ᔭᓄᐊᐱ 3, 2024-ᒥ, ᑯᐯᒃᑯᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᖓᓄᑦ ᑐᓴᕐᑎᑕᐅᓚᐅᔪᒐᑦᑕ ᐊᓪᓚᕕᖓᑕ Direction générale des affaires internes-ᒥ ᑎᓕᔭᐅᒪᐅᑎᖃᕐᓂᖓᓂᒃ ᖃᐅᔨᓴᕐᓂᒥᒃ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᐅᓚᑦᓯᓂᓕᕆᓂᕐᒥ ᐊᐅᓚᑦᓯᒍᓯᖏᓐᓅᓕᖓᔪᓂᒃ. ᑖᓐᓇ ᒪᓕᒐᖃᕐᑎᓯᒍᑎᒥᒃ ᒪᓕᓚᐅᔪᖅ ᑯᐯᒃᑯᑦ ᑲᕙᒪᖓᑕ ᐳᕐᑐᓂᕐᓴᒥ ᑲᑎᒪᔨᖏᓐᓂᑦ ᑎᓯᐱᕆ 20, 2023-ᒥ ᓄᐃᑕᕕᓂᕐᒥᑦ.

ᖃᐅᔨᓴᕐᑏᑦ ᐃᓱᓕᒍᑎᖃᓚᐅᔪᑦ ᐱᓇᓱᐊᕈᑎᕕᓂᕐᒥᓂᒃ 2024-ᒥ ᐅᐱᕐᖔᑯᑦ. ᐅᓪᓗᒥᒧᑦ ᑎᑭᑦᓱᒍ, ᖃᐅᔨᓴᕐᓂᓅᓕᖓᔪᑦ ᑐᓴᕐᑎᓯᒍᑏᑦ ᑭᓇᓕᒫᒃᑯᓄᑦ ᖃᐅᔨᔭᐅᒋᐊᖃᖕᖏᑑᖃᑦᑕᑐᑦ. ᐅᓐᓂᑑᑎᖏᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᓄᑦ ᓴᕐᕿᑎᑕᐅᓚᐅᔪᑦ ᐆᒃᑑᐱᕆ 2024-ᒥ. ᑕᒐ, ᐅᑕᕐᕿᓱᑎᒃ ᐃᓄᒃᑎᑑᓕᕐᑎᓯᒪᔪᓂᒃ, ᓱᓇᒥᑦᑐᓂᒃ ᑐᓴᕐᑎᓯᒍᑏᑦ (ᑭᓇᓕᒫᒃᑯᓄᑦ ᖃᐅᔨᔭᐅᒋᐊᖃᕋᑕᖕᖏᑐᑦ) ᐊᑐᐃᓐᓇᕈᕐᑕᐅᓚᐅᔪᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᓄᑦ ᐅᐃᒍᐃᑎᑑᕐᑐᑦ ᖃᓪᓗᓈᑎᑐᓪᓗ ᑎᓯᐱᕆᒥ ᑲᑎᒪᑎᓪᓗᒋᑦ. ᒫᑦᔨ 2025-ᒥ, ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᐃᓄᒃᑎᑑᕐᑐᖏᓐᓂᒃ ᐱᑦᓴᓕᕋᑕᓚᐅᔪᕗᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᑐᓴᕐᑎᓯᒍᑎᖏᓐᓂᒃ ᐃᓘᓐᓈᒍᓪᓗ ᕿᒥᕐᕈᕈᓐᓇᓯᑦᓱᒋᑦ. ᐊᓕᐊᓱᕐᖁᒍᑦ ᑐᓴᕐᑎᓯᒍᑏᑦ ᐊᑐᐃᓐᓇᐅᓴᓕᕋᑕᕐᒪᑕ ᑭᓇᓕᒫᒃᑯᓄᑦ.

