ᐊᑖᓂ ᑕᑯᒋᐊᕐᓗᑎᑦ:

• ᐃᓄᑦᑎᑑᕐᓱᓂ ᐅᖃᐅᓯᕐᒥ ᐃᓕᓭᕈᑎᖃᕐᓂᖅ
• ᐅᐃᒍᐃᑎᑑᕐᓂᒥᒃ ᐅᖃᐅᓯᕐᒥᓄᑦ ᐁᑉᐱᕈᑎᒋᔭᖓᓂ
• ᖃᓪᓗᓈᑎᑑᕐᓂᒥᒃ ᐅᖃᐅᓯᕐᒥᓄᑦ ᐁᑉᐱᕈᑎᒋᔭᖓᓂ

ᑲᑎᕕᐅᑉ ᐅᖃᐅᓯᕐᖄᕆᔭᒧᑦ ᐁᑉᐱᕈᑎᒋᓂᐊᕐᑕᖓᓐᓄᓗ ᐅᖃᐅᓯᓕᕆᓂᐅᑎᑕᓂ ᓴᐳᑦᔨᓯᒪᕈᑕᐅᔪᖅ ᐃᓕᓵᑦ ᐱᕙᓪᓕᐊᒐᓲᑎᖏᓐᓂᒃ ᐊᑐᐊᕐᓯᓂᒃᑯᑦ, ᐊᓪᓚᓂᒃᑯᑦ ᐅᖄᕈᓐᓇᓯᓂᒃᑯᑦ ᑐᓵᕈᓐᓇᓯᓂᒃᑯᓗ ᐱᔪᓐᓇᓂᕆᔭᖏᓐᓂᒃ. ᑕᒪᒃᑯᐊ ᐱᓇᓱᐊᕐᑕᐅᑎᑕᑦ ᐃᓕᓵᓂᒃ ᓇᔫᑎᕕᖃᕐᑎᓯᓚᖓᒻᒪᑕ ᐱᕙᓪᓕᐊᕈᑎᒋᓚᖓᔭᖏᓐᓂᒃ ᓇᒻᒥᓂᖅ, ᐃᓅᓯᕐᒥ, ᐃᓕᕐᕈᓯᕐᑯᓗ ᐃᓕᑕᕐᓯᕈᑎᑦᓴᕆᓗᒋᑦ, ᕋᒥᒋᓪᓗ  ᖃᓄᐃᓕᖓᔪᑦᓴᐅᒪᖔᕐᒥ ᓯᓚᕐᔪᐊᒦᖃᑎᓂ ᐱᓪᓗᒋᑦ ᓇᓗᒐᑐᐃᓐᓇᖁᓇᒋᑦ ᓄᐃᑕᓚᕿᔪᑦ.

ᐊᑐᕐᓂᒥᓄᑦ ᐃᓄᑦᑎᑑᒥᒃ ᐅᐃᒍᐃᑎᑑᒥᓪᓘᓐᓃᑦ ᖃᓪᓗᓇᐅᔭᕐᑐᒥᒐᓴᒃ ᐊᑦᔨᒋᖕᖏᑐᓂ ᐊᑐᕐᕕᐅᔪᓐᓇᑐᓂ, ᐃᓕᓵᑦ ᐃᓕᑦᓯᕙᓪᓕᐊᔪᑦ ᑐᑭᓯᓐᓇᓯᐊᕐᓗᑎᒃ ᖃᓄᐃᓘᖃᑎᖃᕆᐊᒥᒃ, ᓇᓗᕐᖁᑎᖕᖏᓱᑎᒃ ᐊᑐᕐᓇᓚᖓᔪᓂᒃ. ᐅᖃᐅᓯᖃᕈᓐᓇᓯᓂᕐᒥᓄᑦ ᒪᕐᕈᐊᓘᓐᓂᒃ ᐅᖃᐅᓯᓐᓂᒃ ᐃᓕᓵᑦ ᐊᑐᕈᑎᒋᔪᓐᓇᑕᖓ ᐃᓱᒪᒋᐅᕐᓴᕈᑎᒋᓗᓂᐅᒃ ᐃᓱᒪᒋᕋᓱᓪᓚᕆᒍᓐᓇᓯᑦᓴᒪᕆᑦᓱᒍ ᑐᑭᓯᐊᓚᕿᓗᓂ, ᐃᓚᕙᓪᓕᐊᓗᓂᐅᒃ ᖃᐅᔨᒪᓂᕆᔭᓂ. ᐃᓕᓵᑦ ᐃᑲᔪᕐᑎᕆᒻᒥᔭᖓ ᐃᓱᒪᕈᓯᕐᒥᒃ ᐃᓂᓪᓓᒐᓱᑦᑎᓗᒍ ᑕᒐᓗ ᐅᓕᕐᓀᓯᔪᓐᓇᓯᕙᓪᓕᐊᓱᓂ ᐅᖃᕈᓐᓇᓯᕋᑕᕐᓱᒋᑦ ᐃᓱᒪᒋᔭᓂ, ᑐᑭᓯᔪᕆᔭᓂ ᐃᑉᐱᒋᔭᓂᓗ.

