ᐃᓂᖓ ᐱᓇᓱᐊᕆᐊᓕᖏᓪᓗ:

ᐱᓇᓱᑦᑐᓕᕆᕕᐅᑉ ᑐᑭᒧᐊᕐᑎᓯᔨᖓᑕ ᑐᖓᓕᐊᓄᑦ ᐱᓇᓱᑦᑎᒋᔭᐅᓗᓂ, ᐊᐅᓚᑦᓯᓂᓕᕆᕕᒻᒥ ᐱᓪᓗᑯᒋᐊᓕᓕᕆᔨ ᐱᓇᓱᐊᖃᑦᑕᕋᔭᕐᑐᖅ ᐊᐅᓚᑦᓯᓂᓕᕆᕕᒻᒨᓕᖓᔪᓂᒃ ᐱᔭᑦᓴᓂᑦ ᐱᒍᑦᔨᓗᓂ ᐱᔪᓐᓇᐅᑎᓕᓐᓂᒃ, ᐃᓕᓐᓂᐊᑎᑦᓯᔨᓂᑦ ᐊᐅᓚᑦᓯᔩᓪᓗ ᐱᓇᓱᑦᑎᖏᑦᑕ ᐊᓪᓚᖁᑎᖏᓐᓂᒃ. ᐱᓇᓱᐊᕆᐊᖃᕋᔭᕐᑕᖏᑦ ᒪᑯᐊ:

