ᐱᓇᓱᓚᐅᕋᑎᒃ ᐱᒋᐅᕐᓴᑎᑦᓯᓂᕐᒧᑦ ᐃᓕᓐᓂᐊᒐᖅ ᓄᕝᕕᑎᒃ ᐃᓕᓐᓂᐊᕕᖓᓂ (ᐃᕗᔨᕕᒃ)

2019 | 05 | 6
ᐅᓂᒃᑳᑦ

ᐃᓕᓐᓂᐊᑎᑦᓯᓂᕐᒧᑦ ᐅᖃᐅᓯᑦᓭᑦ

2017-ᖑᑎᓪᓗᒍ, ᑯᐯᒻᒥ ᐃᓕᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᖓ ᓇᓗᓀᕐᓯᒍᑎᑖᕐᑎᓯᓚᐅᔪᕗᖅ ᐃᒻᒥᒎᓈᕐᑎᑐᓄᑦ ᐊᕐᖁᓯᐅᕐᓂᒧᑦ ᐃᓕᓐᓂᐊᓂᕐᒥᒃ (IPL) ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓂᕐᒧᑦ ᐃᓕᓐᓂᐊᓂᕐᒥᒃ (PWTC). 2018-ᒥ, ᐃᓕᓐᓂᐊᑎᑦᓯᒍᑎ ᐊᑎᖓ ᐊᓯᑦᔨᑕᐅᓚᐅᔪᖅ ᐱᓇᓱᓚᐅᕋᓂ ᐱᒋᐅᕐᓴᑎᑕᐅᓃᑦ (ᐱᓇᓱᒐᕐᒥᒃ ᖃᐅᔨᓴᕐᓂᖅ). ᑐᕐᖃᑕᐅᕐᕕᒥ ᖁᕝᕙᕆᐊᕈᑎᖃᕐᓱᓂ, ᐱᔭᕇᕐᑐᐃᑦ ᐃᓕᑕᕆᔭᐅᓂᓕᒻᒥᒃ ᐊᓪᓚᓯᒪᔪᕐᑖᓱᖑᓕᕐᖁᑦ ᑯᐯᒃᑯᑦ ᐃᓕᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᖓᓂᑦ ᐱᓯᒪᔪᒥᒃ ᓇᓗᓀᕐᓯᔪᒥᒃ ᐱᒍᓐᓇᐅᑎᖃᕐᓂᖏᓐᓂᒃ.

ᑕᒃᑲᓂ ᐃᓕᓐᓂᐊᒐᕐᒥ, ᐃᓕᓐᓂᐊᑏᑦ ᐃᓕᑦᓯᓲᑦ ᐊᑦᔨᒌᖕᖏᑐᓂᒃ ᐱᓇᓱᒐᕐᒧᑦ ᐱᒍᓐᓇᐅᑎᓂᒃ ᐊᒻᒪᓗ ᐃᓚᐅᓲᖑᑦᓱᑎᒃ ᓄᓇᓕᓐᓂ ᐱᓇᓱᐊᕐᑕᐅᔪᓄᑦ. ᐱᒍᓐᓇᕕᓕ ᐃᒣᑦᑐᓂᒃ