ᑕᑯᓗᒋᑦ ᐊᑖᓂ:

• ᓱᑯᐃᔦᓂᖅ ᖃᕆᑕᐅᔭᒃᑰᑐᓕᕆᓂᕐᓗ
• ᐃᓕᕐᕈᓯᒃᑯᑦ, ᐃᓄᑦᑎᒍᑦ, ᓗᑯᒋᐊᓕᑎᒍᑦ ᑭᓯᑦᓯᑎᓕᕆᐅᑏᑦ
• ᓗᑯᒋᐊᓕᑎᒍᑦ ᓱᑯᐃᔦᒍᑎᑎᒍᓪᓗ ᑭᓯᑦᓯᑎᓕᕆᐅᑏᑦ
• ᐃᓄᐃᑦ ᐊᕙᑎᓕᕆᓂᒃᑯᑦ ᓱᑯᐃᔦᒍᑎᖓ (ᐱᕙᓪᓕᐊᖏᓐᓇᑐᖅ)

ᑭᓯᑦᓯᑎᓕᕆᐅᑏᑦ, ᓱᑯᐃᔦᕈᑏᑦ ᖃᕆᑕᐅᔭᒃᑰᑐᓕᕆᓂᕐᓗ ᓯᕕᑦᑐᒋᐊᕆᒍᑕᐅᔪᑦ ᐃᓕᓵᑉ ᑕᑯᓐᓇᕈᓯᖓᓂᒃ ᓯᓚᕐᔪᐊᒥᒃ ᐊᑑᑎᔭᐅᑎᑦᓯᕈᓐᓇᕋᒥ ᐊᑦᔨᒋᖕᖏᑐᓂᒃ ᓱᓂᖏᓐᓂᒃ ᐃᓄᒐᓭᑦ ᐊᕙᑖᓂᓗ ᓱᓇᓱᐊᕐᑎᓗᒋᑦ.  ᑕᒃᒎᓇ ᐃᓕᓴᕐᑕᖓ ᐃᑲᔪᕐᑎᒋᔭᖓ ᐃᓕᑕᕆᔪᓐᓇᓯᑦᓱᓂ ᐃᒻᒥᓂᒃ ᐃᑲᔪᕐᑕᐅᕈᑎᒋᒐᒥᐅᒃ ᐃᓱᒻᒪᓴᕐᓂᑯᑦ ᓱᖑᓯᒋᐊᕐᓱᒍ ᓇᒻᒥᓂᕐᓱᕈᓐᓇᓂᖓ, ᐃᓱᒪᑕᕈᓐᓇᓂᖓ, ᑐᕌᕐᕕᓴᓕᐅᕈᓐᓇᓂᖓ ᐱᔪᓐᓇᓯᐊᕈᓐᓇᓚᖓᔪᕆᓂᖓᓗ ᐱᕕᓕᒫᕐᓂᒥᖁᑦᓱᒍ ᐆᑦᑐᕋᑲᑦᑕᓂᖓ.

ᐊᑐᖃᑦᑕᓱᒋᑦ ᐋᕐᕿᓱᕐᓯᒪᑦᓯᐊᕇᕐᑐᑦ ᐱᐅᓯᑐᖃᕐᑎᒍᓪᓗ ᐊᑐᕐᑕᐅᒍᓪᓕᐅᓲᑦ ᑕᑯᓐᓇᑕᖃᕐᓂᒧᑦ, ᐊᐱᕐᓱᑲᑦᑕᓂᕐᒧᑦ, ᐆᑦᑐᕋᑲᑦᑕᓂᕐᒧᑦ ᑭᓪᓕᓯᓂᐊᕈᓯᕐᓂᒃ ᐃᓚᖃᕐᑎᓗᒋᒐᓴᒃ ᐅᖃᐅᓯᐅᒍᓪᓕᓲᓂᒃ ᑭᓯᑦᓯᑎᑦᓂᐊᓂᕐᒥᒃ, ᓱᑯᐃᔦᓂᕐᒥᒃ ᖃᕆᑕᐅᔭᑎᒎᕐᑐᑰᕐᑐᓂᓪᓗ, ᐃᓕᓵᑦ ᖃᓄᐃᓕᖓᓂᖓᓂᒃ ᓯᓚᕐᔪᐊᑉ ᐃᒣᓕᖓᔪᕈᓈᕐᓯᒪᕈᑎᑦᓴᓯᑦᓱᑎᒃ ᐃᓅᕕᒋᔭᒥᓂᒃ ᑐᑭᓯᒪᑦᓯᐊᓕᕈᓂᒍ ᐃᓱᐊᕆᔭᒥᓄᑦ ᐃᖁᑎᒋᐊᕐᓂᐊᕋᒥ, ᓴᓇᕈᑎᒋᓕᕐᓗᓂᐅᒃ ᓯᕗᓂᕐᒥᓂᒃ.

