ᒪᓐᑐᔨᐊ, ᑯᐯᒃ (ᐆᒃᑑᐱᕆ 24, 2018) – ᑲᑎᕕᒃ ᐃᓕᓴᕐᓂᓕᕆᓂᖅ ᑐᖕᖓᓱᑦᑎᓯᕗᖅ ᑐᓴᕐᑎᓯᒍᑎᓂᒃ ‘ᐱᐅᔪᓂᒃ ᓄᓇᕕᒻᒥ ᐃᓕᓐᓂᐊᕈᑎᓅᓕᖓᔪᓂᒃ ᐱᒍᑦᔨᒍᑎᖃᕐᓂᒧᑦ ᓄᓇᕕᒻᒥ ᐃᓄᐃᑦ ᐃᓗᕐᖁᓯᖓᓐᓄᑦ ᓈᒻᒪᓈᕐᑐᓂᒃ’, ᐅᓪᓗᒥ ᓄᐃᑕᐅᔪᑦ ᑯᐯᒻᒥ ᐅᓐᓂᓘᑎᓕᕆᔨᓄᑦ.

‘ᑐᓴᕐᑎᓯᒍᑏᑦ ᐱᐅᔪᒻᒪᕆᒻᒥᒃ ᕿᒥᕐᕈᑎᑦᓯᓇᕐᑑᕗᑦ ᐊᕐᓱᕈᕐᓇᑐᒃᑰᒍᑎᒋᓗᐊᖕᖑᐊᓲᑦᑎᓂᒃ ᓄᓇᕕᒻᒥ ᐃᓕᓐᓂᐊᕈᑎᓕᓂᕐᓅᓕᖓᔪᓂᒃ,’ ᐅᖃᕐᑐᖅ ᐅᔮᐱ ᒍᐊᑦ, ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᖓᔪᕐᖄᖓ. ᑐᓴᕐᑎᓯᒍᑏᑦ ᖁᓕᓪᓗ ᓯᑕᒪᓪᓗᓂᒃ ᐅᓐᓂᑑᑎᑦᑕᓖᑦ ᐅᖃᕐᓂᖃᕐᓱᑎᓗ ᐃᓕᓴᕐᓂᓕᕆᓂᐅᑉ ᑌᒪᖕᖓᑦ ᓴᐳᑎᔭᐅᓯᒪᒍᒪᐅᑎᖃᕐᓂᕆᓲᖓᓂᒃ ᑯᐯᒻᒥ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓄᑦ (MEES). ᑕᒪᒃᑯᐊ ᐃᒣᑦᑐᓂᒃ ᐃᓚᓖᑦ ᐊᓯᒋᐊᓪᓚᖏᑦ ᐱᒻᒥᑎᓪᓗᒋᑦ: ᐃᓕᓐᓂᐊᕈᑎᓅᓕᖓᔪᑦ ᐃᓱᐃᓗᑕᐅᓲᑦ, ᐱᓇᓱᑦᑎᓴᕐᓯᐅᓃᑦ, ᐃᓕᓐᓂᐊᕖᑦ ᐋᕐᕿᓯᒪᐅᑎᖏᑦ ᐃᓪᓗᖁᑎᖏᓪᓗ ᐃᓕᓴᕐᓂᓕᕆᓂᕐᒥ ᐱᓇᓱᑦᑏᑦ ᐃᓪᓗᖏᑦ, ᐃᓄᐃᑦ ᐃᓕᓭᔩᑦ ᐱᒋᐅᕐᓴᑎᑕᐅᓂᖏᑦ ᑮᓇᐅᔦᓪᓗ ᑐᕌᒐᖏᑦᑕ ᒪᓕᒐᖏᑦ ᓄᓇᕕᐅᑉ ᖃᓄᐃᑦᑐᒦᓐᓂᓚᕆᖓᓄᑦ ᓈᒻᒪᓈᕋᔭᕐᑐᑦ.