ᐊᔪᕐᓇᒪᐅᒐᓗᐊᖅ, ᑐᓴᕐᑎᓯᒍᑎᓕᐊᖑᓯᒪᔪᑦ ᑕᒐᑕᒐ ᐊᑐᐃᓐᓇᐅᒪᑕ ᒍᐃᒍᐃᑎᑐᑦ ᑭᓯᐊᓂ. ᑯᐯᒃ ᑲᕙᒪᒃᑯᑦ ᐃᓕᓐᓂᐊᕈᑎᓕᕆᔨᖏᑦ ᐅᑕᕐᕿᖏᓐᓇᒪᑕ ᐃᓕᒃᑯᑦ ᐊᒃᓚᓯᒪᔪᖕᖑᑕᐅᒐᔭᕐᓂᖏᑕ ᐊᖏᕐᑕᐅᓂᑦᓴᖏᓐᓂᒃ ᑕᒪᖏᓐᓂ ᐃᓄᒃᑎᑐᓪᓗ ᖃᓪᓗᓈᕐᑎᑐᓪᓗ ᓄᐃᑎᓛᕐᑕᒥᓂᒃ ᖃᕆᑕᐅᔭᒃᑯᑦ ᐊᒃᓚᓯᒪᔪᖃᐅᑎᒥᓐᓂ.

ᑐᓴᕐᑎᓯᒍᑏᑦ ᐅᓐᓂᑑᑎᑦᑕᓖᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᖃᓄᐃᓕᒋᐊᕈᑎᑦᓴᖏᓐᓂᒃ, ᐅᓐᓂᑑᑎᖃᕐᕕᐅᒥᑎᓪᓗᒋᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ. (MEQ).

ᐊᖏᔪᒻᒪᕆᐅᕗᑦ ᐅᓐᓂᑑᑏᑦ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. ᐅᖄᔪᑦ ᐱᓇᓱᑦᑕᐅᓲᖑᒌᕐᑐᓂᒃ ᖃᐅᔨᓴᕐᓂᖅ ᐱᒋᐊᓚᐅᕐᑎᓇᒍᓂᑦ (ᐆᑦᑑᑎᒋᓗᒍ, ᐱᓇᓱᑦᑎᓴᕐᓯᐅᓂᖅ, ᐱᓇᓱᑦᑎᙯᓐᓇᕋᓱᓐᓂᖅ, ᐃᓕᓐᓂᐊᑏᑦ ᐊᓂᒎᑎᔭᖃᕐᓂᖏᑦ, ᓯᖁᒥᓯᒪᔪᕐᓂᐊᑕᐅᓂᖏᑦ ᐃᓪᓗᖁᑏᑦ, ᖃᕆᑕᐅᔭᒃᑯᑦ ᐊᑦᑕᓇᕐᑐᒨᓚᕿᕇᒃᑯᑏᑦ ᐊᓯᖏᓪᓗ). ᑕᒪᒃᑯᐊ ᐊᒥᓱᑦ ᐃᓱᐃᓗᑕᐅᓲᓅᓕᖓᔪᑦ ᐅᖄᖃᑎᒌᓐᓂᖃᕈᑎᒋᓲᑦᑎᓄᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ ᐊᕐᕌᒍᓂ ᐊᓂᒍᕐᑐᓂ, ᐅᓄᕐᓯᒋᐊᕐᕕᐅᒋᐊᖃᓲᖑᑦᓱᑎᓗ ᓴᐳᑎᔭᐅᓯᒪᐅᑎᓂᒃ ᖃᐅᔨᒪᔭᐅᒌᕐᑐᓂᒃ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ.

ᖃᐅᔨᓴᕐᓂᖅ ᑐᖕᖓᕕᓕᒃ ᑐᑭᓯᓐᓇᑎᑦᓯᒍᑕᐅᓯᒪᔪᓂᒃ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ ᐅᓚᐱᑕᐅᓐᓇᓱᑎᒃ ᑮᓇᐅᔭᑎᒍᑦ ᖃᓄᐃᑦᑐᒦᓐᓂᓄᑦ. ᐱᓗᐊᕐᑐᒥᒃ ᐊᑭᓕᑦᓴᒦᓐᓂᖏᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᐅᖃᕐᑕᖏᒍᑦ ᑮᓇᐅᔭᕐᑎᑕᐅᒍᑎᖃᑦᓯᐊᖏᓐᓂᖏᓐᓄᑦ ᑐᖕᖓᕕᒋᑦᓱᒋᑦ ᑮᓇᐅᔦᑦ ᑐᕌᒐᖏᑦᑕ ᒪᓕᒐᖏᑦ 2019-ᒧᑦ ᑎᑭᑦᑐᑦ ᐃᓱᓕᓯᒪᑦᓱᑎᒃ ᔫᓂ 30, 2023-ᒥ. ᑌᑲᖕᖓᓂᑦ, ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ ᑮᓇᐅᔭᖃᕐᑎᑕᐅᓂᖃᕐᓇᑕ ᓱᓂ ᐊᐅᓚᒍᑎᖃᖃᑦᑕᖏᓐᓇᑐᒍᑦ.