  • ᐱᓇᓱᐊᕐᓂᒥᒃ ᐱᒋᐊᖕᖓᐅᑎᒥᒃ ᐊᑦᔨᒌᖕᖏᑐᓄᑦ ᐱᓇᓱᒐᕐᓄᑦ ᖃᓄᐃᓕᖓᓂᐅᔪᓄᑦ,
  • ᐃᓕᑦᓯᓗᑎᒃ ᐱᒻᒪᕆᓐᓂᒃ ᐱᓇᓱᒐᕐᓄᑦ ᐊᒻᒪᓗ ᐃᓅᓯᕐᒥ ᐱᒍᓐᓇᓯᓂᕐᒧᑦ ᐱᓇᓱᐊᕐᓗᑎᒃ
  • ᐱᒋᐅᕐᓴᑎᑕᐅᓗᑎᒃ,
  • ᐱᓇᓱᐊᖃᑕᐅᓗᓂ ᐱᓇᓱᖃᑎᒌᓄᑦ ᐋᕐᕿᓱᐃᓗᑎᒃ ᐊᒻᒪᓗ ᐱᔭᕇᕐᓗᑎᒃ ᓄᓇᓕᓐᓂ
  • ᐱᓇᓱᐊᕐᑕᐅᔪᓄᑦ,
  • ᖃᐅᔨᓴᕐᓗᑎᒃ ᓱᓇᓂᒃ ᐱᒍᒪᒻᒪᖔᕐᒥᒃ ᐊᒻᒪᓗ ᖃᐅᔨᓗᑎᒃ ᓱᓇᓂᒃ
  • ᓲᖑᔫᓂᖃᕐᒪᖔᕐᒥᒃ,
  • ᐱᓇᓱᐊᕐᓯᒪᓂᕐᑖᓗᑎᒃ ᐱᒻᒪᕆᓐᓂᒃ ᐱᓇᓱᕝᕕᐅᔪᓄᑦ, ᐊᒻᒪᓗ
  • ᐃᓕᑕᕆᔭᐅᓂᓕᒻᒥᒃ ᐊᓪᓚᓯᒪᔪᕐᑖᓗᑎᒃ ᑐᕐᖃᑕᕐᕕᖓᓂᑦ ᐃᓕᓐᓂᐊᓂᓕᕆᓂᕐᒧᑦ ᓱᓕᑎᑦᓯᔪᒥᒃ ᐱᒍᓐᓇᓯᓂᖏᓐᓂᒃ.

ᐃᓕᓐᓂᐊᑎᑦᓯᒍᑎ ᐃᑉᐱᒋᔭᖃᕐᒥᔪᖅ ᐃᓕᓐᓂᐊᑏᑦ ᑲᔪᓯᑦᓯᐊᓂᖏᓐᓂᒃ ᐃᓕᓐᓂᐊᑎᑦᓯᓂᐅᓲᓄᑦ ᐊᒻᒪᓗ ᐱᐅᓯᐅᒥᑎᑦᓯᓗᑎᒃ ᐊᓪᓚᓯᒪᔪᓕᕆᓂᖏᓐᓂᒃ ᐊᒻᒪᓗ ᑭᓯᑦᓯᒍᑎᓐᓂᐊᓂᕐᒧᑦ ᐱᒍᓐᓇᐅᑎᖏᓐᓂᒃ.

ᐅᖄᖃᑎᖃᓚᐅᔪᕗᒍᑦ ᕗᔮᓐᓴᔅ ᒫᑦᓴᓪᑕᓐ-ᑯᔫᐸᔅᒥᒃ, ᐃᓕᓐᓂᐊᑎᑦᓯᔨ ᑲᒪᒋᔭᖃᕐᓱᓂ ᐱᓇᓱᓚᐅᕋᓂ ᐱᒋᐅᕐᓴᑎᑦᓯᓃᑦ ᐃᓕᓐᓂᐊᑎᑦᓯᓂᕐᒥᒃ ᓄᕝᕕᑎ ᐃᓕᓐᓂᐊᕕᖓᓂ.

ᑲᑎᕕᒃ ᐃᓕᓴᕐᓂᓕᕆᓂᖅ: ᐅᖄᕕᒋᒍᓐᓇᖃᑦᑎᒎᑦ ᐃᓕᓐᓂᐊᑎᑉᐱᑦ ᒥᑦᓵᓄᑦ ᐊᒻᒪᓗ ᐱᓇᓱᕝᕕᐱᑦ ᒥᑦᓵᓄᑦ?

