ᑕᒃᑲᓂ ᐊᓪᓚᓯᒪᔪᒥ, ᑕᑯᑦᓴᐅᑎᑦᓯᕗᒍᑦ ᐃᑦᔭᕋᑦᓴᓯᐊᒥᒃ ᐃᓕᓐᓂᐊᑎᒥᒃ, ᐱᒐᓱᐊᕐᓂᖓ ᐳᕐᑐᓂᕐᓴᒋᐊᓪᓚᑯᑦ ᐃᓕᓐᓂᐊᓂᒃᑯᑦ ᒪᓐᑐᕆᐊᓪᒥ ᓇᓗᓀᕐᑕᐅᔪᖅ ᓴᐱᓕᑦᓯᕇᑦᑑᓂᕐᒧᑦ, ᓴᓇᑐᔫᓂᕐᒧᑦ, ᐊᒻᒪᓗ ᑐᓂᒪᓪᓚᕆᓐᓂᒧᑦ ᓄᓇᓕᒻᒧᑦ. ᐹᓴ ᒪᖏᐅᖅ ᐃᕗᔨᕕᒻᒥᐅᖅ ᐅᓂᒃᑳᑫᓐᓇᓚᐅᔪᖅ ᐃᓚᖓᓂᒃ ᐱᒐᓱᐊᕐᑕᒥ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ.
ᐱᔭᕇᕐᑐᕕᓂᐅᑦᓱᓂ ᓄᓇᕕᒃ ᓯᕗᓂᑦᓴᕘᒥ ᐃᓕᓐᓂᐊᓂᕐᒥᓂᒃ 2022-ᒥ, ᐹᓴ ᑲᔪᓯᓚᐅᕐᓯᒪᔪᖅ ᑳᓐᑯᐊᑎᐊ ᐃᓕᓐᓂᐊᕕᕐᔪᐊᖓᓄᑦ ᒫᓐᓇ ᐃᓕᓐᓂᐊᕕᒋᔭᒥᓄᑦ ᑕᑯᒥᓇᕐᑐᓕᐅᕐᑎᐅᓂᕐᒥᒃ.
ᐊᔪᐃᓐᓇᓚᕿᑦᓱᓂ ᐃᑦᔭᕋᑦᓴᓯᐊᖑᒍᒪᓂᑯᒥᓄᑦ ᓄᑲᕐᓯᓄᑦ ᖃᑕᖕᖑᑎᒥᓄᑦ ᐊᒻᒪᓗ ᑫᓪᓗᑐᐃᓗᓂ ᐊᓯᖏᓐᓂᒃ ᐃᓄᑐᐃᓐᓇᓂᒃ ᐅᕕᒃᑲᓂᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᖁᑦᓱᒋᑦ, ᐹᓴ ᐊᖏᕐᓯᒪᔪᖅ ᐱᔭᕆᐊᑐᔫᓂᖏᓐᓂᒃ ᐊᓯᑦᔨᓂᐅᑉ ᐃᓅᓯᕐᒧᑦ ᖃᓪᓗᓈᑦ ᓄᓇᖓᓐᓂ. ᐊᑯᓂ ᐊᑑᑎᓯᒪᔭᖓ ᑲᑎᕕᒃ ᐃᓕᓴᕐᓂᓕᕆᓂᕐᒥ ᐃᓕᓐᓂᐊᑎᐅᑦᓱᓂ ᐱᑎᑦᓯᓯᒪᔪᖅ ᐹᓴᒥᒃ ᐊᑑᑎᖃᑦᓯᐊᑐᓂᒃ ᑐᑭᓯᒪᓂᕐᓂᒃ, ᐁᑦᑑᑎᒋᒍᒪᔭᒥᓂᒃ ᓯᕗᓂᕐᒥ ᐃᓕᓐᓂᐊᑎᐅᓛᕐᑐᓄᑦ ᑌᒣᑦᑐᑰᓛᕐᒥᔪᓄᑦ.
ᐱᔭᖃᕈᓐᓇᖁᒍᑦ ᓱᓇᑐᐃᓐᓇᓂᒃ. ᐱᔭᖃᕈᓐᓇᖁᒍᑦ ᓱᓇᓕᒫᓂᒃ ᐱᒍᒪᔭᑦᑎᓂᒃ… ᐅᕙᑦᑎᓄᑐᐃᓐᓇᐅᖏᑦᑐᖅ ᑭᓯᐊᓂᓕ ᐃᓄᑐᐃᓐᓇᓕᒫᓄᑦ. ᐋᕐᕿᓱᐃᓚᖓᓯᕗᒍᑦ ᓯᕗᓂᕐᒥᒃ.
