ᒥᐊᔨ ᑫᓐ ᐃᓕᓐᓂᐊᑎᓯᔨᐅᓕᕐᑐᖅ ᐊᔭᒍᑕᖅ ᐃᓕᓐᓂᐊᕕᒻᒥ ᑕᓯᐅᔭᐅᑉ ᓄᓇᓕᖓᓂ ᐊᕐᕌᒍᐃᑦ 30 ᐅᖓᑖᓄᑦ.

ᒥᐊᔨ ᑫᓐ  ᐃᓕᓐᓂᐊᑎᓯᔨᐅᓕᕐᑐᖅ ᐊᔭᒍᑕᖅ ᐃᓕᓐᓂᐊᕕᒻᒥ ᑕᓯᐅᔭᐅᑉ ᓄᓇᓕᖓᓂ ᐊᕐᕌᒍᐃᑦ 30 ᐅᖓᑖᓄᑦ. “ᐅᓪᓗᐃᑦ ᐱᖓᓱᐃᓐᓇᐅᔮᖏᓐᓇᑐᑦ ᐱᓇᓱᑦᑎᓗᖓ ᑕᒡᒐᓂ, ᑭᓯᐊᓂ 30-ᓂᒃ ᐊᕐᕌᒍᓂᒃ ᐱᓇᓱᓕᕐᑐᖓ. ᐅᓪᓗᐃᓕ ᓱᑲᑦᑑᒪᑕ!,” ᐃᔪᓯᑲᓚᖁᖅ.

ᒥᐊᔨ ᐱᒋᐊᓚᐅᕐᓯᒪᔪᖅ ᐱᓇᓱᒐᕐᒥᓂᒃ ᐃᓕᓐᓂᐊᑎᑦᓯᓱᓂ ᐃᓄᒃᑎᑐᑦ ᐅᖃᐅᓯᕐᒥᒃ ᐊᒻᒪᓗ ᐅᑉᐱᓂᕐᒥᒃ ᐳᕐᑐᓂᕐᓂ ᐊᑕᐅᓯᕐᒥ ᐊᒻᒪᓗ ᒪᕐᕈᒥ, ᑭᓯᐊᓂ ᐃᓕᓐᓂᐊᑎᑦᓯᔨᓂᒃ-ᐃᓕᓐᓂᐊᑎᑦᓯᓂᒃᑯᑦ ᐃᓱᒻᒪᓭᔨᐅᓯᒪᒻᒥᔪᖅ, ᐊᑦᔨᐅᖏᑦᑐᒥᒃ ᐃᓕᓐᓂᐊᑎᑦᓯᓂᒃᑯᑦ ᐃᓕᓐᓂᐊᑎᑦᓯᔨᐅᓯᒪᔪᖅ, ᑕᒐᓗ ᐳᕐᑐᓂᕐᓴᓂᒃ ᐃᓕᓐᓂᐊᑎᑦᓯᔨᐅᓕᕐᒥᓱᓂ, ᐅᓪᓗᒥᒧᑦ ᑎᑭᑦᓱᒍ ᐃᓂᒋᒋᐊᖓ ᐃᓱᐊᕆᓂᕐᐹᒥᓂ.

ᐃᒻᒥᓂᒃ ᐅᖄᖁᔭᐅᓕᕋᒥ, ᐅᑯᓂᖓ ᐅᖃᐅᓯᑦᓴᖃᓚᐅᔪᔪᖅ:

“ᒥᐊᔨ ᑫᓐ ᖑᕗᖓ. ᓄᓇᓕᐊᐱᒻᒥᐅᖑᕗᖓ ᐊᓕᐊᒋᔭᒻᒪᕆᐊᓗᒐᓂ. ᐃᒣᑦᑐᖅ ᓱᓇᓕᒫᑦ ᓄᓪᓚᖓᑦᓯᐊᒪᑕ, ᓱᓇᑐᐃᓐᓈᓗᓐᓂᒃ ᓂᒪᑦᑐᖃᓪᓗᐊᖏᒻᒪᑦ. ᐊᕙᓗᔭᐅᒪᒋᐊᒥᒃ ᐃᓚᒃᑲᓄᑦ ᐊᓕᐊᒃᑯᖓ, ᑐᑦᓯᐊᕕᓕᐊᕆᐊᒥᒃ ᐊᓕᐊᒃᑯᖓ. ᐊᐅᓪᓛᓯᒪᒍᓐᓇᑐᖓ. ᓄᓂᕙᒋᐊᕈᓐᓇᑐᖓ. ᐃᖃᓪᓕᐊᕈᓐᓇᑐᖓ. ᑐᒃᑐᓯᐅᕈᓐᓇᑐᖓ. ᓭᒪᐅᒐᑐᐃᓐᓇᓗᖓᓗ. ᐊᓕᐊᓱᑦᑐᒪᕆᐅᕗᖓ ᑕᒫᓃᒃᑲᒪ. ᑕᓯᐅᔭᕐᒦᒍᒪᕗᖓ ᐃᓅᓯᕐᒪ ᐃᓱᐊᓄᑦ ᑎᑭᓪᓗᒍ.”

ᒥᐊᔨ ᐃᒫᒃ ᐅᖃᕈᒪᓚᐅᔪᒻᒥᔪᖅ ᓄᓇᕕᒻᒥᐅᓄᑦ ᐃᓕᓐᓂᐊᑎᓄᑦ:

“ᐃᓄᓕᒫᓂᒃ ᐃᓕᓐᓂᐊᓂᒃᑯᑦ ᑲᔪᓯᑦᓯᐊᖁᔨᕗᖓ. ᐃᓕᓐᓂᐊᓂᖅ ᓴᓇᕐᕈᑎᐅᕗᖅ. ᓇᓪᓕᐊᒍᑐᐃᓐᓇᖅ ᐃᓄᒃᑎᑐᑦ, ᐅᐃᒍᐃᑎᑐᓪᓘᓃᑦ ᐅᕝᕙᓗᓘᓐᓃᑦ ᖃᓪᓗᓈᑎᑐᑦ. ᐃᓕᓐᓂᐊᑎᑦᓯᔩᑦ ᐃᓕᓐᓂᐊᑎᑦᓯᔨᖃᑦᓯᐊᐳᑦ ᐃᓕᓐᓂᐊᑎᑦᓯᒍᓐᓇᓯᐅᕐᑐᓂᒃ. ᐊᒥᓱᐊᓘᓕᕐᑐᑦ ᐱᐅᓕᓐᓂᐊᒉᑦ ᐊᒻᒪᓗ ᐊᒥᓱᐊᓘᓕᕐᓱᑎᒃ ᐃᓕᓐᓂᐊᕈᑎᑦᓭᑦ ᐅᓪᓗᒥ, ᓱᓇᑐᐃᓐᓇᖃᕐᓂᓴᐅᓕᕐᑐᑦ ᐃᓕᓐᓂᐊᑎᐅᓚᐅᕐᓯᒪᒐᒪᓂᒃ. ᐅᓪᓗᒥ ᐊᐅᓪᓚᓴᒻᒪᕆᓲᖑᓕᕐᑐᑦ, ᐊᒥᓱᐊᓗᐃᓪᓗ ᓱᓇᓐᓂᐊᕈᑕᐅᕙᓕᕐᓱᑎᒃ. ᐅᕙᓐᓄᑦ ᐃᓱᒪᓇᕐᑐᖅ ᓱᓕᑐᖅ ᐃᓕᓐᓂᐊᑎᐅᑦᓴᓚᖓ ᐅᓪᓗᒥ!”

ᓯᕗᓂᕐᒥ ᑐᕌᕐᑕᖃᖏᓐᓇᖃ ᒥᐊᔨ?

“ᓱᓇᓐᓂᐊᕈᓐᓀᓚᐅᕐᓯᒪᖕᖏᓚᖓ ᓄᓇᓕᐅᑉ ᐃᓗᐊᓂ. ᕿᑲᑐᐃᓐᓇᓇᖓ ᐃᓅᒋᐊᒥᒃ ᐅᖃᕈᓐᓇᖁᖓ. ᒥᕐᓱᓲᒻᒪᕆᐅᔪᖓ ᓱᒐᓚᖃᑎᖃᕐᐸᓱᖓᓗ ᓂᕕᐊᕐᓯᐊᓂᒃ, ᓱᕈᓯᕐᓂᓗ, ᐊᕐᓇᓂᓪᓗ ᐊᒻᒪᓗ ᐊᖑᑎᓂᒃ. ᐆᑦᑑᑎᒋᓗᒍ ᐊᑎᒋᓕᐅᓲᖑᔪᒍᑦ ᖃᕐᓕᑲᔭᓕᐅᓲᖑᑦᓱᑕᓗ. ᑕᒡᒐᓂ ᐊᕐᕌᒍᒥ ᐃᓕᑦᓯᓚᐅᔪᒻᒥᔪᒍᑦ ᑕᓯᔪᐊᓕᐅᕐᓂᒥᒃ ᕿᕕᐅᑦ (ᐅᒥᒻᒣᑦ ᒥᕐᖁᖏᑦ) ᐊᑐᕐᓱᒋᑦ. ᓯᕗᓂᖃᕐᖁᖓ ᐃᓕᓐᓂᐊᑎᑦᓯᖏᓐᓇᓂᐊᕐᓱᖓ. ᓄᓇᒦᖃᑦᑕᓂᕐᒥᒃ, ᐃᖃᓪᓕᐊᓂᕐᒥᒃ, ᐊᐅᓪᓛᓯᒪᓂᕐᒥᒃ, ᓄᓂᕙᓐᓂᒥᒃ. ᑕᒪᓐᓇ ᑕᒐ ᐸᕐᓇᓯᒪᐅᑎᒐ, ᑕᒫᓃᒍᒫᕐᓱᖓ.”