ᐃᓅᓯᐅᑉ ᐃᑭᐊᕐᒥᐅᑕᖓ
with Charlie Yuliusie
– “ᓱᓇᒥᒃ ᐱᓕᐅᑦᔨᓲᒍᕕᑦ?” ᐊᐱᕐᓱᒍᓗᑐᐃᓐᓇᖁᖓ.
– “ᐃᑎᕐᑎᓯᑦᑌᓕᔨᐅᖃᑦᑕᓯᒪᕗᖓ ᖄᑭᕐᓱᑕ.” ᓵᓕ ᑭᐅᔪᖅ.
ᐅᖃᕈᓐᓇᓱᖓ, ᑭᐅᒍᑎᖓ ᓇᓗᓇᕈᓐᓀᕇᕐᑎᓗᒍ. ᑎᒥᖓᑕ ᖃᓄᐃᓕᖓᓂᖓ ᕿᑦᑌᖓᓂᖓᑕᓗ ᑕᑯᑦᓴᐅᓂᖓ ᑕᑯᑦᓴᐅᒌᕐᓱᓂ. ᓵᓕᐅᑉ ᐱᐊᕋᕐᓄᑦ(ᑲᒃᑲᓛᓄᑦ) ᐃᔨᕐᓯᒪᖕᖏᓂᖓ ᓄᐃᑕᒌᕐᑐᖅ ᐃᙯᓕᓴᕐᕕᒥ ᑐᑯᒥᓇᕐᑑᑫᓐᓇᑐᖅ. ᒪᑭᑕᑦᓯᐊᓱᓂ, ᑕᑯᓐᓇᓯᐊᑲᓪᓚᓱᓂᓗ. ᑖᒃᑯᐊ ᐱᐅᓯᖏᒃ ᓄᐃᑦᓯᒐᓛᐱᑫᓐᓇᑑᒃ ᖁᓚᕐᓇᖏᑦᓯᐊᑐᒥᒃ ᑲᒪᒍᓐᓇᓯᐊᕐᑐᒥᒃ ᑲᒪᒋᐊᖃᓕᕈᓂ.
– “ᐅᑎᑲᐱᓐᓂᐊᕋᒣ.” ᓵᓕ ᐅᖃᕐᑐᖅ ᑲᒪᒋᐊᕐᑐᓯᑦᓱᓂ ᐃᓱᐃᓪᓘᕆᐅᑎᔫᓐᓂᒃ ᓱᕈᓯᕐᓯᓗ (ᑐᕈᓯᖅ) ᓂᕕᐊᕐᓯᐊᒥᓪᓗ (ᐸᓂᒃ).
ᐱᐊᕃᑦ (ᑲᒃᑲᓛᑦ) ᓄᐃᑕᑎᑦᓯᒋᐊᒥᒃ ᓂᒪᕈᓐᓇᓯᐊᕐᓂᒥᒃ ᐊᓕᐊᓲᒍᕗᑦ ᓵᓕ ᐃᓕᓐᓂᐊᑎᑦᓯᓕᕐᒪᑦ (ᐃᓕᓭᓕᕐᒪᑦ) ᓵᓕᒥᒃ, ᑕᑯᓐᓇᑎᑦᓯᕕᑦᓴᓯᐊᒦᑦᓱᑎᓪᓗ. ᐃᓚᖓᓂ, ᐱᐊᕃᑦ (ᑲᒃᑲᓛᑦ) ᓇᒧᓕᒫᑐᐃᓐᓇᑐᑦ ᑕᒻᒪᐅᔨᔭᐅᒐᔭᖃᑦᑕᓚᐅᕐᑐᑦ ᐸᒃᑲᐅᔪᕆᔭᐅᓗᑎᒃ, ᐊᓇᐅᔭᐅᓗᑎᒃ ᖃᑭᕐᓯᑎᖁᑎᒋᓂᕐᐹᓄᑦ! ᐊᕝᕓᑎᒋᐊᑲᓪᓚᖃᑦᑕᓗᒋᑦ ᐱᒋᐅᕐᕕᒃ ᐃᓕᓐᓂᐊᕕᐅᑉ ᐃᓗᐊᓂ ᐃᙯᓕᓴᕐᕕᒃ ᑐᑮᕈᕕᕝᕕᐅᔮᓚᐅᕐᑐᖅ ᐊᓕᐊᑉᕙᓛᔪᓄᑦ 🏃♀️🏃♂️💨✨