• ᐱᓇᓱᑦᑎᑖᖃᒻᒥᐅᔪᓂᒃ ᐊᓪᓚᖁᑎᓕᐅᕐᓗᓂ, ᐊᓪᓚᖁᑏᓕᒫᑦ ᑐᓴᐅᒪᔭᐅᒋᐊᓕᓕᒫᓪᓗ ᐊᐅᓪᓚᑎᑦᓯᐊᖃᑦᑕᓗᒋᑦ ᐱᓇᓱᑦᑎᓂᑦ ᐃᓕᓐᓂᐊᕕᓐᓂᓗ ᐱᓇᓱᕝᕕᒋᔭᐅᔪᓂᓪᓗ ᐃᓕᓐᓂᐊᓂᓕᕆᕕᒻᒥ;
• ᒪᓕᑦᓯᐊᓗᓂ ᖃᓄᐃᑦᑐᑐᐃᓐᓇᓂᑦ ᒪᓕᒐᕐᓂᑦ ᐃᓕᓐᓂᐊᓂᓕᕆᕕᐅᓪᓗ ᒪᓕᒐᖏᓐᓂᑦ, ᐱᔪᓐᓇᐅᑎᓖᑦ ᐱᓇᓱᑦᑎᖏᑦᑕ ᑮᓇᐅᑦᔭᓵᖏᑦ, ᓄᓇᓕᓐᓂᑦ ᐊᑦᔨᒌᖕᖏᑐᓂᑦ, ᓴᑑᑎᑦᓴᓯᐊᖃᕐᓂᖅ ᐊᓯᖏᓐᓂᓗ ᐱᕚᓪᓕᖁᑎᑦᓴᓂᑦ ᐱᓇᓱᑦᑎᐅᑉ ᐱᕕᒋᒍᓐᓇᑕᖏᓐᓂᑦ;
• ᐊᐅᓚᑦᓯᓗᓂ ᑭᐅᕕᒻᒥᒃ ᑲᒪᒋᔭᖃᕐᓗᓂᓗ ᐱᓇᓱᑦᑏᑦ ᓇᓗᓀᕐᓯᐅᑎᖏᓐᓂᑦ ᐃᓪᓗᒥᐅᖃᑎᖏᓐᓂᑦ;
• ᑲᒪᒋᔭᖃᖃᑦᑕᓗᓂ ᐃᓕᑕᕐᓯᓂᕐᒥᒃ ᐱᔪᓐᓇᐅᑎᓖᑦ ᐱᓇᓱᑦᑎᖏᑦᑕ ᐱᒍᓐᓇᐅᑎᖏᓐᓂᒃ ᓄᑕᐅᓯᓕᕐᑐᐃᖃᑦᑕᓗᓂ ᐊᓪᓚᖁᑎᓂᑦ ᑮᓇᐅᑦᔭᓵᖁᑎᑦᓴᓂᑦ ᐱᓇᓱᑦᑎᑐᖃᐅᓕᕐᑐᓂᓪᓗ ᓇᓗᓀᕐᓯᖃᑦᑕᓗᓂ;
• ᑐᓴᐅᒪᑎᑦᓯᓗᓂ ᑮᓇᐅᑦᔭᓵᓕᕆᕕᒃᑯᓂᑦ ᐊᓯᑦᔨᑐᖃᕐᐸᑦ ᐱᓇᓱᑦᑎᐅᑉ ᐊᓪᓚᖁᑎᖏᓐᓂᑦ ᐅᒃᑯᐊᑕᐅᓂᖏᓐᓂᓗ;
• ᐊᐅᓚᑦᓯᖃᑦᑕᓗᓂ ᓄᑕᕋᑦᓴᓖᑦ ᕿᑲᕐᓂᓴᖏᓐᓂᒃ, ᐊᑖᑌᑦ ᕿᑲᕐᒥᓴᖏᓐᓂᒃ ᐊᒻᒪᓗ ᐊᖓᔪᕐᖄᑉ ᕿᑲᕐᓂᓴᖏᓐᓂᒃ;
• ᑲᒪᒋᔭᖃᕐᓗᓂ ᓄᑕᐅᓯᓕᕐᑐᐃᓗᓂᓗ ᐱᓇᓱᑦᑎᓂᑦ;
• ᑭᐅᖃᑦᑕᓗᓂ ᐃᑲᔪᕐᑏᑦ ᐱᓇᓱᑦᑏᑦ ᐱᔪᓐᓇᐅᑎᓖᓪᓗ ᐱᓇᓱᑦᑎᖏᑦᑕ ᐱᓇᓱᒐᖏᑦᑕ ᖃᓄᐃᓕᖓᓂᖏᓐᓄᑦ ᐊᐱᕐᓲᑎᓂᒃ ᑭᐅᒍᓐᓇᑕᕐᒥᓂᒃ ᐱᓇᓱᒐᕐᒥᓂᑦ;
• ᑐᓴᐅᒪᑎᑦᓯᖃᑦᑕᓗᓂ, ᐃᑲᔪᖃᑦᑕᓗᓂ ᓴᐳᒻᒥᖃᑦᑕᓗᓂᓗ, ᐅᖄᓚᐅᑎᒃᑯᑦ, ᖃᕆᑕᐅᔭᒃᑯᓗ ᐊᒻᒪᓗ ᓄᓇᕕᒻᒥ, ᐊᑕᐅᑦᓯᑰᕐᑎᓯᔨᓂᒃ ᐃᓕᓐᓂᐊᕈᑎᓕᕆᕕᖏᓐᓂᒃ ᐃᓕᓐᓂᐊᕖᑦ ᑭᐅᔨᖏᑦᑕᓗ ᐱᓇᓱᐊᕐᑕᕕᓂᖏᓐᓂᒃ ᑕᑯᓐᓇᓗᓂ ᐊᐅᓚᑦᓯᓂᖏᓐᓂᒃ ᐊᓪᓚᖁᑎᓂᑦ ᐱᓇᓱᑦᑐᓕᕆᕕᐅᑉ;
• ᐱᓇᓱᐊᖃᑦᑕᓗᓂᓗ ᐊᓯᖏᓐᓂ ᐱᓇᓱᐊᕐᑕᐅᖁᔭᐅᔪᓂᑦ ᐊᖓᔪᕐᖄᒥᓄᑦ.

ᐱᒍᓐᓇᐅᑎᒋᒋᐊᓕᖏᑦ:

ᐱᔭᕇᕈᑎᑖᕐᓯᒪᓗᓂ ᐳᕐᑐᓂᕐᓴᒥ ᐃᓕᓐᓂᐊᕕᒻᒥ (D.E.C) ᐊᐅᓚᑦᓯᓂᓕᕆᕕᒻᒥ ᐱᔭᕇᕈᑎᑖᕐᓯᒪᐅᑎᒥᒃ ᐅᕝᕙᓘᓐᓃᑦ ᐃᓕᑕᕆᔭᐅᒍᑎᕐᒥᒃ ᐃᓕᓐᓂᐊᓂᒃᑯᑦ ᐊᑦᔨᐸᓱᖓᓄᑦ ᐃᓕᓐᓂᐊᓂᓕᕆᕕᐅᑉ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᐊᑐᖕᖏᑑᒍᓐᓇᑐᖅ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᓗᓂ, ᐱᓇᓱᑦᑎᑖᕆᔭᐅᓂᖓᓄᑦ ᖃᓄᐃᓕᖓᐅᑎᐅᑎᓪᓗᒍ, ᐋᕐᕿᑕᐅᒪᔪᒥᒃ ᐃᓕᓴᕐᓂᓕᕆᓂᕐᒧᑦ.

ᐊᑐᕈᓐᓇᕆᐊᓕᖏᑦ:

• ᐊᐅᓪᓚᖃᑦᑕᕈᓐᓇᓗᓂ ᓄᓇᕕᒻᒧᑦ 1-ᒥᒃ 2-ᒧᑦ ᐱᓇᓱᐊᕈᓯᕐᓂᑦ ᐃᓕᓐᓂᐊᓀᑦ ᐃᓗᐊᓂ;
• ᖃᐅᔨᒪᓪᓗᑯᒋᐊᓕᒃ GRICS-ᓂᑦ;
• ᖃᐅᔨᒪᒍᓐᓇᕆᐊᓕᒃ ᒪᕐᕉᓂᒃ ᐱᖓᓱᓂᓪᓘᓃᑦ ᐱᓇᓱᒐᐅᑉ ᐅᖃᐅᓯᖏᓐᓂᒃ ᐃᓕᓐᓂᐊᓂᓕᕆᓂᒃᑯᓂᑦ (ᐃᓄᒃᑎᑐᑦ, ᒍᐃᒍᐃᑎᑐᑦ, ᖃᓪᓗᓈᑎᑐᑦ);
• ᖃᐅᔨᒪᓂᖃᕆᐊᓕᒃ ᖃᕆᑕᐅᔭᒃᑯᑦ ᐊᑐᕆᐊᒥᒃ MS Outlook-ᒥᒃ, Word-ᒥᒃ Excel-ᒥᓪᓗ;
• ᐃᒻᒥᓂᕐᓱᒍᓐᓇᓯᐊᕐᑐᖅ, ᐃᓂᓪᓚᖓᒍᓐᓇᓯᐊᕐᑐᖅ, ᐱᓇᓱᐊᒍᒪᓂᖃᑦᓯᐊᓱᓂ ᐊᒻᒪᓗ ᐅᐃᒪᓇᕐᑐᓂᒃ ᐱᓇᓱᐊᕈᓐᓇᓱᓂ;
• ᖃᐅᔨᒪᓂᖃᑦᓯᐊᓗᓂ ᐊᖏᖃᑎᒌᒍᑎᐅᔪᓂᑦ;
• ᐱᓇᓱᒋᐊᓕᖏᑦᑕ ᑫᕙᓪᓚᒍᓯᓕᐅᑐᐃᓐᓇᕆᐊᓕᒃ ᐅᖓᑖᓄᑦ ᐃᓕᓐᓂᐊᓇᐅᑉ ᐱᒋᐊᕐᓂᖓᓂᒃ ᐊᐅᓪᓚᑲᑦᑕᓂᒃᑯᓗ ᓄᓇᕕᒻᒧᑦ.

ᑫᕙᓪᓚᒍᓯᕆᒐᔭᕐᑕᖏᑦ:

35-ᓂᑦ ᑫᕙᓪᓚᒍᓯᕐᓂᑦ ᐱᓇᓱᐊᕈᓯᑕᒫᑦ ᐊᓪᓕᕇᕐᑐᓂᑦ ᓂᕿᑦᓯᑐᓄᑦ.

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᒪᓕᑦᓱᒋᑦ AENQ-ᑯᑦ ᐱᓇᓱᑦᑎᖏᑦᑕ ᐊᖏᖃᑎᒌᒍᑎᖓ ᐱᓇᓱᑦᑎᑐᐃᓐᓇᓄᑦ / ᑖᓐᓇ ᐱᓇᓱᒐᖅ 4211-ᒥᒃ ᐱᓇᓱᕝᕕᖃᕋᔭᕐᑐᖅ,

ᐱᒋᐊᕐᓱᒋᑦ $27.75-ᓂᑦ $37.04-ᓄᑦ ᑎᑭᐅᑎᒍᓐᓇᑐᑦ / ᑫᕙᓪᓚᒍᓯᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᑐᖕᖓᕕᒋᑦᓱᒋᑦ ᐱᔭᑦᓴᖏᑦᑕ ᐳᓴᓐᑎᖏᑦ.