ᑰᑦᔪᐊᖅ (ᓅᕕᒻᐱᕆ 30, 2017) – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᓐᓂᒥᓂᒃ ᑐᓴᕐᑎᓯᒍᒪᕗᖅ ᓯᐊᔭ ᒫᒃ ᒪᖏᐅᒥᒃ ᓂᕈᐊᕐᑕᐅᓚᐅᕐᑐᒥᒃ 2017-ᒥ ᐁᑦᑐᑕᐅᔪ ᓄᓇᖃᕐᖄᓯᒪᔪᑦ ᐃᓕᓐᓂᐊᓂᕐᒧᑦ: ᓄᓇᖃᕐᖄᓯᒪᔪᑦ ᐃᓕᓐᓂᐊᑎᑦᓯᔩᑦ ᑐᓂᔭᐅᓂᖓᓄᑦ ᐃᓗᕐᖁᓯᐅᑉ, ᐅᖃᐅᓯᐅᑉ ᐊᒻᒪᓗ ᐱᐅᓯᑐᖃᕐᒨᓕᖓᔪᓂᒃ ᐁᑦᑐᑕᐅᔪᖅ. ᐱᒻᒪᕆᒧᑦ ᐊᑦᔨᐅᖏᑦᑐᖅ ᓵᓚᖃᐅᑎ ᐁᑦᑑᑎᐅᓛᕐᖁᖅ ᓯᐊᔭᒧᑦ ᓂᕿᑦᓯᑐᓂ ᑏᓯᒻᐱᕆ 1-ᒥ, ᑲᓇᑕᓕᒫᒥ ᓄᓇᖃᖄᓯᒪᔪᓂᒃ ᐃᓕᓐᓂᐊᑎᑦᓯᔨᓂᒃ ᐁᑦᑐᑐᐃᓂᖃᓕᕐᐸᑕ ᑲᑎᓐᓂᖓᓐᓂ, ᒪᓐᑐᔨᐊᒥ.

“ᓄᓇᕕᒻᒥ, ᐃᓄᐃᑦ ᐃᓕᓐᓂᐊᑎᑦᓯᔩᑦ ᐱᓇᓱᐊᕐᓂᖓ ᐱᒻᒪᕆᐅᕗᖅ ᑐᑭᓯᑎᑦᓯᒋᐊᓪᓚᓂᕐᒧᑦ ᐅᕕᒃᑲᓂᒃ ᓄᓇᕕᒻᒥᐅᓂᒃ ᑭᓇᐅᓂᖏᓐᓂᒃ, ᐅᖃᐅᓯᕐᒥᒃ ᐊᒻᒪᓗ ᐃᓗᕐᖁᓯᖓᓂᒃ. ᐅᐱᒍᓱᒻᒪᕆᑉᐳᒍᑦ ᐱᓇᓱᐊᑦᓯᐊᓂᖓᓂᒃ ᓯᐊᔭ ᒫᒃ ᒪᖏᐅᑉ ᐊᒻᒪᓗ ᐃᑲᔪᕐᓯᓂᖓᓄᑦ ᓄᓇᖃᕐᖄᓯᒪᔪᑦ ᐃᓕᓐᓂᐊᑎᑦᓯᓂᖓᓄᑦ ᐃᓕᑕᕐᓯᔭᐅᑎᓪᓗᒋᑦ ᐱᒻᒪᕆᒻᒥᒃ ᑲᓇᑕᓕᒫᒥ ᐃᓕᑕᕐᓯᔭᐅᓂᖓᓄᑦ” ᐅᖃᕐᑐᖅ ᐋᓚᓯ ᓈᓚᑦᑑᔭᖅ, ᑲᑎᕕᒃ ᐃᓕᓴᕐᓂᓕᕆᓂᕐᒥ ᐊᖓᔪᕐᖄᖑᓚᐅᕐᑐᖅ.

ᓯᐊᔭ ᒫᒃ ᒪᖏᐅᖅ ᒫᓐᓇ ᐃᓕᓐᓂᐊᑎᑦᓯᔨ ᓄᕝᕕᑎ ᐃᓕᓐᓂᐊᕕᖓᓂ, ᐃᕗᔨᕕᒻᒥ. ᐃᓕᓐᓂᐊᑎᑦᓯᔨᐅᓂᕐᒥ, ᐃᓕᓐᓂᐊᕈᑎᑦᓴᓕᐅᖏᓐᓇᓲᖅ ᐃᓕᓐᓂᐊᑎᒥᒃ ᐱᒋᐅᕐᑎᓯᓂᕐᒥᒃ ᐃᓱᒪᖃᕐᓱᓂ. ᐊᖓᔪᕐᖄᕆᔭᐅᔪᓂᒃ ᐃᓚᐅᑎᑦᓯᓯᐊᕋᓱᐊᕐᓂᒥᒃ ᐱᒐᓱᐊᓲᖅ. ᐃᓚᑦᔪᒍᓱᓐᓂᖓ ᐃᓅᖃᑎᐅᑦᓯᐊᕈᓐᓇᓂᖓᓗ ᐃᓕᓐᓂᐊᑎᑦᓯᔨᐅᓂᖓᓄᑦ ᐱᒻᒪᕆᐅᑎᑦᓯᕗᖅ ᐊᓯᑦᔨᕈᓐᓇᓯᐊᕐᓂᖓ ᐃᓕᓐᓂᐊᑏᑦ ᐊᑦᔨᒌᖕᖏᑐᓂᒃ ᐱᒋᐊᓕᖏᓐᓂᒃ ᐃᑲᔪᕐᑐᓂᖃᕐᓱᓂᓗ ᐃᓕᓐᓂᐊᑎᓂᒃ ᐱᕈᕐᐸᓕᐊᓂᖏᓐᓄᑦ ᐃᓕᑦᓯᕙᓪᓕᐊᓂᖏᓐᓄᓗ ᐅᐃᒪᔮᕐᓂᖃᖕᖏᑐᒥ ᓇᔫᑎᑎᑦᓯᓱᓂ.

