ᓱᑯᐃᔦᓂᕐᒧᑦ ᓴᕐᕿᔮᕐᑎᓯᓂᖅ ᑕᒫᓂ ᐊᕐᕌᒍᕐᒥᑦ ᐊᐅᓚᑕᐅᓚᐅᔪᕗᖅ ᐃᓛᒍᑦ Cree-ᒃᑯᑦ ᐃᓕᓴᕐᓂᓕᕆᓂᖓᓄᑦ ᐃᓛᒍᑦ ᐊᐅᓚᑕᐅᑦᓱᓂ ᑲᑎᕕ ᐃᓕᓴᕐᓂᓕᕆᓂᕐᒧᑦ, ᑲᑐᑦᔨᖃᑎᒌᓐᓂᖓᑕ ᑖᒃᑯᐊ ᐱᒻᒪᕆᐅᓂᖓ ᑕᑯᑦᓴᐅᓚᕿᑦᓱᓂ ᑌᑲᓂ.

2025 ᑯᐯᒃ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥ ᓴᕐᕿᔮᕐᑎᓯᓂᖓ, ᒫᑦᔨ 18-ᒥ 20-ᒧᑦ ᒍᐊᑉᒪᑰᔅᑐᐃᒥ ᑰᑦᔪᐊᕌᐱᒻᓗ, ᐊᐅᓚᔨᒐᑦᓴᓯᐊᖑᑦᓱᓂ ᐊᑑᑎᔭᐅᓚᐅᔪᕗᖅ ᑕᑯᑦᓴᐅᑎᑦᓯᓱᓂ ᓱᑯᐃᔦᓂᑎᒍᑦ ᑐᓂᕐᕈᓯᐊᖃᕐᓂᖏᓐᓂ ᐃᓕᓐᓂᐊᑏᑦ ᑯᐯᓕᒫᒥ ᓄᓇᖃᕐᖄᓯᒪᔪᑦ ᓄᓇᓕᖏᓐᓂ ᐱᓯᒪᑦᓱᑎᑦ. ᑯᐯᒃᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒧᓗ ᓴᓇᑦᑐᓴᐅᑎᓕᕆᓂᕐᒧᓗ ᑲᑐᑦᔨᖃᑎᒌᓐᓂᖓᓄᑦ ᐊᐅᓚᑕᐅᑎᓪᓗᒍ (QASEA), ᑕᒪᓐᓇ ᐊᑑᑎᔭᐅᓚᐅᔪᔪᖅ ᐃᓚᐅᒋᐊᕐᑐᓯᒪᔪᓂᑦ ᑲᑎᑎᑦᓯᓚᐅᔪᕗᖅ ᐃᓗᕐᖁᓯᖃᑎᒌᖑᖕᖏᑐᓂ 21-ᓂ ᐊᓪᓓᑦ ᐃᓄᐃᓪᓗ ᓄᓇᖏᓐᓂ ᐱᓯᒪᔪᓂᑦ, ᐃᓚᒋᔭᐅᑎᓪᓗᒋᑦ Anishnabeg, Naskapi, Cree, Huron-Wendat, ᐃᓄᐃᑦ, Innu ᐊᒻᒪᓗ Mohawk.

