ᐊᐅᒡᒍᓯ 21-ᒥ ᓄᓇᕕᒃ ᓯᕗᓂᑦᓴᕗᑦ ᑐᖕᖓᓱᑦᑎᓯᓚᐅᔪᕗᖅ ᐃᓕᓐᓂᐊᑏᑦ ᓯᕗᓪᓕᐹᖑᒍᑎᖏᓐᓂᒃ. ᐅᑭᐅᓕᓐᓂᑦ 17-ᒥᑦ ᐱᒋᐊᕐᓱᑎᒃ ᑎᑭᑦᑐᓂᒃ ᐅᑭᐅᓕᓐᓄᑦ 38-ᓂ, ᑖᒃᑯᐊ ᓄᓇᓕᓐᓂᑦ ᓯᑕᒪᐅᔪᖕᖏᒐᕐᑐᓂᑦ ᓄᓇᕕᐅᑉ ᓄᓇᓕᖏᓐᓂᑦ ᐱᓯᒪᔪᑦ. ᐊᕐᕌᒍᕐᑐᓚᖓᔪᑦ ᒪᓐᑐᔨᐊᒥ, ᐃᓕᓐᓂᐊᑎᑕᐅᒍᑎᖃᕐᓗᑎᒃ ᓴᓇᔭᐅᒪᓂᖃᓪᓗᑯᕐᑐᓂᒃ ᐱᑕᖃᕐᑎᓯᒍᑎᑦᓴᐅᓗᑎᒃ ᑐᖕᖓᕕᑦᓴᓂᒃ ᑭᓇᑐᐃᓐᓇᑯᓐᓄᑦ ᐅᓇᒻᒥᓱᐊᔪᓄᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᕐᒥᒃ. ᑖᒃᑯᐊ ᐃᓕᓐᓂᐊᑎᑕᐅᒍᑏᑦ ᐱᒍᑕᐅᒍᓐᓇᓚᖓᔪᑦ ᐃᓕᓐᓂᐊᑎᓄᑦ ᓄᐊᑦᓯᒍᑎᐅᓗᑎᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓯᒪᓂᒃᑯᑦ ᖁᕝᕙᐸᓪᓕᐊᒍᑎᓂᒃ ᐊᑕᐅᑦᓯᑯᑦ ᑐᑭᓯᑎᑕᐅᒍᑎᖃᕐᓗᑎᒃ ᓄᓇᕕᐅᑉ ᖃᓄᐃᑦᑑᓂᖓᓂᒃ, ᐃᓗᕐᖁᓯᖓᓐᓂᒃ, ᐅᖃᐅᓯᖓᓐᓂᒃ ᐃᓄᖏᓐᓂᓗ, ᐃᓚᖃᕆᐊᓪᓚᒥᓗᑎᒃ ᐅᑭᐅᕐᑕᑐᒥᐅᓕᒫᑦ ᐱᕙᓪᓕᐊᓯᒪᓂᖏᓐᓂᓗ, ᐱᓂᐊᕐᓂᓕᕆᐅᑎᐅᕙᑦᑐᓂᓪᓗ ᑲᕙᒪᑎᒍᓪᓗ ᐊᐅᓚᑕᐅᔪᓂᒃ.