓐᓂᒥᒃ ᐊᑐᕋᑦᓴᓯᐊᓂᒃ ᖃᓄᐃᓘᕈᑎᓂᒃ. ᐃᓚᖏᑦ ᐱᒋᐊᕐᑎᑕᕕᓃᑦ ᖃᐅᔨᒪᔨᒧᑦ ᐃᓕᓐᓂᐊᑎᑦᓯᔨᒧᑦ ᐃᓚᐅᔪᕕᓂᕐᒧᑦ ᐅᖁᒣᓪᓕᐅᕈᑎᓂᒃ ᖁᐊᕐᑕᒥ. ᐊᕕᑦᑐᓯᒪᔪᓂ ᐊᒥᓲᓂᕐᐹᓂᒃ ᐃᓕᓐᓂᐊᕆᐊᕐᓂᖃᖃᑦᑕᑐᕕᓃᑦ ᑕᕐᕿᐅᑉ ᓄᖕᖑᐊᓂ  ᑕᕐᕿᑕᒫᑦ ᓱᖃᑦᓯᒍᑎᒥᒃ ᓇᓪᓕᑳᕈᓐᓇᓂᖃᕐᑎᓗᒋᑦ ᐃᓕᓐᓂᐊᕕᓕᒫᒧᑦ ᐊᑐᕐᑕᐅᓚᖓᔪᒥᒃ. ᑖᑦᓱᒧᖓ ᐱᓇᓱᐊᕐᑕᐅᔪᒧᑦ, ᐃᓱᒻᒪᓴᕐᕕᒃ ᐃᓕᓐᓂᐊᕕᖓ ᐊᖏᓕᒋᐊᕐᑎᓯᒍᓐᓇᓯᔪᕕᓂᖅ ᐳᒃᑭᓂᕐᓴᓂ ᐃᓕᓐᓂᐊᕆᐊᕐᓂᖏᓐᓂᒃ 70%-ᒥᑦ 90%-ᒧᑦ! ᐱᑕᑲᓪᓚᐅᑉ ᐃᓕᓐᓂᐊᕕᖓ ᑕᑯᖃᑦᑕᖁᖅ ᐱᐅᔪᓂᒃ ᓄᐃᑎᑦᓯᒍᑎᓂᒃ ᐃᑉᐱᒍᓱᒍᑎᓄᑦ ᐊᓪᓚᓂᐊᒐᓕᕆᓂᕐᒥ ᐃᓕᓐᓂᐊᕕᐅᑉ “ᑐᖑᔪᕐᑕᒥ ᖃᕆᐊᒧᑦ”. ᔭᓄᐊᕆᒥ ᐱᑕᑲᓪᓚᒥ ᓄᐃᑦᓯᓛᕐᒥᔪᖅ ᓄᑖᒥᒃ “ᓭᒪᖃᑎᒌᓐᓂᒧᑦ ᖃᕆᐊᒥᒃ”, ᒪᓕᒐᑦᓴᖅ ᖃᕆᐊᒥ ᐃᓕᓐᓂᐊᕕᒻᒥ ᓄᐃᑕᑎᑦᓯᓂᕐᒨᓕᖓᓗᓂ ᐋᕐᕿᓱᕐᓯᒪᐅᑎᑦᓴᖅ ᓴᓇᔭᐅᒪᓗᓂ ᐃᑲᔪᕐᓯᓂᕐᒧᑦ ᐱᕈᕐᓭᓯᐊᕐᓂᒥᒃ ᐊᕙᑎᖃᕐᑎᓯᓂᕐᒧᑦ.