ᓴᕐᕿᔮᕐᑎᓯᓂᖃᕐᑎᓗᒍ 80 ᐃᓚᐅᓚᐅᔪᔪᑦ ᑕᑯᑦᓴᐅᑎᑦᓯᖃᑦᑕᓱᑎᑦ ᐱᓇᓱᐊᕐᑕᕕᓂᕐᒥᓂ ᐱᒃᑯᒪᔭᕐᓱᑎᓄᑦ ᐃᕐᖃᑐᐃᔨᖕᖑᐊᓄᑦ ᑰᑦᔪᐊᕌᐱᐅᑉ ᐃᙯᓕᓴᕐᕕᒪᕆᖓᓂ ᐱᖓᓱᐃᓕᖓᔪᒥᒃ. ᑌᑲᓂ ᐱᓂᐊᕐᓂᖃᖃᑦᑕᓚᐅᔪᒻᒥᔪᑦ ᐃᓗᕐᖁᓯᕐᒥᑎᒍᑦ ᓱᓇᓱᐊᕐᓂᖃᖃᑦᑕᓱᑎᑦ, ᑕᕐᕋᓕᔮᖃᑦᑕᓱᑎᓪᓗ, ᐱᖕᖑᐊᖃᑦᑕᓱᑎᑦ, ᐃᙯᓕᓴᕐᓂᑯᒐᓴᒃ, ᐱᑐᑦᓯᒪᐅᑎᓂᖏᑦ ᐃᑉᐱᓇᓚᕿᑎᓪᓗᒋᑦ ᐃᓕᓐᓂᐊᑏᑦ, ᐃᓕᓐᓂᐊᑎᑦᓯᔩᑦ ᐊᒻᒪᓗ ᑕᑯᓂᐊᕐᓯᒪᔪᑦ.

ᓄᓇᕕᒻᒥᐅᖑᑦᓱᑎᒃ ᖃᐅᔨᔭᐅᒋᐊᖃᓪᓚᕆᑦᑑᒃ ᓵᓚᖃᕐᓯᒪᖃᑕᐅᔫᒃ

ᐱᑕ ᓇᑖᑦᓯᑯᐊᓐ ᐊᒻᒪᓗ ᐋᓕᔅᑐ ᓵᓚ, ᐊᓯᒪᐅᑦᑕ ᐃᓕᓐᓂᐊᕕᒻᒥ ᐃᓕᓐᓂᐊᑎᐅᑦᓱᑎᒃ ᑰᑦᔪᐊᕌᐱᒻᒥ, ᐱᖓᔪᖏᔭᐅᓚᐅᔪᔫᒃ ᐳᕐᑐᓂᕐᓴᒥ ᐃᓕᓐᓂᐊᑎᓂ 1-ᒥ 3-ᒧᑦ. ᑖᓐᓇ ᐱᓇᓱᐊᕐᑕᕕᓂᕆᓚᐅᔪᔭᖓ ᑌᔭᐅᔪᖅ ᖁᓪᓕᒥᒃ ᓄᐃᑕᑎᑦᓯᓚᐅᔪᑦᓱᓂᓗ ᓱᓇᓂᑦ ᐊᑐᖃᑦᑕᓯᒪᒻᒪᖔᑕ ᖁᓪᓕᐅᑉ ᐅᕐᓱᖓᓂ ᐊᒻᒪᓗ ᓱᐳᑎᖓᓂ. ᒫᓐᓇ ᓱᓀᑦ ᐊᑐᕐᑕᐅᓲᖑᓕᕐᒪᖔᑕ ᐊᑦᔨᒌᖕᖏᓂᖏᓐᓂ ᑕᑯᑦᓴᐅᑎᑦᓯᓚᐅᔪᔫᒃ, ᓴᕐᕿᑎᑦᓯᓚᐅᔪᕘᒃ ᑌᑦᓱᒪᓂ ᐊᑐᕐᑕᐅᕙᑦᑐᕕᓃᑦ ᐃᑯᒪᑯᑖᒍᓐᓇᓂᕐᓴᐅᒋᐊᖏᑦ ᐅᕐᖂᓂᕐᓴᐅᓱᑎᓪᓗ. ᑕᑯᑦᓴᐅᑎᑦᓯᓂᕐᒥᓂᒃ ᐱᓇᓱᐊᖃᑎᖃᓚᐅᔪᕘᒃ ᐃᓄᑐᖃᕐᒥᒃ ᓯᐊᔭ ᒥᓗᕐᑐᒥᒃ ᐅᖃᐅᑦᔪᐃᓚᐅᔪᔪᖅ ᑖᒃᑯᓃᖓ ᐃᓕᓐᓂᐊᑏᓐᓂᒃ ᐱᒻᒪᕆᐅᓂᖓᓂ ᖁᓪᓕᐅᑉ, ᓱᓇᑐᐃᓐᓇᓄᑦ ᐊᑐᕐᑕᐅᒍᓐᓇᓱᓂ ᐅᕐᖂᒍᑎᐅᑦᓱᓂ ᐃᒐᒍᑎᐅᑦᓱᓂᓗ ᐃᑉᐱᓂᑎᑦᓯᓱᓂᓗ ᐊᑦᑕᓀᑦᑐᒦᓐᓂᒥᑦ, ᓂᕈᒥᓐᓂᒥᒃ, ᓱᖁᓯᔪᐃᑦᑑᓂᕐᒥᒃ, ᑐᖕᖓᓇᕐᓂᒥᒃ, ᐊᒻᒪᓗ ᐃᑎᔪᒥ ᐱᑐᖃᑎᖃᕐᓂᒥᒃ.

