ᒪᓐᑐᔨᐊ (ᑯᐯᒃ), ᔫᓂ 5, 2025 – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᑉᐳᑦ ᐱᒋᐊᕐᑎᓯᒍᓐᓇᒋᐊᒥᒃ ᐃᓕᑕᕐᓯᔭᐅᒍᑎᒃ ᐃᓕᓐᓂᐊᓂᓕᕆᓂᕐᒥᒃ ᓄᓇᖃᕐᖄᓯᒪᔪᓄᑦ ᐃᓄᓐᓄᓗ (CEFNI), ᓄᑖᖑᑦᓱᓂ ᐊᑌᓐᓇᑐᒥᒃ ᐃᓕᓐᓂᐊᕕᕐᔪᐊᒥᒃ-ᓇᓪᓕᖁᐊᖓᓂᒃ ᐃᓕᓐᓂᐊᑎᑦᓯᒍᑎ ᐋᕐᕿᓱᕐᑕᕕᓂᖅ ᑲᑐᑦᔨᖃᑎᒌᒍᑕᐅᑦᓱᓂ ᒥᑭᐅᓪ ᐃᓕᓐᓂᐊᕕᕐᔪᐊᖓᓄᑦ. ᑖᓐᓇ ᐱᒋᐊᕐᑎᓯᒍᑎ ᐋᕐᕿᓱᕐᑕᐅᓯᒪᔪᖅ ᐊᑐᐃᓐᓇᕈᕐᑎᓯᒍᑕᐅᑦᓱᓂ ᓄᓇᕕᒻᒥᐅᓂᒃ ᐱᒍᓐᓇᐅᑎᖃᕐᓂᑯᑦ ᐃᓕᓐᓂᐊᑎᑦᓯᔨᖕᖑᕈᓐᓇᓂᕐᒥᒃ, ᐃᑉᐱᒋᔭᖃᓗᐊᖕᖑᐊᓱᑎᑦ ᐃᓕᓐᓂᐊᑎᑦᓯᓂᕐᒥᒃ ᐃᓄᒃᑎᑑᑉ ᐅᖃᐅᓯᖓᓂᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᐃᓄᒃᑎᑐᑦ ᑖᑦᓱᒥᖓ ᐅᖃᐅᓯᕐᒥᒃ ᐃᓕᓐᓂᐊᑎᑦᓯᒍᑎᐅᑎᓪᓗᒍ.

ᐱᒋᐊᕐᓗᒍ ᓯᑦᑎᒻᐱᕆ 2, 2025, ᒪᕐᕉᓂ-ᐊᕐᕌᒎᓐᓂᒃ, 60-ᖁᕝᕙᒋᐊᕈᑎᓕᒃ ᐃᓕᑕᕐᓯᔭᐅᒍᑎᑖᕐᓂᒧᑦ ᐃᓕᓐᓂᐊᑎᑦᓯᒍᑎ ᐃᓕᓐᓂᐊᑎᑦᓯᒍᑎᐅᓛᕐᑐᖅ ᑰᑦᔪᐊᒥ, ᐱᕕᑦᓴᖃᕐᑎᓯᔪᖅ ᐃᓕᓐᓂᐊᑎᓂᒃ ᐱᒐᓱᐊᒍᓐᓇᓂᕐᒥᒃ ᒥᑭᐅᓪ ᐃᓕᓐᓂᐊᕕᕐᔪᐊᖓᑕ ᐃᓕᓐᓂᐊᑎᑦᓯᒍᑎᖏᓐᓂᒃ ᓄᓇᕕᒻᒥ ᐊᐅᓪᓚᕆᐊᑐᒍᓐᓀᓗᑎᑦ. ᐊᑐᕐᑕᐅᓲᑐᖃᕐᑎᑐᑦ ᐃᓕᓐᓂᐊᑎᑦᓯᔨᓂᒃ ᐱᒋᐅᕐᓭᓂᕐᒥᒃ ᐃᓕᓐᓂᐊᑎᑦᓯᒍᑎᒃ ᐊᑐᐃᓐᓇᐅᑎᑕᐅᓗᐊᖕᖑᐊᓲᖅ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓄᑦ, ᑖᓐᓇ ᓄᑖᖅ ᐊᑌᓐᓇᑐᒥᒃ ᐃᓕᓐᓂᐊᑎᑦᓯᒍᑎᒃ ᐅᒃᑯᐃᖔᕐᑐᖅ ᐃᓄᓕᒫᓄᑦ. ᑐᓂᓯᒍᓐᓇᕕᓕᒃ ᐱᕕᑦᓴᖃᕐᑎᓯᓂᕐᒥᒃ ᐃᓕᓐᓂᐊᕕᕐᔪᐊᑦ-ᓇᓪᓕᖁᐊᖓᓂᒃ ᐃᓕᓐᓂᐊᑎᑦᓯᔨᐅᓂᕐᒥᒃ ᐱᒋᐅᕐᓭᒍᓐᓇᓂᕐᒥᒃ ᓄᓇᕕᒻᒥᐅᓄᑦ ᐱᓇᓱᒍᒪᒐᔭᕐᑐᓄᑦ ᐃᓕᓐᓂᓕᕆᓂᕐᒥᒃ.

