ᓄᓇᕕᒃ ᐊᖏᔪᐊᓗᕋᑕᐅᕗᖅ ᓯᕕᑐᔫᑦᓱᓂᓗ; ᕿᑦᑌᔫᒥᓇᖏᓐᓇᓲᖑᕗᖅ ᑕᑯᔪᖃᕋᒥ ᐃᓕᑕᕐᓇᑐᓂᒃ ᑮᓇᖏᓐᓂᒃ ᐃᓄᐃᑦ ᐃᑲᔪᕐᓯᒪᔪᑦ ᒪᑭᑦᓯᓂᕐᒥᒃ ᑲᑎᕕᒃ ᐃᓕᓴᕐᓂᓕᕆᓂᕐᒥᒃ ᓇᓂᑐᐃᓐᓇᖅ ᑕᕐᕋᒥ.

ᑌᑯᖓᑦᓯᐊᕌᓗᒃ ᑕᓯᐅᔭᒧᑦ ᐊᐅᓪᓚᓚᐅᕐᓯᒪᒍᕕᑦ, ᑲᑎᓯᓯᒪᖕᖏᓂᐅᔭᖕᖏᑐᑎᑦ ᓵᓐᑎ ᐊᒻᒪᓗ ᔩᓂ ᓵᓐᑕᔅᑰᓐᓂᒃ. ᐊᑯᓂᐊᓗᒃ ᑕᓯᐅᔭᕐᒥᐅᒃ, ᓵᓐᑎ ᐊᖁᑎᐅᔪᖅ ᐊᔭᒍᑕᖅ ᐃᓕᓐᓂᐊᕕᐅᑉ ᐃᓕᓐᓂᐊᑎᓂᒃ ᐅᓯᑲᑦᑕᐅᑎᖓᓂᒃ ᐊᕐᕌᒍᐃᑦ 30 ᐅᖓᑖᓄᑦ! “ᐊᓕᐊᒋᔭᕋ. ᑕᒡᒐᓂ ᐱᓇᓱᒋᐊᒥᒃ ᐊᓕᐊᒃᑯᖓ. ᖃᓄᑐᐃᓐᓇᒐᓚᒃ ᑮᑕ ᐱᓇᓱᓲᖑᕗᖓ,” ᑌᒫᒃ ᐅᖃᐅᑎᕚᖓ.

ᔨᓂ, ᐁᐹᒍᑦᑕᐅᖅ, ᐊᒥᓱᐃᓂᒃ ᐃᓂᖃᕐᓯᒪᒻᒥᔪᖅ, ᖃᒻᒥᐅᓂᕐᐹᖅ ᐃᓕᓐᓂᐊᑎᓂᒃ ᐃᓱᒻᒪᓭᔨᐅᑦᓱᓂ ᐊᔭᒍᑕᖅ ᐃᓕᓐᓂᐊᕕᒻᒥ. “ᐱᐅᔪᐊᓗᒃ, ᐊᓕᐊᒋᔭᕋ. ᐃᓕᓐᓂᐊᑏᑦ ᑕᖃᒍᑎᒃ, ᙯᒍᓐᓇᑐᑦ ᐅᕙᓐᓄᑦ ᐅᖄᕆᒋᐊᕐᑐᓗᑎᒃ ᓱᓕᕐᓂᒥᓂᒃ ᐅᕝᕙᓗᓘᓐᓃᑦ ᖃᓄᐃᓕᕐᓂᒥᓂᒃ ᑌᑲᓂ ᐅᓪᓗᒥ.”

