ᒧᓃᒃ ᓯᑖᓐᑕᓐ ᖃᕆᐊᖓᓂ ᔮᓂᒻᒪᕆᒃ ᐃᓕᓐᓂᐊᕕᖓᓂ ᑰᑦᔪᐊᒥ,ᐃᓕᓐᓂᐊᑎᓕᒫᑦ ᐃᒻᒥᓂᒃ ᑕᑯᓐᓇᖁᔭᐅᓲᖑᕗᑦ ᓴᓇᙳᐊᑎᐅᒋᐊᒥᓂ. 2008 ᖑᓕᕐᓂᒪᓂᑦ ᒧᓃᒃ ᐃᑲᔪᕐᓯᓯᒪᓕᕐᖁᖅ ᐅᕕᒃᑲᓂᑦ ᐃᒻᒥᓂᒃ ᑕᑯᒋᐊᕈᓐᓇᓯᑎᑦᓱᒋᑦ ᓴᓇᙳᐊᕈᓐᓇᓂᕐᒥᓂ,ᑲᑦᓱᙰᑦᑑᒍᓐᓇᓂᕐᒥᓂ ᐊᒻᒪᓗ ᕿᒥᕐᕈᒋᐊᓪᓛᕈᓐᓇᓂᕐᒥᓂ ᑭᓇᐅᓂᕐᒥᓂ ᓴᓇᙳᐊᓂᒃᑯᑦ. ᐱᓇᓱᒍᓯᖓ ᐊᓯᑦᔩᓯᒪᕗᖅ ᖃᕆᐊᒥ ᐃᓂᒋᔭᐅᓕᕐᓱᓂ ᑕᐅᑐᙳᐊᑕᐅᒍᓐᓇᓗᓂ ᐊᒻᒪᓗ ᐃᒻᒥᓂᓪᓗ ᖃᐅᔨᕙᓪᓕᐊᒍᓐᓇᓕᕐᓱᑎᒃ.
ᐱᕈᕐᓭᓂᖅ ᓴᓇᑐᓂᕐᒥᒃ ᓴᓇᙳᐊᓂᒃᑯᑦ
ᓴᓇᖕᖑᐊᓂᕐᒧᑦ ᐃᓕᑕᕆᔭᐅᒍᑎᑖᕐᓯᒪᔪᖅ Concordia ᐃᓕᓐᓂᐊᕕᕐᔪᐊᖓᓂ ᐊᒻᒪᓗ ᐃᓕᓐᓂᐊᑎᑦᓯᔨᐅᒍᑎᑖᕐᓯᒪᑦᓱᓂ ᐃᓕᓐᓂᐊᕕᕐᔪᐊᖓᓂ ᐋᑐᕚ, ᒧᓃᒃ ᑕᒣᓐᓂᒃ ᐱᓱᓐᓇᓂᕆᒥᓂᒃ ᐊᑐᓲᖑᕗᖅ ᐊᒻᒪᓗ ᐊᓕᐊᒋᔭᖃᑦᓯᐊᓱᓂ ᐱᓇᓱᐊᕐᑕᒥᓂᒃ. ᖁᓖᑦ ᐅᖓᑖᓄᑦ ᐃᓕᓐᓂᐊᑎᓂᑦ ᐃᑲᔪᕐᓯᓯᒪᓕᕐᑐᖅ ᓴᓇᙳᐊᑎᐅᓂᕐᒥᒃ ᓂᐱᖃᕈᓐᓇᓕᕐᓱᑎᒃ,ᐃᑲᔪᕐᓯᓱᓂ ᐃᓱᒪᑦᓴᓯᐅᕈᓐᓇᓂᕐᒥᒃ ᐊᓐᓇᓗ ᑲᑦᓱᙰᑦᑑᓂᕐᒥᒃ ᓯᕗᓂᕐᒥᓄᑦ.
ᓄᕐᖃᖓᑫᓐᓇᓚᐅᕐᑐᓚᐅᔪᒐᓗᐊᕐᓱᓂ ᐸᓂᒻᒥᓂᒃ ᐃᑲᔪᕐᓂᒥᓂ ᐃᓕᓐᓂᐊᓂᖓᓂ,ᒧᓃᒃ ᐅᑎᓚᐅᔪᖅ ᖃᕆᐊᒥᓄᑦ ᐊᒻᒪᓗ ᐊᓕᐊᓱᑐᓱᓂ ᐃᓕᑕᕐᓇᑐᓂᒃ ᑕᑯᖃᑦᑕᓕᕋᒥ.
