ᓭᒻᒪᑕᐅᕕᒃ ᐱᕕᑦᓴᑖᕐᑎᓯᓲᖑᕗᖅ ᓭᒪᖃᑎᒌᓐᓂᒥᒃ ᐱᑕᑲᓪᓚᒃ ᐃᓕᓐᓂᐊᕕᒻᒥ ᔨᐊᓂ ᒪᒃᒪᓇᔅᒧᑦ ᐊᓪᓚᑕᐅᔪᖅ

2018 | 05 | 30
ᐅᓂᒃᑳᑦ

ᑎᐸᖓ ᐸᑦᑕᐅᔭᐅᑉ ᑎᑉᐯᓯᒪᑎᓪᓗᒍ ᑎᑉᐯᒍᑎᒥᑦ ᐱᑦᓱᓂ, ᕿᓚᐅᑦᔭᕈᑎᐅᑉ ᕿᓚᖓ ᓂᓪᓕᑎᓪᓗᒍ ᐱᓇᓱᐊᖃᑎᒌᑦ ᑲᑎᔪᑦ ᓇᑎᑦᓴᔭᒥ. ᐅᓪᓛᓯᐅᕈᑎᖃᕐᑐᒍᑦ ᐋᕐᕿᒋᐊᕆᒐᓱᐊᕐᓱᑕ ᐊᔮᔮᕈᑎᒥᒃ ᐱᓯᕐᒥᒃ ᖃᐅᔨᒐᓱᐊᕐᓱᑕ ᖃᐅᔨᑦᓴᐅᓯᐊᕋᓂ ᐊᓯᑦᔨᓂᖓᓂᒃ ᓯᓚᑎᑦᑕ, ᐆᑦᑐᑎᒋᓗᒍ ᓯᕿᓂᖅ ᓯᕿᓐᓂᓕᐅᒥᔪᖅ ᐃᒐᓛᒃᑯᑦ, ᐃᓕᑕᕐᓯᓂᖅ ᐃᓕᓐᓂᐊᑏᑦ ᐊᔪᐃᓐᓇᓂᖓᓂᒃ ᐊᒻᒪᓗ ᐱᒍᓐᓇᓯᓯᒪᓂᖏᓐᓂᒃ, ᐊᒻᒪᓗ ᓄᒃᑭᕆᐊᕐᑎᒐᓱᐊᕐᓗᒋᑦ ᐊᐅᓚᔨᒍᓯᖏᑦ. ᐅᐱᒍᓱᓐᓂᖏᑦ ᓄᐃᑕᑦᓯᐊᓱᑎᒃ, ᐃᓕᓐᓂᐊᑏᑦ ᐸᑎᑦᑕᑐᑦ ᐊᒥᓱᓂᒃ ᐅᓪᓗᕆᐊᓂᒃ ᐱᑖᕆᒍᓐᓇᓯᔭᒥᓂᒃ ᐅᓪᓛᖑᑎᓪᓗᒍ ᐃᓕᑕᕐᓯᒍᑎᐅᑎᓪᓗᒋᑦ ᒪᓕᑦᓯᐊᓂᖏᓐᓂᒃ ᒪᓕᑦᑕᐅᖁᔭᐅᔪᓂᒃ ᒪᓕᑦᓱᒋᑦ ᐃᓕᓐᓂᐊᕕᕗᓐᓂ ᐃᓪᓕᓇᕐᑐᖁᑎᖏᑦ ᓲᓱᑦᓴᓂᕐᒧᑦ, ᑕᑎᖃᖃᑎᒌᓐᓂᒧᑦ, ᓭᒪᐅᑎᓂᕐᒧᑦ ᐊᒻᒪᓗ ᑐᑭᒧᐊᑦᓯᐊᓂᕐᒧᑦ.

