ᐊᐱᕐᓱᑕᐅᔪᕕᓂᖅ ᑲᐅᑦᔭᖅ ᐹᑦᓚᔮᒧᑦ

ᑭᓇᒃᑯᑐᐃᓐᓇᓄᒃ ᑐᓴᐅᒪᖃᑎᒌᑦᑎᓯᔨ (ᑭᑐ):  ᑭᓇᐅᕖᑦ? ᐊᒻᒪᓗ ᓇᓂ ᐱᓇᓱᐊᕐᓯᒪᕕᑦ? ᖃᖓᓂᑦ ᐱᓇᓱᐊᕐᓱᑎᑦ?

ᓕᓯ ᖁᐊᕋᖅ ᐊᐅᓪᓚᓗᒃ (ᓕᐊ): ᓕᓯ ᖁᐊᕋᖅ ᐊᐅᓪᓚᓘᕗᖓ. ᐱᓇᓱᐊᕐᓯᒪᕗᖓ ᑐᑭᓯᓂᐊᕐᕕᒃ ᐃᓕᓐᓂᐊᕕᒻᒥ ᐊᕐᕌᒍᓂ 30-ᓂᒃ.

ᑭᑐ: ᓱᓇᒨᑦ ᐱᓇᓱᐊᖏᓐᓇᕈᑎᖃᓯᒪᕕᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ?

ᓕᐊ: ᐱᓇᓱᐊᖃᑎᖃᕆᐊᒥᒃ ᐱᓇᓱᖃᑎᒃᓂᒃ ᐊᓕᐊᓱᓯᒪᔪᖓ ᐊᒻᒪᓗ ᐱᓇᓱᐊᕆᐊᒥᒃ ᐱᐊᕋᕐᓂᒃ ᐊᓕᐊᒋᔭᖃᕐᓱᖓ. 

ᑭᑐ: ᓱᓇᓃᒃ ᐅᐱᒋᔭᖃᕐᓂᐸᐅᓯᒪᕕᑦ ᐱᓇᓱᐊᕐᓱᑎᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ?

ᓕᐊ: ᐅᐱᒋᓂᕐᐹᕆᓯᒪᔭᒃᑲ ᑕᑯᒋᐊᒥᒃ ᐃᓕᓐᓂᐊᑎᓂᒃ ᐱᔭᕇᕈᑎᑖᕐᑐᓂᒃ. ᑕᑯᑎᑦᓯᓚᕆᓯᒪᔪᖅ ᐅᕙᓐᓂᒃ ᐃᓕᓐᓂᐊᑎᑦᓯᔨᐅᑦᓱᑕ ᐃᑲᔪᕐᓯᓯᒪᔪᒍᑦ ᐊᒻᒪᓗ ᐃᓕᓐᓂᐊᑎᓂᒃ ᑐᕌᕐᑕᒥᓂᒃ ᐱᒍᓐᓇᓯᒋᐊᖏᓐᓂᒃ ᑕᒪᓐᓇ ᐊᓕᐊᓇᕐᑑᓯᒪᔪᖅ. ᐊᒻᒪᓗ, ᑕᑯᑦᓱᒋᑦ ᐃᓕᓐᓂᐊᑏᑦ ᐅᓪᓗᑕᒫᖅ ᐃᓕᓐᓂᐊᑎᓪᓗᒋᑦ, ᐱᒐᓱᐊᕐᓂᖏᑦ ᐊᒻᒪᓗ ᑐᓂᓯᒪᑦᓯᐊᓂᖏᑦ ᐃᓕᓐᓂᐊᕕᒻᒦᖏᓐᓇᕋᓱᐊᑦᓯᐊᓂᖏᑦ ᑕᒪᓐᓇ ᐅᐱᒋᓯᒪᔭᕋ.

ᑭᑐ: ᐅᖃᐅᓰᑦ ᐅᕝᕙᓘᓐᓃᑦ ᐅᖃᕐᑕᐅᓯᒪᔪᑦ ᐃᓅᓯᕐᓂ ᑲᔪᓯᑎᑦᓯᓲᑦ?

