ᐅᐱᕐᖔᑯᑦ ᕿᑲᕐᓇᖅ ᑎᑭᓴᕐᑐᓕᕐᒥᑎᓪᓗᒍ, ᑕᑯᒋᐊᕋᑦᓴᓯᐊᓪᓚᕆᐊᓘᕗᑦ ᐊᓂᒎᑎᑦᓯᐊᓱᒋᑦ ᐱᓇᓱᐊᖃᑦᑕᓚᐅᕐᑕᕗᑦ ᖁᕕᐊᓱᒍᑎᑦᓴᓯᐊᖑᑦᓱᑎᓪᓗ ᓴᐱᓕᑦᓯᕇᑦᑑᓚᐅᕐᒪᑕ ᐃᓕᓐᓂᐊᑎᖁᑎᕗᑦ, ᐱᓗᐊᖕᖑᐊᑐᒥᑦ ᑕᒫᓂ ᐊᕐᕌᒍᕐᒥ ᐱᔭᕇᕈᓯᕐᑕᐅᓚᖓᔪᑦ. ᐊᑏ ᐱᕕᑦᓴᖃᓚᐅᕐᒥᑕ ᐱᑐᖃᑎᖃᕆᐊᓪᓚᓗᑕ ᑎᑭᐅᑎᒐᓱᑦᑕᑎᓐᓂ: ᐃᓕᓐᓂᐊᑎᓂᑦ ᓴᐳᒻᒥᓂᑦᑎᓂ ᐅᖓᒻᒧᐊᒌᕋᓱᑦᑎᓗᒋᑦ ᐱᓇᓱᐊᕐᑕᒥᑕ ᐃᓱᐊᓄᑦ, ᓱᓇᓂᑦ ᐱᓇᓱᑦᑎᐅᒐᓗᐊᕈᑦᑕ ᐃᓕᓴᕐᓂᓕᕆᓂᐅᑉ ᐃᓗᐊᓂ. ᐱᓇᓱᐊᕐᓂᕆᓚᐅᕐᑕᓯ ᐊᑦᓱᕈᕐᓱᓯ ᑐᓂᒪᓂᓯᓪᓗ ᖁᔭᒋᔭᐅᒻᒪᕆᑉᐳᑦ.
ᖃᐅᔨᒪᔪᑦᓴᐅᒐᑦᓯ, ᐊᖏᖃᑎᒌᒐᓱᐊᕐᑐᓂ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᑦ ᐱᓇᓱᑦᑎᕗᓐᓄᑦ ᑲᑐᑦᔨᖃᑎᒌᓐᓂᒦᑦᑐᓄᑦ, ᑐᓴᕐᑎᓯᒍᑎᖃᕐᓯᒪᒐᑦᑕ ᖃᒻᒥᑯᑦ ᐊᖏᖃᑎᒌᒍᑎᓕᕕᓂᐅᓂᖏᓐᓂᒃ ᐱᒍᓐᓇᐅᑎᓖᑦ. ᐊᖏᖃᑎᒌᓐᓂᖃᕈᓐᓇᓯᓯᒪᓕᕐᒥᔪᒍᑦ ᐃᓕᓐᓂᐊᑎᑦᓯᔨᓄᑦ ᐱᓇᓱᑦᑎᑐᐃᓐᓇᓄᓪᓗ, ᑲᑐᑦᔨᖃᑎᒌᑦᑎᖏᓪᓗ ᐱᓇᓱᖃᑎᒋᑦᓱᒋᑦ ᐊᓪᓚᖑᕐᑎᓯᓂᕐᒧᑦ ᐊᖏᖃᑎᒌᒍᑎᓂᒃ ᓱᓕᓕᕐᑎᑕᐅᒋᐊᖃᓛᕐᒥᑎᓪᓗᒋᑦ ᑖᒃᑯᓄᖓ ᐱᓇᓱᑦᑎᓄᑦ. ᓯᕗᓪᓕᐸᐅᑦᔨᖏᓐᓇᑕᕗᑦ ᒪᓂᔨᓯᒪᓂᖅ ᐱᓕᐅᑦᔨᒍᑎᖃᑦᓯᐊᑐᓂᒃ ᐱᓇᓱᐊᕐᓂᒥ ᖃᓄᐃᑦᑐᒦᓐᓂᖃᕈᑎᓄᑦ ᐱᕙᓪᓕᖁᑏᓪᓗ ᐱᓇᓱᑦᑎᓕᒫᓄᑦ ᑲᑐᑦᔨᖃᑎᒌᓐᓂᒦᑦᑐᓄᑦ, ᐊᑦᔨᒌᖕᖏᒍᑎᖃᕈᓐᓀᑎᒐᓱᐊᕐᓱᒋᑦ, ᐱᓗᐊᕐᑐᒥᒃ ᐱᓇᓱᑦᑎᑖᕆᔭᐅᓲᓄᑦ ᓄᓇᓕᒻᒥᓂ ᓄᓇᕕᒻᒥ.
