ᐃᓂᖓ ᐱᓇᓱᐊᕆᐊᓕᖏᓪᓗ:

ᐊᖓᔪᕐᖄᖃᕐᓱᓂ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓᓂ ᑮᓇᐅᑦᔭᓵᓕᕆᕕᒻᒥ, ᐊᐅᓚᑦᓯᓂᓕᕆᓂᕐᒥ ᑲᒪᔨ ᑲᒪᒋᔭᖃᕆᐊᓕᒃ ᐅᑯᓂᖓ:

• ᐃᑲᔪᕐᓗᓂ ᑮᓇᐅᑦᔭᓵᓕᕆᕕᒻᒥ ᐊᐅᓚᓂᖏᑦᑕ ᐅᓪᓗᑕᒫᕐᓯᐅᑎᖏᓐᓂᒃ;
• ᐱᓇᓱᑦᑎᓂᒃ ᑕᒡᒐᓂ ᐱᓇᓱᕝᕕᒥ ᐱᓇᓱᐊᕐᓂᖏᓐᓂᒃ ᑲᒪᔨᐅᓗᓂ ᓇᐅᑦᓯᑐᕐᑎᒋᔭᐅᓗᓂᓗ;
• ᐊᒥᓱᓂᒃ ᐱᔭᑦᓴᑕᓕᓐᓂᒃ ᐱᓇᓱᑦᑏᑦ ᐊᒡᓚᓯᒪᔪᖁᑎᖏᓐᓂᒃ ᑮᓇᐅᑦᔭᓵᖏᑦᑕᓗ ᐊᒡᓚᓯᒪᔪᖁᑎᖏᓐᓂᒃ ᑲᒪᔨᐅᓗᓂ;
• ᐱᓇᓱᑦᑏᑦ ᐊᒡᓚᓯᒪᔪᖁᑎᓕᒫᖏᓐᓂᒃ ᑐᑭᓯᓇᑦᓯᐊᕆᐊᖃᕐᓂᖏᓐᓂᒃ ᑲᒪᓗᓂ, ᓱᓪᓕᑕᐅᒍᑎᖏᑦ ᐱᓇᓱᑦᑕᕕᓃᑦ ᐋᕐᕿᒋᐊᕐᑕᐅᒍᑎᖏᓪᓘᓃᑦ, ᐃᒫᒃ ᐊᒡᓚᓯᒪᔪᖁᑎᓕᐅᕐᓂᓄᑦ, ᐊᒡᓚᓯᒪᔪᖁᑎᓅᕐᑕᓄᑦ, ᐊᑭᓕᕐᑕᐅᓗᐊᕐᑐᕕᓂᕐᓂᒃ ᐊᑭᓕᕋᑦᓴᓕᐅᕆᓃᑦ ᐊᓯᖏᓪᓗ ᐱᓇᓱᐊᕐᑕᐅᒋᐊᓖᑦ;
• ᐱᖁᑎᓕᕆᕕᒻᒥᒃ ᐱᓇᓱᖃᑎᖃᕐᓗᓂ ᑲᒪᓗᓂ ᐊᕐᕌᒍᑕᒫᖅ ᑮᓇᐅᔭᓕᕆᒍᑎᓂᒃ ᐊᑐᐃᓐᓇᕈᕐᑎᕆᓂᕐᒥᒃ ᓄᐃᑎᕐᑕᐅᓂᖏᓐᓂᓗ;
• ᑮᓇᐅᑦᔭᓵᖏᑦ ᖃᓄᐃᓕᖓᑎᑕᐅᒻᒪᖔᑕ ᑕᑯᑎᑦᓯᒍᑎᓂᒃ ᐊᑐᐃᓐᓇᕈᐃᓗᓂ ᐊᐱᕐᓲᑎᐅᔪᖃᕐᐸᑦ;
• GRics ᐊᒻᒪᓗ percos ᖃᕆᑕᐅᔦᑦ ᐱᓇᓱᒍᑎᖏᑦᑕ ᐳᑯᑦᑕᐅᔪᓂᒃ ᐊᑐᕐᑕᐅᒍᓯᒋᒋᐊᓕᖏᓐᓂᓗ ᑲᒪᒋᐊᓕᒃ;
