ᑰᒃᔪᐊᖅ (ᓇᑦᔪᐃᔭᕐᕕᒃ 10, 2017) – ᑲᑎᕕᒃ ᐃᓕᓴᕐᓂᓕᕆᓂᖅ ᖁᕕᐊᒋᔭᖃᕐᐳᖅ ᐅᖃᐅᓯᖃᕆᐊᒥᒃ ᑯᐯᒃ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᖓ ᐁᑦᑐᐃᓛᕐᒪᑦ ᐳᕐᑐᓂᕐᓴᓂ ᐃᓕᓐᓂᐊᒐᕐᓂᒃ ᐱᔭᕇᕈᑎᓂᒃ ᑌᒃᑯᓄᖓ ᓄᓇᕕᒻᒥ ᐳᕐᑐᓂᕐᓴᒥ ᐃᓕᓐᓂᐊᒐᕐᓂᒃ ᐱᔭᕇᓚᐅᔪᔪᓄᑦ ᐁᑦᑐᑕᐅᓯᒪᔪᓄᑦ ᐳᕐᑐᓂᕐᓴᓂᒃ ᐃᓕᓐᓂᐊᒉᑦ ᓇᓪᓕᖁᐊᖏᓐᓂᒃ ᐱᔭᕇᕐᓯᒪᓂᖓᑕ ᓱᓕᓂᕃᒍᑎᓂᒃ ᑐᕐᖃᑐᕐᕕᑯᓐᓄᑦ ᐊᕐᕌᒍᕐᓂ 2015ᒥᑦ 2017ᒧᑦ.

“ᑕᒪᓐᓇ ᑐᓴᕐᑎᑕᐅᒍᑎᒋᓯᒪᓕᕋᑦᑎᒍ ᐊᒡᓚᑖᕐᑎᑕᐅᒍᑎᒋᑦᓱᒍ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᑦ,” ᐅᖃᐅᓯᖃᓚᐅᔪᔪᖅ ᐊᖓᔪᕐᖄᖓ ᐃᓕᓴᕐᓂᓕᕆᓂᐅᑉ, ᐋᓚᓯ ᓈᓚᒃᑑᔭᒃ. “ᐃᓕᓐᓂᐊᓂᓕᕆᓂᕐᒥ ᑭᒡᒐᑐᕐᑏᑦ ᐊᒻᒪᓗ ᐳᕐᑐᓂᕐᓭᑦ ᑲᑎᒪᔩᑦ ᐱᓇᓱᐊᒻᒪᕆᑦᓯᒪᒻᒪᑕ ᓄᓇᕕᒻᒥ ᐃᓕᓐᓂᐊᑏᑦ ᐊᑦᔨᒋᔭᐅᑎᑕᐅᑦᓯᐊᓗᑎᒃ ᐱᓇᓱᐊᕐᕕᐅᒍᑎᑦᓴᖏᓐᓂᒃ ᐊᒻᒪᓗ ᖁᕕᐊᒋᔭᖃᒻᒪᕆᑉᐳᒍᑦ ᑕᒪᑦᓱᒥᖓ ᐱᔭᖃᕈᓐᓇᓚᐅᕐᓂᑎᓐᓂᒃ”, ᐅᖃᕆᐊᓪᓚᒥᑦᓱᓂ.