“ᖃᐅᔨᒪᖕᖏᑑᓚᐅᔪᖕᖏᑐᒍᑦ ᐊᑭᓕᑦᓴᒨᑉᐸᓕᐊᓂᑦᑎᓂᒃ. ᖃᐅᔨᓴᐅᑏᑦ ᑐᓴᕐᑎᓯᒍᑎᖏᑦ ᐃᓕᓐᓂᐊᓂᕐᒥᒃ ᑭᒡᒐᑐᕐᓂᒃ ᑲᒪᑦᓯᐊᖏᑦᑑᓂᕃᔪᑦ ᑮᓇᐅᔭᑎᒍᑦ ᑐᑭᑖᕈᑎᖃᕐᓂᑯᑦ. ᖃᓄᐃᑦᑐᒦᓐᓂᓚᕆᖓ ᐊᕐᓱᕈᓐᓇᑐᒃᑯᑦ ᑐᑭᑖᕆᐊᖃᓲᖑᒐᑦᑕ ᑌᒣᑦᑐᖅ: ᑮᓇᐅᔭᖃᕐᑎᑕᐅᑦᓯᐊᖏᓐᓂᖅ ᑭᖕᖒᒪᓇᕐᑐᓂᒃ ᓲᕐᓗ ᐃᓪᓗᔪᐊᓄᑦ ᓯᖁᒥᑎᑦᓯᑌᓕᒪᓂᖅ ᐊᖏᓕᒋᐊᕆᐊᖃᕐᓂᑯᓪᓘᓃᑦ, ᐱᓇᓱᒉᑦ ᓄᑖᑦ ᑭᖕᖒᒪᓇᕐᑐᑦ ᐃᓕᓐᓂᐊᑏᑦ ᓴᐳᑦᔨᔭᐅᓂᖏᓐᓄᑦ, ᐊᓯᖏᓪᓗ. ᐃᓕᓐᓂᐊᓂᕐᒥ ᑭᒡᒐᑐᕐᑏᑦ ᑲᑎᒪᑎᓪᓗᒋᑦ, ᐅᖄᖃᑎᒌᓂᖃᒻᒪᕆᓚᐅᔪᒍᑦ ᖃᓄᖅ ᑲᖐᒋᔭᐅᓕᕋᔭᕐᓂᑎᓐᓂᒃ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ ᓱᕐᖁᐃᑕᖃᕐᓯᒪᓂᕐᒧᑦ ᑮᓇᐅᔭᖃᕐᑎᑕᐅᓂᕐᒧᑦ. ᑕᒐ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ ᐱᐅᓂᕐᐸᐅᔪᕆᑦᓯᓚᐅᔪᕗᑦ ᖃᓄᐃᓘᕈᓯᑦᓴᖃᕐᓂᒧᑦ ᐊᖏᕐᓗᑎᒃ ᐊᑭᓕᑦᓴᒦᓐᓂᓂᒃ. ᑕᒐ ᐅᓪᓗᒥ ᑌᒣᑦᑐᒦᑉᐳᒍᑦ: ᐊᑭᓕᑦᓴᒦᑦᓱᑕ ᑮᓇᐅᔭᑎᒍᓪᓗ ᐊᓐᓇᕆᐊᕈᑎᑦᓴᖃᕐᓂᒦᓕᕐᓱᑕ, ᑭᓯᐊᓕ ᐱᓗᐊᕐᑐᒥᒃ, ᑐᓴᐅᒪᖃᑎᒌᓐᓂᖃᑦᓯᐊᓱᑕ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ,” ᐅᖃᕐᑐᖅ ᓯᐊᔭ ᐋᓗᐸ, ᐊᖓᔪᕐᖄᖅ ᑲᑎᕕᒃ ᐃᓕᓴᕐᓂᓕᕆᓂᕐᒥ.