ᑕᕐᕿᓂ ᐊᒥᓲᖕᖏᑐᓂ ᐊᓂᒍᕐᑐᓂ, ᐱᐅᓯᕙᓪᓕᐊᖃᑦᑕᓕᕐᑐᑦ ᑐᓴᐅᒪᖃᑎᒌᓐᓂᖃᕐᓂᒧᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᒃ, ᑐᕐᖃᑕᕐᕕᐅᑉ ᑐᖓᓕᖓ ᐃᓚᒋᔭᐅᒻᒥᑎᓪᓗᒍ. ‘ᓂᕈᐊᕐᓂᖃᓚᐅᕐᑎᓗᒍ ᑯᐯᒻᒥ ᑲᕙᒪᒃᑯᓂᒃ, ᑐᓴᕐᑎᓯᒍᑏᑦ ᓲᖑᔪᒥᒃ ᑐᖕᖓᕕᒻᒥᒃ ᓄᐃᑦᓯᕗᑦ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᖑᕐᑐᒥᒃ Jean-François Roberge ᐱᐅᔪᒃᑯᑦ ᐱᒋᐊᕈᑎᖃᕐᓱᓂ ᐃᓕᓴᕐᓂᓕᕆᓂᕐᒥᒃ ᓄᓇᕕᒻᒥᐅᓂᓪᓗ ᐃᓄᓐᓂᒃ,’ ᐅᖃᕐᒥᔪᖅ ᐅᔮᐱ ᒍᐊᑦ. ‘ᐱᐅᔪᒃᑯᑦ ᐱᓇᓱᖃᑎᖃᕐᐸᓕᐊᕐᖃᒥᓐᓂᕗᑦ ᑐᕐᖃᑕᕐᕕᑯᓐᓂᒃ ᑌᒣᖏᓐᓇᓚᖓᖁᓇᕐᑐᖅ ᓯᕗᓕᕐᑏᑦ ᐊᓯᑦᔨᖃᑦᑕᕋᓗᐊᕐᐸᑦ,’ ᐅᖃᕆᐊᓪᓚᓱᓂᓗ.

ᐊᐅᒡᒍᔅᑎ 2018-ᒥᖑᑎᓪᓗᒍ, ᑐᕐᖃᑕᕐᕕᐅᑉ ᑐᖓᓕᖓ Sylvie Barcelo ᐃᓕᓴᕐᕕᓄᑦ ᐊᕐᕕᑕᕐᕕᖃᓚᐅᔪᖅ ᓄᓇᓖᑦ ᐃᓚᖏᓐᓂ ᑲᑎᒪᔪᓄᓪᓗ ᐃᓚᒋᔭᐅᑦᓱᓂ ᐃᓕᓐᓂᐊᕈᑎᓕᕆᓂᕐᒨᓕᖓᔪᓂᒃ ᑰᑦᔪᐊᒥ. ᔫᓂᐅᑎᓪᓗᒍ ᐊᐅᒡᒍᔅᑎᒥᓪᓗ 2018-ᒥ, ᑮᓇᐅᔭᖃᕐᑎᓯᒍᑏᑦ ᐊᖏᕈᑕᐅᓚᐅᔪᒻᒥᔪᑦ ᓴᓇᓂᕐᒧᑦ ᐊᖏᕐᑕᐅᓂᑦᓴᒥᓐᓂᒃ ᐅᑕᕐᕿᕈᑎᐅᖃᑦᑕᓚᐅᔪᓂᒃ 2014-2015-ᒥᓂᑦ.

ᐃᓕᓴᕐᓂᓕᕆᓂᖅ ᕿᓚᓈᕈᑎᖃᕐᐳᖅ ᐱᓇᓱᖃᑎᖃᕐᓂᐅᓂᕐᒥᓂᒃ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᒃ ᐳᕐᑐᓂᕐᓴᒥᓪᓗ ᐃᓕᓐᓂᐊᓂᕐᒥᒃ, ᐃᓗᓯᕐᓱᓯᐊᕐᓂᓕᕆᓂᕐᒥ ᐃᓄᓕᕆᓂᕐᒥᓗ ᑐᕐᖃᑕᕐᕕᑯᓐᓂᑦ, ᒋᐊᖃᕐᐸᑕᓗ ᑯᐯᒻᒥ ᐃᓪᓗᓕᕆᔨᒃᑯᖏᓐᓂᒃ ᑲᔪᓯᓕᕐᑎᓯᒍᓐᓇᓂᕐᒧᑦ ᐅᓐᓂᑑᑕᐅᔪᓂᒃ ᑯᐯᒻᒥ ᐅᓐᓂᓘᑎᓕᕆᔨᒃᑯᑦ ᑐᓴᕐᑎᓯᒍᑎᖏᓐᓄᑦ ᓄᐃᑕᐅᔪᓂᒃ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒋᐊᑦᓯᐊᕈᒪᒍᕕᑦ, ᐅᒥᖓ ᐅᖄᕕᖃᕐᓗᑎᑦ:

ᔮᑦ ᑐᓯᓅ-ᐱᐊᕐᓃ
ᐅᖄᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ
514-482-8220 ext. 309 | publicrelations@kativik.qc.ca