ᐊᕐᕌᒍᖅ ᐃᓱᓕᓐᓂᖓᓄᑦ ᐅᖃᐅᓯᓭᑦ ᑲᒪᔨᒻᒪᕆᒃ ᖄᔨᐊ ᑭᓕᐅᑕᖅ
ᐊᕐᕌᒍᒋᓚᐅᕐᑕᕗᑦ ᐊᔪᒉᑦᑐᕋᑕᐅᓚᐅᕐᐳᑦ, ᐊᒥᓱᐃᑎᒍᑦ ᓴᖑᐊᔪᕋᑕᐅᓚᐅᕐᓂᑎᓐᓄᑦ ᐊᕐᖁᓵᖃᑦᑕᐅᓚᐅᕐᑕᕗᑦ ᐃᑉᐱᒋᑦᓱᒋᑦ, ᑌᒣᒐᓗᐊᕐᑎᓗᒍᓗ, ᐃᑉᐱᒋᔭᒐᖃᕐᑐᖓᑦ ᓱᓇᓕᑦᓯᐊᑦ ᐊᓂᒍᕐᑕᐅᓴᐅᑎᒋᖃᑦᑕᐅᓚᐅᕐᓂᖏᓐᓂᒃ. ᐃᓕᓴᕐᓇᐅᑉ ᐊᕐᕌᒍᖓᑦ ᐃᓱᓕᓯᒌᕐᒥᒪᑦ! ᐊᓰᑦ ᓯᓐᓇᑑᒪᔪᕐᑎᑐᑦ ᐃᓱᒪᖃᑦᑕᒐᒪ ᖁᕕᐊᓱᖃᑎᒌᓛᓕᕐᒥᓂᑦᑎᓂᑦ ᐅᐱᒍᖁᖃᑎᒌᑦᓯᐊᓗᑕ ᐊᓕᐊᓱᐊᖃᑎᒌᑦᓯᐊᓗᑕᓗ, ᐅᒻᒪᖃᑎᖃᕐᓗᑕ ᐅᖁᒣᓪᓘᓂᖃᖕᖏᑐᒥᒃ ᐃᓓᖃᑦᑕᓚᐅᕐᓂᑎᓐᓄᑦ ᐊᕐᕌᒍᒋᓚᐅᕐᑎᓐᓂ….ᓴᓪᓗᓚᖓᖕᖏᓇᒪ, ᐊᑦᓱᕈᐊᓪᓚᓇᕐᑐᑰᓪᓚᕆᖃᑦᑕᓚᐅᔪᒻᒪᑕ ᐃᓕᓭᔩᑦ ᐊᓪᓚᕕᒻᒥᓗ ᐱᓇᓱᑦᑏᑦ ᓱᒐᓗᑦᑐᒥᒃ, ᑭᓯᐊᓂ ᓄᑖᖅ ᐊᖏᖃᑎᒌᒍᑎᐅᓲᖅ ᐱᓇᓱᑦᑎᓅᖓᔪᖅ ᐃᑲᔪᕐᓯᓂᖃᑦᓯᐊᓛᕐᑐᕆᒐᒃᑯ ᓄᑖᓂᒃ ᓄᓇᓕᓐᓃᑐᓂᒃ ᐱᓇᓱᑦᑎᑖᒍᓐᓇᓯᔫᒥᓂᕐᒥᒃ ᐊᕐᕌᒍᒋᓛᓕᕐᒥᔭᕐᑎᓂᑦ.