ᑐᓴᕐᑎᓯᒍᑎᕕᓂᐅᑎᓪᓗᒍ ᖃᐅᔨᓴᕐᓂᐅᑉ ᐱᒋᐊᕐᑕᐅᓂᑦᓴᖓ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᓂᓪᓕᕈᑎᖃᕆᐊᖕᖓᓚᐅᔪᖅ ᓂᕆᐅᕐᕕᖃᑦᓯᐊᓂᕐᒥᓂᒃ ᑯᐯᒃᑯᑦ ᑲᕙᒪᖓᓐᓄᑦ ᑐᑭᓯᔭᐅᑦᓯᐊᓂᕐᓴᐅᓛᓕᕐᒥᓂᒃ ᖃᓄᐃᑦᑐᒦᓐᓂᖃᓪᓚᕆᐅᑎᑦᑎᓂᒃ ᐊᕙᑎᑦᑎᓂ ᐊᐅᓚᕕᒋᓲᑦᑎᓂ, ᑭᖕᖒᒪᒋᔭᑦᑎᓂᓪᓗ ᓄᐃᑕᖏᓐᓂ ᑕᒪᑦᓱᒪ. “ᐅᑉᐱᒋᔭᖃᖏᓐᓇᖁᒍᑦ ᐱᐅᔪᒥᒃ ᓄᐃᑦᓯᓚᖓᓂᖓᓂᒃ ᑕᒪᑦᓱᒪ; ᐱᓪᓚᕆᐅᕗᖅ ᓯᕗᒧᐊᑦᓯᐊᖏᓐᓇᕆᐊᖃᕋᑦᑕ. ᐅᓐᓂᑑᑏᑦ ᐊᓯᖏᒍᑦ, ᖃᐅᔨᓴᕐᓂᒥ ᑐᓴᕐᑎᓯᒍᑏᑦ ᑐᓴᐅᒪᔭᐅᒋᐊᓕᑦᑕᖃᕐᖁᑦ ᐊᒥᓱᒻᒪᕆᓐᓂᒃ ᐃᑲᔪᕐᓯᔭᐅᓚᖓᕈᑎᑦᑎᓂᒃ ᓴᐳᑦᔨᔭᐅᒪᓂᒃᑯᑦ ᑮᓇᐅᔭᖃᑦᑎᑕᐅᓂᒃᑯᓗ. ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᐱᖕᖑᐊᖏᑦᑑᖁᓇᕐᑑᕗᑦ ᐃᑲᔪᕐᓯᓂᒃᑯᑦ ᐅᕙᑦᑎᓂᒃ ᑭᖕᖒᒪᒋᔭᑦᑎᓂᒃ ᓄᐃᑦᓯᓂᒃᑯᑦ ᖃᓄᐃᓕᒋᐊᕈᑎᑦᓴᓄᑦ ᐅᓐᓂᑑᑎᖏᓐᓄᑦ, ᑮᓇᐅᔦᑦ ᑐᕌᒐᖃᕐᑎᓯᒍᑎᖏᒎᑦᓴᐸᑦ, ᖃᐅᔨᒪᔨᐅᓂᕐᒥᒍᑦ ᐃᑲᔪᕐᓯᓂᒃᑰᓴᕐᐸᑦ ᐱᓇᓱᑦᑎᖃᕐᑎᓯᓂᒃᑰᓴᕐᐸᓗ,” ᐅᖃᕐᑐᖅ ᓯᐊᔭ ᐋᓗᐸ.

