ᒪᓐᑐᔨᐊᓪ, ᑯᐯᒃ. (ᓯᑉᑎᒻᐱᕆ 30, 2020) – ᖁᕕᐊᓱᒻᒪᕆᑦᓱᑎᒃ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐅᓪᓗᒥ ᐅᒃᑯᐃᓯᔪᑦ Moodle-ᓚᔭᐅᔪᒥᒃ, ᖃᕆᑕᐅᔭᒧᑦ ᐱᑐᑦᓯᒪᐅᑎᑎᒍᑦ ᐃᓕᓐᓂᐊᑎᑦᓯᒍᑎᐅᑦᓱᓂ ᐃᑲᔪᕐᓯᓂᐊᕐᑎᓗᒍ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓄᑦ ᓄᓇᕕᓕᒫᒥ.

“Moodle-ᓚᔭᐅᔪᖅ ᖃᕆᑕᐅᔭᒧᑦ ᐱᑐᑦᓯᒪᐅᑎᑎᒍᑦ ᐊᑐᕐᑕᐅᓲᖅ ᐃᓕᓐᓂᐊᑐᓄᑦ ᐊᒥᓱᐃᓄᑦ ᐃᓕᓐᓂᐊᕕᓐᓄᑦ ᑲᓇᑕᓕᒫᒥ ᓯᓚᕐᔪᐊᒥᓗ. “ᐅᑉᐱᒋᔭᖃᕐᖁᖓ ᓄᓇᕕᒻᒥᐅᓄᑦ ᐃᓄᒻᒪᕆᓐᓄᑦ ᐃᓕᓐᓂᐊᑎᓄᑦ ᐊᑐᐃᓐᓇᐅᑎᒍᑦᑎᒍ ᐃᑲᔪᕐᓯᓚᖓᕆᐊᖓ ᑭᖕᖒᒪᒋᔭᖏᓐᓂᒃ ᑐᓂᔨᑦᓯᐊᖁᓪᓗᑕ,” ᐅᖃᕐᑐᕕᓂᖅ ᖄᔨᐊ ᑭᓕᐅᑕᒃ, ᑲᔪᓯᒃᑫᔨ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ.
ᖃᕆᑕᐅᔭᒧᑦ ᐱᑐᑦᓯᒪᐅᑎᑎᒍᑦ ᐊᑐᕐᑕᐅᓲᖑᒐᓗᐊᖅ Moodle-ᓚᔭᐅᔪᖅ, ᐃᓕᓐᓂᐊᑎᑕᐅᒍᑎᑦᓴᓕᒫᑦ ᖃᕆᑕᐅᔭᒨᕐᑕᐅᒍᓐᓇᑐᑦ ᐃᓘᓐᓇᓯᐊᖏᑦ ᑌᒪ ᐱᑐᑦᓯᒪᐅᑎᒥᒃ ᐊᑐᖕᖏᒪᕆᓪᓗᑎᒃ ᐱᓇᓱᐊᕐᑕᐅᕈᓐᓇᓯᐊᕐᑐᑦ. “ᑌᒣᓐᓂᖓ ᐊᔪᒉᑦᑐᒪᕆᒃ ᐱᐅᔫᑦᓱᓂᓗ ᐅᕙᑦᑎᓄᑦ” ᐅᖃᕐᑐᕕᓂᖅ ᒪᒪᑑ ᑎᐅᑉ, ᑐᑭᒧᐊᕐᑎᓯᔨᐅᓚᐅᕐᑐᑐᖅ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᑦ ᐱᓇᓱᒐᕐᓂᓗ ᐱᒋᐅᕐᓴᑎᑦᓯᕕᖏᓐᓂ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ.