ᕗᔮᓐᓴᔅ ᒫᑦᓴᓪᑕᓐ-ᑯᔫᐸᔅᒥᒃ: ᖁᓕᓪᓗ ᓯᑕᒪᓪᓗᓂᒃ ᐃᓕᓐᓂᐊᑎᖃᕐᑐᖓ: ᖁᓕᓪᓗ ᒪᕐᕈᓗᐃᑦ ᓱᕈᓰᑦ ᐊᒻᒪᓗ ᒪᕐᕉᒃ ᓂᕕᐊᕐᓯᐊᒃ. ᑖᒃᑯᐊ ᐅᕕᒐᕐᑐᐃᑦ ᑲᔪᓯᑦᓯᐊᓂᖃᕋᔭᖕᖏᓂᕐᓭᑦ ᐃᓕᓐᓂᐊᑕᒥᓂᒃ ᓂᕈᐊᕐᓯᒪᔪᑦ ᐃᓕᓐᓂᐊᓂᕐᒥᒃ ᑕᑯᓐᓇᓂᕐᓴᖃᕐᑐᒥᒃ ᐱᓇᓱᒐᕐᒨᓕᖓᓂᕐᓴᓂᒃ. ᐱᒐᓱᐊᕐᓂᓴᕆᓯᒪᔭᕋ ᐃᓅᓯᕐᒥᒃ ᐃᓂᖃᕐᑎᓯᓂᕐᒥᒃ ᖃᕆᐊᒥ ᐃᓕᓐᓂᐊᕕᒻᒥ ᐊᑐᕐᑕᐅᓲᑐᖃᐅᖕᖏᓂᕐᓴᒥᒃ. ᐱᕈᕐᓰᕕᕗᑦ ᖃᕆᐊᒥᒃ ᕿᑎᕐᖃᖓᓂᒃ ᐃᓂᓕᒃ, ᐊᒻᒪᓗ ᖃᕆᑕᐅᔭᕐᕕᖃᕐᓱᓂ ᖃᕆᐊᑉ ᑎᕆᕐᖁᖓᓂ ᐊᒻᒪᓗ ᐳᓛᕐᕕᖃᕐᓱᓂ. ᓂᕆᓚᖓᔭᖏᓐᓂᒃ ᐊᑦᔭᓯᓲᖑᔪᖓ ᖃᐅᑕᒫᑦ—ᓰᕐᓇᑐᓂᒃ ᐱᕈᕐᑐᕕᓂᕐᓂᒃ, ᔫᑯᑦ, ᐅᓪᓛᕈᒥᑕᑦᓴᔭᕐᓂᒃ, ᑌᒣᑦᑐᓚᑳᓂᒃ.

ᑲᑎᕕᒃ ᐃᓕᓴᕐᓂᓕᕆᓂᖅ: ᖃᓄᐃᒃᑳ ᐃᓕᓐᓂᐊᑎᑦᓯᓃᕐᒧᑦ ᐊᒻᒪᓗ ᐃᓕᑦᓯᓂᕐᒧᑦ ᐱᕙᓪᓕᐊᓂᖓ?

ᕗᔮᓐᓴᔅ ᒫᑦᓴᓪᑕᓐ-ᑯᔫᐸᔅᒥᒃ: ᒫᓐᓇ ᐱᓇᓱᐊᕐᖁᒍᑦ ᑕᓪᓕᒪᓂᒃ ᐱᓇᓱᐊᕋᑦᓴᓂᒃ ᐃᑲᔪᕐᓯᓚᖓᔪᓂᒃ ᐱᒍᓐᓇᓯᑎᑦᓯᓗᑎᒃ ᐊᑦᔨᒌᖕᖏᑐᓂᒃ ᐱᒍᓐᓇᐅᑎᓂᒃ ᐊᒻᒪᓗ ᖃᐅᔨᒪᐅᓯᕐᓂᒃ ᑐᖕᖓᕕᓕᓐᓂᒃ ᓱᖃᑦᓯᒍᑎᓂᒃ ᐆᑦᑐᑎᒋᓗᒍ ᒪᙯᓐᓂᒥᒃ, ᐃᖃᓗᑦᓯᐅᓂᕐᒥᒃ, ᓄᐊᑦᓯᓂᕐᒥᒃ ᓴᓂᕐᓂᒃ ᐃᓪᓓᒍᑎᑦᓴᔭᓂᒃ, ᐱᕈᕐᓰᕕᓐᓂᒃ ᐃᓪᓘᓱᑎᒃ ᓂᕿᑦᓴᓂᒃ ᐱᕈᕐᓰᕕᒃ, ᐊᒻᒪᓗ ᐃᙯᓕᓴᕐᓂᒥᒃ.

