ᒪᓐᑐᔨᐊᒥ (ᓯᑎᐱᕆ 12, 2016) – ᑲᑎᕕᒃ ᐃᓕᓐᓂᐊᓂᓕᕆᓂᖅ, ᔮᓐ ᐋᐸᑦᓗ ᐊᓕᐊᓱᕐᖁᑦ ᑐᓴᕐᑎᓯᒍᑎᖃᕆᐊᒥᒃ ᐊᖏᕐᑕᐅᓯᒪᓕᕐᓂᖏᓐᓂᒃ $666,921 ᑮᓇᐅᔭᖃᕐᑎᓯᒍᑎᑦᓭᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕖᑦ ᑲᑐᑦᔨᖃᑎᒌᓐᓂᖓᑕ ᐱᓇᓱᐊᕐᕕᖓᓂᑦ ᐱᓯᒪᔪᓂᒃ ᐃᓄᓕᕆᔨᑐᖃᒃᑯᓂᑦ ᑲᓇᑕᒥ, ᓄᓇᕕᒃ ᓯᕗᓂᑦᓴᕗᑦ ᐃᓗᕐᖁᓯᕐᒧᑦ ᓈᒻᒪᓯᓕᕐᓯᒪᔪᓂᒃ ᐃᓕᓐᓂᐊᑎᑦᓯᒍᑎᖃᖃᑦᑕᓛᕐᑐᖅ ᓄᓇᕕᒻᒥᐅᓄᑦ, ᐊᐅᒡᒍᔅᑎ 2017-ᒥ ᐱᒋᐊᕐᓗᒍ.

“ᐃᓄᓕᕆᔨᑐᙯᑦ ᑲᓇᑕᒥ ᑮᓇᐅᔭᖃᕐᑎᓯᓂᖓ ᐃᑲᔪᕐᓯᔪᒻᒪᕆᐅᓚᖓᕗᖅ ᓄᓇᕕᒻᒥᐅᑦ ᑎᑭᐅᑎᔭᖃᕈᓐᓇᓯᓂᖓᓄᑦ ᐊᑯᓂᓂᑦ ᐱᒍᒪᓲᕆᓕᕐᑕᖓᓄᑦ ᖁᕝᕙᕆᐊᕈᑎᑖᕈᑎᓕᓐᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᑦᓯᒍᑎᖃᕐᓂᒧᑦ ᐃᓄᖁᑎᑦᑎᓂᒃ ᐃᓕᓐᓂᐊᑎᑦᓯᓂᕐᒧᑦ ᐱᒋᐅᕐᓴᑎᑦᓯᓂᕐᒧᓗ ᑐᕌᒐᓕᓐᓂᒃ” ᐋᓚᓯ ᓈᓚᑦᑑᔭᖅ ᐅᖃᕐᑐᖅ, ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐊᖓᔪᕐᖄᖓ.

ᑮᓇᐅᔭᖃᕐᑎᓯᓂᕐᒧᑦ ᐊᖏᕈᑎᖏᑦ ᐃᓄᓕᕆᔨᑐᖃᒃᑯᑦ ᑲᓇᑕᒥ ᐳᕐᓱᓂᕐᓴᒋᐊᓪᓚᒥ ᐃᓕᓐᓂᐊᕖᑦ ᑲᑐᑦᔨᖃᑎᒌᓐᓂᖓᑕ ᓄᓇᕕᒃ ᓯᕗᓂᑦᓴᕗᓐᓂᒃ ᓄᐃᑦᓯᕈᓐᓇᑎᑦᓯᓚᖓᕗᖅ ᐱᓪᓚᕆᒻᒥᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᑦᓯᒍᑎᖃᕐᓂᒥᒃ ᓄᓇᕕᒻᒥᐅᑦ ᐅᕕᒃᑫᑦ ᐃᓕᓐᓂᐊᕈᑎᑦᓴᖏᓐᓂᒃ ᐃᓄᐃᑦ ᖃᓄᐃᑦᑐᑰᕐᓯᒪᓂᖏᓐᓂᒃ, ᐅᖃᐅᓯᖓᓂᒃ, ᐃᓗᕐᖁᓯᖓᓂᒃ, ᐱᖁᔭᓕᕆᓂᕐᒨᓕᖓᔪᓂᒃ ᐊᐅᓚᑦᓯᓂᓕᖃᕐᓂᒧᓪᓗ. “ᐃᓂᑦᓴᖃᕈᓐᓇᖁᔭᕗᑦ ᐅᕕᒃᑫᑦ ᐃᓕᓐᓂᐊᓂᕐᒧᑦ ᐃᓄᐃᑦ ᐃᓅᖃᑎᒌᓐᓂᖓᓅᓕᖓᔪᓂᒃ ᑭᓇᐅᓂᖃᕐᓂᖏᓐᓂᓗ ᐃᓕᓐᓂᐊᖏᓐᓇᓗᑎᒃ ᖃᓄᐃᑦᑐᑰᕐᓯᒪᓂᖏᓐᓂᒃ, ᐅᖃᐅᓯᕐᒥᓂᒃ ᐃᓄᕐᖁᓯᕐᒥᓂᓗ,” ᐅᖃᕆᐊᓪᓚᑐᖅ ᐋᓚᓯ ᓈᓚᑦᑑᔭᖅ.