ᐃᓕᓴᕐᓂᓕᕆᓂᖅ ᒫᓐᓇᐅᑎᓪᓗᒍ ᐱᓇᓱᖃᑎᖃᒻᒪᕆᕉᑕᕆᕗᖅ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᒃ ᐊᑐᓕᕐᑎᑕᐅᓂᖏᓐᓂᑦ ᐱᒍᓐᓇᓯᓂᕐᒥᒃ ᑐᖕᖓᕕᖃᕐᓱᑎᒃ ᓴᓇᑦᑐᓴᐅᑎᓕᕆᐅᑎᓂᒃ ᐃᓕᓐᓂᐊᓂᕐᒥᒃ, ᒪᓕᑦᑐᓂᒃ ᐃᓕᓐᓂᐊᕈᑏᑦ ᐋᕐᕿᒋᐊᕐᑕᐅᓂᕆᓯᒪᔭᖏᓐᓂᒃ ᑯᐯᒻᒥ ᐊᕐᕌᒍᐃᑦ ᐊᒥᓱᒐᓚᐅᓕᕐᑐᑦ ᖄᖏᕐᓯᒪᓕᕐᑐᓂ. “ᑐᓴᐅᒪᖃᑎᖃᑦᓯᐊᓂᖅ ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᓐᓂᒃ ᐱᐅᓯᓕᐅᒥᓯᒪᔪᒻᒪᕆᐅᕗᖅ ᑕᕐᕿᓂᑦ 6-ᓂᑦ ᖄᖏᕋᑖᕐᑐᓂᑦ. ᑐᕐᖃᑕᕐᕕᑯᓐᓂ, ᑐᑭᓯᒪᑦᓯᐊᓂᕐᓴᐅᓕᕐᑐᐃᑦ ᑭᖕᖒᒪᒋᔭᕗᓐᓂᒃ ᐊᒻᒪᓗ ᐱᓇᓲᑎᑦᓴᐅᒋᐊᓕᓐᓂᒃ ᐱᒋᐊᖃᕋᔭᕐᑕᕗᓐᓂᒃ ᑲᔪᓯᑦᓯᐊᑎᓂᐊᑐᐊᕈᑎᒋᑦ ᐋᕐᕿᒋᐊᕆᒍᑎᐅᓯᒪᔪᑦ ᑯᐯᓕᒫᒥ ᐊᑯᓃᕐᑐᒥ ᐋᕐᕿᒋᐊᕆᕙᓪᓕᐊᒍᑎᐅᓯᒪᔪᓂᒃ, ᐊᑐᐃᓐᓇᖃᕐᑎᑕᐅᓗᑕ ᓈᒻᒪᑐᓂᒃ ᐱᓇᓱᒍᑎᑦᓴᑖᕈᑎᑦᓴᓂᒃ”, ᐅᖃᓚᐅᕐᒥᔪᖅ ᕌᐳᕐᑦ ᒍᐊᑦ, ᐊᖓᔪᕐᖄᑉ-ᑐᖓᓕᖓ ᐃᓕᓴᕐᓂᓕᕆᓂᕐᒥ.

“ᐃᓚᒋᔭᐅᒻᒥᑎᓪᓗᒍ ᑐᕌᒐᓕᐅᕐᑕᐅᓯᒪᔪᓂᒃ ᐃᓕᓐᓂᐊᑎᑕᐅᓂᑦᓴᖏᑦ ᓴᓇᑦᑐᓴᐅᑎᓕᕆᐅᑎᓂᒃ ᐃᓕᓭᔨᖏᑦᑕ, ᐃᓕᓴᕐᓂᓕᕆᓂᒃᑯᑦ ᐱᓇᓱᒍᑎᑦᓴᒋᐊᓪᓚᓂᒃ ᐱᑕᖃᕐᑎᓯᓚᐅᔪᕗᑦ ᐃᑲᔪᕐᓯᒍᑎᐅᓂᐊᕐᑐᓂᒃ ᐃᓕᓐᓂᐊᑎᓂᒃ ᐃᓕᓭᔨᓂᓪᓗ ᑕᒪᒃᑯᐊ ᐊᓯᑦᔨᑕᐅᕙᓪᓕᐊᓂᖏᑦ ᐱᓇᓱᐊᕐᑕᐅᓂᖏᓐᓄᓂ,” ᐅᖃᓚᐅᕐᑐᖅ ᕌᐳᕐᑦ ᒍᐊᑦ. ᓱᓕᕗᖅ, ᑲᑎᒪᑦᓱᑎᒃ ᐊᕐᓇᓕᖕᖒᑎᕕᒻᒥ ᑕᕐᕿᒥ, ᐃᓕᓴᕐᓂᓕᕆᓂᕐᒥ ᑭᒡᒐᑐᕐᑏᑦ ᐊᖏᓚᐅᔪᕗᑦ ᐱᒋᐊᕐᑎᑕᐅᒍᑎᑦᓴᖏᓐᓂᒃ ᐊᕐᕌᒍᕐᓄᑦ-ᐱᖓᓱᓄᑦ ᓄᓇᕕᓕᒫᒥ ᐃᓕᓐᓂᐊᑎᓂᕐ ᐃᑲᔪᕐᓯᒍᑏᑦ ᐱᓇᓱᐊᕐᑕᐅᓂᖓᑕ. ᐱᓇᓱᐊᕐᑕᐅᓚᖓᔪᑦ ᐃᓕᓐᓂᐊᕕᓕᒫᓂᑦ, ᑐᕌᒐᖃᕐᓗᑎᒃ ᐃᑲᔪᕐᓯᓂᕐᒥᒃ ᐃᓕᓐᓂᐊᑎᓂᒃ ᑎᑭᐅᑎᒍᑎᒋᓂᐊᕐᑕᖏᓐᓂᒃ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᑯᑦ ᐱᑕᖃᕆᐊᖃᕐᓂᕋᕐᑕᖏᓐᓄᑦ. ᓯᕗᓪᓖᑦ ᐃᓕᓐᓂᐊᑎᓂᒃ ᐃᑲᔪᕐᑎᓭᑦ ᑎᑭᓛᕐᑐᑦ ᑕᕐᕿᐅᑉ ᓇᑦᔪᐃᔭᕐᕕᐅᑉ ᐃᓱᓕᓐᓂᖓᓂ ᑕᓪᓕᒪᓄᑦ ᓄᓇᕕᒻᒥ ᓄᓇᓕᓐᓄᑦ. ᓇᓕᕐᙯᑐᒥ 2018-ᒥ, ᑐᖓᓕᖏᓐᓂᒃ ᐱᓇᓱᒋᐊᕐᑐᑐᓂᒃ ᑎᓕᔭᐅᔪᖃᓛᕐᒥᔪᑦ ᐅᐸᑦᑕᐅᕋᑕᕐᓂᖏᑦᑐᓄᑦ ᓄᓇᓕᓐᓄᑦ.