ᐹᓴᐅᑉ ᐱᒍᒪᔭᖃᕐᓂᖓ ᑕᑯᒥᓇᕐᑐᓕᐅᕐᓂᒥᒃ ᐊᖏᔪᒻᒪᕆᒃ. ᖃᐅᔨᒍᒪᓪᓚᕆᑦᑐᖅ ᑕᑯᒥᓇᕐᑐᓕᐅᕈᓯᓕᒫᓂᒃ ᐊᑐᐃᓐᓇᐅᔪᓂᒃ, ᐱᒍᓐᓇᓯᐊᕐᓗᓂ ᑕᑯᒥᓇᕐᑐᓕᐅᕐᑎᐅᓂᕐᒥᒃ ᐃᓕᓐᓂᐊᑎᑦᓯᔨᕈᕈᒪᑦᓱᓂ ᐅᕝᕙᓘᓐᓃᑦ ᐊᑌᓐᓇᑐᒥᒃ ᑕᑯᒥᓇᕐᑐᓕᐅᕐᑎᕈᕐᓗᓂ. ᐃᓕᓐᓂᐊᖏᓐᓇᓱᓂ, ᓇᒻᒥᓂᖅ ᐱᓇᓱᑦᑎᕈᕐᓯᒪᔪᖅ, ᐃᑲᔪᕐᓯᓱᓂ ᐱᓇᓱᐊᕐᓂᓂᒃ ᐆᑦᑑᑎᒋᓗᒍ Laissez nous rencontrer, ᐊᓪᓚᖑᐊᕐᓱᓂ ᐃᓄᑐᐃᓐᓀᑦ ᐅᓂᒃᑳᖏᓐᓂᒃ ᐆᑦᑑᑎᒋᓗᒍ ᓴᓐᓇ ᐊᒻᒪᓗ ᐱᖓᓱᑦ ᓄᑲᕇᑦ ᐊᕐᓀᑦ.
ᓇᓪᓕᑳᕆᑦᓱᓂ ᐃᓕᓐᓂᐊᓂᕐᒥ ᐊᑑᑎᒋᐊᓕᓐᓂᒃ ᑮᓇᐅᔭᑎᒍᓪᓗ ᐊᑦᓱᕈᕐᓇᑐᓂᒃ, ᐱᒍᓐᓇᓯᓯᒪᔪᖅ ᐋᕐᕿᓱᐃᒍᓐᓇᓂᕐᒥᒃ—ᑫᕙᓪᓚᒍᓯᓕᐅᑦᓯᐊᓗᑯᐊᐱᖃᑦᑕᓱᓂ ᐱᕕᑦᓴᒥᓂᒃ ᐊᒻᒪᓗ ᐃᑲᔪᕐᑕᐅᒍᒪᖃᑦᑕᓱᓂ ᐃᓕᓐᓂᐊᑎᑦᓯᔨᓄᑦ ᐊᒻᒪᓗ ᐃᓕᓐᓂᐊᑎᓂᒃ ᐱᒍᑦᔨᕕᒻᒧᑦ. ᓲᖑᓂᕐᑖᓲᖑᒻᒥᔪᖅ ᓄᓇᓕᒻᒥᑦ, ᐱᖃᑎᑖᖃᑦᑕᓂᕐᒥᑦ ᐊᒻᒪᓗ ᓴᐳᑦᔨᕕᓐᓂᑦ ᐃᑲᔪᕐᓯᓯᒪᔪᓂᑦ ᑲᔪᓯᑦᓯᐊᓂᖓᓂᒃ.
ᐅᐱᒋᓂᕐᐹᖓ ᐊᔪᐃᓐᓇᓯᑎᐅᓂᖓ ᐊᒻᒪᓗ ᐃᒻᒥᓂᕿᒍᓐᓇᓂᖓ. ᐃᓕᑦᓯᓯᒪᔪᖅ ᖃᓄᐃᓘᕆᐊᒥᒃ ᖃᐅᔨᒪᖕᖏᑕᒥᓂᒃ ᐊᒻᒪᓗ ᑲᔪᓯᑦᓱᓂ ᓯᕗᒧᐊᓐᓂᒥᒃ, ᐊᔪᐃᓐᓇᓚᕿᑦᓱᓂ ᖃᐅᔨᒍᒪᒧᑦ ᐊᒻᒪᓗ ᖃᐅᔨᒍᒪᓂᕐᒥᓄᑦ ᓇᒧᑦ ᑎᑭᒍᓐᓇᒪᖔᕐᒥ.
ᐅᖃᐅᓯᑦᓴᖓ ᓄᓇᕕᒻᒥᐅᖑᖃᑎᒥᓄᑦ ᐃᓕᓐᓂᐊᑎᐅᖃᑎᒥᓄᑦ ᓂᕆᐅᓐᓂᖃᕐᓂᖅ ᐊᒻᒪᓗ ᐱᔪᓐᓇᓂᕐᑖᓂᖅ: ᐃᕐᙯᑎᑦᓯᒋᐊᕈᑎ ᐱᔪᓐᓇᓂᖃᕐᒪᑕ ᐱᔭᖃᕐᓂᒧᑦ ᐱᒍᒪᔭᒥᓂᒃ—ᐃᒻᒥᓂᑐᐃᓐᓇᐅᖏᑦᑐᖅ, ᑭᓯᐊᓂᓕ ᓄᓇᓕᒻᒥᓄᑦ. ᐅᑉᐱᕆᔭᓕᒃ ᐃᓄᑐᐃᓐᓀᑦ ᐅᕕᒃᑫᑦ ᐋᕐᕿᓱᐃᓚᖓᓕᕆᐊᖏᑦ ᓯᕗᓂᕐᒥᒃ, ᐊᒻᒪᓗ ᐱᔭᖃᕐᓂᖅ ᑎᑭᐅᑎᔭᐅᑐᐃᓐᓇᕆᐊᖃᕐᒪᑦ ᐱᒍᒪᓂᖃᓪᓚᕆᑦᑐᓄᑦ.