ᐊᕐᕌᒍᓕᒫᒥ ᐱᕈᕐᐸᓕᐊᓂᖅ ᐊᒻᒪᓗ ᐃᓗᕐᖁᓯᖅ: ᐃᓕᓐᓂᐊᑎᐅᑉ ᐊᑑᑎᓪᓚᕆᑦᑕᒥᓂᒃ ᑕᑯᓐᓇᕈᓯᖓ ᓄᓇᕕᒃ ᓯᕗᓂᑦᓴᕗᒻᒥᒃ

ᐃᓄᑐᐃᓀᑦ ᐅᕕᒃᑫᑦ ᐅᑎᕐᑎᓯᒋᐊᕐᑐᕕᖓ ᐅᓂᒃᑳᑐᐊᒥᓂᒃ—ᒪᓐᑐᕆᐊᓪᒥ ᓭᓐᑦ ᐋᓐᕇᒥᑦ ᓄᓇᕕᒻᒧᑦ

ᓄᓇᕕᒃ ᓯᕗᓂᑦᓴᕗᑦ (NS) ᐃᓕᓐᓂᐊᒐᑐᐃᓐᓇᐅᖏᑦᑐᖅ—ᐊᓯᑦᔨᓂᖅ ᐃᓄᑐᐃᓐᓇᓄᑦ ᐅᕕᒃᑲᓄᑦ, ᐊᒻᒪᓗ ᐊᑦᔨᐅᖏᑦᑑᓱᓂ ᐱᕕᑦᓴᖅ ᐃᓕᓐᓂᐊᓂᕐᒥᒃ ᐊᑑᑎᓯᒪᔪᓂᒃ, ᐱᓂᐊᕐᓂᓕᕆᓂᕐᒥᒃ, ᐊᒻᒪᓗ ᑕᑯᒥᓇᕐᑐᓕᐅᕐᓂᒥᒃ ᐃᓄᑐᐃᓐᓀᑦ ᑕᑯᓐᓇᕈᓯᖓᒍᑦ. ᐁᕆᓕᐅᓚᐅᕐᑐᒥ, ᑲᑎᕕᒃ ᐃᓕᓴᕐᓂᓕᕆᓂᖅ ᐳᓛᕆᐊᓚᐅᔪᖅ ᓄᓇᕕᒃ ᓯᕗᓂᑦᓴᕗᒻᒧᑦ ᓄᑖᒧᑦ ᐃᓂᒋᓕᕐᑕᖓᓄᑦ ᓭᓐᑦ ᐋᓐᕇᒥ ᒪᓐᑐᕆᐊᓪᒥ, ᐅᖄᕕᖃᕆᐊᕐᑐᓱᓂ ᐃᓕᓐᓂᐊᑎᒥᒃ ᐱᓯᒪᔪᒥᒃ 2024-2025-ᒥ ᐃᓕᓐᓂᐊᑐᓂᑦ ᐊᒻᒪᓗ ᖃᐅᔨᒐᓱᑦᓱᓂ ᐊᑑᑎᓯᒪᔭᖏᓐᓂᒃ.