ᓯᕗᒧᐊᑦᑏᑦ ᑐᑭᓯᓂᐊᕐᕕᖃᕐᑎᓗᒋᑦ, ᔫᓂᐅᓚᐅᔪᒥ ᐱᒋᐊᓚᐅᔪᑦᓱᑎᑦ, ᐱᔭᕇᕆᐊᕕᑦᑐᑦ. ᑕᒪᑦᓱᒪ ᐸᕐᓇᑕᐅᓂᖓ ᓯᕗᓂᑦᓴᕆᓂᐊᕐᑕᑎᓐᓄᑦ ᑐᕌᕐᓂᖃᕐᖁᖅ ᑕᑯᓐᓇᖑᐊᕆᐊᓪᓚᖁᓪᓗᑕ ᖃᓄᖅ ᓴᐳᑦᔨᓲᖑᓂᑦᑎᓂ ᓄᓇᕕᒻᒥ ᐃᓕᓐᓂᐊᑎᖁᑎᑦᑎᓂᑦ. ᐊᖏᔪᒥ ᓴᐳᑦᔨᓯᒪᓂᓯ ᑕᒪᑦᓱᒪ ᐱᓇᓱᐊᕐᑕᐅᓂᖓᑕ ᐊᑯᓐᓂᖏᓐᓂ ᓄᓇᕕᒻᒥ ᒪᓐᑐᔨᐊᒥᓪᓗ ᐃᓪᓕᓇᕐᑐᓂᑦ ᐱᑎᑦᓯᖃᑦᑕᓚᐅᕐᖁᖅ. ᐃᓚᐅᑎᑦᓯᕙᓪᓕᐊᓂᖅ ᐱᒍᓐᓇᓯᑎᑦᓯᓚᐅᕐᑐᖅ ᐊᑦᑕᓀᑦᑐᒦᓪᓗᑕ ᓂᐸᖃᔫᒥᖁᓪᓗᑕ ᑕᑯᒍᒪᔭᑦᑎᓂᑦ ᓂᕆᐅᒋᔭᑦᑎᓂᓪᓗ, ᓄᐃᑦᓯᓱᓂ ᑐᑭᓯᒪᐅᑎᖃᑎᒌᓐᓂᒥᒃ, ᑫᓪᓗᑐᐃᑦᓱᓂ ᐃᑲᔪᕐᑎᒌᓐᓂᒥᒃ ᓴᐳᑦᔨᖃᑎᒌᓐᒥᓪᓗ, ᐱᒍᓐᓇᓕᐅᒥᑎᑦᓯᓱᓂ ᐃᓚᐅᖃᑦᑕᑐᓂᑦ, ᐃᓄᑐᐃᓐᓀᓗ ᐃᓗᕐᖁᓯᖓᑕ ᑐᓴᐅᒪᔭᐅᓂᖓᓂᒃ ᐱᔪᓐᓇᓂᕐᑖᑎᑦᓯᔫᒥᑦᓱᓂ. ᐊᖏᕈᑕᐅᒪᔪᕐᑎᑐᑦ ᐊᔪᐃᓐᓇᕈᑎᒋᖃᑦᑕᓚᐅᕐᑕᕗᑦ ᑕᓯᐅᕐᓯᓚᖓᔪᖅ ᓲᕐᓗ ᐅᕙᑦᑎᓂᑦ ᐱᒋᐊᕈᑎᖃᕐᑎᓗᑕ ᑕᒪᑦᓱᒥᖓ ᓯᕗᒧᑦ ᐊᓪᓗᕆᐊᕐᓂᑎᓐᓂ. ᑐᓴᐅᒪᒐᓱᑦᓭᓇᕐᓂᐊᖁᓯ ᓄᑖᓂᑦ ᑐᓴᕋᑦᓴᖃᓕᕐᒪᖔᑦᑕ!