ᐅᓪᓛ ᑕᒫᑦ ᑫᕝᕙᓪᓚᓯᒪᓐᓇᐅᓕᕐᒪᑦ, ᐃᕐᙯᑎᒋᐊᓲᖑᔪᒍᑦ ᐃᒻᒥᓂᒃ ᓈᓚᑦᓯᐊᓂᕐᒥᒃ ᐅᒃᑯᐃᖔᕐᓗᑕ, ᑲᑎᒪᑦᓯᐊᓗᑕ, ᓭᒪᑦᓯᐊᓗᑕ ᐊᒻᒪᓗ ᓯᓐᓇᑑᒪᒋᔭᕗᑦ ᐊᖏᔫᑎᓗᒍ ᐊᑭᓐᓇᒥᐅᑕᖃᕐᓱᑕ ᓴᓇᓯᒪᔭᕗᓐᓂᒃ ᐃᓘᓐᓇᑕ, ᐊᒡᒐᐃᑦ ᖃᓄᐃᓕᓂᖏᑦ ᓂᐸᖃᕋᑎᒃ ᓴᖑᑎᑦᓯᒍᓐᓇᑐᑦ, ᐊᒻᒪᓗ ᒥᑭᓂᕐᓭᑦ ᓯᒃᑭᑖᐲᑦ ᖃᐅᔨᑎᑦᓯᒍᑏᑦ ᓂᕆᐅᒋᔭᐅᖕᖏᑐᓂᒃ ᐊᑐᕐᑕᐅᔪᓂᒃ. ᐊᑐᓂᑦ ᐃᓕᓐᓂᐊᑏᑦ ᑕᐅᑦᑐᓖᑦ ᐊᑭᓐᓇᒥ ᐊᑎᕐᒥᓂᒃ ᓄᐃᑕᑎᑦᓯᒍᑎᓂᒃ, ᐅᓪᓗᕆᐊᑦ ᐊᒻᒪᓗ ᐃᓕᑦᓯᓂᕕᓂᖓᑕ ᓄᐃᑕᑎᑦᓯᒍᑎᖏᑦ. ᓭᒻᒪᑕᐅᕕᒻᒥ, ᖃᐅᔨᓲᑦ ᐃᓚᐅᕕᒋᒍᓐᓇᑕᒥᓂᒃ ᐱᖃᑎᒌᓐᓂᒥᒃ ᐊᖏᔫᑎᑦᓯᔪᒥᒃ, ᓂᑲᒍᓱᓐᓂᒥᒃ ᐊᒻᒪᓗ ᐱᕈᕐᓴᓂᕐᒥᒃ.

ᓭᒻᒪᑕᐅᕕᒃ ᐅᕝᕙᓘᓐᓃᑦ ᓭᒪᓂᐅᑉ ᖃᕆᐊᖓ, ᐃᓅᖃᑎᒌᓐᓂᒧᑦ ᐊᒻᒪᓗ ᐃᑉᐱᓂᐊᓂᕐᒧᑦ ᐃᓕᑦᓯᕕᐅᑦᓱᓂ ᐃᓂᒋᔭᐅᕗᖅ ᐱᑕᑲᓪᓚᒃ ᐃᓕᓐᓂᐊᕕᒻᒥ ᑰᑦᔪᐊᒥ. ᐱᒋᐊᕐᑎᑕᐅᔪᕕᓂᖅ ᔨᐊᓂ ᒪᒃᒪᓇᔅᒧᑦ, ᐃᓚᑦᔪᒍᓱᒍᓐᓇᑐᓂᒃ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᔨ, ᐱᑕᖃᕐᑎᓯᓲᖅ ᐊᖏᕐᕋᕆᔭᐅᑦᓱᓂ ᐱᕈᕐᓭᔨᓄᑦ, ᐃᓅᖃᑎᒌᒋᐅᕐᓴᑎᑦᓯᔨᓄᑦ, ᐊᒻᒪᓗ ᓱᖃᑦᓯᑎᑦᓯᔨᓄᑦ. ᐱᕈᕐᓭᔩᑦ ᐱᒍᑦᔨᒍᑎᓕᒫᓂᒃ ᐊᑐᕐᓱᑎᒃ ᐊᑯᓐᓂᖁᑦᓯᐅᑎᓲᖑᕗᑦ ᐃᓕᓐᓂᐊᑎᓄᑦ Boxall-ᑯᑦ ᐊᓪᓚᑕᐅᒪᒍᑎᖏᑎᒍᑦ (ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᒍᑦ ᖃᐅᔨᓴᕈᑏᑦ ᐊᑐᕐᑕᐅᓲᑦ ᖃᐅᔨᓴᕈᑎᐅᑦᓱᑎᒃ ᐃᓅᖃᑎᒌᓐᓂᒧᑦ ᐊᒻᒪᓗ ᐱᓂᐊᕐᓂᖏᓐᓄᑦ ᐱᓀᓗᑕᖏᓐᓂᒃ ᐱᐊᕃᑦ ᐊᒻᒪᓗ ᐅᕕᒐᕐᑐᐃᑦ) ᓇᓗᓀᕐᓯᓲᑦ ᑭᖑᓯᓐᓂᖏᓐᓂ ᐃᓅᖃᑎᒌᒍᓐᓇᓂᒧᑦ , ᐃᑉᐱᓂᐊᕐᓂᖏᓐᓂᒃ ᐊᒻᒪᓗ ᐱᓂᐊᕐᓂᖏᑎᒍᑦ ᐱᕈᕐᐸᓕᐊᓂᖏᑦ ᐅᖁᒣᓪᓕᐅᕈᑎᖃᕐᓂᖏᓐᓂᒃ ᐱᕈᕐᐸᓕᐊᓂᕐᒥᓂ ᐃᓕᓐᓂᐊᕕᒻᒥ ᖃᕆᐊᒥ ᐱᓂᐊᕐᓂᖏᑎᒍᑦ ᓄᐃᓲᖅ ᐱᓗᐊᕐᓱᑎᓪᓘᓃᑦ ᐅᕝᕙᓘᓐᓃᑦ ᐃᓚᐅᖕᖑᐊᖏᑦᑑᓯᖃᑦᑕᓂᖏᑦ. ᑖᒃᑯᓂᖓᑦᓭᓇᖅ ᐊᑐᕐᓂᒥᒍᑦ ᐊᑦᑖᓀᑦᑐᒦᓐᓂᒥᒃ ᐊᒻᒪᓗ ᖃᓄᐃᓕᓚᖓᓂᖓᓂᒃ ᖃᐅᔨᒪᓂᕐᒧᑦ, ᐃᓄᒻᒪᕆᓐᓄᑦ ᐃᑉᐱᒋᔭᐅᑦᓯᐊᓂᕐᒥᒃ ᑕᑯᓐᓇᑎᑦᓯᔪᓂᒃ ᐱᐅᔪᓂᒃ ᐁᑉᐸᕇᒍᓐᓇᓂᕐᒥᒃ, ᐅᖃᕐᓯᒪᑦᓯᐊᓱᒋᑦ ᐊᒻᒪᓗ ᐊᖏᖃᑎᒌᒍᑎᒋᓯᒪᑦᓯᐊᓱᒋᑦ ᓂᕆᐅᓐᓃᑦ, ᓂᕆᖃᑎᖃᕈᓐᓇᓂᖅ, ᐱᒍᓐᓇᑎᑦᓯᓂᖅ ᐆᑦᑐᕋᕐᑎᓯᖃᑦᑕᓱᑎᒃ ᐊᒻᒪᓗ ᓯᑯᑦᓴᔭᒃᑯᑦ ᑭᓯᑦᓯᒍᑎᓐᓂᐊᓂᖅ ᐊᒻᒪᓗ ᐊᓪᓚᓯᒪᔪᓕᕆᓂᖅ, ᐊᒻᒪᓗ ᐃᓚᐅᑎᑦᓯᓂᖅ ᐱᕈᕐᐸᓕᐊᓂᕐᒧᑦ ᐱᐅᔪᓂᒃ, ᐃᓕᓐᓂᐊᑏᑦ ᐱᐅᔪᓂᒃ ᐱᕙᓪᓕᓂᖃᓲᑦ ᐱᕈᕐᐸᓕᐊᓂᕐᒥᓂ ᐊᑯᓂᐅᖕᖏᑐᐊᐱᒻᒥ. ᐊᑐᕋᑦᓴᖏᓐᓂᒃ ᐃᓚᑦᔪᒍᓱᒍᓐᓇᓂᕐᒧᑦ ᐃᓕᓐᓂᐊᕕᖏᓐᓂ ᐊᒻᒪᓗ ᐱᒍᑦᔭᐅᒋᐊᓪᓚᕕᐅᑉ ᐱᒍᑦᔨᕕᖓᓂ ᐱᔭᐅᒍᒪᓕᕐᑎᓯᓲᖑᕗᑦ ᐆᑦᑐᑎᒋᓗᒍ ᒪᓕᑦᑕᐅᒋᐊᓖᑦ ᐃᓂᖓ, ᐊᓯᑦᔨᓂᕐᒧᑦ ᐃᓅᓯᕐᒧᑦ ᐱᒍᓐᓇᐅᑏᑦ ᐊᑐᕐᓱᑎᒃ ᓱᓂᕐᓂᒃ, ᐊᓂᕐᑎᕆᓂᖅ ᐊᒻᒪᓗ ᐊᑦᓱᕈᕐᓂᒥᒃ ᐃᑉᐱᓂᐊᓂᖓᓂ ᓄᖑᑎᕆᓂᕐᒧᑦ, ᐊᒻᒪᓗ ᐊᓯᖏᑦ ᖁᐊᕐᓵᓇᕐᑐᓂᒃ-ᖃᐅᔨᒪᑎᑦᓯᒍᑎᓄᑦ ᐊᑐᕐᑕᐅᓲᑦ, ᑐᕌᕐᑕᐅᔪᖅ ᐊᑯᓐᓂᖁᑎᓂᕐᒧᑦ ᐱᕈᕐᐸᓕᐊᓂᕐᒥᒃ ᓴᐳᑦᔨᔪᑦ ᐊᒻᒪᓗ ᐊᓯᑦᔨᓂᕐᒥ ᐃᓕᓐᓂᐊᕕᓕᒫᒥ.

ᐃᓕᓐᓂᐊᑎᑦᓯᔩᑦ, ᐃᓚᒌᑦ ᐊᒻᒪᓗ ᐃᓕᓐᓂᐊᑏᑦ ᐅᓂᒃᑳᑐᑦ ᐊᖏᓕᐅᒥᓂᖏᓐᓂᒃ ᐱᒍᓐᓇᓯᐊᕐᓂᒥᓂ ᐃᑉᐱᒍᓱᓐᓂᖅ, ᐊᖏᓕᒋᐊᕐᓂᖏᓐᓂᒃ ᐱᖃᑎᖏᑦ ᐊᒻᒪᓗ ᐱᐅᓯᐅᒥᓂᖏᓐᓂᒃ ᐃᓕᓐᓂᐊᓂᕐᒧᑦ ᐱᒍᓐᓇᓯᔭᖏᑦ. ᓄᐃᑎᑕᐅᒋᐊᖕᖓᓯᒪᑎᓪᓗᒍ ᐊᑯᓐᓂᖁᑎᒍᑏᑦ ᕿᑎᖓᓂ ᐃᓕᓐᓂᐊᓇᐅᑉ ᐊᕐᕌᒍᖓᓂ, ᐃᓕᓐᓂᐊᕕᓕᒫᒥ ᑐᓴᐅᒪᑎᑦᓯᒍᑏᑦ ᐊᓪᓚᓯᒪᐅᑎᖏᑦ ᖃᐅᔨᑎᑦᓯᔪᑦ ᐱᐅᓯᕐᓲᑎᒥᓄᑦ ᐁᑎᑕᐅᕙᑦᑐᑦ ᒥᑭᓕᐅᒥᓯᒪᒋᐊᖏᑦ ᕿᑎᕐᖃᖓᓄᑦ. ᓭᒻᒪᑕᐅᕕᒃ ᑲᑎᑎᑦᓯᓲᖅ ᐃᓕᓐᓂᐊᑎᑦᓯᔨᓂᒃ ᐊᒻᒪᓗ ᐱᓇᓱᑦᑎᑐᐃᓐᓇᓂᒃ ᐱᑕᖃᕐᑎᓯᑦᓱᑎᒃ ᓄᐃᑕᓂᖏᓐᓄᑦ-ᐊᑐᕐᓱᑎᒃ ᐊᑐᕐᑕᐅᓲᑦ ᐃᑲᔪᕐᓯᒍᑎᐅᑦᓱᑎᒃ ᐃᓕᓐᓂᐊᑎᑦᑎᓂᒃ ᑭᖕᖒᒪᑦᓯᔪᓂᒃ ᐊᒻᒪᓗ ᐆᑦᑐᕋᕐᓂᒥᒃ ᓄᑖᓄᑦ ᑐᕌᕐᓂᒧᑦ ᐃᓕᓐᓂᐊᓂᕐᒧᑦ.