ᓄᕐᕋᓕᐅᑦ 17, 2017-ᖑᑎᓪᓗᒍ, ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᒃ ᑎᓕᔨᓚᐅᔪᔪᖅ ᐱᓇᓱᑦᑎᒪᕆᒻᒥᓂᒃ ᐱᓇᓱᖃᑎᐅᓚᖓᑎᓪᓗᒍ ᐃᓕᓴᕐᓂᓕᕆᔨᒃᑯᓂᒃ ᐃᓕᓐᓂᐊᕈᑎᑦᓭᑦ ᖁᕝᕙᕆᐊᒍᑎᖏᓂᒃ, ᐱᓇᓱᖃᑎᒋᒻᒥᓗᒋᑦ ᐱᓪᓗᑯᒋᐊᓕᓕᓐᓂᒃ ᖃᕆᑕᐅᔭᒃᑰᑐᓂᒃ ᐃᓕᓐᓂᐊᓂᕐᒨᓕᖓᔪᓂᓪᓗ ᐱᕙᓪᓕᐊᔭᐅᔪᓂᑦ. ᑐᕓᔭᕉᑦ 12, 2017-ᖑᑎᓪᓗᒍ, ᐃᓕᓐᓂᐊᓂᓕᕆᓂᕐᒥ ᑐᕐᖃᑕᕐᕕᑯᑦ ᐊᖏᓚᐅᔪᕗᑦ ᐃᓕᓐᓂᐊᓂᓕᕆᓂᐅᑉ ᐳᕐᑐᓂᕐᓴᓂ 4ᒥ ᓴᓇᑦᑐᓴᐅᑎᓕᕆᐅᑎᓂᒃ ᓱᑯᐃᔦᓂᕐᒥᒃ ᐱᓪᓗᑯᒋᐊᓕᓕᓐᓂᓗ ᐃᓕᓐᓂᐊᕈᑎᑦᓴᓕᐊᕆᓯᒪᔭᖏᑦᑕ ᐱᕙᓪᓕᐊᑎᑕᐅᓯᒪᓂᖏᓐᓂᒃ. ᐱᒍᓐᓇᓯᑎᑕᐅᓚᕿᔪᑦ, ᐃᓕᓐᓂᐊᒐᕐᓂᒃ ᑖᒃᑯᓂᖓ ᐱᔭᕇᓕᕈᑎᓕᒃ, ᓄᓇᕕᒻᒥ ᐃᓕᓐᓂᐊᑏᑦ ᑐᓂᔭᐅᖃᑦᑕᓂᐊᓕᕐᑐᑦ ᐱᑕᖃᕆᐊᖃᓪᓗᑐᕐᑐᓂᒃ ᖁᕝᕙᕆᐊᕈᑎᓂᒃ ᐃᓕᓐᓂᐊᒐᒃᑯᑦ ᑎᑭᐅᑎᕙᓪᓕᐊᒍᑎᓂᒃ ᐳᕐᑐᓂᕐᓴᓂ 5-ᒥ ᐱᔭᕇᕈᑎᒧᑦ.

