ᖃᕆᑕᐅᔭᒃᑯᑦ ᐱᑐᑦᓯᒪᖃᑎᒌᕝᕕᓂ ᐃᓄᑐᐃᓐᓀᑦ ᐃᓕᓭᒍᑎᑦᓴᔭᖏᓐᓄᑦ ᑐᕃᓐᓇᕈᑎᐅᑉ ᐱᒋᐊᕐᑎᑕᐅᓂᖓ

2020 | 04 | 15
ᑐᓴᕋᑦᓴᖅ

ᑰᒃᔪᐊᖅ, ᑯᐯᒃ – ᐅᓪᓗᒥ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑲᑦᓱᙰᒍᑎᒋᒻᒪᕆᑦᓱᒍ ᐱᒋᐊᕐᑎᓯᕗᑦ ᓄᓇᕕᒻᒥ ᐃᓄᑐᐃᓐᓀᑦ ᐃᓕᓭᒍᑎᑦᓴᔭᖏᓐᓂᒃ ᐃᓕᓐᓂᐊᕈᑎᑦᓴᓄᑦ ᐊᕐᖁᑎᒋᔭᐅᒍᓐᓇᑐᒥᒃ (Nunavik-IcE), ᖃᕆᑕᐅᔦᑦ ᐱᑐᑦᓯᒪᖃᑎᒌᕝᕕᖏᓐᓂ ᑕᑯᑦᓴᐅᑎᑦᓯᕕᒻᒥᒃ ᐃᓕᓐᓂᐊᕈᑎᑦᓴᓂᒃ ᐃᓄᒃᑎᑑᕐᑐᓂᒃ, ᖃᓪᓗᓈᑎᑑᕐᑐᓂᒃ ᒍᐃᒍᐃᑎᑑᕐᑐᓂᓪᓗ.

