ᓇᐅᓕᒫᒧᑦ ᓴᓇᓂᕐᒧᑦ, ᓯᑕᒪᐅᔪᖕᖏᒐᕐᑐᓗᑐᕐᓂᒃ ᐱᒻᒪᕆᐅᑎᓂᒃ ᐊᓪᓗᕆᐊᕐᖃᓂᖃᕐᖁᖅ ᓯᕗᓪᓕᐹᖅ ᐳᐊᕐᕆᑎ ᓄᓇᒥᒃ ᖃᓗᓯᖕᖏᓂᖓᓂ. ᐱᒋᐊᕐᓱᒍ ᑮᓇᐅᔭᓂᒃ ᐱᒍᒪᐅᑎᓕᐅᕐᓂᒥᒃ ᑎᑭᑦᓱᒍ ᐱᓇᓱᑦᑎᓯᒍᑎᐅᑉ ᐊᑎᓕᐅᕐᕕᐅᓂᖓᓄᑦ, ᑕᑯᓐᓇᖏᑦᑕᑎᓐᓂᒃ ᐃᓱᒣᓐᓇᖅ ᐱᓇᓱᑦᑐᖃᓲᖑᕗᖅ. ᑌᒪ ᐃᓱᒪᓕᕐᒥᒋᑦ ᐃᓪᓗᓕᐅᕐᓂᒥᒃ ᓄᓇᕕᐅᑉ ᐃᓗᐊᓂ. ᐃᓘᓐᓇᓂ ᐊᑦᔨᒋᐅᖏᓪᓗᑐᑦᓯᐊᒪᑦ!
ᑖᑦᓱᒪᓂ ᐅᐃᒍᓕᕇᓂ ᐱᖓᓱᐃᒍᑦᓱᑎᒃ ᐊᒡᓚᓯᒪᔪᓂ ᓴᓇᒋᐊᒥᒃ ᓄᓇᕕᒻᒥ, ᐅᖄᒍᑎᖃᕐᓂᐊᑐᒍᑦ ᒪᑯᓂᖓ ᐱᖓᓱᐃᓂᒃ ᐱᑦᔪᑕᐅᔪᓂᒃ ᐊᒡᒍᓯᒪᑦᓱᑎᒃ: ᓇᓪᓕᑳᒐᕆᓗᒍ ᓇᓪᓕᐊᓂᒃ ᓂᕈᐊᕐᑕᒥᓂᒃ, ᑐᑭᓕᐅᕐᓗᒍ ᐱᔭᑦᓴᖅ, ᐊᒻᒪᓗ ᓱᒃᑯᑎᑦᓯᑌᓕᓂᒥᒃ ᐊᒻᒪᓗ ᐱᒪᓗᒋᑦ ᐃᓪᓗᖁᑎᐅᑉ ᐃᓗᒥᐅᑕᖏᑦ.
ᓄᐃᓂᐊᕐᑐᖅ ᐅᓇ ᓯᕗᓪᓕᐹᒍᓗᓂ ᓄᐃᑎᑕᐅᔪᖅ ᐊᓪᓚᓯᒪᓗᓂ ᑖᑦᓱᒪᓂ ᐃᓚᒃᖁᐊᕇᓂ.