“ᑖᓐᓇ ᐃᓕᓐᓂᐊᑎᑦᓯᒍᑎᒃ ᐊᓪᓗᕆᐅᒍᑎᑦᓯᐊᒪᕆᒃ ᐃᑲᔪᕐᓯᓂᕐᒥᒃ ᓄᓇᕕᒻᒥᐅᓂᒃ ᐃᓕᓐᓂᐊᑎᑦᓯᒍᒪᒐᔭᕐᑐᓂᒃ ᐅᖃᐅᓯᕐᒥᑎᒍᑦ ᓲᖑᓯᒋᐊᕆᓗᑎᓗ ᐃᓕᓐᓂᐊᓂᕐᒥᒃ ᓄᓇᓕᒻᒥᓂᒃ,’’ ᐅᖃᓚᐅᕐᑐᖅ ᖄᔨᐊ ᑭᓕᐅᑕᒃ, ᑲᒪᔨᒻᒪᕆᒃ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ. “ᐱᕈᐃᕙᓪᓕᐊᓂᕐᒥᒃ ᑲᑦᓱᙰᒃᑑᓂᕐᒥᒃ, ᐱᒍᓐᓇᓂᓕᒫᒥᒍᑦ, ᐊᒻᒪᓗ ᐃᓕᕐᖁᓯᕐᒥᓂᒃ ᐅᐱᒋᔭᖃᕐᓂᑯᑦ,’’ ᐃᓚᒋᐊᕆᓚᐅᕐᑐᖅ.

ᑖᓐᓇ ᓄᑖᖅ ᐊᑌᓐᓇᑐᒥᒃ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᑦᓯᒍᑎᒃ ᓄᐃᑕᐅᓯᒪᔪᖅ ᓇᑯᒦᑕᕗᑦ ᑮᓇᐅᔭᖃᕐᑎᓯᓚᐅᕐᑐᑦ ᐊᖏᕈᑕᕕᓂᐅᔪᓂᒃ ᑐᕐᖃᑕᕐᕕᑯᓐᓄᑦ Ministère de l’Enseignement supérieur (MES). ᑖᓐᓇ ᐱᒋᐊᕐᑎᓯᒍᑎᒃ ᐱᕕᑦᓴᖃᕋᔭᓚᖓᐅᖕᖏᑐᖅ ᐃᑲᔪᓚᐅᖕᖏᑐᐊᕐᐸᑕᔭ.

ᐃᓕᓐᓂᐊᑏᑦ ᐱᓚᖓᔪᑦ ᐃᓕᓐᓂᐊᑎᑦᓯᓂᐅᑉ ᐱᒍᓐᓇᓂᕆᒋᐊᓕᖏᓐᓂᒃ, ᐃᓚᒋᔭᐅᑎᓪᓗᒋᑦ ᐃᓕᓐᓂᐊᑎᑦᓯᕕᒻᒥᓂᒃ ᐊᐅᓚᑦᓯᒍᓐᓇᓂᖅ, ᐃᓕᓐᓂᐊᑎᑦᓯᒍᑎᑦᓴᓂᒃ ᐸᕐᓇᕈᓐᓇᓂᖅ, ᐊᒻᒪᓗ ᐃᓕᓐᓂᐊᑎᑦᓯᓂᕐᒧᑦ ᖃᓄᕐᑑᕈᑏᑦ ᐋᕐᕿᓱᕐᑕᐅᓯᒪᔪᑦ ᓄᓇᕕᒻᒥᐅᓄᑦ. ᐃᓕᓐᓂᐊᑎᑦᓯᒍᑎᒃ ᐃᓚᒋᔭᖃᕐᑐᖅ ᐱᖓᓱᓗᐊᖕᖑᐊᓂᒃ ᐱᒋᐅᕐᓴᓂᒃᑯᑦ ᐱᓇᓱᓐᓂᒥᒃ ᓄᓇᕕᐅᑉ ᐃᓕᓐᓂᐊᕕᖏᓐᓂᒃ, ᐱᕕᑦᓴᖃᕐᑎᓯᔪᑦ ᐃᓕᓐᓂᐊᑎᓂᒃ ᐊᒡᒐᒥᒍᑦ- ᐱᒋᐅᕐᓴᕈᓐᓇᓂᕐᓂᒃ ᐊᑐᕐᓂᒧᑦ ᐃᓕᓐᓂᐊᑕᕕᓂᕐᒥᓂ.