“ᑐᕌᒐᓪᓚᕆᓕᒃ ᑖᓐᓇ ᑕᑯᑦᓴᐅᑎᑦᓯᕕᓐᓄᑦ ᐊᕐᖁᑎ ᓄᓇᕕᒻᒥ ᐃᓕᓭᔨᓂᒃ ᐃᑲᔪᕐᓯᒍᑎᐅᑦᓱᓂ ᐃᓕᓭᒍᑎᑦᓴᓂᒃ ᐃᓕᓐᓂᐊᕈᑎᑦᓴᕗᓐᓄᑦ ᐱᑎᑦᓯᒪᔪᓂᒃ ᐊᑐᐃᓐᓇᓴᖃᕐᑎᓯᒍᑎᐅᑦᓱᓂ,” ᐅᖃᐅᓯᖃᓚᐅᕐᑐ ᐄᑐᐊ ᓯᓅᐹ, ᐃᓕᓐᓂᐊᕈᑎᓕᐅᕐᕕᒥ ᑐᑭᒧᐊᑦᑎᓯᔨ ᑲᑎᕕᒃ ᐃᓕᓴᕐᓂᓕᕆᓂᕐᒥ.
COVID-19 ᖃᓂᒻᒪᓯᖅ ᓇᒧᓕᒫᖅ ᐃᕐᐸᓯᒪᓂᖓᓄᑦ ᐃᓕᓐᓂᐊᕖᓪᓗ ᐅᒃᑯᐊᑕᐅᓯᒪᓂᑯᖏᓐᓄᑦ, ᖃᕆᑕᐅᔦᑦ ᐱᑐᑦᓯᒪᕕᖏᓐᓂ ᐃᓕᓐᓂᐊᕈᑎᑦᓭᑦ ᕿᑐᕐᖓᓕᓐᓅᓕᖓᔪᑦ ᕿᑐᕐᖓᖏᓐᓄᓗ ᓄᐃᑕᐅᒋᐊᖃᕐᓂᖏᑦ ᐱᓇᓱᑦᑕᐅᓴᐅᑎᒋᒋᐊᖃᓚᕿᓕᓚᐅᔪᕗᑦ. ᐊᓯᑦᔨᕙᓪᓕᐊᔪᖅ ᖃᓄᐃᓘᒋᐊᖃᓚᕿᒍᑎᒋᑦᓱᒍ, ᐃᓕᓴᕐᓂᓕᕆᔨᒃᑯᑦ ᖃᕆᑕᐅᔦᑦ ᐱᑐᑦᓯᒪᕕᖏᓐᓂ ᑕᑯᑦᓴᐅᑎᑦᓯᕕᓕᐊᒥᓂᒃ ᐊᖏᓕᒋᐊᕆᓚᕿᓚᐅᔪᔪᑦ ᓴᓇᒋᐊᓪᓚᒍᑎᒋᑦᓱᒋᑦ ᖃᕆᑕᐅᔦᑦ ᐱᑐᑦᓯᒪᕕᖏᓐᓅᕆᑦᓱᑎᒃ ᐃᓕᓭᒍᑎᑦᓴᒋᐊᓪᓚᓂᒃ ᐋᕐᕿᓱᕐᑕᐅᓯᒪᒍᓯᖃᕇᕐᑐᓂᒃ ᐊᑐᕐᑕᐅᔪᑦᓴᓕᐊᕆᔭᐅᓯᒪᑦᓱᑎᒃ ᐃᓚᒌᓄᑦ.
“ᓇᑯᕐᓴᓚᕆᒃᑯᖓ ᐱᓇᓱᖃᑎᒌᖑᑦᓱᑕ ᐱᓇᓱᐊᑦᓴᐅᑎᒋᒍᓐᓇᓯᓚᐅᕋᑦᑕ ᐊᑐᕐᑕᐅᒋᐊᓕᓐᓂᒃ ᐃᓕᓐᓂᐊᕈᑎᑦᓴᓂᒃ ᐊᑐᐃᓐᓇᕈᐃᑦᓱᑕ ᕿᑐᕐᖓᓖᑦ ᐊᑐᐃᓐᓇᖃᕐᑎᒍᒪᒧᑦ ᐃᓕᓭᒍᑎᑦᓴᓯᐊᕌᓗᓐᓂᒃ ᑐᖕᖓᕕᓕᓐᓂᒃ ᐊᕙᑎᕗᓐᓃᑐᓂᒃ, ᐃᓄᑐᐃᓐᓇᐅᓱᑕ ᐃᓪᓕᕆᔭᕗᓐᓂᒃ ᐃᓚᒌᒍᓯᑎᒍᑦ ᓄᓇᓕᑦᑎᒍᓪᓗ,” ᐅᖃᓚᐅᕐᑐᖅ ᓯᓅᐹ.