ᐊᔭᒍᑕᖅ ᐃᓕᓐᓂᐊᕕᖓ ᐱᐅᓯᐅᒥᑎᑦᓯᓯᒪᕗᖅ ᐊᖏᕐᕋᒥᑦ ᐃᓕᓐᓂᐊᕕᒻᒧᑦ ᑐᓴᐅᒪᖃᑎᒌᓐᓂᒥᒃ, ᓄᑖᒥᒃ ᐅᖄᓚᔪᓂᒃ ᐊᓪᓚᓯᒪᐅᑎᒥᒃ ᐊᖏᕐᕋᒥ ᑐᓴᐅᒪᖃᑎᒌᓐᓂᒧᑦ, ᐊᒻᒪᓗ ᐅᖄᓚᓲᑦ ᑐᓴᕋᑦᓴᓯᐊᓂᒃ ᑐᓴᕐᑎᓯᑦᓱᑎᒃ ᐊᖏᕐᕋᖏᓐᓄᑦ ᐱᐊᕃᑦ. ᔮᓂᒻᒪᕆᐅᑉ ᐃᓕᓐᓂᐊᕕᖓ ᐱᓇᓱᐊᒻᒪᕆᖃᑦᑕᖁᖅ ᐱᒍᓐᓇᑎᑦᓯᓂᕐᒥᒃ ᐃᓕᓐᓂᐊᑎᓂᒃ ᖃᓄᐃᓕᓂᕐᒥᒃ ᓵᓚᕐᖄᖃᕐᓂᒧᑦ. ᐱᒋᐊᕐᑎᓯᓯᒪᑦᓱᑎᓪᓗ “ᐃᓄᑦᓯᐊᖑᓂᕐᒧᑦ ᖃᓄᐃᓘᕐᓂᖅ ᖃᖓᑐᐃᓐᓇᖅ” ᐃᓚᐅᓂᕐᒥᒃ, ᖃᕆᐊᒥ ᐃᓕᓐᓂᐊᕖᑦ ᐴᕐᑕᓖᑦ ᖃᓄᐃᓘᖁᔨᒍᑎᑕᓕᓐᓂᒃ ᐃᓕᓐᓂᐊᑎᑦᓯᔩᓪᓗ ᐃᓕᓐᓂᐊᑏᓪᓗ ᑲᔪᖏᕐᓴᑕᐅᒪᔪᑦ ᐱᔭᕇᖁᔭᐅᑦᓱᑎᒃ ᐊᓪᓚᖑᐊᕐᓂᒥᒃ. ᐃᓕᓐᓂᐊᑏᑦ ᖃᐅᔨᓯᒪᔪᑦ ᐃᓄᑦᓯᐊᖑᓂᑦ ᐱᐅᓯᕐᓲᑎᑦᓯᐊᓚᕆᐅᓂᖓᓂᒃ! ᑭᖑᓪᓕᐹᒥ, ᐅᓪᓗᕆᐊᖅ ᐃᓕᓐᓂᐊᕕᖓ ᐋᕐᕿᓱᐃᓯᒪᕗᖅ ᑲᔪᓯᑦᓯᐊᑐᒻᒪᕆᒻᒥᒃ ᓄᐊᑦᓯᒍᑎᒥᒃ ᐳᕐᑐᓂᓕ 1 ᐊᒻᒪᓗ ᐳᕐᑐᓂᓕᒃ 2 ᐋᕐᕿᓱᕐᓯᒪᐅᑎᓕᒻᒥᒃ. ᐳᕐᑐᓂᕐᒥ 1-ᒥ, ᐆᑦᑑᑎᒋᓗᒍ, ᐃᓕᓐᓂᐊᕖᑦ ᖃᕆᐊᑦ “ᐃᕿᕐᕋᖃᕐᖁᑦ ᓄᓪᓚᖓᕕᒻᒥᒃ” ᐃᑲᔪᕐᓯᒍᑎᓂᒃ ᐃᓕᓐᓂᐊᑎᓂᒃ  ᐅᖁᒣᓪᓕᐅᓗᐊᓕᑐᐊᕐᒪᑕ ᐅᕝᕙᓘᓐᓃᑦ ᓂᖕᖓᐅᒪᓕᑐᐊᕐᒪᑕ. ᐅᓪᓗᕆᐊᖅ ᑕᓚᕖᓴᖃᕐᖁᑦ ᐃᓕᓐᓂᐊᕕᓕᒫᓂ ᐳᕐᑐᓂᖅ 1 ᑐᓴᕐᑎᓯᒍᑎᖏᑦ ᓄᐃᑕᑎᑕᐅᓲᑦ ᐊᒻᒪᓗ ᐅᑎᕐᑕᓱᑎᒃ ᓄᐃᑕᑎᑌᑦ. ᐳᕐᑐᓂᓕᒃ 2 ᐃᑲᔪᕐᓯᒋᐊᕈᑎ ᐊᑐᕐᓂᖃᑦᓯᐊᓲᖅ ᐅᓪᓗᕆᐊᖅ ᐃᓕᓐᓂᐊᕕᖓᓂ ᐃᓕᓐᓂᐊᑎᓄᑦ ᐃᕐᖃᒐᕐᑐᕆᐊᓕᓐᓄᑦ ᐃᓚᐅᓂᕐᒧᑦ ᐅᓪᓛᕈᒥᑕᕐᓇᒧᑦ ᓂᕆᑦᓯᐊᓂᖃᕈᓐᓇᑐᖅ ᐅᑕᕐᕿᓗᑎᓪᓗ ᐄᕐᖃᒐᖏᑦ ᐊᑐᓕᖕᖏᓂᖏᓐᓂ ᐃᓕᓐᓂᐊᕕᒻᒥᓄᑦ ᖃᕆᐊᒧᑦ ᐁᓚᐅᕋᑎᒃ. ᑖᓐᓇ ᐃᑲᔪᕐᓯᓯᒪᔪᖅ ᐃᓕᓐᓂᐊᑎᓂᒃ ᐅᓪᓛᓯᐅᑦᓯᐊᑎᑦᓯᓱᓂ.

ᐃᓚᒋᐊᕈᑎᐅᑎᓪᓗᒍ ᐅᖄᓂᖅ ᑲᔪᓯᑦᓯᐊᓂᕐᒥᒃ, ᐃᓚᑦᔪᒍᓱᓐᓂᒥ ᐃᓕᓐᓂᐊᕕᓐᓂ ᐱᓇᓱᖃᑎᒌᑦ ᐅᖄᓂᖃᓚᐅᕐᒥᔪᑦ ᐱᓀᓗᑕᓂᒃ ᐊᒻᒪᓗ ᐃᓱᒪᑦᓴᓯᐅᕐᓱᑎᒃ ᐋᕐᕿᕈᑎᑦᓴᓂᒃ. ᓯᕗᓪᓕᐹᖅ ᐱᓀᓗᑕᖅ ᐅᖄᔭᐅᓚᐅᕐᑐᑦ: ᐃᓚᐅᑎᑦᓯᓂᖅ ᐱᓇᓱᑦᑎᓂᒃ, ᐱᓇᓱᖃᑎᒌᑦᓯᐊᓂᕐᒥᒃ ᐅᓐᓂᑐᐃᓂᖅ ᐱᓇᓱᑦᑎᓂᒃ ᐊᒻᒪᓗ ᐱᑕᖃᑦᓯᐊᑎᑦᓯᓂᖅ ᐊᑦᔨᒌᓕᑦᓯᐊᑐᓂᒃ ᐃᑲᔪᕐᓯᒋᐊᕈᑎᓂᒃ; ᐅᖄᖃᑎᒌᓐᓂᓂᒃ ᐃᓕᓐᓂᐊᕕᓐᓂᒃ, ᐃᓕᓴᕐᓂᓕᕆᓂᕐᒥᒃ ᐊᒻᒪᓗ ᓄᓇᓕᒻᒥᒃ; ᓯᕗᓪᓕᐸᐅᑦᔭᐅᑎᑦᓯᓂᖅ ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᓐᓂᒃ ᐃᓕᓴᕐᓂᓕᕆᓂᕐᒥ; ᐊᒻᒪᓗ ᐲᕐᐸᓕᐊᓂᖅ “ᐱᓂᕐᓗᓂᕐᒧᑦ ᓱᒋᐊᕐᑕᐅᓂᕐᒧᑦ ᐊᑐᕐᓂᒥᒃ”.

