ᐊᔭᒍᑕᒃ ᐃᓕᓐᓂᐊᕕᒃ, ᑕᓯᐅᔭᒥ, ᐃᓕᓐᓂᐊᕕᒻᒥ ᓱᖃᑦᓯᓂᕆᓯᒪᔭᖏᑦ ᐊᓕᐊᒋᔭᐅᓪᓚᕆᑦᓯᒪᔪᑦ ᐃᓄᓐᓄᑦ ᐃᓕᓐᓂᐊᓂᒃᑯᑦ ᓱᖃᑦᓯᑎᑕᐅᓂᖃᕐᓯᒪᒻᒪᑕ ᖃᕆᑕᐅᔭᒨᕐᑐᓕᕆᓂᕐᒥᒃ ᐊᒻᒪᓗ ᐃᑯᒪᐅᑎᒨᕐᑐᓂᓪᓗ ᐃᒻᒥᓂᒃ ᐃᖏᕐᕋᔫᓕᕆᑦᓱᑎᒃ ᓱᑯᐃᔦᓂᒃᑯᑦ ᐊᒻᒪᓗ ᓴᓇᑦᑐᓴᐅᑎᓂᒃᑯᑦ ᒪᓕᒐᓐᓂᒃ ᐊᑐᕐᓱᑎᒃ.

ᓱᖃᑦᓯᑎᑕᐅᓂᕆᔭᕕᓂᖏᑦᑕ ᐃᓚᕕᓂᖏᑦ, ᐱᖓᓱᐃᑦ ᖃᐅᔨᓴᕐᑏᑦ ᐊᒻᒪᓗ ᒪᕐᕉᒃ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᒃ ᖃᓪᓗᓈᑦ ᓄᓇᖓᓐᓂ ᐱᓯᒪᔪᑦ ᐃᑲᔪᕐᓯᒋᐊᕐᑐᑐᕕᓃᑦ ᐃᓕᓐᓂᐊᑎᑦᓯᔨᓂᑦ ᐃᓕᓐᓂᐊᑎᑦᓯᒐᓚᑦᓱᑎᒃ ᐃᓕᓐᓂᐊᑎᑦᓯᒍᑎᑦᓴᐅᑐᐃᓐᓇᕆᐊᓕᓐᓂᑦ ᐆᑦᑐᕋᕐᑎᓯᑦᓱᑎᒃ ᑌᒣᓘᕐᓂᒥᒃ.

ᐃᓕᓐᓂᐊᑎᑦᓯᓃᑦ ᐋᕐᕿᓱᐃᓂᒃᑯᑦ ᐊᒻᒪᓗ ᐃᑯᒪᐅᑎᒨᕐᑐᓂᓪᓗ ᐃᒻᒥᓂᒃ ᐃᖏᕐᕋᔫᓕᕆᓂᖅ ᐳᕐᑐᓂᕐᓴᓄᑦ, ᓱᓕᔫᖅ?

ᑲᑎᓚᐅᕐᓯᒪᔪᒍᑦ ᐅᖃᕐᑐᕕᓂᖅ ᑮᕋᓂ ᑎᕆᓪᓗᓕᐅᑦ 2023-ᖑᑎᓪᓗᒍ, ᑕᓯᐅᔭᒥ. ᒪᓗᓐᓇᓚᐅᕐᓯᒪᔪᖅ ᐊᒥᓱᓂᑦ ᐱᓇᓱᐊᕋᑦᓴᓂᑦ ᐆᑦᑐᕋᕐᓂᖃᕈᒪᑦᓱᓂ ᐊᒻᒪᓗ ᐱᒋᐊᖕᙰᕋᓱᐊᓚᐅᕐᓯᒪᔪᖅ ᐊᒥᓱᓂᑦ ᓱᖃᑦᓯᐅᑎᑦᓴᓂᑦ ᐃᓚᐅᓕᖁᑦᓱᒋᑦ ᐊᒻᒪᓗ ᐱᒍᒪᓂᖃᖁᑦᓱᒋᑦ ᐃᓕᓐᓂᐊᑎᖁᑎᖏᑦ.