ᑭᓇᒃᑰᓂᕗᑦ:

ᑲᑎᕕᒃ ᐃᓕᓐᓂᐊᓂᓕᕆᓂᖅ (ᑲᑎᕕᒃ) ᑎᒥᖕᖑᑎᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᐱᑕᖃᕐᑎᓯᔪᑐᐊᖑᓯᒪᕗᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ. ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ, ᐃᓕᓐᓂᐊᓂᓕᕆᓂᖅ ᐱᔪᓐᓇᓂᖃᕐᑎᑕᐅᔪᖅ ᐊᐅᓚᑦᓯᔨᐅᕕᖃᕐᑎᑕᐅᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᒪᓕᑦᓯᐊᑐᓂᒃ ᐃᓕᓐᓂᐊᕈᑎᑦᓴᓕᐅᕐᓂᒥ ᐃᓕᓐᓂᐊᑎᑦᓯᓂᕐᒥᓗ. ᑐᕌᒐᖓ ᑎᓕᔭᐅᒪᒍᑎᒋᑦᓱᒍ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᑌᒣᒻᒪᑦ ᒪᕐᕈᐃᓕᕿᖓᕗᖅ. ᓯᕗᓪᓕᖅ, ᓄᓇᓕᓕᒫᓂ ᐃᓕᓐᓂᐊᓂᓕᕆᔨᐅᑦᓱᓂ ᓄᓇᕕᒻᒥᐅᓕᒫᓄᑦ. ᐁᑉᐹᒍᓪᓗ, ᑎᒥᖁᑎᒋᔭᐅᕗᖅ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᐅᑎᖃᕐᓱᓂ ᐊᐅᓚᑦᓯᔨᐅᕕᖃᕐᓱᓂᓗ ᓴᐳᑦᔨᒍᑎᐅᒋᐊᕐᑐᓂᒃ, ᐱᑕᖃᕐᑎᓯᖏᓐᓇᕈᑎᐅᒋᐊᕐᑐᓂᒃ, ᐊᒻᒪᓗ ᐱᕙᓪᓕᐊᑎᑦᓯᒍᑎᓂᒃ ᐃᓄᐃᑦ ᐅᖃᐅᓯᖓᓂᒃ, ᐃᓗᕐᕈᓯᖓᓂᒃ, ᐃᓅᑦᔪᓯᖓᓂᓪᓗ. ᐃᓕᓐᓂᐊᕈᑎᑦᓭᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ ᐃᓕᓐᓂᐊᕈᑎᓕᐊᑦ ᐃᓕᓐᓂᐊᑎᑦᓯᒍᑎᐅᕗᑦ ᐃᓘᓐᓇᖏᓐᓂᑦ ᑖᒃᑯᐊ 14-ᐃᑦ ᓄᓇᓖᑦ ᐃᓕᓐᓂᐊᕕᖏᓐᓂᑦ, ᐃᓄᒃᑎᑐᑦ ᐅᖃᐅᓯᕐᖄᖓᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᖓᓂᒃ. ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐳᒃᑭᓂᕐᓴᓂ ᐳᕐᑐᓂᕐᓴᓂᓪᓗ ᐃᓕᓐᓂᐊᕕᓐᓂᒃ ᐊᒻᒪᓗᑦᑕᐅᖅ 5-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᓪᓚᕈᑎᑦᓭᑦ ᑕᑯᔭᐅᒍᓐᓇᑐᑦ ᐅᕙᓂ: www.kativik.qc.ca

— 30 —

ᑐᑭᓯᒪᐅᑎᑦᓴᓄᑦ, ᐅᓇ ᖃᐅᔨᒋᐊᕐᓗᒍ :

ᔮᑦ ᑑᓯᓅ-ᐱᐊᕐᓂᐁᕐ

ᑐᓴᐅᒪᖃᑎᒌᒍᑎᓄᐊᖓᔪᓂᒃ ᐊᑕᐅᑦᓯᑰᕐᑎᓯᔨ

publicrelations@kativik.qc.ca