ᓄᓇᕕᒃ ᑕᑯᓐᓇᑕᐅᓲᖑᕗᖅ ᐊᖏᔪᐊᓘᖁᑎᒋᔭᐅᑦᓱᓂ ᓄᓇᖓ, ᐊᖏᔪᕐᔪᐊᕌᓗᒃ ᐊᑐᕐᕕᓴᐅᑦᓱᓂ ᐆᒪᔪᕐᓂᐊᓂᕐᒥᒃ ᐊᒻᒪᓗ ᐃᖃᓗᓐᓂᐊᓂᕐᒥᒃ, ᓴᐳᒻᒥᔭᐅᑦᓱᓂ ᓄᓇᒥᒃ ᓂᐅᕐᕈᓯᕐᑎᓄᑦ ᐱᕙᓪᓕᐊᕕᐅᓂᕐᒥᒃ. ᑌᒣᒻᒪᑦ ᐊᔪᒉᒋᔭᐅᑐᐃᓐᓇᕆᐊᖃᖁᖅ ᐃᓪᓗᓕᐅᕐᕕᓴᒥᒃ ᓂᕈᐊᕐᓂᖅ ᐃᓱᐃᓗᑕᖃᕈᓐᓇᒪᑦ. ᓱᓕᓗᓂ, ᑕᒪᓐᓇ ᐃᓱᒪᒋᔭᑦᓴᐅᖏᑦᑐᒥᒃ ᓂᐊᖁᖕᖑᓇᕐᑐᖅ.
ᐱᓂᐊᕐᓂᓕᕆᔩᑦ ᑲᒪᒍᑎᖏᑦ
“ᓄᓇᑖᕐᓂᖅ ᖃᒻᒥᑯᑦ ᐃᓱᐃᓗᑕᓪᓚᕆᖕᖑᓯᒪᔪᖅ. ᓄᓇᓕᓐᓂ ᐃᓘᓐᓇᖏᓐᓂ ᐃᓂᑦᓭᓂᐊᕐᑐᑦ, ᓴᓇᕕᑦᓴᓂᒃ, ‘ᑳᑎᑯᔨ I-ᒥ’ ᓄᓇᒥᒃ ᐊᑐᕆᐊᓕᓐᓂᒃ,” ᑐᑭᓯᑎᑦᓯᕗᖅ ᓯᐊᔭ ᐋᓗᐸ, ᐊᖓᔪᕐᖄᖅ ᑲᑎᕕᒃ ᐃᓕᓴᕐᓂᓕᕆᔨᒃᑯᓂ.
ᑕᒪᓐᓇ ᐃᓚᖓᓗᒍ ᖃᓄᐃᓕᖓᑦᓯᐊᓂᖓᓄᑦ, ᑕᑯᑫᓐᓇᑕ ᐊᒥᓲᖕᖏᑐᓂᒃ ᓱᓪᓕᑎᓂᒃ. ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᖅ (JBNQA), ᐊᑎᓕᐅᕐᕕᐅᓯᒪᔪᖅ 1975-ᒥ, ᐊᕕᑦᑐᑎᑦᓯᓯᒪᕗᖅ ᓄᓇᕕᒻᒥᒃ ᐱᖓᓱᐃᓄᑦ ᐊᑦᔨᒌᖕᖏᒍᑎᓄᑦ. “ᑳᑎᑯᔨ I-ᒥ” ᓄᓀᑦ, ᓯᐊᔭᐅᑉ ᐅᖃᑫᓐᓇᑕᖏᑦ, ᐱᒋᔭᐅᔪᑦ ᐃᓄᐃᑦ ᓄᓇᒥᒃ ᑎᒍᒥᐊᕐᑎᖏᓐᓄᑦ ᑎᒥᐅᔪᓄᑦ. ᑖᒃᑯᑑᑦᓱᑎᒃ ᐱᔪᓐᓇᓂᖃᕐᕕᒋᒻᒥᓱᒋᑦ ᐆᒪᔪᕐᓂᐊᓂᕐᒥᒃ ᐊᒻᒪᓗ ᐃᖃᓗᓐᓂᐊᓂᕐᒥᒃ, ᑖᒃᑯᐊ ᓄᓀᑦ ᑖᒃᑯᑑᕗᑦ JBNQA-ᒥ ᐃᓚᐅᔪᑦ ᐱᕕᖃᕐᑎᑕᐅᕕᑐᐊᖏᑦ ᓴᓇᓂᕐᒥᒃ. ᑭᓯᐊᓂ, ᑳᑎᑯᔨ I-ᒥ ᓄᓀᑦ, ᐊᕕᑦᑐᓯᒪᔪᑦ 14-ᓄᑦ ᓄᓇᓕᓐᓄᑦ, ᓄᐃᑕᑦᓯᔪᑦ 1%-ᑐᐃᓐᓇᒥᒃ ᓄᓇᕕᐅᑉ ᓄᓇᖓᓄᑦ ᐊᖏᓂᓕᒻᒧᑦ 1,082,000 km²-ᓂᒃ (ᐱᕕᖓ ᐆᒪᔪᕐᓂᐊᓂᕐᒥᒃ, ᐃᖃᓗᓐᓂᐊᓂᕐᒥᒃ, ᒥᑭᒋᐊᕐᓂᐊᓂᕐᒥᒃ ᑐᑭᒧᐊᑦᑎᓯᓂᕐᒧᑦ ᑲᑎᒪᔨᐊᐲᑦ, 2025-ᒥ).