ᐱᐅᓯᑐᖃᓕᕆᓂᕐᒧᑦ ᐃᓕᓐᓂᐊᕕᖃᖕᖏᑐᖅ. ᓱᓇᑐᐃᓐᓀᑦ ᐃᓕᓐᓂᐊᑎᑦᓯᒍᑎᐅᒍᓐᓇᑐᑦ. ᐆᑦᑐᑎᒋᓗᒍ, ᐱᓇᓱᐊᓕᑐᐊᕈᑦᑕ ᐱᕈᕐᓰᕕᒻᒥ, ᐱᕈᕐᓯᐊᓂᒃ ᐱᕈᕐᓰᓂᖅ ᐅᕝᕙᓘᓐᓃᑦ ᐱᕈᕐᑐᕕᓂᕐᓂᒃ, ᐃᓕᓐᓂᐊᑐᐃᑦ ᐱᕈᑦᓯᐊᑦ ᒥᑦᓵᓄᑦ, ᑐᑭᓯᓴᕐᓂᖅ ᓱᓇᑦᓴᔦᑦ ᐅᐊᕈᑎᒌᒍᓐᓇᒪᖔᑖ, ᓱᒧᑦ ᑌᒣᓚᕿᒻᒪᖔᑕ, ᐱᐅᒃᑯᑎᓂᒃ ᓯᖁᒥᑎᑦᓯᑌᓕᓂᕐᒧᑦ, ᐊᓯᖏᓐᓂᓗ. ᐃᓕᓐᓂᐊᒥᑦᓱᑎᓪᓗ ᐸᕐᓀᓂᕐᒥᒃ, ᐱᓀᓗᑕᕐᓂᒃ ᐋᕐᕿᓱᐃᓂᕐᒥᒃ, ᐱᓇᓱᖃᑎᒌᓐᓂᒥᒃ ᐊᒻᒪᓗ ᐃᑉᐱᒍᓱᑦᓯᐊᓂᕐᒥᒃ!

ᓯᓚᒥ ᓱᒐᓚᓕᑐᐊᕋᑦᑕ, ᐅᖄᕕᒋᑦᓯᐊᓲᒃᑲ ᐊᑑᑎᔪᕕᓂᕐᓂᒃ, ᐊᑑᑎᔭᕕᓂᖏᓐᓂᒃ ᓄᓇᖏᓐᓂ, ᖃᓄᐃᑦᑐᓂᒃ ᐊᑐᕐᓱᑎᒃ ᐃᖃᓪᓕᐊᐸᓐᓂᒪᖔᑕ ᐃᓄᐃᑦ ᐊᓯᖏᓪᓗ, ᐆᒪᔪᕐᓯᐅᐸᓐᓂᒪᖔᑕ, ᐊᓂᕐᕋᓴᕐᒥᓂᒃ ᓴᓇᖃᑦᑕᓂᕕᓂᖏᓐᓂᒃ ᐊᒻᒪᓗ ᐊᓐᓄᕌᓕᐅᕐᐸᓂᕕᓂᖏᓐᓂᒃ. ᐃᒡᓗᓕᓂᕐᒥᒃ, ᖃᔭᓕᐅᕐᓂᒥᒃ ᐅᕝᕙᓘᓐᓃᑦ ᖃᒧᑎᓕᐅᕐᓂᒥᒃ—ᓴᓇᑦᑐᓴᐅᑎᓕᕆᓂᐅᒻᒥᔪᖅ, ᓴᓇᒪᓂᖏᓐᓂᒃ ᐊᒻᒪᓗ ᓇᓪᓕᑳᕈᓐᓇᓂᖏᓐᓂᒃ ᐊᒻᒪᓗ ᓈᒻᒪᓈᕐᑐᓂᒃ ᐱᐅᓕᓂᐊᒐᕐᓂᒃ ᐊᑐᕐᓂᕆᒐᔭᕐᑕᖏᓐᓂᒃ. ᓱᑯᐃᔦᓂᐅᒻᒪᑦ!

ᖃᔭᕐᑐᓕᑐᐊᕋᑦᑕ ᐅᕝᕙᓘᓐᓃᑦ ᓴᓂᕐᓂᒃ ᐃᓪᓓᒍᑎᑦᓴᔭᓂᒃ ᓄᐊᑦᓯᓕᑐᐊᕋᑦᑕ, ᐅᖄᓱᖑᔪᒍᑦ ᐃᓄᐃᑦ, ᐊᕙᑎᒧᑦ ᐆᒪᔪᕐᓂᓗ ᐃᓅᖃᑎᖃᕐᒪᑕ, ᐅᖄᑦᓱᑕᓗ ᐊᕙᑎᒧᑦ ᐱᓀᓗᑕᐅᓕᕐᑐᓂᒃ, ᓴᓂᕐᓂᒃ ᐃᑉᐱᒋᔭᖃᕐᓂᒧᑦ ᐊᒻᒪᓗ ᐱᕈᕐᓯᐊᓂᒃ ᐆᒪᔪᓂᓪᓗ.