ᐊᑐᐃᓐᓇᕈᕐᑎᓯᒪᔭᖓ ᐱᔭᑦᓴᖅ ᙯᖁᔨᓯᒪᕗᑦ ᐃᓕᓐᓂᐊᑎᓂᑦ ᓴᓇᖕᖑᐊᖁᔨᑦᓱᓂ ᓇᒻᒥᓂᖅ ᑕᕐᓴᑲᓪᓛᐱᑦᓴᖏᓐᓂᑦ ᐃᓱᒪᒋᑦᓱᒋᑦ ᓯᓐᓇᑑᒪᖏᑦ ᐊᒻᒪᓗ ᐱᒻᒪᕆᐅᑎᑕᖏᑦ. ᐃᓱᒪᒐᓱᐊᖃᑎᒌᑦᓱᑎᒃ,ᐊᓪᓚᖑᐊᕐᓱᑎᒃ ᐊᒻᒪᓗ ᐱᔭᕇᕐᐸᓕᐊᑦᓱᒋᑦ ᐊᓪᓚᐅᑎᓄᑦ ᐃᒪᓕᓐᓄᑦ, ᐃᓕᓐᓂᐊᑏᓪᓗ ᕿᒥᕐᕈᓱᑎᒃ ᑭᓇᐅᓂᕐᒥᓂ ᐊᒻᒪᓗ ᐃᒻᒥᓂ ᐅᖄᒍᓐᓇᓂᕐᒥᒃ. ” ᐊᐱᕐᓱᓂᒃᑯᑦ ᐱᒋᐊᖕᖓᓲᑦ,”ᓱᓇ ᐅᕙᓐᓄᑦ ᐱᒻᒪᕆᐅᕙ?” ᒧᓃᒃ ᐅᓂᒃᑳᑐᖅ “ᐱᐊᕋᓕᒫᑦ ᓴᓇᖕᖑᐊᑎᐅᕗᑦ… ᐊᑐᕈᓐᓇᓯᑎᑐᐃᓐᓇᕆᐊᖃᕐᑕᕗᑦ”
ᐃᓗᒃᑯᑦ ᐊᓕᐊᓇᕐᑐᖅ ᑕᑯᑦᓱᓂ ᐃᓕᓐᓂᐊᑎᓂᑦ ᖁᕝᕙᕙᓪᓕᐊᔪᓂᑦ ᐱᕈᕐᕙᓕᐊᑦᓱᑎᒃ ᐊᒻᒪᓗ ᑲᒪᑦᓯᐊᑐᖕᖑᓯᒪᑦᓱᑎᒃ ᐅᕕᒃᑳᐲᑦ,ᐅᕕᒃᑫᑦ ᓄᓇᕐᖃᑎᒌᑦ.