• ᐱᓇᓱᑦᑐᕕᓂᐅᑉ ᐱᓇᓱᑦᑐᕕᓂᐅᓂᕋᕐᑕᐅᒍᑎᖏᓐᓂᒃ ᐊᒡᓚᓯᒪᔪᓕᐅᕐᓂᒥᒃ ᑲᒪᒋᔭᖃᕐᓗᓂ ᐊᒻᒪᓗ ᑲᓇᑕᒥ ᐱᓇᓱᑦᑐᓕᕆᔨᒃᑯᓂᒃ ᖃᓄᐃᓕᒋᐊᒋᐊᖃᓕᑐᐊᕈᓂ ᖃᓄᐃᓕᒋᐊᕐᑎᐅᓗᓂ;
• ᐱᓇᓱᑦᑎᓂᒃ ᐱᓇᓱᕝᕕᓂᓪᓗ ᑕᓯᐅᕐᓯᒍᑎᓂᒃ ᐃᑲᔪᕐᓯᒍᑎᓂᓪᓗ ᐱᑕᖃᕐᑎᓯᓗᓂ ᐱᓇᓱᑦᑎᐅᑉ ᑮᓇᐅᑦᔭᓵᓄᑦ ᐊᐱᕐᓲᑎᖏᓐᓅᓕᖓᔪᓂᑦ;
• ᐊᑐᓕᕐᑎᑕᐅᓂᖏᑦ ᐱᓇᓱᒍᑎᐅᒋᐊᓖᑦ ᐊᒻᒪᓗ ᑮᓇᐅᑦᔭᓵᓕᕆᓂᕐᒥ ᐊᐅᓚᑦᓯᓂᓕᕆᓂᕐᒨᓕᖓᔪᑦ ᐱᓇᓱᑦᑕᐅᒋᐊᓕᓕᒫᑦ;
• ᐃᑲᔪᕐᑎᐅᓗᓂ ᐃᓱᐊᕐᓭᔨᒋᔭᐅᓗᓂᓗ ᑲᒪᔨᓄᑦ ᐊᑦᔨᒌᖕᖏᑐᑎᒍᑦ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖓᑕ ᐊᖏᖃᑎᒌᓐᓂᖓᓂ ᑮᓇᐅᑦᔭᓵᓕᕆᓂᕐᒨᓕᖓᔪᓂᒃ;
• ᐱᓇᓱᑦᑎᓕᒫᓂᒃ ᖃᐅᔨᑎᑦᓯᓗᓂ ᑮᓇᐅᑦᔭᓵᓅᓕᖓᔪᓂᒃ ᓱᓇᑐᐃᓐᓇᓂᒃ ᐱᑦᔪᑎᓂᒃ ᐊᒻᒪᓗ ᐅᓪᓗᓂᒃ ᖄᖏᕐᕕᖃᕐᑎᑕᐅᔪᓂᒃ ᓱᓇᑐᐃᓐᓇᒧᑦ ᐊᑐᐃᓐᓇᕈᐃᖃᑦᑕᓗᓂ ᐊᐅᓪᓚᑎᑦᓯᖃᑦᑕᓗᓂᓗ ᑐᓴᐅᒪᑎᑦᓯᒍᑎᓂᒃ;
• ᓱᓪᓕᑕᐅᒍᑎᖏᑦ ᓱᕐᖁᐃᓗᒋᑦ ᐊᑎᓕᐅᕐᓗᒋᓗ ᑮᓇᐅᑦᔭᓵᓂᒃ ᐃᓚᖕᖏᐊᑎᕆᓂᐅᓚᖓᔪᑐᐃᓐᓇᓄᑦ;
• ᑲᑎᖕᖓᔪᓂ ᐃᓕᓐᓂᐊᑐᓂ ᐁᓯᒪᖃᑦᑕᓗᓂ, ᑐᓴᕐᑎᓯᒍᑎᓂᒃ ᑭᓯᑕᐅᒪᔪᓕᕆᒍᑎᓂᓪᓗ ᐊᑐᐃᓐᓇᕈᐃᖃᑦᑕᓗᓂ ᑎᓕᔭᐅᓕᕈᓂ;
• ᐱᓇᓱᒐᕐᒥᓂ ᖃᓄᐃᓘᕐᑎᐅᓂᖓᓅᓕᖓᔪᓂᒃ ᐊᖓᔪᕐᖄᒥᓄᑦ ᑎᓕᔭᐅᒍᑎᒋᑐᐃᓐᓇᕆᐊᓕᒻᒥᓂᒃ ᐱᓇᓱᐊᕐᓗᓂ.