ᓵᓐᑎ ᐊᒻᒪᓗ ᔨᓂ ᐃᕐᖃᐅᒪᔫᒃ ᖃᓄᖅ ᐊᓯᑦᔨᓯᒪᓕᕐᒪᖔᑕ ᓱᓇᑐᐃᓐᓀᑦ ᑕᓯᐅᔭᒥ. “ᒥᕝᕕᒃ ᓄᓇᓕᐅᑉ ᕿᑎᖓᒎᖃᑦᑕᓚᐅᕐᓯᒪᔪᖅ,” ᓵᓐᑎ ᐅᖃᕐᑐᖅ. “ᖃᖓᑦᑕᔫᑦ ᓴᓂᐊᒍᑦ ᖃᐅᑕᒫᑦᓯᐊᖅ ᐱᓱᖃᑦᑕᓚᐅᕐᓯᒪᔪᒍᑦ, ᐱᐅᔫᖃᑦᑕᓯᒪᔪᖅ,” ᔨᓂ ᐅᖃᕐᒥᔪᖅ. ᓱᓪᓕᑎ ᑐᓴᕆᐊᖓ ᐊᓕᐊᓇᕐᑐᖅ: ᑕᓯᐅᔭᐅᑉ ᒥᕝᕕᖓ ᐅᒃᑯᐃᑕᐅᓚᐅᕐᓯᒪᔪᖅ 1996-ᒥ. ᓯᕗᓂᐊᒍᑦ ᖃᖓᑦᑕᔫᑦ ᒥᖃᑦᑕᓚᐅᕐᓯᒪᔪᑦ ᐅᓪᓗᒥ ᐊᕐᖁᑎᒻᒪᕆᐅᓕᕐᑐᒧᑦ ᑕᓯᐅᔭᒥ.

ᐊᑯᓂᐊᓗᒃ ᐁᑉᐸᕇᖑᓕᕐᑑᒃ ᐅᖃᐅᓯᑦᓴᖃᓚᐅᔪᒻᒥᔫᒃ ᓄᓇᕕᒻᒥᐅᓄᑦ ᐃᓕᓐᓂᐊᑎᓄᑦ. ᓵᓐᑎ ᐅᖃᑦᓴᐅᑎᒋᓚᐅᔪᔪᖅ, “ᐅᐸᓗᑦᑌᓕᖃᑦᑕᓗᓯ! ᓈᓚᖃᑦᑕᓗᓯ ᐃᓄᒻᒪᕆᓯᓐᓂᒃ ᐅᕝᕙᓗᓘᓐᓃᑦ ᑭᓇᒃᑯᑐᐃᓐᓇᓂᒃ ᑲᒪᔨᓯᓐᓂᒃ. ᐱᒻᒪᕆᐅᓂᕐᐹᖅ, ᐊᕐᐸᖏᖃᑦᑕᕈᓐᓀᓗᓯ ᐅᓯᑲᑦᑕᐅᑎᒧᑦ,” ᔨᓂ ᐅᖃᕆᐊᓪᓚᑎᓪᓗᒍ ᐃᒫᒃ, “ᐅᖃᐅᑦᔨᒍᒪᔪᖓ ᐱᐊᕋᕐᓂᒃ ᐅᓯᕐᑎᓴᐅᑎᒋᖃᑦᑕᖁᓗᒋᑦ ᐃᓕᓐᓂᐊᓇᐅᑉ ᐅᓐᓄᖏᓐᓂ. ᐃᓕᓐᓂᐊᑎᓕᒫᑦ ᐃᓕᓐᓂᐊᕇᕐᑐᐃᓇᐅᑎᓪᓗᒋᑦ ᑕᑯᒍᒪᒻᒥᔪᖓ. ᐃᓕᓐᓂᐊᑏᑦ ᐃᓕᓐᐊᓂᕇᕋᒥᒃ, ᐱᔪᓐᓇᓯᒍᑎᑦᓴᓂᒃ ᐱᕕᖃᕐᓂᓴᐅᓲᖑᕗᑦ.”

ᐊᒻᒪᓗ ᓱᓇ ᓯᕗᓂᕐᒥ ᓄᐃᓛᕆᕚ ᑖᒃᑯᓅᖓ ᐊᓕᐊᓇᕐᑐᒪᕆᐊᓘᓐᓄᑦ (ᓲᖑᔪᑦᓱᑎᒃ) ᐁᑉᐸᕇᓐᓄᑦ? ᐃᖃᓪᓕᐊᕋᓕᑦᓴᖑᐊᓛᕐᑑᒎᒃ, ᐊᖏᕐᑐᐃᓇᐅᑦᓱᑎᒃ ᑌᒣᓕᕘᒃ! ᑭᖑᓪᓕᒥᒃ ᑕᑯᖕᖏᓂᑦᑎᓂ ᐊᑦᓱᓀ ᓵᓐᑏ ᐊᒻᒪᓗ ᔨᓃ. ᓇᑯᕐᒦᒃ ᙯᓯᒪᑫᓐᓇᓚᐅᔪᒐᑦᑎᒃ ᐊᔭᒍᑕᕐᒥ ᐃᓕᓐᓂᐊᕕᒻᒦᑎᓪᓗᑕ ᒫᑦᔨᒥ.