ᐃᓂᖓ ᐱᓇᓱᐊᕆᐊᓕᖏᓪᓗ:

ᐊᖓᔪᕐᖄᖃᕐᓱᓂ ᐱᓇᓱᑦᑎᓅᓕᖓᔪᓕᕆᕕᒻᒥ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓᓂᒃ, ᐱᓇᓱᑦᑎᓅᓕᖓᔪᓂᒃ ᐱᓇᓱᕝᕕᒥ ᐊᑕᐅᑦᓯᑰᕐᑎᓯᔨ ᑲᒪᒋᔭᖃᕆᐊᓕᒃ ᐅᑯᓂᖓ ᐱᓇᓱᐊᕐᑕᐅᔪᓂᒃ:

• ᐊᑐᕐᑕᐅᑎᓗᒋᑦ ᑐᑭᓯᓇᕐᑎᓗᒋᓗ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᑦ ᑖᒃᑯᓇᓂ ᐱᖓᓱᐃᓕᖓᔪᓂᑦ ᐱᓇᓱᑦᑎᓕᕆᓂᕐᓂᑦ ᐃᓕᓐᓂᐊᕕᑐᐃᓐᓇᓂᑦ (ᐃᑲᔪᕐᑏᑦ ᐱᓇᓱᑦᑏᑦ, ᐱᔪᓐᓇᐅᑎᓖᑦ ᐊᒻᒪᓗ ᐃᓕᓭᔩᑦ);
• ᐃᓕᓐᓂᐊᕖᑦ ᑲᒪᔨᖏᓐᓂᒃ ᐊᔪᖀᒋᐊᖃᑦᑕᓗᑎᒃ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᓐᓂᒃ ᑐᑭᓯᓇᕐᑎᓂᕐᒥ ᐊᑐᕐᑕᐅᑎᑦᓯᓂᕐᒥᓗ);
• ᑖᒃᑯᓄᖓ ᐱᖓᓱᓄᑦ ᑲᑐᑦᔨᖃᑎᒌᓐᓂᓄᑦ ᐱᓇᓱᑦᑎᐅᓂᖏᓐᓄᑦ ᐊᑦᔨᒌᖕᖏᑐᓄᑦ ᐃᓚᐅᔪᓂᒃ ᐊᔪᖀᒋᐊᕐᑎᐅᓗᓂ;
• ᐅᓐᓂᓗᒍᑎᓂᒃ ᐃᕐᖃᑐᐃᕕᑎᒍᓪᓗ ᐱᓇᓱᐊᕐᑕᐅᔪᓂᒃ ᐊᒡᓚᓯᒪᔪᓕᐅᕆᖃᑦᑕᓗᓂ;
• ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᑲᑎᒪᓂᖏᓐᓂ ᐃᓕᓴᕐᓂᓕᕆᓂᒃᑯᓂᒃ ᑭᒡᒐᑐᕐᑎᐅᓗᓂ;
• ᐱᓇᓱᕝᕕᒥ ᖃᓄᐃᖕᖏᓯᐊᕐᓂᒧᑦ ᐊᑦᑕᓇᕐᑐᒦᑦᑌᓕᓂᕐᒧᓗ ᑲᑎᖕᖓᔨᐅᖃᑎᒌᕝᕕᒧᑦ ᐃᓚᐅᓗᓂ, ᐃᓕᓐᓂᐊᕕᓐᓂᒃ ᕿᒥᕐᕈᒋᐊᕐᑐᖃᑦᑕᓗᓂ ᑕᑯᓗᒋᑦ ᐃᓘᓐᓇᖏᑦ ᐱᓂᕐᓗᐊᕿᓂᕐᓂᓗ ᖃᐅᔨᒐᓱᐊᖃᑦᑕᓗᓂ;
• ᑐᑭᓯᒐᓱᕐᑎᐅᓗᓂ ᐱᓇᓱᑦᑏᑦ ᑮᓇᐅᑦᔭᓵᒥᑕ ᓇᓪᓕᐅᑯᒫᑦᓴᖏᓐᓂᒃ (ᐃᒻᒪᖃᐅᑎᖏᓐᓂᒃ) ᐊᑐᕈᒪᒍᑎᖏᓐᓂᒃ, ᐊᑐᐃᓐᓇᕈᐃᖃᑦᑕᓗᓂ ᐋᓐᓂᐊᓯᐅᕐᑎᓄᑦ ᖃᐅᔨᖃᕐᑎᑕᐅᒍᒪᒍᑎᓂᒃ ᑲᒪᔨᐅᓗᓂᓗ ᐊᑭᓕᕐᑕᐅᒍᒪᒍᑎᓂᒃ CNESST-ᑯᓂᑦ;
• ᐊᓯᓕᒫᖏᓐᓂᒃ ᑕᒪᒃᑯᓄᖓ ᐃᓕᖓᔪᓂᒃ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓᑕ ᐱᓇᓱᑦᑕᐅᖁᓯᒪᔭᖏᓐᓂᒃ;