ᑲᔪᖏᕐᓭᔪᑦ ᑐᓴᕐᑕᐅᔪᑦᓭᑦ ᐃᓚᒌᑦᓄᑦ ᐊᒻᒪᓗ ᐃᓕᓐᓂᐊᑎᓄᑦ
ᐱᒍᒥᓇᕐᑎᑕᐅᔪᖅ ᐆᒧᖓ ᕗᕇᑕ ᑳᓘᔅ,ᒧᓃᒃ ᐊᓪᓚᖑᐊᕐᓯᒪᕗᖅ ᓄᒃᑭᕆᐊᕐᓯᒪᓂᕐᒥᓂ ᐋᓐᓂᓚᐅᕐᑐᕕᓂᐅᑦᓱᓂ ᐊᒻᒪᓗ ᐱᓇᓱᖃᑎᒥᑦᑕ ᐊᔪᐃᓐᓇᓂᖏᓐᓂ. “ᑕᒃᑲᓂ ᐃᓕᓐᓂᐊᑎᑦᓯᔨᓄᑦ ᐱᒍᒪᓕᕐᑎᑕᐅᒋᐊᓪᓛᓯᒪᕗᖓ…ᐅᑯᓄᖓᓗᐊᖕᖑᐊᖅ ᐃᓄᑐᐃᓐᓇᓄᑦ ᐃᓕᓐᓂᐊᑎᑦᓯᔨᓄᑦ ᕿᑐᕐᖓᑎᓐᓂ ᑲᒪᑦᓯᐊᕙᒻᒪᑕ ᓄᓇᓕᑦᑎᓂ”
ᐊᖓᔪᕐᖄᕆᔭᐅᔪᓂᑦ ᐅᖃᐅᑏᒍᒪᕗᖅ: “ᐃᓚᐅᑦᓯᐊᖃᑦᑕᕆᑦᓯ.ᓯᕗᓕᕐᑎᓵᐱᓐᓂᒃ ᓴᓇᒐᑦᑕ,ᐃᑲᔪᕐᑕᐅᓯᐊᕈᒪᕗᒍᑦ ᐃᓕᑦᓯᓄᑦ” ᐊᒻᒪᓗ ᐃᓕᓐᓂᐊᑎᓄᑦ ” ᓵᓚᖃᕐᓂᒥᒃ ᓯᕗᓂᖃᕐᓗᓯ, ᐃᒻᒥᒍᑦ ᓯᓐᓇᑑᒪᓕᐅᕐᓱᑎᑦ. ᓴᐱᓕᕐᑌᓕᒋᑦ… ᓱᓇᑐᐃᓐᓀᑦ ᓱᒃᑫᑐᒥ ᐱᒋᐊᕐᐸᓕᐊᓲᖑᒻᒪᑕ,ᑭᓯᐊᓂ ᓄᐃᓲᑦ.”
ᒧᓃᒃ ᖃᕆᐊᖓ ᐊᖏᓂᕐᓴᐅᕗᖅ ᓴᓇᖕᖑᐊᓂᑐᐃᓐᓇᒥᑦ- ᐃᓂᒋᔭᐅᕗᖅ ᐃᓕᓐᓂᐊᑎᓄᑦ ᓯᕗᓂᑦᓴᓯᐊᓕᐅᕐᕕᐅᓱᓂ,ᐊᑕᐅᓯᐅᓈᕐᑎᓱᒋᑦ ᒥᖑᐊᕐᑕᖏᑦ.ᓇᑯᕐᒦᒃ ᐃᓚᐅᑫᓐᓇᕋᕕᑦ ᒧᓃᒃ!
ᐃᓕᓐᓂᐊᑎᑦᓯᓂᖅ ᐱᒻᒪᕆᐅᕗᖅ ᐊᒻᒪᓗ ᑐᑭᖃᑦᓯᐊᓱᓂ ᐱᓇᓱᒐᕆᑦᓱᒍ,ᓄᓇᕕᒻᒥᓗᐊᖕᖑᐊᖅ ᐊᑦᑐᐃᓯᒪᓪᓚᕆᓲᖅ ᐃᓕᓐᓂᐊᑎᓂᑦ,ᐃᓚᒌᓂᑦ ᐊᒻᒪᓗ ᓄᓇᓕᒻᒥ. ᐃᓕᓐᓂᐊᑎᑦᓯᔩᑦ ᑕᑯᓐᓇᓱᒋᑦ ᐃᓚᐅᒍᒪᓕᕐᓂᕈᕕᑦ ᐃᓚᐅᒐᓱᒍᓐᓇᓯᐊᕐᖁᑎᑦ ᐃᓕᓐᓂᐊᑎᑦᓯᔨᖕᖑᓂᕐᒥᒃ.
ᐃᓕᓐᓂᐊᑎᑦᓯᔨᐅᑉ ᐃᓂᖏᑦ ᐅᒃᑯᐃᖔᕐᑐᑦ ᐊᒻᒪᓗ ᐱᔪᒥᓇᕐᑐᓂᑦ ᑮᓇᐅᑦᔭᓴᕐᓱᓂ!
ᐃᓕᒐᓱᒍᓐᓇᖁᑎᑦ ᐅᓪᓗᒥ ᐃᓚᐅᓯᓗᑎᓪᓗ ᐱᓇᓱᑦᑎᐅᖃᑎᑦᑎᓄᒃ.