ᑲᒪᔨᖃᕐᓗᓂ ᑐᑭᒧᐊᕐᑎᓯᔨᐅᑉ ᐃᑲᔪᕐᑎᖓᓂᒃ, ᐃᓕᓐᓂᐊᕖᑦ ᐊᐅᓚᑕᐅᓂᖏᑦ, ᐊᐅᓚᑦᓯᓂᓕᕆᓂᕐᒥ ᐱᓪᓗᑯᒋᐊᓕᓕᕆᔨ ᐱᔭᑦᓴᖃᕐᖁᖅ ᐊᑦᔨᒌᖕᖏᑐᓂᒃ ᐱᓪᓗᑯᒋᐊᓕᓐᓂᒃ ᐃᓚᐅᔪᓂᒃ ᐊᐅᓚᑕᐅᓂᖏᓐᓅᓕᖓᔪᑦ ᐱᓇᓱᑦᑐᓕᕆᕕᒻᒥ ᑮᓇᐅᔭᓕᕆᓂᕐᒥᓗ ᐱᓇᓱᕝᕕᓂ ᐊᒻᒪᓗ ᐱᕙᓪᓕᐊᑎᑦᓯᓂᕐᒥ ᐊᑐᓕᕐᑎᓯᓂᕐᒥᓗ ᐱᐅᓯᕐᒥᒃ ᐱᓇᓱᐊᕐᑕᐅᔪᓂᓪᓗ ᐃᓚᐅᔪᓂᒃ ᐱᓇᓱᕝᕕᐅᑉ ᐊᐅᓚᓂᖓᓄᑦ. ᐱᔭᑦᓴᖏᑦᑕ ᐃᓚᒋᔭᖓᓂ, ᐊᐅᓚᑦᓯᓂᓕᕆᓂᕐᒥ ᐱᓪᓗᑯᒋᐊᓕᓕᕆᔨ ᐃᑲᔪᕐᓯᒪᓲᖅ ᐊᐅᓚᑦᓯᕕᒻᒥ ᐱᓇᓱᑎᓂᒃ.

ᐃᓂᖓ ᐱᓇᓱᒋᐊᓕᖏᓪᓗ:

• ᐊᑐᕋᑦᓴᓂᒃ ᓄᐃᑦᓯᖃᑦᑕᓗᓂ, ᐊᑐᓕᕐᑎᓯᓗᓂ, ᑲᒪᒋᖃᑦᑕᓗᒋᓪᓗ ᐱᐅᓂᕐᐹᓂᓪᓗ ᐱᓇᓱᐊᕈᓯᕐᓂᒃ ᐊᓪᓚᖁᑎᓂᒃ ᑐᓴᐅᒪᔭᐅᒋᐊᓕᓐᓂᓗ ᑲᒪᒋᔭᖃᖃᑦᑕᓗᓂ, ᐊᑐᕐᓗᓂ ᐃᑲᔪᕐᓯᐅᑎᓂᒃ ᖃᕆᑕᐅᔭᕈᑎᓂᓪᓗ ᐊᑐᐃᓐᓇᓂᒃ.
• ᐱᓇᓱᕝᕕᐅᑉ ᑐᓴᕋᑦᓴᖏᓐᓂᒃ ᑕᕐᕿᑕᒫᑦ ᐊᓪᓚᖃᑦᑕᓗᓂ.
• ᐊᑐᐃᓐᓇᕈᕐᑎᕆᖃᑦᑕᓗᓂ ᐁᑦᑐᑑᑎᖃᖃᑦᑕᓗᓂᓗ ᑐᓴᕐᑎᓯᒍᑎᓂᒃ ᐱᓇᓱᕝᕕᐅᑉ ᐊᐅᓚᑕᐅᓂᖏᓐᓅᓕᖓᔪᓂᒃ.
• ᑲᒪᒋᔭᖃᖃᑦᑕᓗᓂ ᓄᑕᐅᓯᓕᕐᑎᕆᖃᑦᑕᓗᓂᓗ ᐊᓪᓚᖁᑎᓂᒃ Teams-ᒥ ᐊᒻᒪᓗ SharePoint-ᒦᑦᑐᓂᒃ.
• ᐱᓯᒪᖃᑦᑕᓗᓂ ᐊᓪᓚᖁᑎᓂᒃ, ᐊᑑᑎᔭᐅᒋᐊᓕᓐᓂᒃ, ᖃᐅᔨᒋᐊᑦᓯᐊᖃᑦᑕᓗᓂᓗ ᐱᓇᓱᕝᕕᓕᒫᑦ ᑮᓇᐅᔭᕐᑑᑎᖏᓐᓂᒃ ᐱᓇᓱᒍᑦᔨᓂᐊᕐᓂᕋᐅᑎᓂᓪᓗ.
• ᐱᕙᓪᓕᐊᓗᒋᑦ, ᖃᐅᔨᓴᕐᓗᒋᓪᓗ, ᐊᓪᓚᖁᑎᓅᔭᕐᓗᒋᓪᓗ ᐱᓇᓱᑦᑏᑦ ᐊᐅᓪᓚᓯᒪᓂᕐᒧᑦ ᐅᑎᕐᕕᐅᒍᒪᐅᑎᓕᐊᕕᓂᖏᑦ, ᐱᓇᓱᓐᓀᓗ ᑫᕙᓪᓚᒍᓰᑦ ᐅᖓᑖᓄᑦ ᐱᓇᓱᓐᓂᕋᕈᑏᑦ ᐱᓇᓱᖕᖏᑑᓂᕕᓃᓪᓗ ᑐᓴᕐᓯᒍᑏᑦ.
• ᐱᓇᓱᖃᑎᒌᓪᓗᑎᒃ ᖃᐅᔨᒐᓱᐊᕐᓗᑎᒃ ᐊᑦᔨᒌᖕᖏᑐᑦ ᐱᓇᓱᕝᕖᑦ ᐱᓇᓱᐊᕋᑦᓴᖏᓐᓂᒃ.
• ᐊᐅᓪᓚᕆᐊᖃᕐᓂᕈᓂ ᐊᑐᐃᓐᓇᐅᒍᓐᓇᓗᓂ.
• ᐊᓯᖏᑦ ᐱᓇᓱᒐᖓᓅᓕᖓᔪᑦ ᐱᔭᑦᓭᑦ ᐱᓇᓱᐊᖃᑦᑕᓗᒋᑦ ᑎᓕᔭᐅᑐᐊᕈᓂ ᐊᖓᔪᕐᖄᒥᓄᑦ.