ᑭᓯᐊᓂ ᐊᖏᖃᑎᒌᒍᑎᓕᐅᕐᓃᑦ ᐊᒻᒪᓗ ᐱᓂᐊᕐᓂᓕᕆᔩᑦ ᑐᑭᑖᕐᓂᖏᑦ ᐊᑯᓂᕆᓲᑦ. ᓄᓇᕕᒃ ᑕᑯᑦᓱᒍ, ᓱᒃᑫᑐᕋᑌᑦ ᐊᖑᒪᓗᑲᑦᓱᑎᒃ ᐃᓄᖃᕐᑎᒋᓂᐅᑉ ᐊᒻᒪᓗ ᐊᕙᑎᕆᔭᐅᔪᑦ ᐊᓯᑦᔨᕈᑎᖏᓐᓂᒃ. ᓱᓕᐅᒻᒥᔪᖅ, ᐃᓂᑦᓴᖅ ᑳᑎᑯᔨ I ᓄᓇᖓᑕ ᐃᓗᐊᓃᒐᓗᐊᕐᐸᑦ, ᐊᒥᓱᐃᓂᒃ ᐱᓪᓗᑯᒋᐊᓕᓐᓂᒃ ᐊᕝᕕᐊᓗᑕᖃᕐᒥᔪᖅ ᐱᔭᕆᐊᑦᑐᐃᔪᓂᒃ ᓴᓇᒍᒪᔪᑦ ᐱᓇᓱᑦᑕᖏᓐᓂᒃ.
“ᓄᓇᒥᒃ ᑎᒍᒥᐊᕐᑏᑦ ᑎᒥᖏᑦᑕ ᑲᑐᑦᔨᖃᑎᒌᓐᓂᖓ ᐅᓪᓗᒥᐅᑎᓪᓗᒍ ᐊᖏᖃᑎᖃᕋᓱᐊᕐᑐᖅ ᑲᕙᒪᒃᑯᓂᒃ ᐃᓚᒋᐊᖁᔨᑦᓱᓂ ᑳᑎᑯᔨ I-ᒥ ᓄᓇᑦᑎᓂᒃ, ᐃᓄᐃᑦ ᐊᒥᓱᖕᖑᐸᓪᓕᐊᒪᑕ ᐃᓂᑦᓭᕈᑎᓕᕋᑦᑕᓗ”
ᐱᓪᓗᑯᒋᐊᓖᑦ ᐃᓱᐃᓗᑌᑦ
ᑕᑯᑦᓱᓂ ᑐᓴᕐᑎᓯᒍᑎᒥᒃ ᐋᑕᕕᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᕕᕈᐊᕆᐅᑎᓪᓗᒍ 2024-ᒥ (Nunatsiaq News, 2024-ᒥ) ᐃᓪᓗᓭᑦ ᓴᓇᔭᐅᓂᖓ ᓄᓇᕕᒻᒥ ᒪᕐᕉᓂᒃ ᐊᕝᕕᐊᓗᑦᓯᐅᑏᓐᓂᒃ ᐊᐳᐊᔪᖅ: ᐊᐅᑉᐸᓕᐊᔪᒥᒃ ᓄᓇᐅᑉ ᐃᑭᐊᖓᓂ ᖁᐊᖑᑦᓭᓇᕐᑐᒥᒃ ᐊᒻᒪᓗ ᓯᐅᕋᖃᖕᖏᓂᕐᒥᒃ.