ᓄᓇᕕᒃ ᓯᕗᓂᑦᓴᕗᑦ ᐃᓕᓐᓂᐊᑎᑦᓯᒍᑎᖃᕋᔭᕐᑐᖅ ᖁᕝᕙᕆᐊᕈᑎᓕᓐᓂᒃ ᐋᕐᕿᓱᕐᓯᒪᔪᓂᒃ ᐊᑐᐃᓐᓇᕈᕐᑎᓯᓂᕐᒧᑦ ᐃᓄᓐᓂᒃ ᐅᕕᒃᑲᓂᒃ ᐃᓕᓐᓂᐊᕆᐊᓪᓛᓂᕐᒧᑦ ᐳᕐᑐᓂᕐᓴᒋᐊᓪᓚᒦᑦᑐᓂᒃ, ᐱᓇᓱᑦᑎᐅᕈᓐᓇᓂᕐᑖᓂᕐᒧᑦ ᓄᓇᕕᒻᒥ ᐱᓇᓱᒐᕐᓄᑦ ᓴᐳᑦᔨᓯᒪᓂᕐᒧᓗ ᐃᓗᕐᖁᓯᕐᒥᒍᑦ ᓇᓗᕐᖁᑎᖕᖏᓂᕐᑖᓯᒪᔪᓂᒃ ᐅᕕᒃᑲᖃᕋᓱᐊᕐᓂᒧᑦ ᓯᕗᓕᕈᓐᓇᑐᓂᒃ ᐱᖁᔭᓕᕆᓂᒃᑯᑦ ᐃᓅᖃᑎᒌᓐᓂᑯᓪᓗ ᓯᕗᓂᕐᒥ ᓄᓇᓕᒻᒥᓂ. ᐃᓄᒃᑎᑐᑦ.

“ᐊᑯᓂᓂᐅᓕᕐᑐᖅ ᐱᓇᓱᖃᑎᖃᓲᖑᓕᕐᑐᒍᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒥᒃ ᐅᐱᒍᓱᑦᓱᑕᓗ ᐃᓚᒋᔭᐅᒋᐊᒥᒃ ᐱᖕᖑᑎᑦᓯᕙᓪᓕᐊᓂᖏᓐᓄᑦ ᐊᑐᓕᕐᑎᓯᓂᖏᓐᓄᓗ ᑕᒪᑦᓱᒥᖓ”, Erich Schmedt ᐅᖃᕐᑐᖅ, ᐃᓕᓐᓂᐊᓂᕐᒨᓕᖓᔪᓂᒃ ᐊᐅᓚᑦᓯᔨ ᔮᓐ ᐋᐸᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᖓᓂ.