ᐱᒍᓐᓇᐅᑎᒋᒋᐊᓕᖏᑦ:

• ᐃᓕᓐᓂᐊᕕᕐᔪᐊᒥ ᐳᕐᑐᓂᕐᓴᐅᑉ ᐊᓪᓕᖓᓂᒃ ᐱᔭᕇᕐᓯᒪᐅᑎᖃᕐᓗᓂ ᐊᑐᕐᓂᓕᒻᒥᒃ ᐱᔭᕇᕐᓯᒪᓂᕃᔪᒥᒃ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᒐᕐᒥ ᐱᖓᓱᓂᒃ-ᐊᕐᕌᒍᓂᒃ ᐃᑭᓐᓂᓴᐅᖕᖏᑐᓂᒃ ᐅᕝᕙᓘᓐᓃᑦ ᐳᕐᑐᓂᕐᓴᒥ ᑲᒪᔨᐅᓂᕐᒥᓘᓐᓃᑦ ᐱᓇᓱᐊᕐᓯᒪᓗᓂ;
• ᑕᓪᓕᒪᓂᒃ (5) ᐊᕐᕌᒍᓂᒃ ᐃᑭᓐᓂᓴᐅᖕᖏᑐᓂᒃ ᐱᓇᓱᐊᓚᐅᕐᓯᒪᓗᓂ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐊᑐᖕᖏᑑᑎᑦᓯᒍᓐᓇᑐᖅ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᔪᒥᒃ.

ᐊᑐᕈᓐᓇᕆᐊᓕᖏᑦ:

• ᐅᖄᒍᓐᓇᓯᐊᕐᓗᓂ ᒪᕐᕉᓂᒃ ᐅᖃᐅᓰᓐᓂᒃ ᐱᖓᓱᓂᑦ ᐅᖃᐅᓯᕆᔭᐅᔪᓂᑦ ᐃᓕᓴᕐᓂᓕᕆᓂᕐᒥ (ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ);
• ᐱᓇᓱᓚᐅᕐᓯᒪᓗᓂ ᑐᑭᓯᓇᕐᑎᑕᐅᓂᖏᓐᓂᒃ ᐊᑐᕐᑎᑕᐅᓂᖏᓐᓂᓗ ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᑦᑕ ᐊᖏᖃᑎᒌᓐᓂᖏᓐᓂᒃ;
• ᑲᒪᔨᐅᓚᐅᕐᓯᒪᓗᓂ ᐱᕐᖃᔭᖕᖏᒍᑎᖃᕐᓂᒧᑦ ᐱᓇᓱᖕᖏᑑᒍᑎᓕᓐᓂᒃ CNESST-ᑯᓅᓕᖓᔪᓂᓪᓗ ᐱᓇᓱᐊᕐᓂᒥᒃ;
• ᐱᓇᓱᑦᑏᑦ ᑲᑐᑦᔨᖃᑎᒌᓐᓂᖏᓐᓂᑦ ᐱᑕᓕᓐᓂᒃ ᐱᓇᓱᐊᓚᐅᕐᓯᒪᓗᓂ;
• ᐃᓕᓴᕐᓂᓕᕆᓂᕐᒥ ᐱᓇᓱᐊᓚᐅᕐᓯᒪᓗᓂ;
• ᐃᓄᑐᐃᓐᓀᑦ ᐃᓗᕐᕈᓯᖓᓂ ᖃᐅᔨᒪᔭᖃᕐᓗᓂ;
• ᓄᓇᕕᒻᒥ ᐊᕐᕕᑕᖃᑦᑕᕆᓐᓇᓗᓂ.

ᐱᓇᓱᒐᖓᑕ ᑌᔭᐅᓂᖓ / ᑮᓇᐅᑦᔭᓵᖏᑦ / ᐃᓱᕐᕉᑎᑦᓴᖏᓪᓗ:

ᐳᕐᑐᓂᖓ 6* ᒪᓕᑦᓱᒋᑦ ᐱᓇᓱᒐᖓᑕ ᖃᓄᐃᓕᖓᓂᖓ ᑲᑎᕕᒃ ᐃᓕᓴᕐᓂᓕᕆᓂᕐᒥ ᑲᒪᔩᑦ:  ᐱᒋᐊᕐᑐᑦ $88,755-ᓂᑦ $118,336-ᓄᑦ ᑎᑭᐅᑎᒍᓐᓇᓱᑎᒃ / ᐊᕐᕌᒍᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ. ᐱᕙᓪᓕᖁᑎᑖᕈᑎᓕᒫᑦ ᐱᖃᕐᑎᑕᐅᔪᑦ ᐱᔭᑦᓴᖓᑕ ᓇᓪᓕᖁᐊᓪᓗᖓᖏᑦ ᑐᖕᖓᕕᒋᑦᓱᒋᑦ.