ᐊᒥᓱᐊᓗᓐᓂᒃ ᐃᓂᓕᒃ ᓴᓇᕕᑦᓴᐅᖏᑦᑐᓂᒃ, ᐃᒪᖅ ᑲᑎᕐᓱᓲᖑᒻᒪᑦ ᐅᐱᕐᖓᓴᒃᑯᑦ, ᓄᓇᐅᑉ ᐃᑭᐊᖓᓂ ᖁᐊᖑᑦᓭᓇᕐᑐᖅ ᐊᐅᑉᐸᓕᐊᓕᕐᒪᑦ… ᐅᕝᕙᓘᓐᓃᑦ ᐱᐅᓯᑐᖃᕐᑎᒍᑦ ᒪᙯᑦᑏᑦ ᐊᕐᖁᑎᓪᓗᐊᖓᓃᒻᒪᑕ. ᑕᒪᒃᑯᓂᖓ ᐃᓱᒪᒋᐊᖃᕐᒥᔪᒍᑦ.
ᑕᒪᒃᑯᐊ ᐊᕝᕕᐊᓗᑌᑦ ᐊᑦᔨᒌᖕᖏᑐᑦ ᐊᓪᓚᒍᑕᐅᓯᒪᑦᓯᐊᓕᕋᓗᐊᕐᑎᓗᒋᑦ, ᐊᓯᖏᓐᓂᒃ, ᓱᓕ “ᓂᕆᐅᓐᓇᖏᑦᑐᓂᒃ” ᐊᕝᕕᐊᓗᑕᖃᓲᖑᒻᒥᔪᖅ ᓇᓗᓀᔦᔪᖃᓕᕐᒪᑦ:
“ᖃᓄᖅ ᐃᒪᕐᓗᑯᐃᑦ ᐊᒻᒪᓗ ᐃᒪᑦᓯᐊᑉ ᐊᐅᓚᑕᐅᓂᖓ ᐅᓪᓗᒥ ᑕᑯᓐᓇᓱᒍ, ᐃᓂᑦᓭᑦ ᐊᒥᓱᑦ ᐅᐸᒐᑦᓴᐅᔭᖏᒻᒥᔪᑦ ᓴᓇᕕᒋᓚᖓᓗᒋᑦ. ᑕᒪᓐᓇ ᐱᑦᔪᑎᓕᒃ ᐊᖏᔪᐊᓗᓐᓂᒃ ᐃᓂᓂᒃ ᐊᑐᕆᐊᖃᓲᖑᓂᑦᑎᓂᒃ ᓴᓇᕕᒋᓗᒋᑦ, ᓄᓇᒃᑰᔫᑦ ᐱᖓᓱᑦ ᑎᑭᐅᑎᒍᓐᓇᓂᐊᕐᒪᑕ ᐃᓪᓗᔪᐊᒧᑦ ᐃᒥᕐᑕᕆᐊᕐᑐᓗᑎᒃ, ᐃᒪᕐᓗᑯᐃᔦᓗᑎᓪᓗ ᐊᒻᒪᓗ ᐅᕐᓯᑐᐃᓗᑎᒃ,” ᑐᑭᓯᑎᑦᓯᔪᖅ ᔨᕉᒻ ᑎᐋᓐ, ᑐᑭᒧᐊᑦᑎᓯᔨ ᐱᖁᑎᑎᒍᑦ ᐃᓱᐊᖁᑎᓕᕆᓂᕐᒥᒃ.