ᐃᓅᓱᑦᑐᐃᒪᑯᐊ ᐱᕙᓪᓕᓂᓕᕐᔪᐊᕌᓘᓲᑦ ᐱᔪᓐᓇᓯᕕᒋᑐᐊᕋᒥᐅᒃ ᑐᑭᓯᒪᓪᓚᕆᓕᕐᓱᒍ ᐅᖃᐅᓯᐅᕙᑦᑐᖅ ᑭᓯᑦᓯᑎᓕᕆᓂᕐᒥ, ᓱᑯᐃᔦᓂᕐᒥ ᖃᕆᑕᐅᔭᒃᑰᑐᓕᕆᓂᕐᒥᓗ, ᐱᔭᕆᐊᑭᓪᓕᑎᕆᒍᑕᐅᒻᒪᑕ ᖃᐅᔨᖃᑦᑕᑕᓂᒃ ᑐᑭᓯᕈᑎᖃᕐᓂᒥᒃ ᒪᑯᐊᓗ ᐊᑦᔨᒋᖕᖏᑐᑦ ᐃᓕᓴᕐᑕᐅᔪᓐᓇᑐᑦ ᖃᓄᐃᓕᖓᑦᓱᑎᒃ ᐃᓚᕐᖁᐊᕇᕐᓂᖃᕐᒪᖔᑕ ᑕᒪᒃᑭᒃ.  ᑐᑭᓕᐅᕈᓐᓇᓂᖅ, ᕿᒥᕐᕈᒪᕆᓐᓂᖅ ᐊᐅᓚᑦᓯᓂᕐᓗ ᐊᑦᔨᒋᖕᖏᑐᓂᒃ ᐊᑑᑎᔭᓂᒃ, ᑖᑦᓱᒥᖓ ᐃᓕᓴᕐᓂᖅ ᐃᓕᓵᓂᒃ ᐱᕙᓪᓕᐊᑎᑦᓯᕈᑕᐅᔪᓐᓇᓯᔪᖅ ᑐᑭᑖᕆᐊᓪᓚᕆᒍᓐᓇᓕᕐᓂᒥᒃ ᐃᓚᐅᕕᒋᔪᓐᓇᓕᕐᓱᒋᒐᓴᒃ ᐅᖄᔭᐅᔪᑦ ᐱᓪᓚᕆᐅᓂᑯᖏᓐᓄᑦ ᐅᓪᓗᒥ.

ᑕᑯᓗᒋᑦ ᐊᑖᓂ:

• ᐃᓄᒐᓴᓐᓂᒃ ᐃᓕᓴᕈᑎᖃᕐᓃᑦ
• ᑐᓂᕐᑕᓂᐊᕐᓂᖅ, ᓄᓇᓕᕆᓂᖅ, ᐊᑑᑎᓯᒪᔪᓕᕆᓂᖅ ᐃᓅᖃᑕᐅᓂᕐᓗ
• ᐅᑭᐅᕐᑕᑑᑉ ᓯᓚᕐᔪᐊᖓ
• ᓄᓇᕕᐅᑉ ᐊᑑᑎᓯᒪᔭᖓ (ᐱᕙᓪᓕᐊᕈᑕᐅᖏᓐᓇᑐᖅ)

ᐃᓄᓐᓄᐊᖓᔪᓂᒃ ᓱᑯᐃᔦᕈᑎᓕᕆᓂᖅ ᐃᑲᔪᕐᓯᒪᒍᑎᓕᒃ ᐃᓕᓵᑉ ᓯᓚᕐᔪᐊᒥᒃ ᑕᑯᓐᓇᕈᓯᖓᓂᒃ ᐊᕐᖁᓯᓐᓂᕈᑕᐅᒐᒥ ᑐᑭᓯᓂᕐᒧᑦ ᓇᓗᓕᕐᓯᒪᓇᓪᓚᕆᑦᑐᓂᒃ ᐃᓄᑦᑎᒍᑦ, ᓄᓇᖃᕐᓂᑎᒍᑦ, ᑮᓇᐅᔭᓕᐅᕋᓱᓐᓂᑯᓪᓗ ᐊᑑᑎᔭᓂᒃ ᑕᒫᓂ ᐊᓯᓂᓗ, ᑌᑦᓱᒪᓂᓛᓂᑦ ᐱᔪᒥᒃ ᐅᓪᓗᒥᓗᒐᓴᒃ.