ᐃᓄᐃᑦ ᐃᓪᓕᕆᔭᑐᖃᖓ, ᓭᒪᖃᑎᒌᓐᓂᖅ ᓄᐃᑦᓯᓲᖅ ᓴᐃᒪᓂᕐᒥᒃ ᐃᓅᖃᑎᒌᓐᓂᒥᒃ, ᐊᖏᖃᑎᒌᓐᓂᒥᒃ ᐃᓱᒪᒋᔭᒥᓂᒃ, ᑐᑭᓯᒪᖃᑎᒌᓐᓂᓗ ᐃᓇᖏᕐᓯᓲᖑᕗᖅ ᐊᖏᖃᑎᒌᖕᖏᓂᕐᒥᒃ. ᓭᒪᖃᑎᒌᓐᓂᖅ ᓄᐃᑦᓯᒥᔪᖅ ᑲᑎᒪᓂᖏᓐᓂᒃ ᑕᐅᑦᑐᐃᑦ ᖃᕆᐊᒥ ᐊᒻᒪᓗ ᐃᑭᑦᓯᓱᑎᒃ ᓵᒥᒃ, ᑐᓴᕐᓂᑑᓂᖓᓂᒃ ᓂᐸᖓ ᕿᓚᐅᑦᔭᓂᐅᑉ ᐊᒻᒪᓗ ᐊᔮᔮᕐᓂᐅᑉ ᐃᖕᖏᑕᐅᒍᓯᖓᓂᒃ, ᑲᑎᑎᑦᓯᓂᖓ ᕿᕋᑕᔪᓂᒃ ᐊᕿᑦᑐᓂᒃ ᐊᒻᒪᓗ ᑎᐸᖏᓐᓂᒃ; ᐃᓅᖃᑎᒌᓐᓂᒧᑦ ᓭᒪᖃᑎᒌᓐᓂᖏᑦ ᓱᕐᖁᐃᓇᕐᓯᑎᑕᐅᔪᑦ ᐃᑉᐱᒋᑦᓯᐊᓱᒋᑦ ᐋᕐᕿᓱᕐᓯᒪᔪᒧᑦ ᓯᓚᑎᒧᑦ ᐊᒻᒪᓗ ᓇᓪᓕᑳᕐᑕᐅᒪᔪᓄᑦ ᐱᐅᓕᓂᐊᒐᕐᓄᑦ.

ᑭᖑᓂᕐᒥ, ᐱᒋᔭᐅᒍᒪᖕᖏᑐᑦ ᐱᐅᓕᓂᐊᒉᑦ ᐊᒻᒪᓗ ᐊᑦᔨᒌᖕᖏᑐᑦ ᐱᐅᒃᑯᑏᑦ ᓄᐊᖃᑦᑕᓯᒪᔪᑦ ᐊᑐᕐᑕᐅᖏᑦᑐᒥ ᖃᕆᐊᒥ ᐃᓕᓐᓂᐊᕕᒻᒥ; ᐃᓕᓐᓂᐊᑏᑦ ᐃᔨᕐᓯᒪᖃᑦᑕᓯᒪᔪᑦ ᐱᓇᓱᐊᕆᐊᓕᒥᓂᒃ ᕿᒫᓕᑐᐊᕋᒥᒃ. ᐊᓯᑦᔨᑕᐅᒪᓂᖓᓄᑦ ᖃᓄᐃᓕᖓᓂᖓ, ᖃᓄᐃᓕᖓᐅᓯᐅᖃᑦᑕᑐᕕᓂᕐᒥᒃ ᖃᕆᐊᑉ ᐃᓕᓐᓂᐊᕕᐅᑉ ᐊᓯᑦᔨᑎᑦᓯᔪᖅ ᐊᒻᒪᓗ ᐃᓕᓐᓂᐊᑎᑦᓯᔨᐅᑉ ᖃᓄᐃᓘᕆᐊᖃᕐᓂᖓᓂᒃ – ᓵᑦ ᐋᕐᕿᓱᕐᓯᒪᓂᖏᑦ ᓱᓇᒐᓚᓕᐅᕐᑏᑦ ᐋᕐᕿᓱᕐᓯᒪᒍᓯᖓᓂᒃ ᐋᕐᕿᓯᒪᒍᑎᖃᑦᓱᑎᒃ ᐃᓘᓐᓇᑎᒃ ᖃᐅᔨᒪᔪᒥᒃ ᓵᖕᖓᓯᑦᓱᑎᒃ.