ᑌᒣᒐᓗᐊᕐᑎᓗᒋᑦ, ᑐᓴᕐᑎᓯᒍᑏᑦ ᐅᓐᓂᑑᑎᖏᑦ ᐃᓚᖏᑦ ᓄᐃᑦᓯᕗᑦ ᐱᑐᑦᓯᒪᖕᖏᓂᖏᓐᓂᒃ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᑐᑭᓯᒪᖕᖏᓂᕐᒥᒍᑦ ᓄᓇᕕᒻᒥ ᐃᓕᓐᓂᐊᓂᓕᕆᓂᕐᒥ. ᐆᑦᑑᑎᒋᓗᒍ, ᑐᓴᕐᑎᓯᒍᑏᑦ ᐃᓱᒫᓘᑎᖃᕐᐳᑦ ᐱᒋᐅᕐᓴᔭᐅᒍᑎᖃᑦᓯᐊᖏᓐᓂᖏᓐᓂᒃ ᐃᓕᓐᓂᐊᓂᕐᒥᒃ ᑭᒡᒐᑐᕐᑏᑦ. ᐅᓐᓂᑑᑎᖃᕐᓱᑎᒃ ᐱᒋᐅᕐᓴᑎᑦᓯᓃᑦ ᓄᐃᑕᐅᔪᑦᓴᐅᑎᓪᓗᒋᑦ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᓐᓄᑦ ᐱᓇᓱᖃᑎᖏᓐᓄᓗ ᑐᑭᒧᐊᑦᑎᓯᔨᓄᑦ ᐊᐅᓚᑦᓯᓂᕐᒥᓗ ᑲᑎᒪᔨᖏᓐᓄᑦ ᑯᐯᑉ ᐃᓕᓐᓂᐊᕕᖏᓐᓂᒃ ᐱᑦᔪᔨᕕᓐᓂ ᐃᓕᓐᓂᐊᓂᓕᕆᓃᓪᓗ ᐊᑐᐃᓐᓇᐅᑎᑕᐅᓗᑎᒃ ᐃᓕᓐᓂᐊᓂᕐᒥᒃ ᑭᒡᒐᑐᕐᑎᓄᑦ. ᑌᒣᓲᖑᒌᕐᑐᒍᑦ.

ᒐᓗᐊᕐᑎᓗᒋᑦ ᑲᑎᕕᒃ ᐃᓕᓴᕐᓂᓕᕆᖅ ᐊᐅᓚᑕᐅᖕᖏᑐᖅ ᐃᓕᓐᓂᐊᓂᕐᒥᒃ ᒪᓕᒐᕐᓄᑦ (CQLR, c. I-13.3), ᐃᓚᖏᑦ ᐱᒋᐅᕐᓴᑎᑦᓯᒍᑏᑦ ᐱᑐᑦᓯᒪᖕᖏᑐᑦ ᐊᑦᔨᐅᖏᑦᑐᑯᑦ ᐱᖁᔭᖃᕐᑎᑕᐅᒍᑎᖏᓐᓄᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᑐᖕᖓᕕᒋᑦᓱᒋᑦ ᐃᓕᓐᓂᐊᓂᕐᒥᒃ ᒪᓕᒉᑦ ᑯᔩᒃᑯᑦ, ᐃᓄᐃᑦ ᓇᔅᑳᐱᒃᑯᓗ (CQLR, c. I-14). ᐃᓚᒋᐊᕈᑎᒋᑦᓱᒍ, 10%-ᑐᐃᓐᓇᖏᑦ ᐱᒋᐅᕐᓴᑎᑦᓯᒍᑏᑦ ᖃᓪᓗᓈᑎᑑᑐᐃᓐᓇᑐᑦ, ᐊᓯᓕᒫᖏᑦ ᒍᐃᒍᐃᑎᑑᑐᐃᓐᓇᑎᓪᓗᒋᑦᔭ 99%-ᖏᑦ ᓄᓇᕕᒻᒥᐅᑦ (ᓄᓇᕕᒻᒦᑐᑦ ᑭᓯᑕᐅᒪᐅᑎᖏᓐᓂᑦ 2021-ᒥ), ᓂᕈᐊᕐᑕᐅᓯᒪᔪᑦ ᐊᓪᓚᓂᐊᓲᑦ ᐅᖄᑦᓱᑎᓗ ᐅᖃᐅᓯᕐᖄᓯᒍᑦ ᐃᓄᒃᑎᑐᑦ. ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᐱᔭᑦᓴᖃᕐᑎᓗᒋᑦ ᑕᑯᓐᓇᑕᕗᑦ ᐱᒋᐅᕐᓴᑎᑦᓯᒍᑎᓕᐅᕐᓂᒥᒃ ᓈᒻᒪᓯᐊᕐᑐᑯᑦ ᐱᖁᔦᑦ ᒪᓕᑦᓱᒋᑦ ᐊᐅᓚᑦᓯᓂᖃᕐᕕᖏᒍᑦ ᓄᓇᓂ.