ᐯᓯᑯᓕᑐᐊᕋᑦᑕ, ᐸᑦᑕᒥᒃ ᓄᓗᐊᒨᕐᓯᒐᓱᐊᓕᑐᐊᕋᑦᑕ, ᓯᐊᕐᕆᔭᕆᐊᓕᑐᐊᕋᑦᑕ ᐅᕝᕙᓘᓐᓃᑦ ᐊᓯᖏᓐᓂᒃ ᐃᙯᓕᓴᕈᑎᓂᒃ ᐊᑐᓕᑐᐊᕋᑦᑕ, ᐅᖄᓱᖑᔪᒍᑦ ᓱᒐᒥ ᐃᙯᓕᓴᕐᓂᖅ ᐱᐅᔫᒻᒪᖔᑦ ᑎᒥᒧᑦ ᐊᒻᒪᓗ ᐃᓱᒪᒧᑦ, ᓂᕆᑦᓯᐊᓂᐅᓪᓗ ᒥᑦᓵᓄᑦ, ᐊᒻᒪᓗ ᓱᕐᕃᓲᖑᓂᖓᓂᒃ ᓱᐴᕈᑎᐅᑉ. ᐃᓕᓐᓂᐊᒥᑦᓱᑕᓗ ᐊᐅᓚᐅᑎᓂᒃ, ᐋᕐᕿᓱᐃᓲᖑᓂᑦᑎᓄᑦ ᐯᓯᑯᕗᓐᓂᒃ!

ᑲᑎᕕᒃ ᐃᓕᓴᕐᓂᓕᕆᓂᖅ: ᑌᒫ ᐃᓕᓐᓂᐊᑎᑦᓯᓃᑦ ᐱᒋᐅᕐᓴᑎᑦᓯᓂᑐᐃᓐᓇᐅᑉ ᓯᓚᑖᓄᓱᖑᕙ ᐱᓇᓱᒐᕐᒨᓕᖓᓕᕐᑎᓯᑦᓱᓂ?

ᕗᔮᓐᓴᔅ ᒫᑦᓴᓪᑕᓐ-ᑯᔫᐸᔅᒥᒃ: ᐊᐊ, ᐱᒍᓐᓇᑕᒥᑦᑕ ᐅᖓᑖᓄᖁᑦᓱᒋᑦ ᑫᓪᓗᑐᕆᐊᓪᓚᑖᓲᒃᑲ, ᐱᓇᓱᐊᖁᑦᓱᒋᑦ ᐊᑦᓱᕈᕐᓗᑎᒃ ᐊᑦᓱᕈᕐᓇᑐᒃᑰᓕᕈᑎᒃ ᐊᒻᒪᓗ ᐅᐱᒍᓱᓪᓗᑎᒃ ᐱᒍᓐᓇᓯᓯᒪᓕᕐᑕᒥᓂᒃ. ᕿᓄᐃᓵᑦᓯᐊᓂᕐᒥᒃ ᐃᓕᓐᓂᐊᑎᒐᓱᐊᓲᒃᑲ, ᐊᓕᐊᓱᖁᑦᓱᒋᓪᓗ ᐊᑦᓱᕈᕐᓗᑎᒃ ᐱᓇᓱᐊᓕᑐᐊᕈᑎᒃ ᐊᒻᒪᓗ ᐱᒐᓱᐊᑦᓯᐊᓂᖃᕐᓗᑎᒃ ᓱᑲᑦᑐᒥᒃ ᐊᓕᐊᓱᒐᓱᑐᐃᓐᓇᕈᓐᓀᓗᑎᒃ. ᐅᑉᐱᕈᓱᑦᓯᐊᖁᑦᓱᒋᑦ ᐃᒻᒥᓂᒃ ᐱᒍᓐᓇᓂᕐᒥᓂᒃ. ᐅᖃᐅᑎᖏᓐᓇᓲᒃᑲ ᐱᕈᕐᑐᓴᒥᒃ ᐱᕈᕐᓰᓂᕋᓂᒃ ᓂᕆᐅᓐᓂᕋᕐᓱᖓ ᐱᐅᔪᒥᒃ ᐱᕈᓚᖓᓂᖏᓐᓂᒃ, ᖃᐅᑉᐸᐅᐸᑦ, ᐊᕐᕌᒎᓚᖓᔪᒥ ᐅᕝᕙᓘᓐᓃᑦ ᖁᓖᑦ ᐊᕐᕌᒍ ᓈᑉᐸᑕ!