ᑖᒃᑯᐊ ᓄᐃᑕᑎᖓ ᒥᑦᓯᖃᕆᐊᖓᓂ ᓱᕐᖁᐃᓇᓚᐅᔪᕗᖅ. ᓱᓇᑐᐃᓐᓇᓂᑦ ᐆᑦᑐᕋᕇᕋᒥᒃ, ᓇᑦᓯᐅᑉ ᐅᕐᓱᖓ ᐃᑭᒍᐊᕐᓂᐸᐅᓚᐅᔪᔪᖅ. ᓱᐳᑎᖃᕐᓱᓂ ᒪᓂᕐᒥᒃ ᐃᑯᒪᑯᑖᒍᓐᓇᓂᕐᐸᐅᓚᐅᔪᔪᖅ.

ᐃᕗᔨᕕᒻᒥᐅᑦ ᐃᓕᓐᓂᐊᑎᖏᑦᑕ ᓄᑖᓂᑦ ᐃᓱᐊᕐᑐᓂᑦ ᐱᓇᓱᐊᕐᓂᖓ

ᑕᑯᒍᒥᓇᕐᓂᐸᐅᖃᑕᐅᓚᐅᔪᔪᖅ ᐱᓇᓱᐊᕐᑕᐅᔪᓂᑦ ᐃᕗᔨᕕᐅᑉ ᐃᓕᓐᓂᐊᑎᖏᑦᑕ ᓴᓇᓯᒪᔭᖓ ᓯᐅᓯ ᐊᐃᓇᓕᐅᑉ ᓵᓇᓐ ᐅᓱᐊᕐᔫᓗ. ᑖᒃᑯᐊ ᐳᕐᑐᓂᓕᒻᒥ 6-ᒥ ᐃᓕᓐᓂᐊᑎᐅᑦᓱᑎᒃ ᓇᒧᑐᐃᓐᓇᖅ ᓄᓇᓕᒻᒥᓂ ᕿᓂᕆᐊᓚᐅᔪᕘᒃ ᖃᐅᔨᒍᒪᑦᓱᑎᒃ ᓄᓇᓕᖓ ᖃᑯᕐᑕᒥᒃ ᒪᕐᕋᓴᔭᖃᕐᒪᖔᑦ. ᐃᑲᔪᕐᑕᐅᓱᑎᒃ ᓄᓇᕐᖃᑎᒥᓄᑦ, ᓇᕝᕚᓚᐅᔪᔫᒃ ᑰᑉ ᓯᓈᓂ, ᓴᓂᕐᓂᑦ ᐲᔦᑦᓱᑎᒃ ᓴᓇᖕᖑᐊᕋᑦᓴᓕᐊᕆᓚᐅᔪᔭᖓ. ᑕᒪᓐᓇ ᐱᓇᓱᐊᕐᑕᖓ ᓱᑯᐃᔦᓂᒃᑯᑐᐃᓐᓇᐅᖏᑦᑐᖅ ᐱᑐᒍᑎᒋᓚᐅᔪᔭᖓ ᐃᓗᕐᖁᓯᕐᒥᑎᒍᑦ ᐱᐅᓯᑐᖃᖅ ᐊᑐᕐᓱᒍ ᐱᑐᒍᑎᒋᓚᐅᔪᒻᒥᔭᖓ.