ᖃᕆᐊᖅ ᐃᓕᓐᓂᐊᕕᒃ ᐅᐸᒋᐊᖓ ᐊᓕᐊᓇᕐᑑᒍᓐᓇᑐᖅ ᐊᒻᒪᓗ ᑐᖕᖓᓱᑦᑎᓯᑦᓱᓂ, ᕿᑎᖔᓃᑦᑐᖅ ᐊᖏᕐᕋᐅᑉ ᐊᒻᒪᓗ ᐃᓕᓐᓂᐊᕕᐅᑉ ᐃᓱᐊᕐᑐᒥ ᐃᓂᖃᕐᓱᓂ ᑲᑎᔪᖃᓕᕐᒪᑦ ᐊᒻᒪᓗ ᓄᓪᓚᑎᑦᓯᓱᓂ, ᓵᑦ ᓂᕆᖃᑎᒌᓐᓂᒧᑦ ᐅᕝᕙᓘᓐᓃᑦ ᐱᓇᓱᐊᖃᑎᒌᓐᓂᒧᑦ, ᐊᒻᒪᓗ ᐃᓂᖃᕐᒥᓱᓂ ᐊᒡᒐᒧᑦ ᐱᓇᓱᐊᕐᕕᐅᒍᓐᓇᑐᒥᒃ ᐱᓇᓱᐊᕈᑎᓂᒃ ᐊᑐᕐᓗᓂ. ᓭᒻᒪᑕᐅᕕᐅᑉ ᑕᐅᑦᑐᖏᑦ ᓄᐃᑕᓪᓗᕆᑦᑑᓱᑎᒃ ᐱᖕᖑᐊᕈᒪᓕᕐᑎᓯᓲᑦ ᐊᒻᒪᓗ ᓴᓇᖕᖑᐊᕈᒪᓂᖏᓐᓂᒃ, ᐋᕐᕿᓱᕐᓯᒪᓂᖓ ᓴᐳᑦᔨᓱᓂ ᐅᓪᓗᑖᒫᕐᓯᐅᑎᖏᓐᓂᒃ, ᐱᒐᓱᐊᒻᒪᕆᑦᑎᓯᓲᖅ ᐊᒻᒪᓗ ᐃᓕᓐᓂᐊᓂᕐᒥᒃ ᐱᒐᓱᐊᑦᓯᐊᓂᕐᒥᒃ, ᐱᐊᕋᕐᓂᒃ ᐃᒻᒥᓂᕿᒍᓐᓇᓂᖏᓐᓂᒃ ᓂᕆᐅᓐᓂᖃᑦᓯᐊᓱᓂ ᐃᒻᒥᓂᒃ ᓱᑲᓐᓂᒥᓂᒃ ᐋᕐᕿᒍᓐᓇᓂᕐᒥᒃ ᐊᒻᒪᓗ ᑐᕌᕐᓂᖏᓐᓂᒃ ᐃᒻᒥᓂ ᐃᓕᑦᓯᒍᓐᓇᓂᖏᑦ. ᓂᕆᐅᑦᓯᐊᖁᒍᑦ ᐋᕐᕿᓱᐃᓂᕐᒥᒃ ᖃᓄᐃᓘᕈᓯᕗᓐᓂᒃ ᐃᓱᒪᒋᑦᓯᐊᓗᒋᑦ, ᑲᔪᓯᑦᓯᐊᓯᒪᓂᕗᓐᓂᒃ ᐅᓂᒃᑳᓗᑕ ᐊᓯᑦᑎᓄᑦ, ᐊᒻᒪᓗ ᐱᓇᓱᑦᑎᑖᕆᐊᓪᓚᓗᑕ ᓭᒪᓂᕐᒥᒃ ᓄᐃᑦᓯᒍᒪᑦᓯᐊᑐᓂᒃ ᐃᓕᓐᓂᐊᕕᑦᑎᓄᑦ ᐊᒻᒪᓗ ᓄᓇᓕᑦᑎᓄᑦ.