ᑲᑎᕕᒃ ᐃᓕᓴᕐᓂᓕᕆᓂᖅ: ᐆᑦᑐᑎᖃᖁᓐᓇᑮᑦ?

ᕗᔮᓐᓴᔅ ᒫᑦᓴᓪᑕᓐ-ᑯᔫᐸᔅᒥᒃ: ᓱᓇᒐᓚᖃᐅᑎᓂᒃ ᓄᓇᓕᓐᓄᑦ ᐃᓕᓯᕕᖃᖃᑦᑕᓯᒪᔪᒍᑦ ᐋᕐᕿᓱᕐᑕᐅᒪᔪᓂᒃ ᐃᓂᖏᓐᓂᒃ ᓄᐊᑦᓯᕕᑦᓴᓂᒃ ᓴᓂᕐᓂᒃ ᐃᓪᓓᒍᑎᑦᓴᔭᓂᒃ. ᑌᒪ ᓴᓃᑦ ᐊᐅᓪᓚᑎᑕᐅᒐᔭᕐᑐᑦ ᖃᓪᓗᓈᓄᑦ ᐊᑐᕐᑐᓴᓕᐊᕆᔭᐅᒋᐊᕐᑐᕆᐊᓪᓚᓗᑎᒃ. ᐃᓕᓐᓂᐊᑏᑦ ᐊᑐᕐᑐᓂᒃ ᐱᓇᓱᐊᕐᑐᑦ ᓄᓇᓕᒻᒥᓄᑦ, ᐃᑲᔪᕐᓱᑎᒃ ᐱᒍᓐᓇᑕᒥᓂᒃ ᐱᐅᓯᐅᒥᑎᑦᓯᓂᕐᒧᑦ. ᑖᒃᑯᐊ ᐱᑦᔪᑎᒋᑦᓱᒋᑦ, ᓴᓃᑦ ᐊᕙᑎᒨᔭᑐᐃᓐᓇᓚᖓᖕᖏᑐᑦ, ᐊᕙᑎᒥᒃ ᓱᒃᑯᑎᕆᑐᐃᓐᓇᓚᖓᒐᑎᓪᓗ ᐆᒪᔪᖁᑎᓂᒃ ᓱᒃᑯᐃᓚᖓᖕᖏᑐᑦ. ᐅᐱᒋᓂᕃᓐᓇᕋᓱᐊᓲᒃᑲ ᐃᓕᓐᓂᐊᑎᒃᑲ, ᐃᕐᙯᑎᒋᐊᖏᓐᓇᕋᓱᐊᓲᒃᑲ ᐱᒻᒪᕆᒻᒥᒃ ᐱᓇᓱᐊᕐᓂᖏᓐᓂᒃ, ᐱᐅᔪᒥᒃ ᐊᑑᑎᓂᖏᓐᓂᒃ. ᐅᖃᐅᑎᓲᕆᒻᒥᔭᒃᑲ ᖃᖓᑐᐃᓐᓇᖅ ᐃᒻᒪᖄ ᐃᓚᖓᑦ ᐱᒋᐊᕐᑎᓯᓛᕇᐊᖓ ᐊᑐᕋᑦᓴᕆᐊᓪᓚᓕᐅᕐᕕᒥᒃ ᐊᐅᓪᓚᑎᑐᐃᓐᓇᕈᓐᓀᓗᒋᑦ ᖃᓪᓗᓈᑦ ᓄᓇᖓᓐᓄᑦ. ᐊᕙᑎᒥᒃ ᓱᒃᑯᑎᕆᖕᖏᓂᕐᓴᐅᒋᐊᓪᓚᕈᓐᓇᑐᖅ ᐊᒻᒪᓗ ᐱᓇᓱᒐᑦᓴᒥᒃ ᓄᐃᑦᓯᒐᔭᕐᓱᓂ.

ᑲᑎᕕᒃ ᐃᓕᓴᕐᓂᓕᕆᓂᖅ: ᓇᑯᕐᒦᒃ ᐅᖄᖃᑎᒋᒐᑦᑎᒍ, ᕗᔮᓐᓴᔅ. ᑲᔪᓯᑦᓯᐊᖁᓇᕐᖁᑎᑦ ᐱᕈᕐᑐᓴᓂᒃ ᐋᕐᕿᓱᐃᓗᑎᑦ ᐊᕐᕌᒍᓄᑦ ᙯᔪᓄᑦ!