ᐃᓕᓐᓂᐊᑏᑦ ᖃᕆᑕᐅᔭᒧᑦ ᐱᑐᑦᓯᒪᐅᑎᓖᓐᓇᐅᖏᑦᑐᑦ ᐊᓂᕐᕋᒥ ᓄᓇᕕᒻᒥᓗ ᖃᕆᑕᐅᔭᒃᑯᑦ ᑐᓴᖃᑎᕇᒍᑏᑦ ᐊᑐᐃᓐᓇᐅᖏᓐᓇᓕᒫᒐᑎᒃ. “Moodle-ᓚᔭᐅᔪᒥᒃ ᐊᑐᕐᓗᑎᒃ ᐃᓕᓐᓂᐊᑏᑦ ᖃᕆᑕᐅᔭᒨᕐᓯᖃᑦᑕᕈᓐᓇᓂᐊᕐᑐᑦ ᐃᓕᓐᓂᐊᑎᑕᐅᒍᑎᒥᓂᒃ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂᒃ ᐊᑕᐅᓯᕐᒥᒃ ᐱᖓᓲᔪᕐᑐᐃᑦ ᐃᓗᐊᓂ,” ᐅᖃᕆᐊᓪᓚᓱᓂ. ᐃᓕᓐᓂᐊᑏᑦ ᐱᒋᐅᕐᓴᑎᑕᐅᔪᑦ Moodle-ᑎᒍᑦ ᖃᕆᑕᐅᔭᖃᕐᑎᑕᐅᓛᕐᑐᑦ. ᐃᓕᓐᓂᐊᑎᑦᓯᔨᓄᑦ ᐃᑲᔪᕐᑕᐅᖃᑦᑕᓂᐊᕐᓱᑎᒃ, ᐅᖄᓚᐅᑎᒃᑯᑦ ᐊᑭᖃᖕᖏᑐᑎᒍᑦ.
ᐅᐱᕐᖔᖑᑎᓪᓗᒍ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐱᒋᐅᕐᓴᑎᑦᓯᔪᕕᓃᒃ ᐃᓕᓐᓂᐊᑎᑦᓯᔨᓂᒃ ᐃᑲᔪᕐᑎᓂᓪᓗ Moodle-ᓚᔭᐅᔫᑉ ᐊᐅᓚᑕᐅᒍᓯᖓᓂᒃ. ᐱᒋᐅᕐᓴᑎᑦᓯᒍᑎ ᐊᒥᓱᓂᒃ ᖃᐅᔨᑎᑦᓯᒍᑎᕐᑕᓕᒃ ᐃᓕᓐᓂᐊᑏᑦ ᐱᓇᓱᐊᕐᓯᒪᓕᕐᑕᖏᓐᓂᒃ ᐊᒻᒪᓗ ᐃᑲᔪᕐᓯᔭᐅᕈᑎᑦᓴᖏᓐᓂᒃ, ᖃᕆᐊᑉ ᐃᓗᐊᓂ ᐱᓇᓱᐊᕋᓗᐊᕐᐸᑕ ᖃᓂᖕᖏᑐᒥᓪᓘᓃᑦ.

“ᓄᓇᕕᒻᒥᐅᑦ ᓇᐅᓕᒫᓂᒃ ᐃᓕᓐᓂᐊᑎᑕᐅᔪᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂᒃ ᓂᕈᐊᓂᕐᓴᐅᓲᑦ ᐱᓇᓱᒐᖃᕐᓂᑯᒥᓄᑦ ᐃᓚᒥᓂᓪᓗ ᑲᒪᒋᔭᖃᕆᐊᖃᕐᓂᒥᓄᑦ. ᖃᖓᑐᐃᓐᓇᖅ ᐃᓕᓐᓂᐊᕈᓐᓇᕕᖃᕆᐊᓖᑦ ᐱᔭᑦᓴᖃᕐᓂᒥᓄᑦ. Moodle-ᓚᔭᐅᔪᖅ ᐃᑲᔪᕐᓯᓚᕆᐊᓗᓚᖓᔪᖅ ᑐᕌᒐᕆᕈᒪᔭᖏᓐᓄᑦ ᑎᑭᐅᑦᑎᑦᓯᐊᖁᓪᓗᒋᑦ.,” ᑎᐅᑉ ᐅᖃᕐᑐᕕᓂᖅ.