ᓄᓇᕕᒃ ᓯᕗᓂᑦᓴᕗᑦ ᐱᖕᖑᑎᑕᐅᓂᖓᓄᑦ ᐃᓚᒋᔭᐅᑎᓪᓗᒍ ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᐅᓚᑦᔭᒋᐊᕐᓂᖃᖃᓚᐅᔪᖅ ᓄᓇᕕᒻᒥ ᐱᓇᓱᕝᕕᓂᒃ ᓄᓇᓕᓕᒫᓂ ᐃᓱᐃᓗᑕᐅᓲᓄᑦ: ᖁᕝᕙᕆᐊᕈᑎᖃᑦᓯᐊᖏᑦᑐᑦ ᐃᓗᕐᖁᓯᕐᒧᓗ ᓈᒻᒪᓯᐊᖕᖏᑐᑦ ᐃᓕᓐᓂᐊᑎᑦᓯᒍᑎᖏᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕖᑦ ᓄᓇᕕᒻᒥᐅᑦ ᐃᓕᓐᓂᐊᕕᒋᓲᖏᓐᓂ. “ᑖᓐᓇ ᐱᓇᓱᐊᕐᑕᐅᔪᖅ ᐱᒋᐊᕐᑕᐅᕙᓪᓕᐊᓕᕐᓯᒪᔪᖅ ᐅᖄᖃᑎᒌᓐᓂᖃᖃᑦᑕᑎᓪᓗᒋᑦ ᐊᕐᕌᒍᐃᑦ ᖁᓕᓂᒃ ᐊᒥᓲᓂᕐᓭᑦ ᐊᓂᒍᕐᓯᒪᓕᕐᑐᑦ ᐅᕕᒃᑫᑦ ᑲᑎᒪᔨᖏᓐᓄᑦ ᓴᐳᑏᒃᑯᓄᑦ. ᑭᐅᒍᑎᐅᒻᒥᔪᖅ ᐊᑯᓂᓂᑦ ᑭᖕᖒᒪᒋᔭᐅᔪᒧᑦ ᓄᓇᕕᒻᒥᐅᓄᑦ ᑭᖕᖒᒪᑦᓯᕙᓪᓛᖃᑦᑕᑐᕕᓂᐅᑎᓪᓗᒋᑦ ᐸᕐᓇᓯᒪᐅᑎᒃ ᐊᕐᕕᑕᕈᑎᐅᖃᑦᑕᑎᓪᓗᒍ,” ᐅᖃᕐᑐᖅ ᐋᓚᓯ ᓈᓚᑦᑑᔭᖅ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐊᖓᔪᕐᖄᖓ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᑕᐅᑦᓯᑰᕐᑎᓯᔪᖅ ᐱᕙᓪᓕᐊᑕᐅᓂᖓᓂᒃ ᐊᑐᓕᕐᑎᑕᐅᒐᓱᐊᕐᓂᖓᓂᓗ ᓄᓇᕕᒃ ᓯᕗᓂᑦᓴᕗᑦᑕ ᐱᓇᓱᒋᑎᒋᑦᓱᒋᑦ ᐃᓕᓐᓂᐊᓂᕐᒨᓕᖓᔪᓂᒃ ᐊᐅᓚᑦᓯᔨ ᐃᓕᓐᓂᐊᓂᕐᒥᓗ ᑲᔪᓯᕕᓕᕆᕕᖓᑕ ᔮᓐ ᐋᐸᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᖓᑕ, ᓯᕗᓕᕐᑎᓗᒋᑦ ᓄᓇᕕᒃ ᓯᕗᓂᑦᓴᕗᑦ ᐊᔪᖀᒋᐊᕐᑎᖏᑦᑕ ᑲᑎᒪᔨᖏᑦ. ᐃᓚᒋᐊᕈᑎᒋᑦᓱᒋᑦ ᑭᒡᒐᑐᕐᑎᖏᓐᓄᑦ ᔮᓐ ᐋᐸᑦ ᑭᒡᒐᑐᕐᑎᖏᓐᓄᑦ, ᑲᑎᒪᔩᑦ ᐃᓚᓖᑦ ᑭᒡᒐᑐᕐᑎᓂᒃ ᓄᓇᕕᒻᒥ ᐱᓇᓱᕝᕕᓂᒃ ᐱᓯᒪᔪᓂᒃ: ᒪᑭᕝᕕᑯᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᐊᕙᑕᖅ ᑲᑎᕕᒃ ᐃᓕᓐᓂᐊᓂᓕᕆᓂᕐᓗ.

ᓄᓇᕕᒃ ᓯᕗᓂᑦᓴᕗᑦ ᒪᓐᑐᔨᐊᒦᒐᔭᕐᑐᖅ ᐃᓚᖃᕐᓗᓂ ᓄᓇᕕᒻᒥᒃ.