ᐱᖕᖑᑎᑕᐅᓂᖓ ᐃᓕᓐᓂᐊᓂᕐᒥᒃ ᑐᕐᖃᑕᒃᕕᑯᑦ ᐃᓄᐃᑦ ᑐᓴᕐᕕᖓᑕ ᓄᐃᑕᐅᓯᒪᔪᖅ ᐊᔪᐃᓐᓇᓂᖓᓄᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ, 2018-ᒥ ᒪᓕᑦᓱᑎᒃ ᑯᐯᒻᒥ ᐅᓐᓂᓗᒐᕐᕕᐅᑉ ᓄᐃᓯᒪᔭᖏᓐᓂᒃ ᐊᑦᔨᒌᑦᑎᓯᓂᒃᑯᑦ ᐃᓕᓐᓂᐊᓂᕐᒥᒃ ᐱᑦᔪᔨᒍᑎᓂᒃ ᓄᓇᕕᒻᒥ ᓲᓱᒋᓗᒋᑦ ᐃᓄᐃᑦ ᐃᓗᕐᖁᓯᖓ. ᐃᓄᐃᑦ ᑐᓴᕐᕕᖓ ᐃᓕᓐᓂᐊᓂᕐᒥ ᑐᕐᖃᑕᕐᕕᑯᓐᓂ ᐊᑕᐅᑦᓯᑰᕐᑎᓯᓂᐅᕗᖅ, ᑲᒪᒋᔭᐅᑦᓱᑎᒃ ᐊᑑᑎᓕᕐᑎᓯᒍᑎᓕᒫᓂᒃ ᐃᓕᓐᓂᐊᓂᓕᕆᓂᕐᒥ ᐱᑦᔪᔨᒍᑎᖏᑦ ᓄᓇᕕᒻᒥᐅᓄᑦ ᐅᖄᖃᑎᒌᒍᑎᐅᒍᓐᓇᓱᑎᒃ (ᐃᓄᐃᑦ ᑭᒡᒐᑐᕐᑕᐅᑎᓪᓗᒋᑦ 90%-ᖏᑦ ᓄᓇᕕᒻᒥᐅᑦ). “ᖃᐅᔨᓴᕐᓂᖅ ᓄᐃᑦᓯᓚᕿᓯᒪᕗᖅ ᑐᓴᐅᒪᖃᑎᒌᓐᓂᖓᑕ ᐊᑕᐅᑦᓯᑰᕐᑎᓯᓂᖓᑕ ᐃᓕᓐᓂᐊᓂᕐᒥᒃ ᑐᕐᖃᑕᕐᕕᐅᑉ ᐱᐅᓯᐅᒥᓯᒪᓕᕐᓂᖓᓂᒃ. ᐊᖏᕐᓯᒪᓂᖃᕐᖁᒍᑦ ᓲᖑᓯᒋᐊᕐᑎᓯᓂᕐᒧᑦ ᑲᑐᑦᔨᖃᑎᒌᓐᓂᐅᕇᕐᑐᒥᒃ ᐱᓇᓱᖏᓐᓇᓱᑕ ᖃᓄᐃᓕᒍᐊᕈᑎᑦᓴᓄᑦ ᑐᓴᕐᑎᓯᒍᑎᓂ ᐅᓐᓂᑑᑕᐅᔪᓄᑦ,” ᐱᔭᕇᕈᑎᖓ ᓯᐊᔭ ᐋᓗᐸᐅᑉ.

ᐅᕙᓂ ᑕᑯᔭᑦᓴᖅ ᑐᓴᕐᑎᓯᒍᑎ, ᐃᓕᓐᓂᐊᓂᕐᒥᒃ ᑐᕐᖃᑕᕐᕕᑯᑦ ᐊᑐᐃᓐᓇᖃᕐᕕᖓᓂ (ᐊᒃᓚᑕᐅᓯᒪᒍᑎᖃᕐᓱᑎᒃ ᐃᒫᒃ: Rapports d’enquête, ᒍᐃᒍᐃᑎᑐᑐᐃᓐᓇᖅ ᑭᓯᐊᓂ ᐱᔭᐅᔪᓐᓇᑐᑦ ᐱᒋᐊᕐᓗᑎᒃ ᒣ 20, 2025 ᐅᒃᓗᖓᓂᑦ).