ᐃᓕᓴᕋᑦᓭᑦ ᐃᓄᓐᓄᐊᖓᔪᓂᒃ ᓱᑯᐃᔦᓂᕐᒥ ᐱᕙᓪᓕᐊᑎᑦᓯᕈᑕᐅᒋᕗᑦ ᐃᓕᓵᑉ ᖃᓄᕈᓈᕐᓯᒪᕈᓐᓇᓂᖓᓂᒃ ᐃᓕᓵᓂᒃ ᐊᑐᕐᑕᐅᒍᓪᓕᐅᓲᑦᓴᔭᓂᒃ ᐃᓱᒪᒋᓯᒪᔭᓂᓪᓗ ᓴᓇᕐᕈᑎᑦᓴᑖᕐᑎᓯᑦᓱᓂ.  ᑖᒃᑯᐊ ᓴᓇᕐᕈᑎᒋᓕᕐᑕᖏᑦ ᐃᑲᔪᕐᑎᒋᓚᖓᔭᖏᑦ ᐃᓕᓵᑦ ᐃᓱᒪᒋᖃᓯᐅᑦᔨᕈᓐᓇᓯᓗᓂ ᓇᒻᒥᓂᖅ ᐊᓯᒥᑕᓗ ᐃᓱᒪᒋᔭᖏᓐᓂᒃ ᐃᓪᓕᕆᔭᖏᓐᓂᓗ, ᓱᒧᓪᓕᑭᐊᖅ ᓚᕈᑎᒋᔪᓐᓇᓯᓗᒋᑦ ᑕᑯᕈᓐᓇᓯᑦᓱᒋᑦ ᖃᓄᐃᓕᓯᒪᓐᓂᒪᖔᑕ.  ᐃᓄᑦᑎᒎᕐᑐᓂᒃ ᐅᖃᕈᓐᓇᓯᔪᕕᓂᐅᒍᑎᒃ, ᐃᓕᓵᑦ ᖃᐅᔨᒪᓂᕐᑖᕈᑎᒋᓇᔭᕐᑕᖓ ᐊᑐᐃᓐᓇᕈᒍᑎᑦᓴᒥᒃ ᐃᓅᖃᑕᐅᓂᕐᒥᓄᑦ ᐱᓇᓱᐊᕈᓐᓇᓂᐊᕐᑕᖓᓂᒃ, ᓇᔪᕐᑕᒥᓂᐅᑐᐃᓐᓇᕆᐊᓕᒃ ᐊᒻᒪᓗᒐᓴᒃ ᓄᓇᕐᔪᐊᑉ ᓄᓈᓗᐊᑕ ᓄᓇᓕᖓᓐᓂ ᓇᓪᓕᐊᓂ.

ᑕᑯᓗᒋᒃ ᐊᑖᓂ:

• ᓱᖕᖑᐊᑎᑦᓯᓂᒃᑯᑦ ᑕᑯᔭᒃᓴᓕᐅᕐᓂᖅ
• ᑐᓴᕐᓂᔭᕐᑎᓯᓂᒃᑯᑦ

ᓱᖕᖑᐊᑎᑕᐅᓂᕐᒥᓂ, ᐃᓕᓵᑦ ᐊᓪᓚᖑᐊᕐᐸᑐᑦ ᖃᓄᓕᒫᖅ ᓇᒻᒥᓂᕐᒨᓕᖓᔪᒥᒃ – ᑎᒥᒧᑦ, ᓂᐱᒧᑦ, ᐃᓱᒪᒋᔭᕐᒧᑦ, ᐃᓕᕐᕈᓯᕐᒧᓗ ᖃᓄᐃᓕᖓᔪᕆᒻᒪᖔᕐᒥᒍ ᓄᐃᑕᑎᑦᓯᒍᑎᒥᒃ ᓯᓚᕐᔪᐊᒥ ᑕᑯᓐᓇᓂᕐᒥᒍᑦ. ᑌᒣᓕᐅᕐᓂᒥᒍᑦ ᐊᑐᕐᑐᑦ ᐆᑦᑐᕋᐅᑎᑦᓯᐊᔭᒥᒃ ᐅᖃᐅᓯᕐᒥᒃ ᐅᒃᑯᐃᓯᒍᑕᐅᑎᓪᓗᒍ ᓄᑖᓂᒃ ᐃᓱᒪᕈᓯᕐᓂᒃ ᓇᒻᒥᓂᕐᒧᑦ, ᐊᓯᓄᑦ ᐊᕙᑎᒥᓃᑦᑐᓂᓪᓗᒐᓴᒃ.

ᓱᖕᖑᐊᑎᑦᓯᓂᑎᒎᕐᑐᒥᒃ, ᐃᓕᓵᑦ ᐊᑦᔨᒌᓕᖕᖏᑐᓂᒃ ᐆᑦᑐᕋᐅᑎᖃᕈᓐᓇᑎᑕᐅᔪᑦ ᓄᐃᑦᓯᒍᑎᒥᒃ ᖃᓄᐃᓕᓐᓂᕈᑎᒥᓪᓗ, ᐅᐱᒋᔪᓐᓇᓯᓪᓚᕆᑦᓱᒍ ᐊᑦᓱᐃᑑᓂᐊᓗᖓ ᐊᑦᔨᒋᖕᖏᑐᓂᒃ ᓱᖕᖑᐊᑎᑦᓯᓂᖅ ᐅᖃᐅᓯᖃᕈᓐᓇᓂᕐᒥᒍᑦ, ᕿᓂᕐᕕᒋᓗᓂᐅᒃ ᐃᓕᕐᕈᓯᕐᒥᒍᑦ ᐊᕙᒻᒧᑦ ᐊᕐᖁᓯᐅᕈᑎᒋᓗᓂᒍ ᖃᐅᔨᕙᓪᓕᐊᓂᕐᒥᓂ ᐃᓕᕐᕈᓯᕐᓂᒃ ᐃᓘᓐᓀᒍᑦ.