ᐱᒍᓐᓇᐅᑎᒋᒋᐊᓕᖏᑦ:

• ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ ᐃᓕᓐᓂᐊᒐᕐᓂᒃ ᐱᔭᕇᕐᓯᒪᓗᓂ ᐊᑐᕐᓂᖃᑦᓯᐊᑐᒥ ᐃᓕᓐᓂᐊᓯᒪᓗᓂ ᐊᒻᒪᓗ ᓯᑕᒪᓂᒃ ᐊᕐᕌᒍᓂᒃ ᐊᑐᕐᓂᖃᕈᓐᓇᑐᓂᒃ ᐱᓇᓱᓚᐅᕐᓯᒪᓗᓂ ᐅᕝᕙᓘᓐᓃᑦ
• ᐳᕐᑐᓂᕐᓴᒥ 5-ᒥ ᐱᔭᕇᕐᓯᒪᓗᓂ ᐊᑐᕐᓂᖃᕈᓐᓇᑐᒥᒃ ᐃᓕᓐᓂᐊᓯᒪᓗᓂ ᐊᒻᒪᓗ ᓯᑕᒪᐅᔪᕐᑐᓂᒃ ᐊᕐᕌᒍᓂᒃ ᐊᑐᕐᓂᖃᕈᓐᓇᑐᓂᒃ ᐱᓇᓱᓚᐅᕐᓯᒪᓗᓂ

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐊᑐᖕᖏᑑᑎᑦᓯᒍᓐᓇᑐᖅ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᔪᒥᒃ.

ᐊᑐᕈᓐᓇᕆᐊᓕᖏᑦ:

• ᐅᖄᒍᓐᓇᓯᐊᕐᓗᓂ ᒪᕐᕉᓂᒃ ᐅᖃᐅᓰᓐᓂᒃ ᐱᖓᓱᓂᑦ ᐅᖃᐅᓯᕆᔭᐅᔪᓂᑦ ᐃᓕᓴᕐᓂᓕᕆᓂᕐᒥ (ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ);
• ᐱᓇᓱᒍᓐᓇᓯᐊᕐᓗᓂ ᖃᕆᑕᐅᔭᒥ ᐳᑯᑦᑕᐅᒪᔪᓕᕆᒍᑎᓂᒃ, ᑮᓇᐅᔭᓕᕆᒍᑏᑦ ᐊᒡᓚᕕᑦᓴᖁᑎᖏᓐᓂᒃ ᐊᒻᒪᓗ ᖃᕆᑕᐅᔭᒃᑯᑦ ᐱᓇᓱᒍᑎᓂᒃ (GRICS ᑮᓇᐅᔭᓕᕆᒍᑎᓂᒃ ᐱᓇᓱᒍᑏᑦ ᐱᓇᓱᑦᑐᓕᕆᓂᕐᒥ ᐱᓇᓱᕝᕕᐅᓗ ᐱᓇᓱᒍᑎᖏᑦ);
• ᖃᐅᔨᒪᒍᓂ MS Access ᖃᕆᑕᐅᔭᓕᕆᒍᑎᒥᒃ ᐃᓄᒃᑎᑐᓪᓗ ᐅᖃᓕᒪᒍᓐᓇᕈᓂ ᐱᐅᔪᖁᑎᒋᔭᐅᒐᔭᕐᑐᖅ.

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᐳᕐᑐᓂᖓ 00-04* ᒪᓕᑦᓱᑎᒃ ᐊᐅᓚᑦᓯᓂᓕᕆᓂᕐᒥ ᑲᒪᔨᐅᑉ ᐱᓇᓱᒐᐅᑉ ᖃᓄᐃᓕᖓᓂᖏᓐᓂᒃ / ᐱᒋᐊᕐᑐᑦ $77,102-ᓂᑦ ᑎᑭᐅᑎᒍᓐᓇᑐᑦ $102,801-ᓄᑦ ᐊᕐᕌᒍ ᑕᒫᖅ ᐱᔪᓐᓇᐅᑎᖏᓐᓂᒃ ᐱᓇᓱᓚᐅᕐᓯᒪᓂᖏᓐᓂᓗ ᒪᓕᓪᓗᑎᒃ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᑐᖕᖓᕕᒋᑦᓱᒋᑦ ᐱᔭᑦᓴᖏᑦᑕ ᐳᓴᓐᑎᖏᑦ.