ᑲᑎᕕᒃ ᐃᓕᓐᓂᐊᓂᓕᕆᓂᖅ ᓇᑯᕐᒦᓂᖃᕈᒪᕗᖅ ᑮᓇᐅᔭᖃᕐᑎᓯᓂᒃᑯᑦ ᓴᐳᑦᔨᓯᒪᓂᖏᓐᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕖᑦ ᑲᑐᑦᔨᖃᑎᒌᕝᕕᖓᓂᒃ, ᐃᓄᓕᕆᔨᑐᙯᑦ ᑲᓇᑕᒥ ᐱᓇᓱᐊᕐᑕᖓ. ᐃᓄᓕᕆᔨᑐᙯᑦ ᑲᓇᑕᒥ ᑮᓇᐅᔭᖃᕐᑎᓯᓂᖏᓐᓄᑦ ᐃᓚᒋᐊᕈᑎᒋᑦᓱᒋᑦ, ᑮᓇᐅᔭᖃᕐᑎᑕᐅᓂᒃᑯᑦ ᐃᑲᔪᕐᓯᔭᐅᒪᓚᖓᒻᒥᔪᒍᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᑲᑎᕕᒃ

ᐃᓕᓐᓂᐊᓂᓕᕆᓂᕐᒧᑦ ᒪᑭᕝᕕᑯᓐᓄᓗ ᐊᐅᓚᒍᓐᓇᓚᕿᑎᓪᓗᒍ ᓄᓇᕕᒃ ᓯᕗᓂᑦᓴᕗᑦ ᐊᕐᕌᒎᓐᓂ ᒪᕐᕉᓂ. ᒫᓐᓇᐅᓂᖓᓂ, ᐊᑯᓃᕐᑐᒧᑦ ᑮᓇᐅᔭᖃᕈᑎᐅᒐᔭᕐᑐᑦ ᖃᐅᔨᓴᕐᑕᐅᓂᕐᒦᑐᑦ.

ᐅᕙᑦᑎᓅᓕᖓᔪᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᖕᖑᑎᑕᐅᓯᒪᔪᖅ 1975-ᒥ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. 1978-ᒥᓂᑦ, ᐱᒍᑦᔨᔨᑐᐊᖅ ᐃᓕᓐᓂᐊᑎᑦᓯᓂᒃᑯᑦ ᐱᒍᑦᔨᒍᑎᓂᒃ ᓄᓇᕕᒻᒥᐅᓄᑦ. ᐃᓕᓐᓂᐊᑎᑦᓯᒍᑏᑦ ᓴᓇᔭᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᕗᑦ ᐃᓕᓐᓂᐊᕕᓐᓂ ᓄᓇᕕᒻᒥ ᓄᓇᓕᓐᓂ 14-ᓂ. ᐃᓄᒃᑎᑐᑦ ᐅᖃᐅᓯᕐᖄᖑᑎᓪᓗᒍ, ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂ. ᐃᓕᓐᓂᐊᓂᓕᕆᓂᖅ ᐃᓕᓐᓂᐊᕕᖁᑎᖃᕐᑐᖅ 17-ᓂᒃ ᐅᒃᑭᓂᕐᓴᒦᑦᑐᓄᑦ ᐳᕐᑐᓂᕐᓴᒦᑦᑐᓄᓪᓗ ᑕᓪᓕᒪᓂᓪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᕕᖏᓐᓂᒃ ᐃᓕᓐᓂᐊᕕᖁᑎᖃᕐᓱᓂ. ᑐᑭᓯᒋᐊᕈᒪᒍᕕᑦ ᐅᕙᑦᑎᓂᒃ, ᑕᑯᒋᐊᕐᓗᑎᑦ ᖃᕆᑕᐅᔭᕐᑎᒍᑦ ᐅᒃᑯᐃᖔᕐᕕᑎᓐᓂᒃ ᐅᕙᓂ: www.kativik.qc.ca

ᔮᓐ ᐋᐸᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒨᓕᖓᔪᑦ:

ᔮᓐ ᐋᐸᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒃ ᑭᓇᒃᑯᑐᐃᓐᓇᓄᑦ ᖃᓐᓗᓈᑎᑐᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᐅᕗᖅ ᐃᓕᓐᓂᐊᕕᕐᔪᐊᒨᑉᐸᓕᐊᒍᑎᓂᒃ ᐱᓇᓱᒐᕐᓅᓕᖓᔪᓂᓪᓗ ᐃᓕᓐᓂᐊᑎᖃᓲᖑᓕᕐᓱᓂᓗ 1971-ᒥᓂᑦ. ᐅᓪᓗᒥ ᐅᓄᕐᓯᕙᓪᓕᐊᓂᖏᑦ ᖃᓄᐃᑦᑐᑐᐃᓐᓇᐅᓂᖏᑦᑕ ᐃᓕᓐᓂᐊᑏᑦ 6500 ᐅᓪᓗᓕᒫᕐᑐᒥᒃ ᐃᓕᓐᓂᐊᑐᑦ 2000-ᓗ ᐃᓄᒻᒪᕇᑦ ᐃᓕᓐᓂᐊᕕᖓᓂ. ᔮᓐ ᐋᐸᑦ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒃ ᐊᕐᕌᒍᓂ 25-ᓂ ᐱᓇᓱᐊᖃᑎᖃᕐᓯᒪᓕᕐᑐᖅ ᓄᓇᖃᕐᖄᓯᒪᔪᑦ ᓄᓇᓕᖏᓐᓂᒃ, ᐱᓗᐊᕐᑐᒥᒃ ᐱᓇᓱᖃᑎᖃᕐᓱᑎᒃ ᑲᑎᕕᒃ ᐃᓕᓐᓂᐊᓂᓕᕆᓂᕐᒥᒃ ᐃᓄᓐᓂᒃ ᐃᓕᓐᓂᐊᑎᖃᕐᓂᑯᑦ ᓄᓇᕕᒻᒥᒃ ᐱᓯᒪᔪᓂᒃ ᐊᕐᕌᒍᐃᑦ ᐊᕙᑎᑦ ᐅᖓᑖᓅᓕᕐᑐᖅ. ᔮᓐ ᐋᐸᑦ ᒪᓐᑐᔨᐊᒦᑦᑐᖅ. ᑐᑭᓯᒋᐊᕐᕕᓴᖅ: www.johnabbott.qc.ca

ᐸᕐᓇᓯᒪᐅᑎᒨᓕᖓᔪᑦ:

ᐸᕐᓇᓯᒪᐅᑎᒃ ᑐᑭᓯᓴᕋᓱᐊᕈᑎᐅᕗᖅ ᓯᕗᓕᕐᑕᐅᓱᓂ ᓄᓇᕕᒻᒥᐅᓄᑦ ᐃᓄᓐᓄᑦ ᐱᓇᓱᕝᕕᖏᓐᓄᓗ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᐃᓚᒋᔭᐅᑎᓪᓗᒍ. ᑐᑭᓯᓴᕈᑏᑦ ᓄᓇᕕᒻᒥ ᐊᑑᑎᔭᐅᓚᐅᔪᑦ ᐃᓚᒋᔭᐅᑎᓪᓗᒋᑦ ᓯᓵᒥᐱ, Kawachikamach ᒪᓐᑐᔨᐊᓗ, ᕕᕈᐊᕆᒥᑦ ᑎᓯᐱᕆᒧᑦ 2013-ᒥ. ᑐᑭᓯᓴᕈᑏᑦ ᑲᔪᓯᓂᕆᔭᐅᓚᐅᔪᑦ ᐅᖃᖃᑎᒌᒍᑕᐅᓂᖓᑕ Plan Nord ᐱᓇᓱᐊᕐᑕᐅᓂᖓᑕ. ᐸᕐᓇᓯᒪᐅᑎᐅᑉ ᑐᑭᓯᓴᕐᓂᖓᑕ ᑐᓴᕐᑎᓯᒍᑎᖏᑦ ᓄᓇᕕᒻᒥᓗ ᐸᕐᓇᓯᒪᐅᑎᒃ ᑕᑯᓂᐊᕐᑕᐅᕈᓐᓇᑐᑦ ᐅᕙᓂ: www.parnasimautik.com.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᔅᓅ-ᐱᐊᕐᓃ

ᑐᓴᐅᒪᖃᑎᒌᓐᓂᒥ ᐊᑕᐅᑦᓯᑰᕐᑎᓯᔨ

(514) 482-8220

publicrelations@kativik.qc.ca

ᐅᕝᕙᓘᓐᓃᑦ

Debbie Cribb
ᑐᓴᐅᒪᖃᑎᒌᓐᓂᖅ ᐊᒥᓱᐃᑎᒍᓪᓗ ᑐᓴᐅᒪᑎᑦᓯᓂᕐᒥᒃ ᐱᓇᓱᑦᑎ
514 457-6610 ext. 5354
debbie.cribb@johnabbott.qc.ca
johnabbott.qc.ca