ᑏᓯᒻᐱᕆ 2024-ᖑᑎᓪᓗᒍ, ᐃᓕᓐᓂᐊᑎᓂᑦ ᑭᒡᒐᑐᕐᑏᑦ ᐅᖄᔨᐅᓚᐅᔪᕗᑦ ᑯᐯᒥ ᐃᓕᓴᕐᓂᓕᕆᓂᕐᒧᑦ ᑐᕐᖃᑕᕐᕕᒧᑦ (MEQ) ᖃᐅᔨᓯᒪᔭᕐᒥᑦᑕ ᒥᑦᓵᓄᐊᖓᔪᓂᑦ ᐊᐅᓚᑦᓯᓂᑦᑎᓅᓕᖓᔪᓂᑦ. ᑲᑎᓕᕐᒥᒐᒥ ᒫᑦᔨᐅᑎᓪᓗᒍ, ᑖᒃᑯᐊ ᐃᓕᓐᓂᐊᑎᓂᑦ ᑭᒡᒐᑐᕐᑎᐅᔪᑦ ᕿᒥᕐᕈᓚᐅᔪᕗᑦ ᐃᓄᑦᑎᑑᓕᕐᑎᑕᐅᒪᔪᒥᒃ ᑐᓴᕐᑎᓯᒍᑎᒥᒃ ᐅᖄᒍᑎᒋᑦᓱᒋᓪᓗ ᐃᒣᒋᐊᖁᔭᐅᔪᑦ ᑐᕌᖓᑦᓱᑎᑦ ᑲᑎᕕᒃ ᐃᓕᓴᕐᓂᓕᕆᕕᒻᒧᑦ ᑌᒃᑯᐊᓗ ᐅᖄᒍᑎᒋᒻᒥᓱᒋᑦ ᐃᓕᓴᕐᓂᓕᕆᓂᕐᒥ ᑐᕐᖃᑕᕐᕕᒧᑦ ᓂᓪᓕᐊᒍᑕᐅᒪᔪᑦ. ᑕᒪᑦᓱᒪ ᖃᐅᔨᓴᐅᑕᐅᓂᖓ ᐅᒃᑯᐃᓯᒋᐊᓪᓚᕈᑎᐅᒻᒪᑦ ᑐᓴᐅᒪᖃᑎᖃᕐᓂᒥᒃ ᑐᕐᖃᑕᕐᕕᒥᒃ, ᑐᑭᓯᒪᑦᓯᐊᕆᐊᓪᓚᓂᕐᒥ ᑭᖕᖒᒪᑦᓯᕗᒍᑦ ᖃᓄᐃᑦᑐᒦᓐᓂᑎᓐᓂ. ᐃᓱᐃᓪᓕᐅᓇᕐᑐᑰᕐᓂᕆᖃᑦᑕᑕᕗᑦ ᐃᑲᔪᕐᑕᐅᒍᑎᒋᒍᒪᖃᑦᑕᑕᕗᓪᓗ ᐊᒥᓱᑦ ᐅᖃᐅᓯᕆᖃᑦᑕᕋᓗᐊᕐᓱᑎᒋᑦ ᑖᑦᓱᒧᖓ ᑐᕐᖃᑕᕐᕕᑎᓐᓄᑦ ᑲᑐᑦᔨᖃᑎᒌᒍᑕᐅᒋᐊᓪᓚᕆᐊᖃᕐᐳᑦ ᐱᓇᓱᕝᕕᖏᑦᑕ ᐊᕕᑦᑐᓯᒪᔪᖁᑎᖏᓐᓂ, ᑐᕐᖃᑕᕐᕖᑦ ᐊᓯᖏᑦ ᐃᓚᐅᑎᓪᓗᒋᑦ ᐊᓪᓛᑦ.