ᐅᖃᕐᑐᕕᓂᖅ ᐊᓕᐊᒋᔭᖃᓲᖅ ᐊᑦᔨᒌᖕᖏᑐᓂᑦ ᑐᖕᖓᕕᐅᔪᓂᑦ ᐅᐊᕈᑦᔨᑐᐃᓂᕐᒥᒃ ᐊᑕᐅᑦᓯᑯᑦ ᐃᓕᓐᓂᐊᑎᑕᒥᓂᑦ ᐃᓱᒪᒋᔭᖃᕐᓱᓂ ᐊᓕᐊᒋᔭᐅᒍᒪᓂᖃᕐᓱᓂ. ᓴᓇᑦᑐᓴᐅᑎᓕᕆᓂᕐᒥᒃ ᐃᓕᓐᓂᐊᑎᑦᓯᓂᒃᑯᑦ ᓄᑖᓂᑦ ᐱᓇᓱᐊᕋᑦᓴᓂᑦ ᐅᖃᐅᓯᕐᑎᒍᑦ, ᐱᕐᖁᓯᐅᓯᒪᔪᑎᒍᑦ ᐊᒻᒪᓗ ᖃᓄᐃᓘᕐᑕᐅᕆᐊᖃᕐᓂᖏᓐᓄᑦ ᐃᑯᒪᐅᑎᒨᕐᑐᐃᑦ ᐃᒻᒥᓂᒃ ᐃᖏᕐᕋᔫᓕᕆᓂᒃᑯᑦ: ᑕᒪᒃᑯᐊᓕᒫᑦ ᐃᓘᓐᓇᓯᐊᑎᑦ ᐱᑐᑦᓯᒪᖃᑎᒌᑦᑑᔮᖕᖏᑐᑦ ᑐᖕᖓᕖᑦ ᒫᓂ ᐱᑐᑦᓯᒪᓂᓖᑦ ᑕᒡᒐᓂ.

“ᒫᓐᓇ ᖃᐅᔨᒪᓕᕐᑐᑦ ᓱᓇᐅᒻᒪᖔᑕ ᖃᓂᑦᑐᒨᕐᑐᓂ ᑲᒪᐅᑏᑦ ᐊᒻᒪᓗ ᖃᓂᖕᖏᑐᒨᕐᑐᓂ ᑲᒪᐅᑏᑦ, ᐆᑦᑑᑎᒋᓗᒍ. ᑐᑭᓯᒪᔪᑦ, ᐃᓕᓐᓂᐊᓂᖃᕐᓯᒪᒐᒥᒃ. ᑕᒪᓐᓇ ᐃᓕᓐᓂᐊᕈᒪᓂᖃᕐᑎᓯᓲᖅ ᐃᓕᓐᓂᐊᑎᓂᑦ ᐱᑐᑦᓯᒪᐅᑎᑎᑦᓯᓂᒃᑯᑦ ᓱᑯᐃᔦᓂᕐᒥᒃ ᐊᒻᒪᓗ ᐃᑯᒪᐅᑎᒨᕐᑐᓕᕆᓂᕐᒥᒃ, ᐃᑯᒪᐅᑎᒨᕐᑐᓕᕆᓂᕐᒥᒃ ᐊᒻᒪᓗ ᓱᑯᐃᔦᓂᕐᒥᒃ.”

