ᒪᓐᑐᔨᐊ, ᑯᐯᒃ (ᒫᑦᔨ 05, 2019) – ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒧᑦ ᐊᒻᒪᓗ ᖃᐅᔨᒪᔨᒻᒪᕇᑦ ᓴᓇᓂᒃᑯᑦ ᑲᑐᑦᔨᖃᑎᒌᖏᑦ (QASEA) ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᖅ (KI) ᐊᓕᐊᓱᑉᐳᑦ ᖃᐅᔨᑎᑦᓯᒋᐊᒥᒃ 2019-ᒥ ᑯᐯᒃᑯᑦ ᓄᓇᖃᕐᖄᓯᒪᔪᖏᑦ ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᓂᖏᑦ ᐊᑑᑎᓛᕐᒪᑕ ᒫᑦᔨ 26-ᒥᑦ 28-ᒧᑦ, ᐃᓄᐃᑦ ᑲᑎᕝᕕᒋᓲᖓᓂ ᑰᑦᔪᐊᒥ ᓄᓇᓕᖓᑕ ᐊᓪᓚᕕᖓᓂ.

“ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᓂᐅᑉ ᑐᑭᖓ ᐃᒣᑦᑑᓛᕐᑐᖅ: ᓱᑯᐃᔭᕐᓯᒪᔪᑦ ᓄᓇᓕᑐᙯᑦ ᖃᐅᔨᒪᔭᑐᖃᖏᑦ. ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᓂᖅ ᑲᑎᑎᑦᓯᓛᕐᑐᖅ ᓄᓇᖃᕐᖄᓯᒪᔪᓂᒃ ᐊᒻᒪᓗ ᐃᓄᐃᑦ ᐅᕕᒃᑲᖏᓐᓂᒃ ᑯᐯᓕᒫᒥ ᐱᓯᒪᔪᓂᒃ. ᐱᑕᖃᕐᑎᓯᓛᕐᑐᖅ ᐊᑦᔨᐅᖏᑦᑐᒥᒃ ᐱᕕᖃᕐᑎᓯᓂᕐᒥᒃ ᑲᑎᐅᑎᓗᑎᒃ ᓱᑯᐃᔦᓂᕐᒧᑦ ᐱᓇᓱᐊᕐᑕᕕᓂᕐᒥᓂᒃ ᐃᓗᕐᖁᓯᕐᒥᓂ ᑐᖕᖓᕕᓕᓐᓂᒃ”, ᐅᖃᕐᑐᖅ ᒫᒃ ᓚᓛᓐᑦ, ᐊᖓᔪᕐᖄᖓ QASEA-ᑯᑦ.

“ᐅᐱᒍᓱᓪᓚᕆᑦᑐᖓ ᐃᓕᓴᕐᓂᓕᕆᓂᖅ ᑐᖕᖓᓱᑦᑎᓯᓚᖓᒻᒪᑦ ᑖᑦᓱᒥᖓ ᐱᐅᔪᓪᓚᕆᒻᒥᒃ ᐊᑑᑎᔭᐅᓚᖓᔪᒥᒃ. ᐅᑉᐱᕆᔭᕋ ᐱᓇᓱᐊᕐᓗᑎᒃ ᐊᑑᑎᓚᖓᔭᖓ ᓱᑯᐃᔦᓂᕐᒧᑦ ᐱᓇᓱᐊᕐᑕᒥᓂᒃ ᓲᖑᔪᓪᓚᕆᐅᓚᖓᒻᒪᑦ. ᐱᕕᖃᕐᑎᓯᔪᖅ ᐃᓕᓐᓂᐊᑎᓂᒃ ᐱᓇᓱᖃᑎᖃᕐᓂᒥᒃ ᐃᓄᐃᑦ ᖃᐅᔨᒪᐅᓯᖓᓂᒃ, ᐊᒻᒪᓗ ᑐᑭᓯᓗᑎᒃ ᓱᑯᐃᔦᓂᐅᓂᖓᓂᒃ. ᑕᒪᓐᓇ ᐱᓇᓱᐊᕐᓂᖅ ᐱᒻᒪᕆᐊᓗᒃ ᐱᒍᒪᓕᕐᑎᓯᓂᕐᒧᑦ ᐃᓕᓐᓂᐊᑎᓂᒃ ᐊᒻᒪᓗ ᐃᓕᓐᓂᐊᕈᒪᓕᕐᑐᓯᒍᓐᓇᓱᓂ ᓱᑯᐃᔦᓂᕐᒥᒃ ᑖᒃᑯᓂᖓ ᓯᕗᓂᕆᐊᓪᓚᒥ.” ᐅᖃᕐᑐᖅ ᐅᔮᐱ ᒍᐊᑦ, ᐊᖓᔪᕐᖄᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ.