ᐃᓕᓵᑦ ᒪᓂᔨᕕᐅᕙᒻᒥᔪᑦ ᓱᖕᖑᐊᑎᑦᓯᓂᒃᑯᑦ ᐊᑑᑎᔭᐅᓯᒪᔪᓂᒃ ᓇᒻᒥᓂᕐᒧᐊᖓᔪᓂᒃ ᖃᓄᐃᓕᔭᐅᕈᑎᒋᑦᓱᒋᑦ ᖃᓄᐃᓕᓐᓂᕈᒫᓚᕿᐅᑎᒋᑦᓱᒋᑦ ᐃᓱᒪᖓᓂᑦ ᓄᐃᔪᓂᒃ ᓯᓚᕐᔪᐊᒥᓗ ᑕᑯᓐᓇᕈᓯᕐᒥᓂ ᐅᖃᕐᓗᓂ.

ᓱᖕᖑᐊᓂᕐᒥᒃ ᐱᓇᓱᖃᑦᑕᓂᖅ ᐃᑲᔪᕐᓯᒪᒻᒥᔪᖅ ᐃᓕᓵᑉ ᓇᒻᒥᓂᖅ ᐱᕙᓪᓕᐊᓂᖓᓂᒃ.  ᐃᓛᒃᑰᑐᒥᒃ ᐊᕐᖁᑎᑖᕐᕈᑎᒋᒻᒪᐅᒃ ᖃᓄᖅ ᓵᖕᖓᓯᒐᓱᒋᐊᖅ ᐃᓱᒪᒐᓱᒋᐊᖃᕐᓂᒥᓪᓗ ᐱᑦᓯᐊᓂᕐᒧᑦ ᐃᓅᑦᓯᐊᒋᐊᖃᕐᓂᒧᓪᓗ ᐃᓕᖓᔪᓂᒃ, ᐃᓄᑦᑎᒍᑦ ᐱᓐᓀᓗᑕᓂᒃ, ᐅᑉᐱᕈᓯᕐᓂᒃ ᐃᓪᓕᕆᔭᓂᓪᓗ, ᐃᑲᔪᕐᑎᒋᓯᕙᑦᓱᓂᐅᓪᓗ ᑎᒍᓯᕈᑎᒋᑦᓱᓂᐅᒃ ᐃᓪᓗᕙᕐᑕᖏᑦᑐᒥᒃ ᐱᐅᓯᖃᕆᐊᖃᕐᓂᒥᒃ ᓱᖃᑦᑕᒋᐊᖃᕐᓂᒥᓪᓗ ᐊᑑᑎᑐᐃᓐᓇᓕᕐᓗᒍ.

ᑕᑯᓗᒋᑦ ᐊᑖᓂ

• ᓇᒻᒥᓂᕐᒥᒃ ᐃᓄᑦᑎᒍᓪᓗ ᐱᕙᓪᓕᐊᒍᑎᖃᕐᓂᖅ
• ᑎᒥᒥᒃ ᐃᓗᕐᓯᒥᓗ ᐃᓕᓴᐅᑎᖃᕐᓂᖅ
• ᐅᑉᐱᔭᖃᕐᓂᖅ ᐅᑉᐱᓂᕆᔭᐅᔪᓪᓗ ᐃᓕᕐᕈᓯᒃᑰᑐᒥᒃ
• ᐃᓗᓯᖅ ᖃᓄᐃᖕᖏᑑᓂᕐᓗ (ᐱᕙᓪᓕᐊᕈᑕᐅᖏᓐᓇᑐᖅ)