ᐅᖃᓪᓚᑲᐱᑫᓐᓇᕋᒪ ᓴᖑᐊᔪᕋᑕᐅᓚᐅᔪᓐᓂᑎᓐᓂ: ᐃᓕᓴᓐᓂᕆᕕᕗᑦ ᐊᓯᑦᔨᑐᕐᓯᒪᔪᕋᑕᐅᓕᕐᒪᑦ 2022-2023ᒥ. ᓀᓈᕐᓗᒍ, ᐱᖁᔭᖅ 14 (ᐱᖁᔭᖅ 96ᒍᕙᓚᐅᕐᑐᖅ) ᓱᕐᖁᐃᓯᒻᒪᑦ ᖃᑦᓯᓗᑐᐃᑦ ᐃᓕᓵᑦ ᖃᓪᓗᓈᕐᑎᑐᑦ CEGEP-ᓄᑦ ᐊᖏᕐᑕᐅᒪᒻᒪᖔᑕ ᑕᒪᓐᓇᓗ ᑐᕃᓐᓇᑐᕐᑎᒍᑦ ᓱᕐᕃᓂᖃᓛᕐᓂᐊᓱᓂ ᐱᓗᐊᕐᑐᒥ ᐱᓇᓱᐊᒐᑦᓴᖑᕐᑕᐅᒪᔪᓂᒃ ᑕᒫᓂ ᓄᓇᕕᒻᒥ. ᐆᑦᑐᕋᐅᑎᒋᓗᒍ, ᐱᓇᓱᐊᖃᑎᒋᓲᕗᑦ CEGEPᖑᔪᐃᑦ ᑳᓖᑦᔩᓗ ᑕᒪᓐᓇ ᖃᑦᓯᓗᑐᓂᒃ ᓇᓗᓀᕐᓯᓯᒪᓂᖅ ᐱᖕᖑᐃᑎᑦᓯᖃᔭᓛᕐᓂᐊᔭᒍᓐᓀᒪᑕ ᓅᑕᓂᒃ ᖃᓪᓗᓈᑎᑐᕐᑐᓂᒃ ᐳᕐᑐᓂᕐᓴᓂ ᐱᔭᕇᒐᓱᐊᕐᑐᑎᐅᒍᓐᓇᒐᔭᕐᑐᓂᒃ ᓄᓇᕕᒻᒥᐅᑦ ᐱᓪᓗᒋᑦ. ᑲᑐᑦᔨᖃᑎᖃᕐᐸᓕᕐᑐᒍᑦ ᑯᐱᐊᒃᒥ ᓄᓇᖃᕐᖄᓯᒪᔪᔭᐅᔪᓂᒃ ᒪᑭᕝᕕᒃ ᑯᐊᐳᕇᓴᓐᑯᓂᓗ ᐱᖁᔭᖅ 14 ᓂᖏᖕᖓᑕᐅᖁᓪᓗᒍ ᓲᕐᓗ ᐃᓄᐃᑦ ᐃᓕᓵᑦ ᓱᕐᕋᑕᐅᓂᖃᕐᐸᓂᐊᖕᖏᓗᑎᒃ ᐳᕐᑐᓂᕐᓴᑲᓂᕐᓂ ᐃᓕᓴᓇᓱᐊᕉᑕᕆᓂᕐᒥᓂᑦ ᑯᐱᐊᒃᒥ. ᐅᓪᓗᒥᒧᑦ, ᐊᔪᐃᓐᓇᓂᕆᔭᕗᑦ ᓱᕐᕃᓂᖃᕋᑕᖕᖏᑐᑦ.