ᑐᕐᓱᐊᑯᑦ ᐃᒪᕐᑖᕈᑎᓂᒃ ᐊᑐᓲᖑᑐᐊᕈᑦᑕᒪ ᑌᒣᒻᒪᑕᓕ ᐊᒥᓱᒐᓚᐅᑦᓴᒪᕆᑦᑐᑦ ᐅᑭᐅᕐᑕᑐᒥᐅᑦ ᓄᓇᕐᔪᐊᖏᑦ, ᐃᖃᓗᓐᓂᓘᓐᓃᑦ ᐊᓪᓛᑦ (ᓄᓇᕗᑦ, ᑳᓇᑕᒥ), ᑮᓇᐅᔭᑎᓐᓄᑦ ᓴᓇᒍᓐᓇᓯᒐᔭᕐᑐᒍᑦ ᒪᔪᕐᖃᐅᓂᕐᓴᓂ ᐃᓂᓂ ᐅᓪᓗᒥ ᐅᐸᒍᓐᓇᖏᑦᑕᕗᓐᓂ. ᕕᓐᓚᓐᑦᒥ ᑌᒣᓘᕐᑐᑦ, ᐆᑦᑑᑎᒋᓗᒋᑦ. ᑐᕌᓚᕿᒐᔭᕐᒥᔪᒍᑦ ᓂᕈᐊᕈᓐᓇᓯᓂᕐᒧᑦ ᒥᑭᓂᕐᓴᓂᒃ ᐃᓂᓂᒃ.
ᑭᖑᓪᓕᐹᖅ, ᐋᕐᕿᕈᑎᒋᑦᓱᒍ “ᓯᐊᕋᖃᖕᖏᓗᐊᕐᓂᒧᑦ”, ᐱᓇᓱᑦᑎᕗᑦ ᐃᓚᐅᕐᑑᑎᖃᓕᕇᕐᑐᑦ ᒪᖑᒪᔪᓂᒃ ᑐᖕᖓᕕᓕᐅᕐᓂᒥᒃ – ᒪᖑᑦᓯᒪᔪᓂᒃ ᙯᕐᑐᒧᑦ ᐅᕝᕙᓘᓐᓃᑦ ᐊᑎᑐᔪᒧᑦ ᓄᓇᐅᑉ ᖁᐊᖓᑦᓭᓇᕐᑐᖓᓄᑦ – ᑐᖕᖓᕕᑦᓴᐅᑎᓪᓗᒋᑦ ᓄᑖᓄᑦ ᐃᓪᓗᔪᐊᓄᑦ. ᑕᒪᓐᓇ ᐃᑯᓪᓚᐅᒥᑎᑦᓯᓚᖓᔪᑦᓴᐅᕗᖅ ᓴᓇᓂᕐᒧᑦ ᑮᓇᐅᔭᕐᑑᑎᓂᒃ ᓯᕗᕐᖏᓂᒍᑕᐅᓗᓂᓗ ᐃᓕᒪᓇᕐᑐᓂᒃ ᓯᓚᕐᔪᐊᑉ ᓂᕈᒻᒪᐸᓪᓕᐊᓂᖓᑕ ᓄᐃᒍᓐᓇᑕᖏᓐᓂᒃ.
ᑐᖕᖓᕕᑦᓴᕗᑦ ᐋᕐᕿᓯᒪᓕᕐᒪᑕ, ᖃᓄᖅ ᓴᓇᒻᒪᓕᐅᓚᖓᓯᕕᑕ, ᓴᓇᓚᖓᓯᕕᓗ ᐊᒻᒪᓗ ᒪᑭᑕᑦᓯᓚᖓᓯᕕᑕ ᐃᓪᓗᔪᐊᒥᒃ ᓄᓇᕕᐅᑉ ᐃᓗᐊᓂ? ᓈᓚᖃᑦᑕᕆᑦᓯ, ᑕᒪᑐᒥᖓ ᓇᐅᑦᓯᑐᓛᕐᒥᒐᑦᑕ ᑭᖑᓪᓕᓂ ᐊᑐᐊᒐᓕᐅᕈᑎᓂ.