ᐊᑐᓂ ᐃᓕᓴᕐᑕᐅᔪᖅ ᓇᒻᒥᓂᕐᒥᒃ ᐱᕙᓪᓕᐊᔭᕆᐊᖃᕐᓂᖓᓄᑦ ᐃᑲᔪᕐᓯᕈᑕᐅᕗᖅ ᐃᓕᓵᑉ ᐃᓘᓐᓈᒍᑦ ᐱᕙᓪᓕᐊᓂᕆᒋᐊᓕᖓᓂᒃ.  ᑕᒪᒃᑭᒃ ᐃᓱᒪᒋᖃᓯᐅᑦᔨᓯᒪᒻᒪᑕ ᑎᒥᖓᒍᑦ, ᐃᑉᐱᒍᓱᓐᓂᑯᑦ, ᐊᑐᕐᓇᑐᕐᑎᒍᑦ, ᐃᓄᑦᑎᒍᑦ, ᐊᕙᑎᑎᒍᑦ, ᐱᑦᓯᐊᕆᐊᖃᕐᓂᑯᑦ ᐅᑉᐱᓂᕐᒥᒍᓪᓗ ᐃᓗᓯᕐᓱᓯᐊᒋᐊᖃᕐᓂᒥᒃ ᑎᑭᔪᓐᓇᓂᐊᕐᑕᖓᓐᓅᑐᒥᒃ ᐃᓕᓵᑉ ᐱᕈᕐᐸᓕᐊᓂᖓᓂ, ᑐᑭᒧᐊᕈᑎᒋᓯᔭᖏᓐᓂ ᖃᐅᔨᕙᓪᓕᐊᓂᕐᒥᓄᑦ ᖃᓄᖅ ᑕᒪᒃᑯᐊ ᖃᓄᐃᓕᖓᓂᐅᔪᑦ ᐱᑐᑦᓯᒪᐅᑎᓂᖃᕐᒪᖔᑕ ᖃᓄᕐᓗ ᑕᒪᒃᑭᒃ ᐊᑐᓂᑦᓯᐊᖅ ᐃᓕᓵᒧᑦ ᐱᓪᓚᕆᐅᓂᖃᕐᒪᖔᑕ ᓇᒻᒥᓂᕐᒥᓂ ᐱᕙᓪᓕᐊᒐᓲᑎᖃᓕᕐᑎᓗᒍ.

ᑕᒪᒃᑯᐊᓄᑯᐊ ᐃᓕᓵᓂᒃ ᐱᔪᓐᓇᓯᑦᔫᒥᑎᑦᓯᓚᕆᑦᑐᑦ ᐊᑦᔨᒋᓈᕐᑎᖏᑦᑐᑦ ᐊᑑᑎᔪᑦ ᐃᓗᐊᒎᕐᑐᒥᒃ ᐃᑲᔪᕐᑎᒋᑦᓱᓂᒋᓪᓗ ᓴᓇᕐᕈᑎᑦᓴᓕᐅᕈᑎᒋᑦᓱᒋᑦ ᐊᑐᕈᓐᓇᓂᐊᕐᑕᖏᓐᓂᒃ ᓇᒻᒥᓂᖅ ᓈᒻᒪᓯᒍᑎᑦᓴᓯᒐᓱᑦᑎᓗᒍ ᐃᓅᓯᕐᒥᓂᑦᑕᐅᖅ.  ᑭᖑᓪᓕᐹᒥᓪᓗ, ᑕᒪᒃᑯᐊ ᐃᓕᓴᕐᑕᐅᔪᑦ ᐃᓕᓵᓂᒃ ᐃᑉᐱᒍᓱᓕᕐᔫᒥᑎᑦᓯᓯᒪᑦᓱᑎᒃ ᐱᓇᓱᐊᒋᐊᖃᕐᒥᓂᖓᓂᑦᑕᐅᖅ ᔪᓐᓇᑕᒥᒎᕐᑐᒥᒃ ᐃᓅᖃᑎᓂ ᐱᕙᓪᓕᑕᐅᓂᖃᖁᓗᒋᑦ.

ᑕᑯᓗᒋᑦ ᐊᑖᓂ:

• ᓱᓇᓕᕆᔨᐅᓚᖓᓂᕐᒧᑦ ᓄᓇᓕᓪᓂᓗ ᐱᕙᓪᓕᐊᒍᑎᖃᓂᖅ (ᑮᓇᐅᔭᓕᐅᕐᓂᒥ);
• ᐱᓇᓱᒐᕐᒨᓚᐅᕋᓂ ᐱᔭᕆᐅᕐᓴᓂᖅ;
• ᐱᔪᓐᓇᓂᖃᒐᓚᕆᐊᖃᕐᒥᔪᑦ ᐱᓇᓱᒉᑦ