ᒫᑦᔨ 27 ᐊᒻᒪᓗ 28-ᒥ, 70 ᐅᖓᑖᓄᑦ ᐃᓚᐅᓛᕐᑐᑦ ᑕᑯᔭᐅᑎᑦᓯᓛᕐᑐᑦ ᓱᑯᐃᔦᓂᕐᒧᑦ ᐱᓇᓱᐊᕐᑕᕕᓂᕐᒥᓂᒃ ᑐᑭᑖᕐᑎᐅᓛᕐᑐᓄᑦ. ᐱᓇᓱᖃᑎᒌᑦ ᓴᓇᓯᒪᔭᒥᓂᒃ ᐱᐅᓂᕐᕌᒥᒃ ᐱᓇᓱᐊᕐᑕᕕᓂᕐᒥᓄᑦ ᓵᓚᖃᐅᑎᑖᓛᕐᑐᑦ ᒫᑦᔨ 28-ᒥ, ᐅᓪᓗᖃᕐᑎᓯᓕᕐᐸᑕ ᑰᑦᔪᐊᒥ ᓄᓇᓕᖓᑕ ᐊᓪᓚᕕᖓᓂ ᐃᓄᓕᒫᑦ ᑲᑎᑦᑕᕕᒋᓲᖓᓂ.

ᐊᒥᓱᑦ ᓱᖃᑦᓯᓂᐅᓛᕐᑐᑦ ᐸᕐᓇᑕᐅᒪᔪᑦ ᐃᓚᐅᓛᕐᑐᓄᑦ. “ᐃᑉᐱᒍᓱᒐᓱᐊᕈᒪᔪᒍᑦ ᐳᓛᕆᐊᕐᑎᕗᑦ ᐃᓄᐃᑦ ᐃᓗᕐᖁᓯᖓᓂᒃ ᑕᑯᑎᓗᒋᑦ ᑕᒫᓃᓐᓂᖏᓐᓂ ᑰᑦᔪᐊᒥ,” ᐅᖃᕆᐊᓪᓚᑐᖅ ᒍᐊᑦ. ᓱᖃᑦᓯᓂᐅᓛᕐᑐᑦ ᒪᓂᔭᐅᒪᔪᑦ ᐅᑯᐊᖑᕗᑦ ᐃᓄᐃᑦ ᐱᖕᖑᐊᕈᓯᖓᓂᒃ ᑕᑯᑦᓴᐅᑎᑦᓯᓂᖅ ᖃᐅᔨᒪᔭᐅᔪᒻᒪᕆᒻᒧᑦ ᐃᙯᓕᓴᕐᑎ, ᑕᕐᕋᓕᔮᕋᑦᓴᓕᐅᕐᑕᐅᓲᖅ ᐊᒻᒪᓗ ᐃᓗᕐᖁᓯᕐᒥᒃ ᐃᓕᓐᓂᐊᑎᑦᓯᔨ ᔮᓂ ᐃᓴᓗᒃ ᐊᒻᒪᓗ ᐊᒥᓱᒋᐊᓪᓓᑦ.

ᓵᓚᖃᕐᓯᒪᔪᑦ ᐳᕐᑐᓂᓴᒥ ᐃᓕᓐᓂᐊᑏᑦ, ᓯᑕᒪᓄᑦ ᑎᑭᓪᓗᒍ ᓇᓪᓕᑳᕐᑕᐅᓛᕐᑐᑦ ᑭᒡᒐᑐᕐᓗᑎᒃ “ᓄᓇᖃᕐᖄᓯᒪᔪᑦ ᑯᐯᒻᒥ” ᓄᓇᓕᖏᓐᓂ ᐱᓯᒪᓗᑎᒃr ᑲᓇᑕᓕᒫᒥ ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᓂᕐᒥ (ᕕᑐᕆᒃᑕᓐ, ᓂᐅ ᐳᔭᓐᓱᕕᒃᒥ , ᒣ 15-17, 2019).

ᐊᕐᕌᒍᑕᒫᑦ, ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒧᑦ ᑕᑯᑦᓴᐅᑎᑦᓯᓂᖓ ᑐᖕᖓᓱᑦᑎᓯᓂᖃᓲᖅ ᐊᑦᔨᒌᖕᖏᑐᓂ ᓄᓇᖃᕐᖄᓯᒪᔪᐃᑦ ᓄᓇᓕᖏᓐᓂ ᑯᐯᒻᒥ. ᐅᐸᑦᑕᐅᓚᖓᔪᑦ ᐃᓕᓴᕐᓂᓕᕆᕕᖏᑦ ᐊᒻᒪᓗ ᓄᓇᓕᖓ ᓇᓪᓕᑳᕐᑕᐅᓲᑦ QASEA-ᑯᓐᓄᑦ, ᐃᓕᓐᓂᐊᕕᖏᓐᓂ ᑯᐯᒃ ᓄᓇᖃᕐᖄᓯᒪᔪᑦ ᐊᒻᒪᓗ ᐃᓄᐃᑦ ᓄᓇᓕᖏᓐᓂ.