ᐊᔪᐃᓐᓇᓂᕆᔭᕗᑦ ᐱᓇᓱᐊᒐᓱᐊᒻᒪᕆᐅᑎᕗᓗ ᑌᒣᒃᑲᓗᐊᕐᑎᓗᒋᑦ, ᐱᔭᕆᐊᑐᔫᖃᑦᑕᖏᓐᓈᑐᖅ ᑲᔪᓯᐅᒐᕐᑎᓇᓱᐊᒋᐊᖓᑦ ᐃᓕᓴᕐᓂᓕᕕᐅᑉ. ᐅᐱᓐᓇᕋᓂ, ᓇᐅᑐᐃᓐᓇ ᐊᖓᔪᕐᖄᖑᔪᖅ ᐃᓕᓴᔨᐊᒥᓂᑦ ᐅᕕᒐᕐᑐᖁᑎᒥᓂᒃ ᐱᒍᑦᔨᓂᐅᒋᐊᓕᓕᒫᓂᒃ ᐊᑐᐃᓐᓇᖃᕐᑐᕆᕙᖕᖏᑯᑎᒃ ᐱᒍᑦᔨᓂᐅᒋᐊᓕᓕᒫᓂᒃ ᐱᒍᑦᔨᔭᐅᑦᓯᐊᒋᐊᖃᕐᑐᐃᓇᐅᒋᐊᖃᕋᓗᐊᕋᑦᑕ, ᐅᓐᓂᓘᑎᒥᓂᒃ ᒪᓂᔨᒍᓐᓇᓯᒋᐊᕕᑦᓯᐊᑐᑦ ᑯᐱᐊᒃᑯᑦ ᐃᓕᓵᑦ ᐅᓐᓂᓘᑎᓕᕆᔨᖓᓄᑦ *. ᑕᒪᓐᓇ ᑎᒥᐅᔪᑦ ᐱᖕᖑᑎᑕᐅᓚᐅᕐᓂᐅᒪᑦ ᐱᖁᔭᖅ 9ᖑᔪᑎᒍᑦ, ᔫᓂ 2022ᒥᓂᑦ. ᐊᑐᕐᑕᐅᒍᓐᓇᓯᓚᕐᓂᐊᓕᕐᓗᓂᓗ ᓯᑉᑎᒻᐱᕆ 2023ᒥ. ᐊᕐᖁᑎᒋᒍᓐᓇᓯᐊᕐᑕᕗᑦ ᑕᒪᓐᓇ ᑯᐱᐊᒃᑯ ᑲᕙᒪᖓᑦ ᑐᑭᓯᑦᔫᒥᕋᔭᕐᒪ ᖃᓄᐃᑦᑐᑰᓪᓚᕆᓂᑦᑎᓂ. ᐊᔪᐃᓐᓇᐅᑎᒋᒋᐊᖃᕈᑦᑎᒍ, ᐊᔪᐃᓐᓇᐅᑎᒋᓂᐊᕐᑕᕗᑦ; ᐱᐅᔪᔭᑦᓯᐊᓂᒃ ᐱᒍᑦᔨᔭᐅᓂᖃᒋᐊᖃᕐᓂᑎᓐᓂ ᐃᓕᓂᐊᓂᓕᕆᓂᑎᒍᑦ.
ᐱᓂᐊᕐᓂᓕᕆᓂᕐᒨᖓᔪᐃᑦ ᓴᒃᑯᑫᓐᓇᓗᒋᑦ ᓵᖕᖓᓯᑫᓐᓇᕈᒪᓕᕆᕗᖓ ᐅᕙᓐᓂ ᐅᐱᒍᓱᓕᕐᑎᓯᖃᑦᑕᑐᓂᒃ.
ᓯᕗᓪᓕᐹᒥ, ᐃᓪᓗᖁᑎᕗᑦ ᖃᓄᐃᖕᖏᓯᐊᕐᑐᑦ. ᐱᐅᓕᓂᐊᒐᑦᓴᖁᑎᓕᕆᕗᑦ ᐱᓇᓱᐊᕐᑐᒪᕆᐅᖃᑦᑕᑐᑦ ᐃᓪᓗᒋᐊᓴᖏᓐᓂᒃ ᐃᓕᔨᑦᑕ ᓇᑉᐯᓇᓱᐊᒧᑦ ᓄᑕᐅᓯᓕᕐᑎᕆᖃᑦᑕᓱᑎᓗ ᐊᒥᓱᑲᓪᓚᓂᒃ ᐃᓪᓗᖁᑎᒋᒌᕐᑕᑎᓐᓂᒃ. ᐱᓇᓱᑦᑎᖏᓗ ᓅᑦᑕᒍᓐᓇᑐᓂᒃ ᐃᓪᓗᓂᒃ ᐃᓕᓴᕐᕕᓴᕐᓂᒃ ᓇᑉᐯᖃᑦᑕᒥᑦᓱᑎᒃ ᐃᓕᓴᕐᕖᑦ ᑭᖕᖒᒪᒋᔭᖏᓐᓂᒃ ᐊᖑᒪᑦᓯᓇᓱᐊᒧᑦ, ᑎᑭᑦᓰᒧᑦ ᓄᑖᓂᒃ ᐃᓪᓗᖁᑎᑦᓴᓂᒃ.
ᑐᖓᓕᖓᓕ, ᓱᓇᒨᒐᓗᐊᖅ ᖃᓄᐃᑦᑐᒨᒐᓗᐊᖅ ᓱᔪᖃᓯᐊᕿᕙᒃᑲᑕ, ᐃᓕᓵᕗᑦ ᐱᒍᓐᓇᓯᒍᓐᓇᐳᑦ ᐱᒻᒪᕆᐊᓗᓐᓂᒃ. ᐅᖄᕗᖓ ᐱᓇᓱᐊᕐᐸᑕᑦᑎᓂ ᓴᓇᖑᐊᔪᓕᕆᓂᑎᒍᑦ, ᐊᑐᐊᕐᓯᓕᕆᓂᑎᒍᑦ ᐱᖕᖑᐊᓂᑎᒍᓗ, ᓱᓇᓱᐊᕐᐸᑕᖏᑦ ᓄᕐᕃᑦ, ᐱᓇᓱᐊᕐᑕᒥᓂᒃ ᓴᕐᕿᔮᕐᑕᐅᑎᑦᓯᔪᕕᓃᑦ ᓄᓇᖃᕐᖄᓯᒪᔪᐃᑦ ᓱᑯᐃᔦᓂᒃᑯᑦ ᓴᕐᕿᔭᕐᑎᓯᑎᓕᕐᓗᒋᑦ….. ᐃᓕᓵᕗᑦ ᒥᓂᑕᐅᓂᐅᔭᑦᔭᖏᑦᑐᑦ ᐅᕝᕙᓘᓐᓃᑦ ᖁᖓᑦᑎᓯᖏᓂᐅᔭᑦᑕᖏᑦᑐᑦ ᐅᕙᑦᑎᓂᒃ ᐱᕕᖃᑦᓴᑐᐊᕐᓂᒥᓂᑦ.
ᑭᖑᓪᓕᐹᒥ, ᖁᕝᕙᑎᕆᒍᒪᕗᖓᑦ ᐊᐅᔭᐅᓂᖓᓂ ᐃᓕᓴᕐᓂᐅᓛᕐᓂᐊᑐᒥᒃ. ᐱᖓᔪᑦᑕᕆᒻᒪᐅᒃ, ᐃᓕᓵᑦᑎᓂᒃ ᑭᖑᓯᒃᑯᓂᒃ ᐱᔭᕇᒍᓐᓇᓯᒋᐊᓕᒻᒥᓂᒃ ᐱᔭᕆᒍᓯᖃᑕᐅᒍᒪᔭᕆᕐᑐᓂᒃ ᓲᕐᓗ. ᑕᒪᓐᓇ ᐃᕐᐹᑎᕐᑕᐅᓕᒃ ᐊᐅᔭᒥ ᐃᓕᓴᕐᓂᐅᓛᕐᑐᖅ ᐱᔭᕇᒍᓐᓇᓯᖃᑕᐅᒍᒪᕋᔭᕐᑐᓄᑦ. ᑲᔪᓯᐅᒐᒍᑎᒋᒐᑦᑎᒋᑦ ᐃᓕᓵᑦᑕ ᐱᔪᓐᓇᓯᓯᑦᓯᐊᓂᖏᑦ!