ᐱᒍᓐᓇᐅᑎᒋᒋᐊᓕᖏᑦ:

ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐱᔭᕇᕈᑎᑖᕐᓯᒪᓗᓂ ᐅᕝᕙᓘᓐᓃᑦ ᐊᓯᖓᓂ ᐱᔭᕇᕈᑎᒥᒃ ᐅᕝᕙᓘᓐᓃᑦ ᓇᓗᓀᕐᑕᐅᒍᑎᑖᕐᓯᒪᓗᓂ ᐃᓕᓐᓂᐊᓂᕐᒥᒃ ᐃᓕᑕᕆᔭᐅᓂᓕᒻᒥᒃ ᐊᑦᔨᐸᓱᖓᓂᒃ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐊᑐᖕᖏᑑᑎᑦᓯᒍᓐᓇᑐᖅ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᔪᒥᒃ.

ᐱᒍᓐᓇᓯᐊᕆᐊᓕᖏᑦ:

• ᖃᕆᐊᑕᐅᔭᒃᑯᑦ ᐱᓇᓱᒍᑎᓂᒃ ᐊᑐᕈᓐᓇᓯᐊᕆᐊᓕᒃ Microsoft Office Suite, ᐃᓚᐅᑎᓪᓗᒋᑦ Word, Excel, PowerPoint, SharePoint, Teams, ᐊᒻᒪᓗ OneDrive.
• Dash-ᒥᒃ Dofin-ᒥᓪᓗ ᖃᐅᔨᒪᓗᓂ (ᐱᕙᓪᓕᖁᑎᐅᒍᓐᓇᑐᖅ)
• ᐅᖄᒍᓐᓇᓗᓂ (ᐅᖄᓂᖅ ᐊᓪᓚᒍᓐᓇᓂᕐᓗ) ᒪᕐᕉᓂᒃ (2) ᐱᖓᓱᓂᑦ (3) ᐃᓕᑕᕆᔭᖏᓐᓂᒃ ᐅᖃᐅᓯᕐᓂᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ: ᐃᓄᒃᑎᑐᑦ, ᖃᓪᓗᓈᑎᑐᑦ ᐅᐃᒍᐃᑎᑐᓪᓗ.
• ᐱᒍᓐᓇᑕᒥᓂᒃ ᐊᑐᕐᓗᓂ ᐃᓕᑦᓯᒍᒪᓂᕐᒥᓂᓪᓗ ᓄᐃᑕᑎᑦᓯᓗᓂ ᓄᑖᓂᒃ ᖃᕆᑕᐅᔭᕈᑎᑎᒎᕐᑐᓂᒃ.
• ᐊᓪᓚᕕᒻᒥ ᐃᒻᒥᓂᕿᓗᓂ ᐱᓇᓱᒍᓐᓇᓯᐊᕆᐊᓕᒃ.
• ᖃᐅᔨᒪᒋᐊᓕᒃ ᐃᓄᐃᑦ ᐃᓗᕐᖁᓯᖓᓂᒃ ᓄᓇᕕᒻᒥᓗ ᐃᓅᓯᖏᓐᓂᒃ (ᐱᕙᓪᓕᖁᑎᐅᒍᓐᓇᑐᖅ)

ᐱᓇᓱᓐᓇᖓᑕ ᐅᓪᓗᖁᑎᖏᑦ:

35 ᑫᕙᓪᓚᒍᓰᑦ ᐱᓇᓱᐊᕈᓯᑕᒫᑦ ᐊᓪᓕᕇᕐᑐᓂᑦ ᓂᕿᑦᓯᕕᒧᑦ

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᒪᓕᑦᓱᒋᑦ AENQ-ᑯᑦ ᐱᓇᓱᑦᑎᖏᑦᑕ ᐊᖏᖃᑎᒌᒍᑎᖓ ᐱᓇᓱᑦᑎᑐᐃᓐᓇᓄᑦ / ᑖᓐᓇ ᐱᓇᓱᒐᖅ 4211-ᒥᒃ ᐱᓇᓱᕝᕕᖃᕋᔭᕐᑐᖅ, ᐱᒋᐊᕐᓱᒋᑦ $27.75-ᓂᑦ $37.04-ᓄᑦ ᑎᑭᐅᑎᒍᓐᓇᑐᑦ / ᑫᕙᓪᓚᒍᓯᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᑐᖕᖓᕕᒋᑦᓱᒋᑦ ᐱᔭᑦᓴᖏᑦᑕ ᐳᓴᓐᑎᖏᑦ.