ᑭᓇᒃᑰᓂᕗᑦ:

ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᓇᓂᕐᒥᓗ ᖃᐅᔨᒪᔨᒻᒪᕇᑦ ᑲᑐᑦᔨᖃᑎᒌᓐᓂᖓ (QASEA) ᖄᖏᕐᓂᑯᓕᐅᕐᑎᐅᖏᑦᑐᖅ ᑎᓕᔭᐅᒪᐅᑎᖃᕐᓱᓂ ᐃᓕᓴᕐᑕᐅᒍᒪᓕᕐᑎᓯᓂᕐᒥᒃ ᓱᑯᐃᔦᓂᕐᒥᓗ ᓴᓇᓂᕐᒥᓗ ᓄᓇᓕᑐᖃᕐᓄᑦ ᐅᕕᒃᑲᓄᑦ ᐃᓕᓵᓄᑦ ᓄᓇᓕᑐᙯᑦ ᐃᓄᐃᓪᓗ ᓄᓇᓕᖏᓐᓂ ᑯᐯᒻᒥᐅᓂᒃ. ᑯᐯᒻᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥᒃ ᓴᓇᓂᕐᒥᓗ ᑲᐅᔨᒪᔨᒻᒪᕇᑦ ᑲᑐᑦᔨᖃᑎᒌᓐᓂᖓ (QASEA) ᑎᓕᔭᐅᒪᐅᑎᒥᓄᑦ ᑎᑭᐅᑎᒍᓐᓇᓯᓲᖅ ᓄᓇᓕᑐᖃᕐᓂᒃ ᓱᑯᐃᔭᕐᓯᒪᔭᒥᓂᒃ ᑕᑯᑦᓴᐅᑎᑦᓯᓂᕐᒥᒃ ᐱᓇᓱᐊᕐᓂᒥᒍᑦ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: www.asfquebec.ca

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ ᓄᐃᑕᐅᓯᒪᔪᖅ 1975ᒥ, ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒧᑦ. 1978ᒥᓂᑦ, ᓄᓇᕕᒻᒥᐅᓕᒫᑦ ᐃᓕᓴᕐᓂᓕᕆᔨᑐᐊᕆᓯᒪᔭᖏᑦ. ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᐅᑉ ᐅᖃᐅᓯᕐᑕᖏᑎᒍᑦ, ᐃᓕᓴᕐᓂᓕᕆᓂᖅ ᐊᑦᔨᒋᔭᐅᖕᖏᓂᕐᓴᓂᒃ ᓄᑭᖃᕐᕕᓕᒃ ᑐᑭᑖᕈᓐᓇᕕᖃᕐᓱᓂᓗ ᐱᐅᓕᐊᕐᑕᐅᒋᐊᖃᕐᓂᖏᓐᓄᑦ ᐱᕙᓪᓕᐊᑎᑕᐅᒋᐊᖃᕐᓂᖏᓐᓄᓗ ᐃᓄᐃᑦ ᐅᖃᐅᓯᖓᑕ, ᐃᓕᕐᖁᓯᖓᑕ, ᐃᓅᓯᖓᑕᓗ, ᐃᓕᓐᓂᐊᓂᖃᕐᑎᓯᓂᒃᑯᑦ ᐃᓄᓐᓅᓕᖓᔪᓂᒃ ᐃᓕᓴᕋᑦᓴᖃᕐᑎᓯᓂᒃᑯᓗ. ᐃᓕᓴᕋᑦᓴᓕᐊᕆᔭᐅᓯᒪᔪᑦ ᐃᓕᓴᕐᓂᓕᕆᕕᒻᒥ ᐃᓕᓭᒍᑕᐅᓲᑦ ᖁᓕᓪᓗ ᓯᑕᒪᓪᓗᓂ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑐᑦ ᐅᖃᐅᓯᕐᖄᒍᑎᓪᓗᒍ ᑌᒪ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓴᕐᓂᓕᕆᓂᖅ ᐊᐅᓚᑦᓯᔪᖅ ᖁᓕᓪᓗ ᓯᑕᒪᐅᔪᖕᖏᒐᕐᑐᓗᓐᓂᒃ ᐃᓕᓴᕐᕕᓂᒃ ᒥᑭᓂᕐᓴᓄᑦ ᐳᕐᑐᓂᕐᓴᓄᓪᓗ ᐊᒻᒪᓗ ᑕᓪᓕᒪᓂᒃ ᐃᓄᒻᒪᕆᓐᓄᑦ ᐃᓕᓴᕐᕕᓂᒃ ᐊᒻᒪᓗ ᐃᓕᓐᓂᐊᕕᒻᒪᕆᒻᒧᑦ ᐃᓕᓴᕐᑐᓭᑦ ᐱᒋᐅᕐᓴᔭᐅᕕᖓᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: www.kativik.qc.ca

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514-482-8220 ext. 309 | publicrelations@kativik.qc.ca

or

ᐅᕝᕙᓘᓐᓃᑦ
ᒫᒃ ᓚᓛᓐᑦ
ᐊᖓᔪᕐᖄᖅ-ᑮᓇᐅᔭᓕᕆᔨ
ᑯᐯᒃ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒧᑦ ᐊᒻᒪᓗ ᖃᐅᔨᒪᔨᒻᒪᕇᑦ ᓴᓇᓂᒃᑯᑦ ᑲᑐᑦᔨᖃᑎᒌᖏᑦ (QASEA)
(819) 684-1889