ᐃᓕᓐᓂᐊᕈᑎᑦᓴᓕᐅᕐᓂᒥᒃ ᐃᓚᐅᑦᓯᐊᓱᓂ, ᓯᐊᔭ ᐱᓇᓱᐊᖃᑎᖃᓲᖑᒻᒥᔪᖅ UQAT-ᑯᓐᓂᒃ ᐃᓕᓐᓂᐊᕈᑎᑦᓴᓂᒃ ᓴᓇᖃᑎᖃᕐᓱᓂ ᐊᓯᐅᑎᑦᓯᑌᓕᓂᕐᒧᑦ ᓲᖑᓯᑎᑦᓯᓂᕐᒧᓗ ᐃᓄᑦᑎᑐᑦ ᐅᖃᐅᓯᖓᓂᒃ. ᐃᓚᐅᑦᓯᐊᓱᓂᓗ UQAT-ᑯᑦ ᐊᐅᓚᑦᓯᖃᑎᒌᓐᓂᖓᓂᒃ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓄᑦ, ᓯᐊᔭ ᐱᓇᓱᐊᖃᑎᖃᓲᖅ ᐱᓇᓱᑦᑎᐅᖃᑎᒥᓂᒃ ᐳᕕᕐᓂᑐᒥ ᓴᓇᓂᕐᒥᒃ ᐃᓕᓐᓂᐊᓂᕐᒥ ᐅᓕᓀᒍᓯᓕᐅᕐᓂᒧᑦ ᐃᓄᑦᑎᑐᑦ ᐅᖃᐅᓯᖓᓂᒃ ᐊᒻᒪᓗ ᑐᑭᓯᐅᕆᓂᕐᒥᒃ. ᓄᓇᓕᓕᒫᖑᖃᑎᒌᓂ, ᓯᐊᔭ ᐃᓚᑕᕆᔭᐅᓂᖃᕐᒥᔪᖅ ᖃᐅᔨᒪᓂᕐᒥᓄᑦ ᐃᓄᐃᑦ ᐃᓗᕐᖁᓯᖓᓂᒃ, ᐱᐅᓯᑐᖃᖓᓂᒃ ᐊᒻᒪᓗ ᐅᖃᐅᓯᖓᓂᒃ, ᐱᓇᓱᐊᒐᕆᕙᑦᑕᖓ ᐆᒪᑎᒐᓱᐊᕐᓱᒍ ᐃᕗᔨᕕᒻᒥ ᐊᓯᖏᓐᓂᓗ ᐃᓄᐃᑦ ᓄᓇᓕᖏᓐᓂ.

ᐃᓕᓐᓂᐊᑎᑦᓯᔨᐅᒍᑎᑖᕐᓯᒪᔪᖅ 1998-ᒥ ᐃᓕᑕᕐᓯᔭᐅᒍᑎᑖᕐᓯᒪᑦᓱᓂᓗ ᐃᓕᓐᓂᐊᕕᕐᔪᐊᒥ ᐱᔭᕇᕈᑎᑖᓚᐅᕋᓂ ᐃᓕᑕᕆᔭᐅᒍᑎᒥᒃ ᐃᓕᓐᓂᐊᕋᑕᖕᖏᑐᑦ ᐃᓕᓐᓂᐊᓂᖓᓂ ᐊᒻᒪᓗ ᐳᒃᑭᓂᕐᓴᒥ ᐃᓕᓐᓂᐊᑎᑦᓯᓂᕐᒥᒃ ᑕᕐᕋᒥᐅᑦ ᓄᓇᖓᓐᓂ ᐃᓕᓐᓂᐊᕕᕐᔪᐊᖓᓂᑦ ᑯᐯᒻᒥ ᐊᐱᑦᓯᐱ-ᑎᒥᔅᑭᒣᖕ (UQAT). ᓯᐊᔭ ᐃᓕᓐᓂᐊᑎᑦᓯᔨᐅᓕᕐᑐᖅ ᐊᑯᓂ ᐊᒻᒪᓗ ᐃᓕᓐᓂᐊᕈᑎᓕᕆᓂᕐᒥ ᐃᑲᔪᕐᑎᐅᓱᓂ. ᐱᓇᓱᐊᕐᓯᒪᓕᕐᑐᖅ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐃᓕᓴᕐᓂᓕᕆᓂᖓᓂ ᓄᓇᕕᒻᒥ, 1989-ᒥᓂᑦ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ

ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

publicrelations@kativik.qc.ca