ᐅᓇᑕᒐ ᐊᑕᐅᓯᖅ ᐱᓇᓱᖃᑎᒌᑦ ᓄᐃᑎᑕᕕᓂᖓ ᐊᑐᓂᑦ ᐊᕕᑦᑐᓯᒪᔪᓄᑦ, ᒪᓕᑦᓯᐊᑐᖅ ᐅᖃᕐᑕᐅᓂᖏᓐᓂᒃ: ᐃᒻᒥᒎᓈᕐᑎᑐᑦ ᐊᖏᔫᖕᖏᑐᑦ ᐱᓀᓗᑕᓂᒃ ᐅᖄᖃᑎᒌᖃᑦᑕᓚᖓᔪᑦ ᐊᒻᒪᓗ ᑲᔪᓯᑦᓯᐊᑐᕕᓂᕐᓂᒃ, ᐃᒻᒪᖄ ᐅᓪᓗᖅ ᑕᓪᓕᒪᖓᓂ ᑲᑎᖕᖓᓂᕐᒥ; ᙯᖁᔨᓂᖅ ᐃᓕᓐᓂᐊᓂᕐᒥ ᑭᒡᒐᑐᕐᑎᒥᒃ ᐃᓘᓐᓇᖏᑦ ᐱᓇᓱᖃᑎᒌᑦ ᑲᑎᒪᓂᖓᓄᑦ ᐊᒻᒪᓗ ᙯᖁᔨᓂᖅ ᐊᖓᔪᕐᖄᕆᔭᐅᔪᓂᒃ ᐅᓪᓗᖅ ᐊᑕᐅᓯᕐᒥ ᐃᓕᓐᓂᐊᕕᖓᓃᓐᓂᖅ ᐱᐊᕋᖓᑕ; ᐃᓚᐅᑎᓪᓗᒍ ᓀᑦᑐᖅ ᑐᓴᕐᑎᓯᐅᑎ ᐃᓕᓐᓂᐊᑎᐅᑉ ᐱᐅᓯᕐᓲᑎᖓᓂᒃ/ᑐᑭᓯᒪᓗᓂ ᓲᓱᑦᓴᓗᑎᒃ ᐊᑐᓂᑦ ᐃᓕᓐᓂᐊᕖᑦ ᐃᓪᓕᕆᔭᖏᓐᓂᒃ ᐃᓕᓐᓂᐊᑎᐅᑉ ᖃᐅᔨᓴᕐᑕᐅᒍᑎᖓᓂᒃ ᑐᓴᕐᑎᓯᐅᑎᒥᒃ; ᐊᒻᒪᓗ ᖃᐅᔨᑎᑦᓯᒍᑎᖃᕐᓗᑎᒃ ᐱᐅᔪᓂᒃ ᐱᐅᓯᕐᓲᑎᓂᒃ ᐃᑲᔪᕐᓯᒍᑎᓂᒃ ᐊᒻᒪᓗ ᓴᐳᒻᒥᒍᑎᓂᒃ ᐊᒻᒪᓗ ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕖᑦ ᑲᔪᓯᑦᓯᐊᓯᒪᓂᖏᓐᓂᒃ.