19-ᓂᒃ ᐅᑭᐅᓕᒻᒧᑦ ᑕᑯᒥᓇᕐᑐᓕᐅᕐᑎᒧᑦ ᑲᑕᑦᔭᑎᐅᑦᓱᓂᓗ ᕕᓕᓯ ᐋᑕᒥᒧᑦ ᐃᕗᔨᕕᒻᒥᐅᒧᑦ, ᒪᓐᑐᕆᐊᓪ ᓄᓇᕐᔪᐊᑉ ᐊᓯᐊᓃᑦᑑᔮᕈᓐᓇᑐᖅ—ᑭᓯᐊᓂ ᐃᓂᒋᓪᓚᕆᒋᐊᓕᕕᓂᖓ. ᐊᓕᐊᒋᔭᖃᓪᓚᕆᓐᓂᖓ ᑕᑯᒥᓇᕐᑐᓕᐅᕐᓂᑯᑦ ᑕᑯᑦᓴᐅᑎᑦᓯᓂᕐᒥᒃ ᐱᐅᓯᖃᑐᐃᓐᓇᑐᕐᑎᑐᑦ ᐊᓂᕐᕋᓕᐅᔮᕐᑐᖅ ᓄᓇᕕᒃ ᓯᕗᓂᑦᓴᕗᒻᒥ, ᐃᓕᓐᓂᐊᓃᑦ ᐆᑦᑑᑎᒋᓗᒋᒃ ᐊᓐᓄᕌᓕᐅᕐᓂᒥᒃ ᐊᒻᒪᓗ ᑕᑯᓐᓇᐅᔮᕐᑎᓯᓂᕐᒥᒃ ᓴᓇᑐᔫᓂᖓᓂᒃ ᐃᑲᔪᕐᓯᑐᐃᓐᓇᑎᓐᓇᒋᒃ ᑭᓯᐊᓂᓕ ᐃᓕᓐᓂᐊᑎᑦᓯᒥᑦᓱᑎᒃ ᐃᓅᓯᓕᒫᖅ ᐱᒍᓐᓇᓂᕆᓚᖓᔭᖏᓐᓂᒃ.

ᐃᓚᐅᖃᑕᐅᖃᑦᑕᓯᒪᑦᓱᓂ ᐊᑦᔨᒌᖕᖏᑐᓂ ᐃᓕᓐᓂᐊᓇᕇᒥ ᓱᖃᑦᓯᓂᕐᓂ ᐆᑦᑐᑎᒋᓗᒋᑦ ᐸᑦᑕᓂᖅ, ᑕᑯᓐᓇᐅᔮᕐᑎᓯᔨᐅᓂᕐᒥᒃ ᐱᒋᐅᕐᓴᓂᖅ ᓯᕿᓂᒃᑯᓂ, ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᐅᑉ ᑕᑯᒥᓇᕐᑐᓕᐅᕐᓂᒧᑦ ᐊᕐᕕᑕᕐᓂᖓᓄᑦ ᑲᓇᑕᓕᒫᒥ, ᕕᓕᓯ ᐊᑑᑎᒋᐅᓚᐅᔪᖕᖏᑐᖅ ᓄᑖᓂᒃ ᐆᑦᑐᕋᑦᓴᓂᒃ.

ᓴᐳᑦᔭᐅᓂᖅ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐃᑲᔪᕐᓯᒪᕆᓚᐅᕐᑐᖅ ᐱᒐᓱᐊᕐᓂᖓᓂ. ᐃᓪᓗᖃᕐᑎᓯᓂᕐᒥᑦ ᖃᖓᑦᑕᐅᑎᓄᑦ ᐃᑲᔪᕐᓯᓂᕐᒧᑦ, ᐃᑲᔪᕐᓯᓂᕃᔪᖅ ᓴᐳᑦᔨᓂᖏᓐᓂᒃ ᓄᓇᕕᒃ ᓯᕗᓂᑦᓴᕗᑦ ᐱᓇᓱᑦᑎᖏᑦᑕ ᐃᑲᔪᕐᓂᖏᓐᓄᑦ ᐃᓕᓐᓂᐊᑕᒥᓂᒃ ᐃᑉᐱᒋᔭᙯᓐᓇᑎᑦᓯᓱᑎᒃ ᐊᒻᒪᓗ ᑐᖕᖓᓯᐊᕐᑎᓯᑦᓱᑎᒃ. ᐱᓇᓱᑦᑎᖏᑦ ᐃᓕᓐᓂᐊᓂᕐᒥ ᐃᓱᐊᕐᓭᔩᑦ, ᐃᓕᓐᓂᐊᓇᐅᑉ ᓯᓚᑖᓂ ᓱᖃᑦᓯᑎᑦᓯᔩᑦ, ᐊᒻᒪᓗ ᐃᓄᓕᕆᔩᑦ ᐊᔪᐃᓐᓇᒪᕆᓲᑦ ᐃᓕᓐᓂᐊᑎᓕᒫᑦ, ᐃᓚᖏᓪᓗ ᑭᖕᖒᒪᒋᔭᖏᓐᓂᒃ ᐱᑎᑦᓯᒐᓱᑦᓱᑎᒃ.