ᓵᓕ ᐱᔪᓐᓇᐅᑎᑖᕐᓯᒪᕗᖅ ᐃᙯᓕᓴᕐᑎᓯᔨᐅᓂᕐᒧᑦ ᓴᓪᓗᓂ. ᑕᑯᒋᑦ, ᐅᖓᑖᓄᕈᕕᒃ ᒥᖑᐊᕐᓯᒪᔫᑉ ᐃᙯᓕᓴᕐᕕᐅᑉ ᓇᑎᖓᓂ, ᓵᓕᐅᑉ ᐃᑎᕐᑎᓯᑦᑌᓕᕕᖓᑕ ᓇᔪᒐᖓᓅᕈᕕᑦ ᓄᕐᖃᑎᑕᐅᓚᖓᒋᐊᒥᒃ ᖃᐅᔨᓚᖓᕗᑎᑦ: ᓵᓚᕐᖄᖃᕐᕕᐅᒍᓐᓇᓕᒫᕐᑐᒥ. ᑌᒪᖕᖓᓕᒫᑦᓯᐊᖅ.
ᓇᑯᕐᒦᐳᖓ ᐃᓕᓐᓂᐊᑎᑦᓯᔨᓂᒃ (ᐃᓕᓭᔨᓂᒃ) ᐃᓕᓐᓂᐊᑎᑦᓯᓂᖅ ᙯᑦᑕᐅᓯᒪᒻᒪᑦ. ᐱᓕᐅᑦᔨᓃᑦ ᐅᕙᓐᓂᒃ ᐃᑲᔪᕐᓯᓯᒪᔪᐃᑦ ᐃᓅᓯᕋᓂᒃ, ᐊᕐᓱᕈᓐᓇᑐᓂᒃ ᐊᓂᒍᐃᑎᑦᓯᖃᑦᑕᓱᑎᒃ. ᐊᓕᐊᑉᐳᖓ ᐃᓕᓐᓂᐊᑎᓯᒍᓐᓇᓕᕋᒪ ᐅᕕᒃᑫᑦ ᐱᔫᒥᐅᑎᒋᓂᐊᕐᑕᖏᓐᓂᒃ.
ᖃᐅᔨᓚᐅᕐᖁᖓ ᓵᓕᒥ ᒪᓕᑲᑦᑕᓕᕐᓱᖓ ᐊᐱᕆᑲᕐᑕᓱᒍ. ᑕᑯᓐᓇᓯᐊᕈᓐᓇᓯᓚᕿᑦᓱᖓ ᓱᓇᓂᒃ ᐃᔨᕐᓯᓯᒪᒻᒪᖔᑦ ᑮᓇᕐᖁᑕᐅᒌᒃᑯᑎᒥᑕ ᐃᓗᐊᓂ. ᖃᓄᖅ ᑲᒪᒍᓐᓇᓯᐊᕐᑐᖅ ᐱᐊᕋᓕᒫᑦᓯᐊᓂ (ᑲᒃᑲᓛᓕᒫᑦᓯᐊᓂᒃ) ᓄᓪᓚᑎᑦᓯᐊᓱᒋᑦ ᓈᓚᑦᓯᐊᓱᒋᓪᓗ? 🤔
– “ᐊᑦᔨᒌᑦᑎᓯᓲᒍᕗᖓ”
ᑭᐅᒋᐊᑭᑦᑐᐊᐱᒃ ᑐᑭᓯᓐᓇᕇᕐᓱᓂ ᒪᕐᕈᐃᓕᖓᔫᓐᓂᒃ ᐅᐊᕈᑎᒌᑦᓱᑎᒃ ᐱᔪᓐᓇᐅᑕᐅᔫᓐᓂᒃ ᐃᑲᔪᕐᓯᐅᑎᐅᑦᓯᐊᕈᓐᓇᓱᑎᒃ ᐃᓕᓐᓂᐊᑎᑦᓯᔨᒧᑦ (ᐃᓕᓭᔨᒧᑦ): ᓈᓚᒐᑦᓴᐅᓗᓂ ᐃᑦᔭᕈᒥᓇᖏᓐᓈᓱᓂ. ᐱᐊᕋᓂᒃ (ᑲᒃᑲᓛᓂᒃ) ᑲᒪᑯᑖᕈᓐᓇᓯᐊᕐᓱᓂ ᐊᓕᐊᖏᑐᓂᒃ ᐃᑉᐱᓂᐊᕐᓂᒧᑦ ᐅᓇᕐᓂᖓᓄᓗ ᐊᓂᕐᓂᐅᑉ; ᐃᑦᔭᕋᑦᓴᓯᐊᒍᒐᓱᐊᕐᓂᖅ ᐊᖏᓕᕙᓪᓕᐊᑎᒐᓱᐊᕐᓗᒍ ᓱᓇᓱᐊᕈᒪᓂᖏᓐᓄᑦ ᑲᔪᓯᑦᓯᐊᖏᓐᓇᕋᓱᐊᕐᓂᖏᓐᓄᓗ ᑐᑭᓯᓐᓇᓯᐊᖏᓐᓇᓗᓂ ᑕᓯᐅᕐᓱᒋᑦ. ᐊᑏ ᓱᓕᑦᓯᐊᓂᕐᒦᓚᐅᕐᑕ, ᐅᓇᑕᕐᑎᓴᔭᐅᖏᑐᐃᑦ. ᐊᑐᓂ ᐱᐊᕋᖅ (ᑲᒃᑲᓛᖅ) ᖃᐅᔨᓴᑦᓯᐊᕆᐊᖃᕐᖁᖅ ᐃᓱᒣᓐᓇᕿᑦᓯᐊᓗᓂ ᓇᓪᓕᐊᓂ ᐱᓕᐅᑦᔨᓂᕐᒥ ᐃᙯᓕᓴᕐᓂᒥᓪᓘᓃᑦ ᓇᓪᓕᑳᕈᓐᓇᕆᐊᖃᕐᐳᖅ ᐱᐅᓯᕐᒥᑎᒍᑦ, ᓵᓕᐅᓪᓗ ᑕᒪᓐᓇ ᖃᐅᔨᒪᑦᓯᐊᓱᓂᐅᒃ.
– “ᐊᓕᐊᓇᕐᑐᖅ ᐱᐊᕋᕐᓂᒃ (ᑲᒃᑲᓛᓂᒃ) ᐱᓇᓱᐊᖃᑎᖃᕆᐊᒥᒃ, ᐃᔪᕐᑎᑕᐅᓲᒍᕗᖓ.”
ᐱᐊᕃᑦ (ᑲᒃᑲᓛᑦ) ᐱᓇᓱᐊᖃᑎᒋᒍᒥᓐᓇᑦᓯᐊᐳᑦ. ᒥᑭᔪᐊᐱᐅᖕᖏᓈᓱᑎᒃ ᑐᑭᓯᕙᓪᓕᐊᓯᓲᒍᕗᑦ ᐊᐅᓚᑦᓯᒍᓐᓇᓂᕐᒥᓂᒃ ᑎᒥᖓᑕ ᓂᒪᕈᓐᓇᓂᖓᓂᒃ. ᐊᓕᐊᓀᑦᑑᒥᔪᖅ, ᐃᓚᖏᑦ ᐃᓕᓐᓂᐊᑏᑦ (ᐃᓕᓵᑦ) ᑲᓈᖏᑦᑐᒥᓄᑦ ᐊᐅᓚᑕᐅᔪ ᕆᓲᑦ:
– “ᐃᓚᖏᑦ ᑕᑯᓐᓇᓲᑦ ᐃᑎᒐᒻᒥᓂᒃ ᐅᓪᓚᓕᕋᒥᒃ (ᐊᕐᐸᖏᓕᕋᒥᒃ) ᑕᑯᓐᓇᕋᓱᐊᕐᓱᑎᒃ ᖃᓄᓪᓗᐅᑎᒋᒃ ᓱᑲᑦᑑᒪᒐᕐᒥᒃ ᐅᖃᕐᓱᑎᓪᓗ ᓱᑲᕐᓂᒥᓂᒃ!” ᐃᓕᓐᓂᐊᑎᑦᓯᔨ (ᐃᓕᓭᔨ) ᐅᖃᕐᑐᖅ, ᐃᔪᓯᒋᐊᑲᓪᓚᓱᓂᓗ.