ᐱᓇᓱᖃᑎᒌᑦ ᕿᓚᓈᕐᖁᑦ ᑐᖕᖓᓱᑦᑎᓯᓂᕐᒥᒃ ᐳᔨᓐᑕ ᓕᓐᒥᒃ ᐱᓇᓱᒐᕐᒧᑦ ᐃᓕᓐᓂᐊᕈᑎᑦᓴᓕᐅᕐᓂᒧᑦ ᐃᓱᐊᕐᓭᔨ. ᐳᔨᑕ ᐱᑕᖃᕐᑎᓯᖃᑦᑕᓚᖓᔪᖅ ᐃᑲᔪᕐᓂᒥᒃ ᓴᐅᑦᔪᐃᒃᑯᓐᓄᑦ, ᐱᒋᐅᕕᒧᑦ ᐃᑯᓯᒻᒧᑦ, ᐃᓱᒻᒪᓴᕐᕕᒧᑦ ᐊᒻᒪᓗ ᐊᕐᓴᓂᕐᒧᑦ. ᐱᒍᓐᓇᐅᑎᓕᒃ ᐊᓪᓚᓂᐊᕆᐅᕐᓴᓂᕐᒥᒃ, ᐅᖃᐅᓯᐅᑉ ᐁᑉᐸᖓᓂᒃ ᐊᓪᓚᓂᕐᒥᒃ ᐊᒻᒪᓗ ᐊᓪᓚᓂᐊᕆᐊᒥᒃ ᐱᓀᓗᑕᓕᓐᓄᑦ. ᐊᑐᕐᓯᒪᔭᖃᑦᓯᐊᑐᖅ, ᐱᓇᓱᐊᕐᓂᒥᒃ ᐃᓱᒪᕐᓱᓯᐊᖕᖏᑐᓂᒃ ᐃᓕᓐᓂᐊᑎᑦᓯᓂᕐᒥᒃ ᖃᐅᔨᓴᕐᓂᒥᒃ ᓄᓇᕕᒻᒥ ᐃᓕᓐᓂᐊᑎᓂᒃ ᐊᒻᒪᓗ ᐃᑲᔪᓲᖑᑦᓱᓂ ᐱᐊᕋᕐᓂᒃ ᓄᓇᕕᒻᒥᐅᔭᓂᒃ ᑐᐊᕚᓪᒥ.

ᐊᑦᔨᖑᐊᒦᑦᑐᑦ, ᑕᓕᕐᐱᐊᓂᑦ ᓴᐅᒥᐊᓄᑦ: ᔨᐊᓂ ᒪᒃᒪᓇᔅ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᐱᑕᑲᓪᓚᒃ); ᑲᑦᓖᓐ ᐃᐊᕆᒃᓴᓐ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᐅᓪᓗᕆᐊᖅ); ᒫᒃᓰᒻ ᕉᓲ, ᐃᓕᓐᓂᐊᕈᑎᑦᓴᓕᐅᕐᓂᒧᑦ ᐃᓱᐊᕐᓭᔨ ᔮᓂᒻᒪᕆᒃ, ᐅᓪᓗᕆᐊᖅ, ᑭᓪᓘᑕᖅ ᐊᒻᒪᓗ ᐊᓯᒪᐅᑦᑕᖅ; ᑖᒥᓂᒃ ᑎᓯᐊ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᔮᓂᒻᒪᕆᒃ), ᑌᐊᓇ ᒪᒃᓕᐊᕋᓐ-ᑭᐊᓂᑎ, ᑐᑭᓱᐊᑦᑎᓯᔨ ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᓐᓂᒃ ᐱᓇᓱᐊᕐᑕᐅᔪᓂᒃ (ᐊᒻᒪᓗ ᖃᐅᔨᒪᔨ ᐱᑕᑲᓪᓚᒃ, ᐊᔭᒍᑕᖅ, ᑕᕐᓴᑲᓪᓚᒃ); ᐹᓪ ᒪᑭᐅᓗ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᐊᔭᒍᑕᖅ), ᑯᔨᔅ ᒪᒃᕕᐅᓴᓐ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᐅᓪᓗᕆᐊᖅ). ᓄᐃᑕᖕᖏᑐᑦ: ᕕᑎᕆ ᑐᐲ, ᐃᓚᑦᔪᒍᓱᓐᓂᒧᑦ ᐃᓕᓐᓂᐊᕕᒻᒥ ᖃᐅᔨᒪᔨ ᐃᓕᓐᓂᐊᑎᑦᓯᔨ (ᐃᓱᒻᒪᓴᕐᕕᒃ).