ᓄᓇᕕᒻᒥ ᐃᓄᑐᐃᓐᓀᑦ ᐃᓕᓭᒍᑎᑦᓴᔭᖏᓐᓂᒃ ᐃᓕᓐᓂᐊᕈᑎᑦᓴᓄᑦ ᐊᕐᖁᑎᒋᔭᐅᒍᓐᓇᑐᒥ (Nunavik-IcE) ᐃᓕᓐᓂᐊᒐᑦᓴᑕᓕᒃ ᐊᓯᖏᓐᓂᓗ ᓄᓇᓕᒻᒥ ᐊᑐᕐᑕᐅᒍᓐᓇᑐᓕᐊᕆᔭᐅᓯᒪᔪᓂᒃ ᐃᓕᓐᓂᐊᕈᑎᓕᐅᕐᕕᒥ ᑲᑎᕐᓱᑕᐅᓯᒪᔪᓂᒃ ᐋᕐᕿᓱᕐᑕᐅᓱᑎᓗ ᐱᓇᓱᖃᑎᒋᑦᓱᒋᑦ ᐃᓕᓭᔩᑦ, ᐃᓄᑐᙯᑦ ᖃᐅᔨᒪᓂᓖᓪᓗ ᐊᒻᒪᓗᑦᑕᐅᖅ ᐱᓇᓱᑦᑏᑦ ᐱᓇᓱᖃᑎᐅᔪᐃᓪᓗ ᐃᑲᔪᕐᑎᐅᓱᑎᒃ ᓄᓇᕕᒻᒥ ᐃᓕᓐᓂᐊᓂᓕᕆᓂᕐᒥ. ᐃᓚᒌᑦ ᐊᑐᕋᑦᓴᔭᖏᑦ ᓇᓗᓀᕐᑕᐅᓯᒪᔪᑦ ᓄᓇᐅᔭᒥᒃ ᑕᐅᑦᑐᓕᒻᒧᑦ ᓇᓗᓀᒃᑯᑕᒧᑦ ᐃᒡᓗᖑᐊᑉ ᑕᕐᕋᖓᓂᒃ ᐊᒡᓚᖑᐊᕐᓯᒪᔪᓕᒻᒧᑦ. ᑖᒃᑯᐊ ᐱᓇᓱᒍᑎᑦᓭᑦ ᓇᓗᓀᕐᑕᐅᓚᐅᔪᕗᑦ ᐃᑲᔪᕐᓯᒍᑎᑦᓴᐅᓱᑎᒃ ᐱᐊᕋᕐᓂᒃ ᐃᓅᓱᑦᑐᓂᓪᓗ ᐊᑕᐅᓯᐅᓕᖓᑎᑦᓯᓯᐊᕈᓐᓇᓯᑎᓗᒋᑦ ᖃᐅᔨᒻᒪᓯᕐᓂᒃ ᐱᒃᑲᕆᑦᓯᓂᕆᓯᒪᓕᕐᑕᒥᓂᓗ ᐊᓂᕐᕋᒥ ᐃᓕᓐᓂᐊᕕᒻᒥᓗ ᐃᓕᑦᓯᓯᒪᓕᕇᕐᑕᒥᒍᑦ.
“ᑖᒃᑯᐊ ᐊᑐᐃᓐᓇᐅᑎᑕᐅᓕᕐᑐᑦ ᓄᓇᕕᒻᒥ ᐃᓄᑐᐃᓐᓀᑦ ᐃᓕᓭᒍᑎᑦᓴᔭᖏᓐᓂᒃ ᐃᓕᓐᓂᐊᕈᑎᑦᓴᓄᑦ ᐊᕐᖁᑎᖓᒍᑦ (Nunavik-IcE) ᐊᐅᓚᑦᔦᖁᓇᓚᖓᔪᑦ ᑐᑭᖃᑦᓯᐊᑐᓂᒃ ᐃᓕᓴᕐᑕᐅᓂᒃᑯᑦ ᐃᓕᓐᓂᐊᑎᕗᑦᑕ ᐊᑑᑎᒍᓐᓇᑕᖏᓐᓂᒃ ᐃᓚᒥᓃᓪᓗᑎᒃ. ᑲᔪᖏᕐᒥᔭᒃᑲ ᐃᓚᒌᑦ ᑖᒃᑯᓂᖓ ᐃᓕᓭᒍᑎᑦᓴᓂᒃ ᖃᓄᖅ ᐃᓱᒪᖃᕐᒪᖔᕐᒥᒃ ᑐᓴᕐᑎᓯᖁᒻᒥᓱᒋᑦ ᐅᕙᑦᑎᓂᒃ.” ᐅᖃᕆᐊᓪᓚᓚᐅᕐᑐᖅ ᓯᓅᐹ.
ᓄᓇᕕᒻᒥ ᐃᓄᑐᐃᓐᓀᑦ ᐃᓕᓭᒍᑎᑦᓴᔭᖏᓐᓂᒃ ᐃᓕᓐᓂᐊᕈᑎᑦᓴᓄᑦ ᐊᕐᖁᑎᒋᔭᐅᒍᓐᓇᑐᖅ (Nunavik-IcE) ᖃᕆᑕᐅᔦᑦ ᐱᑐᑦᓯᒪᖃᑎᒌᕝᕕᖓᓂ ᐊᑐᕐᑕᐅᒍᓐᓇᑐᖅ ᒫᓂ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: www.kativik.qc.ca

— 30 —

ᑐᑭᓯᒋᐊᕐᕕᓴᖅ:
ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220 | publicrelations@kativik.qc.ca