ᐃᓕᓴᕐᓂᒥᑕ ᑐᖓᓪᓕᐅᑎᕈᑎᖓᓂ, ᐃᓕᓵᑦ ᑐᑭᑖᕆᐊᖃᓕᕐᓂᒨᒃᑯᑦ ᐃᓕᓴᕐᓂᕆᓚᖓᔭᓂ ᐱᓪᓗᒍ, ᓂᕈᐊᕈᒪᔭᕐᓱᒍᓐᓇᓯᑦᓱᑎᒃ, ᐃᓕᓴᕐᕕᒋᔪᒪᓇᕋᔭᕐᑐᓂᒃ, ᐊᓯᖏᓐᓂᓗ.  ᑕᒐᓗ ᐊᓂᒍᐃᔪᒪᓂᕐᑖᓱᑎᒃ ᐊᑐᕐᕕᒋᔪᓐᓇᓚᖓᔭᒥᓂ ᕿᓂᕈᒪᓂᕐᑖᓗᑎᒃ ᐱᕕᑦᓴᐅᔪᓂᒃ ᓇᒻᒥᓂᖅ ᖃᐅᔨᒃᑲᓂᕈᒪᓂᕐᒥᒃ ᓇᒻᒥᓂᕐᓗ ᕈᓐᓇᕆᕗᖓᓖᕐᓯᒪᕈᓐᓇᓯᓂᕐᒥᒃ.  ᑖᒃᑯᐊ ᐱᓇᓱᐊᕐᑕᐅᔪᑦ ᑕᑉᕙᓂ ᐃᓕᓴᕐᓂᒥ ᓵᖕᖓᔭᖃᕙᓪᓗᑐᑦ ᐃᓅᓯᕐᒥᓂ ᓱᓇᓐᓂᐊᑎᐅᕈᒪᕋᔭᕐᒪᖔᑕ ᖃᓄᑎᒋᓪᓗ ᐱᔪᓐᓇᑕᖃᕆᐊᖃᕐᒪᖔᑕ, ᕋᒥᓪᓗ ᐃᓕᓵᓂᒃ ᐱᕙᓪᓕᐊᕈᓐᓇᓯᑎᑦᓯᒍᑎᖃᕐᑐᑦ ᓇᒻᒥᓂᖅ ᐱᓇᓱᒐᕆᒐᔭᕐᓗᒍᓗ ᐃᓕᑕᕆᔭᐅᒍᑎᒋᕋᔭᕐᑕᒥᓂᒃ ᐃᓕᕐᕈᓯᕐᒥᒃ ᑲᒪᑦᓯᐊᓂᒃᑯᑦ ᐃᓕᓭᕈᑕᐅᓂᖓᑎᒎᕐᒪᑦ.

ᒪᑯᐊ ᐊᑦᔨᒌᓈᕐᑎᓇᑎᒃ ᐱᓇᓱᐊᕋᑦᓴᐅᑎᑕᐅᔪᑦ – ᐱᓇᓱᕆᐅᕐᓴᓂᖅ ᑮᓇᐅᔭᓕᐅᒐᓱᑦᑎᓂ ᐱᓇᓱᑉᕕᒥᓘᓐᓃᑦ, ᐱᓇᓱᓕᕈᓂ ᐱᔭᑦᓴᕆᕋᔭᕐᑕᖏᑦ ᐆᑦᑐᕋᖃᑦᑕᓱᒋᑦ, ᑮᓇᐅᔭᓕᐅᕋᓲᑎᑦᓴᒥᒃ ᐊᖏᔫᖕᖏᑲᓗᐊᕐᐸᑦ ᐃᓂᓪᓓᕈᓐᓇᓕᕐᓂᒥᒃ, ᐱᔪᓐᓇᓚᕆᑦᑐᒧᑦ ᐅᓂᒃᑳᕕᐅᓂᒃᑯᑦ, ᐱᔭᕆᐅᕐᓴᕕᓕᐊᕐᑎᑕᐅᓂᒃᑯᑦ, ᐊᓯᖏᓐᓂᓗ. – ᐃᓕᓵᓂᒃ ᓯᓚᕐᔪᐊᒥ ᐱᓇᓱᒐᖃᕐᓂᕐᒥᒃ ᑐᑭᓯᓚᕆᒍᑎᒋᓕᕐᓱᒍ, ᓄᓇᓕᓕᒫᓅᓕᖓᔪᒥᒃ ᑯᐯᒃᒥᓘᓐᓃᑦ ᐱᕕᑦᓴᓂᒃ, ᐃᓚᖃᓕᕐᑎᓗᒍᒐᓴᒃ ᓯᓚᕐᔪᐊᒥ ᓂᐅᕐᕈᓯᑲᑦᑕᐅᑎᓂᕐᒥᒃ.