ᐃᓄᒻᒪᕆᖕᖑᐸᓪᓕᑎᓪᓗᒋᑦ ᓂᕆᒃᑫᓱᒍᒐᑦᑕ ᑎᒍᐃᓐᓇᐅᖏᑦᑐᓂᒃ ᐊᑦᔨᒌᒐᑎᒃ ᐱᖕᖏᔦᑦᑐᑎᑐᑦ. ᐃᓛᓂᕋᑎᒃ, ᐱᐊᕃᑦ (ᑲᒃᑲᓛᑦ) ᑕᑯᑎᑦᓯᓲᒍᕗᑦ ᐅᕙᑦᑎᓂ ᕿᒥᕐᕈᒌᐊᓪᓚᓚᖀᑦᓱᑎᒃ ᓱᓇᑕᖃᕐᓂᖏᓐᓂᒃ ᓱᓇᓗᑳᑦ. ᓂᒪᕐᓂᒍᓗᑐᐃᓐᓇᒥᒃ ᐱᓱᓐᓂᒥ ᐱᒋᐊᕐᓱᓂ, ᐃᑎᒐᒃ ᓯᕗᒧᐊᑦᑐᖅ ᑭᖑᓂᖓᓃᑦᑐᓗ, ᑌᒪ ᐊᒥᓲᐃᓕᕿᖓᑦᓱᑎᒃ ᑎᒥᑦᑕ ᓂᒪᕈᓯᖏᑦ ᒥᖕᖏᓕᕋᑦᑕ ᐊᑦᓱᓈᑉ ᖃᖓᒍᑦ, ᑕᑯᓐᓇᕈᓐᓀᑐᐃᓐᓇᕋᑕᓲᒍᕗᒍᑦ ᐃᑎᒐᑦᑕ ᐱᓇᓱᐊᕐᓂᖏᓐᓂᒃ. ᑖᓐᓇᑐᐊᑕᒐ ᓄᐃᑕᑎᑦᓯᓲᖅ ᑎᒥᑦᑕ ᐊᓯᑦᔨᕙᓪᓕᐊᓂᖓᓂᒃ.
– “ᑕᑯᓐᓇᕈᓐᓇᓲᒍᕗᖓ ᐱᐊᕃᑦ (ᑲᒃᑲᓛᑦ) ᐊᓯᑦᔨᕙᓪᓕᐊᓂᖏᓐᓂᒃ ᐊᕐᒑᒍᓂ, ᐊᓕᐊᒋᑦᓱᒍᓗ.”
ᓵᓕ ᐅᑭᐅᕐᑕᑐᒥ ᐱᖕᖑᐊᓂᐅᓲᓂᒃ ᐅᑎᕐᑎᓯᕙᓪᓕᐊᒐᓱᐊᕐᐳᖅ ᓄᓇᓕᒥᓄᑦ. ᐱᐅᓂᕐᓴᓯᐊᒥᒃ ᓄᐃᑦᓯᖃᑦᑕᑐᒍᑦ ᓄᓇᓕᒻᒥ ᐱᓇᓱᐊᕋᓱᐊᓂᐊᑕᖏᓐᓄᑦ. ᐃᑉᐱᒋᒐᓱᐊᖏᓐᓇᓂᐊᕐᑕᕗᑦ!