ᑐᖕᖓᕕᒃ ᓯᕗᓂᕐᒥ ᓱᑯᐃᔦᔨᑦᓴᒫᓄᑦ

ᑯᐯᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᒃᑯᑦ ᓴᕐᕿᔮᕐᑎᓯᓂᖅ ᑐᖕᖓᕕᑦᓴᓯᐊᖑᕗᖅ ᐅᕕᒃᑲᓄᑦ ᓄᓇᖃᕐᖄᓯᒪᔪᓄᑦ ᕿᓂᕈᑎᒋᔭᐅᑦᓱᓂ ᑕᑯᑦᓴᐅᑎᑦᓯᒍᑕᐅᑦᓱᓂᓗ ᓱᑯᐃᔦᓂᒃᑯᑦ ᑐᓂᕐᕈᓯᐊᖃᕐᓂᖏᓐᓂ. ᑫᓪᓗᑐᐃᖃᑦᑕᑐᖅ ᐃᓕᓐᓂᐊᑎᓂᑦ ᐃᓗᕐᖁᓯᒥᓂᑦ ᐊᑐᓕᐅᒥᔮᕐᑎᓯᑦᓱᓂ ᓱᑯᐃᔦᓂᖅ ᐊᑐᕐᓱᒍ, ᐱᔪᕆᒍᑎᒋᑦᓱᓂᐅᓪᓗ ᐃᒻᒥᓂᓗ ᐅᑉᐱᕆᔭᖃᓚᕿᑦᓱᑎᑦ. ᑕᒪᑦᓱᒪ ᐊᑑᑎᔭᐅᓂᕆᓚᐅᔪᔭᖓ ᐅᓐᓂᓯᐅᒍᑕᐅᔪᖅ ᓲᕐᓗ ᐱᔪᑦᓴᐅᔮᕐᓂᖏᓐᓄᑦ ᐃᓚᐅᔪᑦ, ᐊᒻᒪᓗ ᐃᓕᓐᓂᐊᑎᑦᓯᔨᖏᑦᑕ ᑐᓂᓯᒪᓂᖏᓐᓄᑦ ᑕᓯᐅᕐᓯᖃᑦᑕᑐᓄᑦ ᐃᓕᓐᓂᐊᑎᒥᓂᑦ ᑕᕐᕿᓂ ᐊᒥᓱᓂᑦ ᑕᒪᓐᓇ ᐊᑑᑎᔭᐅᓚᐅᖕᖏᓂᖓᓂ.

ᐃᓕᓐᓂᐊᑏᑦ ᐊᑐᐃᓐᓇᕈᕐᑎᓂᖏᓐᓂ ᑲᓇᑕᓕᒫᒥ ᓱᑯᐃᔦᓂᒃᑯᑦ ᓴᕐᕿᔮᕐᑎᓯᓂᖃᓕᕐᐸᑦ, ᐱᔪᓐᓇᕈᑎᒋᓚᐅᔪᔭᖏᑦ ᑯᐯᒥ ᓄᓇᖃᕐᖄᓯᒪᔪᑦ ᓱᑯᐃᔦᓂᕐᒥ ᓴᕐᕿᔮᕐᑎᓯᓂᖃᕐᑎᓗᒋᑦ ᐃᕐᙯᑎᑦᓯᒋᐊᕈᑎᐅᕗᖅ ᐱᔪᓐᓇᑕᖏᓐᓂᑦ ᓄᓇᖃᕐᖄᓯᒪᔪᑦ ᓄᓇᓕᖏᓐᓂ ᐃᑲᔪᕐᓯᒪᒍᑎᒋᒍᓐᓇᓂᐊᓕᕐᓱᓂᐅᓪᓗ ᓇᐅᑐᐃᓐᓇᓕᒫᓄᑦ ᓱᑯᐃᔦᓂᕐᒥ ᐱᓇᓱᐊᕐᐸᑐᓄᑦ.