ᖃᓂᒻᒪᓇᐅᑉ COVID-19 ᓯᓚᕐᔪᐊᒥ ᐃᕐᐸᑎᓐᓂᖓᓄᑦ, Moodle-ᓚᔭᐅᔪᖅ ᑲᔪᓯᑎᑦᓯᒍᓐᓇᓯᐊᓚᖓᔪᖅ ᐱᒍᑦᔨᓂᒃᑯᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂ ᓇᐅᓕᒫᓂᒃ ᐃᓕᓐᓂᐊᑎᑕᐅᓂᐅᔪᓂᒃ, ᐊᒻᒪᓗ ᓯᕗᓂᕐᒥᒃ ᐱᓇᓱᒐᕐᒥᒃ ᐱᒋᐅᕐᓴᑎᑕᐅᓂᑦᓴᓄᑦ ᕈᒫᕐᓂᐊᒥᑦᓱᓂ. ᐃᓄᓐᓂᒃ ᓄᓇᕕᒻᒥᐅᓂᒃ ᐱᕕᑦᓴᖃᕐᑎᓯᓚᖓᒻᒥᔪᖅ ᓄᓇᕕᐅᑉ ᓯᓚᑖᓃᑦᑐᓄᑦ ᐊᒻᒪᓗ ᐳᕐᑐᓂᕐᓴᒥᓂᓪᓗ ᐱᔭᕇᕈᒪᓂᓕᓐᓄᑦ ᓇᒻᒥᓂᖅ ᐊᐅᓚᑦᓯᓯᐊᕐᓗᑎᒃ.
ᑲᑎᕕᒃ ᐃᓕᓴᕐᓂᓕᕆᓂᐅᑉ Moodle-ᖁᑎᖓ ᐱᕕᑦᓴᐅᒍᓐᓇᑐᖅ ᐅᕙᓂ. ᐃᓕᓐᓂᐊᖃᑕᐅᕈᒪᕈᕕᑦ ᐃᓕᒐᓱᐊᕈᓐᓇᖁᑎᑦ ᐅᕙᓂ. ᐃᓕᓐᓂᐊᑏᑦ ᐃᑲᔪᕐᓯᔭᐅᒐᓱᐊᕈᓐᓇᓄᑦ ᐃᓕᓐᓂᐊᑎᑦᓯᔨᒧᑦ ᐅᕘᓇ 1-855-543-9916.

ᐱᑦᔪᑎᕗᑦ:
ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. JBNQA ᐊᑖᒍᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᐅᓯᖃᓲᖑᒻᒥᔪᖅ ᐃᓄᓐᓄᐊᖓᑐᐃᓐᓇᑑᑦᓱᓂ ᑎᒥᐅᔫᑦᓱᓂ ᐊᑦᔨᐅᖏᑦᑑᒍᑎᓕᓐᓂᒃ ᐱᔪᓐᓇᓂᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᑐᕌᕐᓂᓕᓐᓂᒃ ᓴᐳᒻᒥᓂᕐᒥᒃ, ᐱᑕᙯᓐᓇᑎᑦᓯᓂᕐᒥᒃ, ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ ᐊᒻᒪᓗ ᐃᓅᑦᔪᓯᖓᓂᒃ, ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ. ᑐᑭᓯᒋᐊᑦᓯᐊᕈᒪᒍᕕᑦ ᐅᕗᖓ ᑕᑯᒋᐊᕈᓐᓇᖁᑎᑦ www.kativik.qc.ca

— 30 —

ᑐᓴᕐᑎᑕᐅᒋᐊᓪᓛᕈᒪᒍᑦᓯ, ᐅᖄᕕᖃᕈᓐᓇᖁᓯ:

ᔮᑦ ᑐᓯᐊᔅᓇᐅ-ᐱᐊᕐᓃ
ᑐᓴᕈᑎᓕᕆᓂᕐᒥᒃ ᑐᑭᒧᐊᕐᑎᓯᔨ
514 797-8220 ᓂᕐᓂᓗᒍ. 309 | publicrelations@kativik.qc.ca