ᑲᑎᕕᐅᑉ ᓱᓇᓕᕆᔨᐅᓚᖓᓂᕐᒧᑦ ᐱᓇᓱᐊᕐᑕᐅᑎᑕᖓ ᐱᕙᓪᓕᐊᑎᑦᓯᒐᓲᑕᐅᔪᖅ ᐃᓕᓵᑦ ᐱᔪᓐᓇᓚᖓᔪᕆᓂᖓᓂᒃ ᑲᔪᓯᑎᒋᐊᓯᕈᓂᐅᒃ ᐱᓇᓱᐊᕆᐊᓕᓂ ᐃᓚᒋᓕᐅᑎᓯᓗᓂᓗ ᐃᓄᓐᓄᑦ ᐱᓇᓱᒐᖃᕐᑎᑕᐅᔪᓄᓪᓗ ᓇᓂ.  ᑕᒪᒃᑯᓂᖓ ᐃᓕᓴᕐᓂᐅᔪᑦ ᐊᔪᒉᑦᑑᕈᑎᖃᕐᑐᑦ ᐱᕕᖃᕐᑎᓯᒍᑕᐅᕈᓐᓇᕋᒥᒃ ᐃᓱᒪᑦᓴᓯᐅᕈᑎᖃᑫᓐᓇᓂᕐᒥᒃ ᐱᓇᓱᐊᕐᓗᓂᓗ ᐅᐸᓘᒪᓇᕐᑐᓚᕆᒻᒥ, ᐆᑦᑐᕋᓪᓗᑐᒋᐊᖃᓕᕐᓱᓂ ᐃᓕᓴᕐᑕᐅᕈᑎᒋᓯᒪᔭᒥᓂᒃ. ᐃᓕᓵᑦ ᕿᓂᕈᓐᓇᐅᑎᒋᒻᒪᐅᒃ ᓯᕗᓂᕐᒥᒃ ᐱᓇᓱᒐᕆᕈᒪᕋᔭᕐᑕᒥᓂᒃ ᐃᓱᒪᒐᓱᐊᕈᓐᓇᓯᑦᓱᓂ ᖃᓄᖅ ᐊᑐᐃᓐᓇᕈᕐᕕᒋᓚᖓᒻᒪᖔᕐᒥᒍ, ᑕᒪᒃᑯᐊ ᐱᓇᓱᐊᕐᑕᐅᔪᑦ ᕿᑦᑌᖓᕈᑎᓪᓚᕆᐊᓘᕙᑦᑐᑦ ᐃᑲᔪᕐᓯᓱᑎᓪᓗ ᐃᓕᓵᓂᒃ ᑐᑭᓯᕈᑎᒋᓕᕐᒪᒍ ᐱᓪᓚᕆᓪᓗᑑᒋᐊᖓ ᐃᓅᓯᓕᒫᖅ ᐃᓕᑦᓯᕙᓪᓕᐊᒍᓐᓇᓚᖓᓕᕐᓂᖅ.

ᓄᓇᒥ ᐊᓐᓇᐅᒪᕈᓐᓇᓂᖅ ᐃᓚᒋᔭᐅᕙᑦᑐᖅ ᐃᓕᕐᕈᓯᕐᒧᐊᓕᖓᔪᓂ ᐱᓇᓱᐊᕐᑕᓂ; ᓴᓇᕐᕈᑎᑦᓴᓕᐊᖑᓯᒪᔪᑦ ᐊᑐᕐᑕᐅᕙᑦᑐᑦ ᐆᑦᑐᕋᒍᑕᐅᓯᑦᓱᑎᓪᓗ.  ᐊᓐᓇᐅᒪᒐᓱᓐᓂᖅ ᓯᓚ ᖃᓄᐃᒃᑲᓗᐊᕐᐸᑦ ᐃᓕᓭᕈᑕᐅᓲᖑᕗᖅ ᐊᑐᐃᓐᓇᕈᕐᑎᓂᕐᒦᖏᓐᓇᓱᑎᒃ ᓄᓈᕐᑎᓗᒋᓪᓗ ᒪᙯᑦᓱᑎᒃ.

ᑖᓐᓇ ᐃᓕᕐᕈᓯᕐᒨᓕᖓᔪᖅ ᐱᓇᓱᐊᕐᑕᖅ ᐃᓕᓭᒍᑕᐅᕙᑦᑐᖅ ᐱᐅᓯᑐᖃᒃᑰᓂᕐᓴᖅ ᓴᓇᕐᕈᑎᑦᓴᓕᐅᕐᓂᒥᒃ ᒪᙯᓯᐅᑎᑦᓴᓂᓪᓗ ᐃᓕᕐᕈᓯᕐᒥᓂᒃ ᐊᑐᓕᕈᓂ ᐊᑐᖃᑦᑕᕆᐊᓕᑦᓴᔭᒥᓂᒃ ᐊᕙᑎᓂ ᐃᓱᒪᒋᓗᒍ.  ᖃᓄᐃᑦᑐᔭᐅᓂᖓ ᐊᕙᑎᖓᓗ ᐊᑐᓂ ᓄᓇᓕᓐᓂ ᐊᑦᔨᒌᓕᕙᖕᖏᑐᖅ, ᓴᓇᕐᕈᑎᑦᓴᓕᐊᖏᑦ ᐊᑦᔨᒌᓕᖕᖏᒥᔪᑦ ᓴᓇᒪᓂᕆᓚᖓᔭᖓ ᐃᒫᙰᓚᕈᑕᐅᕙᑦᑐᖅ ᐃᓕᓵᑦ ᓇᒻᒥᓂᓪᓗᑐᖅ ᓴᓇᕐᕈᑎᓕᐅᕐᑎᓱᒋᑦ, ᑐᑭᒧᐊᑦᑎᑕᐅᔪᒥᒃ ᐃᓕᓭᔨᒥᓄᑦ. ᓯᓚ ᐃᑉᐱᒋᑦᓱᒍ ᓴᓇᕐᕈᑎᑦᓴᓕᐅᕐᓂᖅ ᐊᑐᕐᓂᐊᑕᕆᔭᓂᒃ ᐊᕐᕌᒎᑉ ᐃᓗᐊᓂ ᒪᓕᑦᑎᑕᐅᓲᖅ.