ᐃᑉᐱᒋᓗᐊᖕᖑᐊᑕᖓ ᕕᓕᓯᐅᑉ, ᐃᑉᐱᒍᓱᓐᓂᖅ ᑭᓇᐅᓂᕐᒥᓂᒃ ᐊᒻᒪᓗ ᐃᓄᖃᑎᒌᓐᓂᒥᒃ ᖃᐅᔨᓯᒪᔭᒥᓂᒃ. ᐃᓄᑐᐃᓐᓇᓅᓕᖓᔪᒃᑯᑦ ᐃᓕᓐᓂᐊᕈᑎᑎᒍᑦ ᐃᓗᓕᓕᑦᑎᒍᑦ ᐃᓕᓐᓂᐊᓂᕐᓂᒃ ᐆᑦᑑᑎᒋᓗᒋᑦ ᒫᓐᓇ ᐅᑭᐅᕐᑕᑐᓕᒫᒥ ᐱᓀᓗᑏᑦ, ᐃᓄᑦᑎᑐᑦ ᐅᖃᐅᓯᖅ ᐊᒻᒪᓗ ᑭᓇᐅᓂᖅ, ᐃᓗᕐᖁᓯᒃᑯᑦ ᑕᑯᓐᓇᐅᔮᕐᑎᓯᓂᖅ ᓄᓇᕕᒻᒥᐅᓂᒃ, ᐊᒻᒪᓗ ᐱᐅᓯᑐᖃᕐᑎᒍᑦ ᐱᒍᓐᓇᓃᑦ, ᐃᓕᓐᓂᐊᓂᖅ ᐊᑑᑎᓯᒪᔪᓂᒃ ᐃᑲᔪᕐᓯᔪᖅ ᑫᓪᓗᑐᐃᓂᕐᒥᒃ ᐊᒻᒪᓗ ᐃᓕᓐᓂᐊᑎᒥᒃ ᐱᒍᒪᓕᐅᒥᑎᑦᓯᓱᓂ.

ᐱᓗᐊᕐᑐᒥᒃ, ᕕᓕᓯ ᐅᐱᒍᓱᑦᑐᖅ ᐃᓄᑐᐃᓐᓇᐅᒋᐊᒥᒃ. ᐱᒐᓱᐊᕐᓂᖓ ᓄᓇᕕᒃ ᓯᕗᓂᑦᓴᕗᒃᑯᑦ ᐃᓕᓐᓂᐊᓂᑐᐃᓐᓇᒥᒃ ᐊᖏᓂᕐᓴᖅ—ᐅᓂᒃᑳᑐᐊᖅ ᓇᒻᒥᓂᖅ ᖃᐅᔨᒐᓱᓐᓂᒥᒃ, ᐃᓗᕐᖁᓯᕐᒥᓂᒃ ᐅᐱᒍᓱᓐᓂᒥᒃ, ᐊᒻᒪᓗ ᐱᔪᓐᓇᓂᖓᓂᒃ ᐊᔪᐃᓐᓇᓂᐅᑉ. ᓇᑯᕐᒦᒃ ᐅᓂᒃᑳᕋᕕᑦ ᐊᑑᑎᓯᒪᔭᕐᓂᒃ ᐅᕙᑦᑎᓄᑦ ᐊᒻᒪᓗ ᕿᓚᓈᕐᖁᒍᑦ ᑕᑯᓛᕆᐊᒥᒃ ᓇᒧᖕᖓᓛᓕᕐᒥᒪᖔᕐᐱᑦ!

ᖃᐅᔨᒋᐊᑦᓯᐊᕈᒪᕖᑦ ᓄᓇᕕᒃ ᓯᕗᓂᑦᓴᕗᑦ ᒥᑦᓵᓄᑦ? ᐊᓕᐊᓱᑐᐃᓐᓇᕆᐊᖃᕐᖁᑎᑦ ᐊᑐᐊᕐᓯᒋᐊᒥᒃ ᑖᑦᓱᒥᖓ ᐅᓂᒃᑳᑐᐊᕐᒥᒃ