ᐊᓕᐊᓱᑦᑐᖓ ᖃᐅᔨᑎᑦᓯᒋᐊᒥᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᖅ ᓄᓇᕕᒻᒧᑦ ᐱᓇᓱᐊᕐᑕᐅᓂᖓ ᐱᕙᓪᓕᐊᑐᐃᓐᓇᒪᑦ. ᐆᑦᑑᐱᕆ 2023-ᒥᑦ ᒫᑦᔨ 2024-ᒧᑦ, ᑐᑭᓯᓂᐊᕐᓂᖃᓚᐅᔪᕗᖅ ᓄᓇᕕᓕᒫᒥ ᓄᓇᓕᓐᓂ 14-ᓂ ᑕᐅᑐᕐᖂᕈᑎᑦᑎᓄᑦ ᐃᓕᖓᑦᓱᓂ ᐃᓕᓐᓂᐊᕆᐊᓪᓚᑖᓂᕐᒧᑦ ᐳᕐᑐᓂᕐᓴᒋᐊᓪᓚᒧᑦ ᑐᖕᖓᕕᖃᕋᔭᓕᕐᑐᒧᑦ ᓄᓇᕕᒻᒥ. ᐅᖄᒍᑕᐅᖃᑦᑕᓚᐅᔪᔪᑦ ᑐᕌᕈᒪᔭᑦᑕ ᒥᑦᓵᓄᑦ, ᐱᓇᓱᐊᕈᑎᑦᓴᐅᒐᔭᕐᑐᓗ, ᐊᐅᓚᒍᑎᑦᓭᓗ, ᓇᓃᓐᓂᕆᒐᔭᕐᑕᖓᓗ. ᑌᑲᖕᖓᓂ ᐊᕐᕕᑕᓚᐅᔪᑎᓪᓗᑕ, ᐱᓇᓱᐊᖃᑎᖃᖃᑦᑕᓕᕐᖁᒍᑦ ᐃᓕᓐᓂᐊᑎᓂᑦ ᑭᒡᒐᑐᕐᑎᓂᑦ ᕿᒥᕐᕈᖃᑎᒋᑦᓱᑎᒋᑦ ᖃᓄᐃᓕᒍᑕᐅᓚᐅᔪᔪᑦ 2023-ᒥ MEQ ᖃᓄᖅ ᐃᓱᐊᕐᑑᒐᔭᕐᒪᖔᑦ ᐅᖄᒍᑎᒋᑦᓱᒋᓪᓗ ᓄᓇᕕᒻᒥ ᐊᕐᕕᑕᕐᓂᑎᓐᓂ ᑐᑭᓯᓂᐊᕈᑎᒋᖃᑦᑕᓚᐅᔪᔭᕗᑦ. ᓱᕐᖁᐃᓯᓯᒪᓕᕐᑐᒍᑦ ᓄᓇᕕᒻᒥᐅᑦ ᑕᑯᒍᒪᒻᒪᑕ ᑲᑎᕕᒃ ᐃᓕᓴᕐᓂᓕᕆᓂᖅ ᓯᕗᓕᕐᓂᐊᑎᓪᓗᒍ ᑕᒪᑦᓱᒥᖓ ᐱᕙᓪᓕᐊᔭᐅᓂᖓᓂᒃ ᑲᑐᑦᔨᖃᑎᖃᕐᓗᑎᒃ ᒪᑭᕝᕕᑯᓐᓂᒃ. ᓯᕗᒧᑦ ᑕᑯᓐᓇᓗᑕ, ᐱᓇᓱᐊᖃᑎᖃᕐᓂᐊᖁᒍᑦ ᑲᑐᑦᔨᖃᑎᖃᕐᓗᑕ ᐃᓕᓴᕐᓂᓕᕆᓂᕐᒧ ᑯᐯᒥ ᑐᕐᖃᑕᕐᕕᑎᓐᓂᒃ ᑕᒪᑦᓱᒪ ᐱᕙᓪᓕᐊᔭᐅᓂᖓᑕ ᐱᓇᓱᐊᕐᑕᐅᓂᖓ ᐱᒋᐊᕐᑕᐅᖁᓪᓗᒍ ᐱᖕᖑᑎᑕᐅᓪᓚᕆᖁᓪᓗᒍᓗ.
ᑕᙯᕐᓯᓯᐊᓛᖁᔨᕗᖓ ᕿᑲᕐᓇᓯᐅᑦᓯᐊᖁᔨᑦᓱᖓᓗ. ᓄᒃᑭᒋᐊᓪᓚᓛᕐᖁᓯ ᐃᓕᓐᓂᐊᓇᖅ ᐱᒋᐊᓯᒻᒥᐸᑦ. ᓇᑯᕐᒦᒃ ᐃᓕᓐᓂᐊᓂᕐᒥᒃ ᐱᓇᓱᐊᕈᒪᓯᒪᒐᑦᓯ, ᓇᑯᕐᒦᓗ ᓄᓇᕕᒻᒦᒍᒪᓯᒪᒐᑦᓯ.