ᓯᕗᓪᓕᐹᒥ ᐊᕐᕌᒍᒥ ᐱᒋᐊᕐᑕᐅᔪᕕᓂᖅ ᑖᓐᓇ ᖃᐅᔨᑎᑦᓯᓂᖃᕐᑐᕕᓂᐅᑦᓱᓂ ᐃᑯᒪᐅᑎᒨᕐᑐᓂᑦ ᐃᒻᒥᓂᑦ ᐃᖏᕐᕋᔫᓕᕆᐅᑎᓂᑦ ᐃᓕᓐᓂᐊᑎᒥᓄᑦ. ᐊᓯᖏᓐᓄᑦ ᐃᓕᓐᓂᐊᑎᑦᓯᓂᒃᑯᑦ ᓱᖃᑦᓯᑎᑦᓯᓂᒃᑯᑦ, ᐱᒻᒪᕆᐅᑎᑦᓯᓂᖃᓲᖅ ᐊᔪᕆᓭᓂᒃᑯᑦ ᐃᓕᓐᓂᐊᑎᑦᓯᒍᓯᕆᓲᒥᓂᒃ ᐃᓕᓐᓂᐊᑎᖁᑎᒥᓄᑦ:

“ᑌᒣᓘᕐᓱᓂ, ᐃᓱᒪᒋᐊᖃᕐᓇᑐᖅ, ᐃᓘᓐᓀᒍᑦ, ᐃᓚᖏᑦ ᐃᓕᓐᓂᐊᑏᑦ ᐃᒻᒥᓂᕿᕈᒪᓂᖃᓲᖅ. ᑐᑭᓯᑦᓴᐅᑎᒋᑦᓱᑎᒃ ᓱᑲᑦᑐᒥ. ᐊᓯᖏᑦ ᐊᑯᓃᕐᑐᒥ ᐃᓕᒐᓱᐊᕐᑎᓗᒋᑦ, ᑌᒣᑦᓱᒍ ᓱᒃᑫᑐᒥᒃ ᐃᓕᓐᓂᐊᑎᑦᓯᒋᐊᖃᕐᓇᑐᖅ.”

ᑌᒪ ᐳᒃᑭᓕᒋᐊᕆᒋᐊᖃᕐᕿᑕ ᓂᕆᐅᓐᓂᕆᔭᕗᓐᓂᑦ ᓴᓇᑦᑐᓴᐅᑎᓕᕆᓂᕐᒥᒃ ᐊᒻᒪᓗ ᓱᑯᐃᔦᓂᕐᒥᒃ? ᐊᐅᑲ! ᑐᖕᖓᕖᑦ ᐃᓕᓐᓂᐊᑕᐅᓲᑦ ᑐᑭᒧᐊᕐᑎᓯᒍᑎᐅᓲᑦ ᐱᓇᓱᐊᕐᑕᐅᔪᓂ ᐊᓂᒎᑎᑎᑦᓯᒍᑎᐅᑦᓱᑎᒃ ᐊᒻᒪᓗ ᐊᔪᕆᓴᐅᑎᐅᑦᓱᑎᑦ.

ᐊᓕᐊᒋᔭᓖᑦ, ᑐᑭᓯᒍᒪᓂᓖᑦ ᐊᒻᒪᓗ ᐃᒻᒥᓂᑦ ᐅᑉᐱᒋᔭᖃᑦᓯᐊᓂᓖᑦ: ᑖᓐᓇ ᐃᓕᓐᓂᐊᑎᑦᓯᔨᒃ ᐅᔭᒍᑕᐅᑉ ᐃᓕᓐᓂᐊᕕᖓᓂ ᓇᕝᕚᓂᖃᕐᓯᒪᔪᖅ ᖃᓄᐃᓘᕐᓂᖃᕆᐊᒥᒃ ᐃᓕᓐᓂᐊᑏᑦ ᐳᕐᑐᓂᕐᓴᒥ ᐃᓕᓐᓂᐊᕇᓲᑦ ᑐᑭᓯᒪᓂᕐᑖᓱᑎᒃ ᐃᓅᓯᕐᒥ ᐱᔪᓐᓇᓂᕐᑖᓂᒃᑯᑦ, ᖃᐅᔨᒪᓂᕐᑖᓂᒃᑯᑦ ᐊᒻᒪᓗ ᖃᓄᐃᓘᒐᓱᐊᕆᐊᒥᒃ ᒫᓐᓇᐅᔪᖅ ᐱᐅᓯᐅᓲᓂᑦ.