ᓕᐊ: ᖃᐅᑉᐸᖃᕆᕗᖅ. ᖃᐅᕌᐱᑦᓴᕆᕗᖅ. ᑎᑭᑦᓴᕇᕆᕗᖅ!

PR: ᖃᓄᖅ ᐅᖃᐅᑦᔩᒐᔭᕐᕿᑦ ᐅᕕᒐᕐᑐᒧᑦ ᐃᓕᓐᓄᑦ?

ᓕᐊ: ᑭᖑᕃᑦᑌᓕᖃᑦᑕᕆᑦ. ᐱᓇᓱᐊᑦᓯᐊᕆ ᐊᑦᓱᕈᕐᓗᑎᑦ.

ᑭᑐ: ᑭᓇᒦᒃ ᐃᑦᔭᕋᑦᓴᖁᑎᖃᕐᕿᑦ ᐃᓕᓐᓂᒃ ᐱᒍᒪᓕᕐᑎᓯᓲᒥᒃ?

ᓕᐊ: ᐊᑖᑕᑦᓯᐊᕋᓂᒃ ᐸᐅᓗᓯ ᐊᐅᐸᓗᒻᒥᒃ. ᐅᐱᒍᓱᖏᓐᓇᖃᑦᑕᓯᒪᔪᖅ ᐅᕙᑦᑎᓂᒃ, ᐃᓚᐅᑦᓯᐊᖃᑦᑕᖁᔨᑦᓱᓂ ᓄᓇᓕᓐᓂ ᓱᓂᒐᓚᓐᓄᑦ. ᐊᓕᐊᓱᒍᑦᔨᖏᓐᓇᖃᑦᑕᓯᒪᔪᖅ ᐅᕙᑦᑎᓂᒃ.

ᑭᑐ: ᓱᓇᓃᒃ ᓯᕗᓂᕐᒥ ᐸᕐᓇᓯᒪᕕᑦ?

ᓕᐊ: ᐃᓅᓗᖓ ᖃᐅᑕᒫᑦ. ᐸᕐᓇᓯᒪᓪᓗᑐᐊᓗᖕᖏᑐᖓ.

ᑭᑐ: ᐱᔭᕆᐊᑐᓂᕐᐸᐅᔪᖅ?

LA: ᐱᔭᕆᐊᑐᓂᕐᐸᐅᓯᒪᔪᖅ ᐱᓇᓱᒐᕋᓂ ᐱᓇᓱᐊᖃᑎᖃᕆᐊᒥᒃ ᓄᑖᒥᒃ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖓᓂᒃ.

ᑭᑐ: ᓱᓇᒋᐊᓪᓚᒦᒃ ᐅᖃᐅᓯᑦᓴᖃᕐᕿᑦ?

ᓕᐊ: ᓇᑯᕐᒦᕈᒪᔪᖓ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᐃᑲᔪᕐᓯᒪᓂᖓᓂᒃ. ᐃᑲᔪᕈᓐᓇᖏᓐᓀᓇᓲᖑᓂᖓᓂᒃ ᖃᓄᐃᑦᑐᑐᐃᓐᓇᑰᓕᕋᑦᑕ. ᐊᓕᐊᓇᕐᑐᓂᒃ ᐊᒥᓱᓂ ᐊᕐᕌᒍᓂ. ᐱᓇᓱᐊᕐᓯᒪᓂᕋ ᐃᓕᓴᕐᓂᓕᕆᓂᕐᒥ ᐊᓕᐊᓇᖏᓐᓇᓕᒫᒐᓓᓐᓇᓯᒪᔪᖅ. ᐱᔭᕇᓯᒐᒪ, ᐱᔭᕆᐊᑐᔫᓯᒪᔪᖅ ᕿᒣᒋᐊᒥᒃ ᐱᓇᓱᖃᑎᒃᑲᓂᒃ. ᐱᓇᓱᑦᑏᑦ ᐃᓚᑖᕆᓯᒪᒐᒃᑭᑦ ᑭᓇᒃᑰᒐᓗᐊᕐᐸᑕ ᐱᓇᓱᖃᑎᑐᐃᓐᓇᕆᑦᔭᓇᒋᑦ.