ᐱᔭᕇᕐᓯᒪᔪᑦ ᐱᒍᓐᓇᕕᖃᓛᕐᑐᑦ ᓄ ᓇᕕᒻᒥ ᓓᓴᓐᓯᒥᒃ ᑐᓂᔭᐅᔪᒥᒃ ᑯᐯᒃᑯᑦ ᑐᕐᖃᑕᕐᕕᖓᓄᒃ. ᐃᓕᓐᓂᐊᓂᓕᕆᓂᒥᒃ. ᐱᓇᓱᒐᑦᓴᓯᐅᓴᑦᓯᓂᕐᐸᑕ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᐱᔭᕇᒍᑎᑖᕐᑐᕕᓂᐅᓕᕐᓱᑎᑦ, ᑲᔪᓯᐅᑦᔨᒍᓐᓇᒥᔪᑦ ᐃᓕᓐᓂᐊᑕᕐᒥᓂᒃ ᐅᓪᓘᑉ ᐃᓓᓐᓇᖓᒍᑦ ᐊᕐᖁᑎᒋᓗᒋᑦ ᐃᓕᓭᔨᑦᑎᓂᒃ ᐃᓕᓭᓂᕆᓲᕗᑦ. ᐃᓕᑕᕆᔭᐅᒍᑎᐅᑉ ᖁᕝᕙᒋᐊᕈᑎᖏᑦ ᓄᐊᑕᐅᒍᓐᓇᑐᑦ ᐱᔭᕇᒍᓐᓇᐅᑎᖃᕐᓂᒧᑦ ᐃᓕᓐᓂᐊᓂᓕᕆᓂᕐᒥᒃ (B.Ed.) ᐃᓕᓐᓂᐊᕆᐊᖕᖓᑐᓂᒃ ᐳᒃᑭᓂᕐᓴᒥᓪᓗ ᐃᓕᓐᓂᐊᓂᓕᕆᓂᕐᒥᒃ – ᓄᓇᖃᕐᖄᓯᒪᔪᑦ ᐃᓄᐃᓪᓗ ᐃᓕᓐᓂᐊᑎᑦᓯᒍᑏᑦ ᑐᓂᔭᐅᓲᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓄᑦ, ᐱᔪᖅ ᒥᑭᐅᓪ ᐃᓕᓐᓂᐊᕕᕐᔪᐊᖓᓂᒃ.

ᐃᓚᐅᒍᓐᓇᓂᐅᑉ ᖃᓄᐃᓕᖓᐅᓯᖏᑦ

ᐃᓚᐅᒐᓱᐊᕐᑐᑦ ᐃᒣᓕᖓᔪᒦᒋᐊᓖᑦ:

• 21 -ᓂᒃ ᐅᑭᐅᖃᕐᓗᑎᑦ.
• ᐳᕐᑐᓂᕐᓴᒥᒃ ᐱᔭᕇᕐᓯᒪᓕᑎᑦ
• ᐃᓚᐅᔫᔪᓗᑎᑦ ᐊᖏᐊᖃᑎᒌᓐᓂᒧᑦ (JBNQA).

ᐃᓕᒐᓱᐊᕆᑦ ᒫᓐᓇ

ᐃᓚᐅᒐᓱᐊᕈᑏᑦ ᐅᒃᑯᐃᖔᕐᑐᑦ ᒫᓐᓇ ᐅᑭᐊᑦᓴᖓᓄᑦ 2025 ᐃᓕᓐᓂᐊᑎᑦᓯᒍᑎᑦᓴᖅ. ᐃᓕᑦᓯᕆᐊᓪᓛᕆᑦ ᐅᕙᓂ.
📅 ᐃᓕᓐᓂᐊᑎᑦᓯᒍᑎᐅᑉ ᐅᓪᓗᖓᑕ ᐱᒋᐊᕐᕕᖓ: ᓯᑦᑎᒻᐱᕆ 2, 2025
📍 ᓇᓃᓐᓂᖓ: ᑰᑦᔪᐊᖅ
📩 ᐊᐱᕐᓲᑏᑦ? ᐅᕝᕙᓘᓐᓃᑦ ᐱᒍᓐᓇᓯᕋᔭᖕᖏᓚᑎᑦ? ᖃCᖃᐅᔨᒋᐊᕐᕕᒋᓗᒋᑦ ᐃᓕᓐᓂᐊᑎᑦᓯᒍᒪᓐᒧᑦ ᐱᓇᓱᖃᑎᒌᑦᑐᑦ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 18-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca