ᓴᓇᖕᖑᐊᓯᒪᔪᓕᐅᕐᓂᖅ
ᐊᐅᓪᓚᑲᑕᑦᓱᓂ ᓴᓇᖕᖑᐊᓯᒪᔪᓕᐅᕐᓂᒥᒃ ᐱᒋᐅᕐᓴᓂᖅ ᐊᑐᐃᓐᓇᐅᑎᑕᐅᓲᖅ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖓᓄᑦ ᐊᒻᒪᓗ ᐱᓇᓱᒐᕐᒧᑦ ᐃᓕᓐᓂᐊᑎᑕᐅᓂᕐᒧᑦ ᐱᓇᓱᕝᕕᒧᑦ, ᐃᑲᔪᕐᑕᐅᓱᑎᒃ ᑲᑎᕕᒃ ᓄᓇᓕᓕᒫᓂ ᑲᕙᒪᖓᓄᑦ. ᓴᓇᖕᖑᐊᑏᑦ ᐊᒻᒪᓗ ᐃᓕᓐᓂᐊᑎᑦᓯᔨᖓ ᓕᓐ ᐹᔅᑎᐊᓐ ᐊᐅᓪᓚᖃᑦᑕᓚᐅᕐᑐᖅ ᐱᖓᓱᓄᑦ ᓄᓇᓕᓐᓄᑦ ᓄᓇᕕᒻᒥ ᐊᕐᕌᒍ ᑕᒫᑦ ᐃᓕᓐᓂᐊᑎᑦᓯᓱᓂ ᕿᔪᒻᒥᒃ ᐊᑐᕐᓱᑎᒃ ᑕᑯᒥᓇᕐᑐᓕᐅᕐᓂᒧᑦ ᓇᑎᑦᓴᔭᒧᑦ.
ᑖᓐᓇ ᐱᔭᕆᐊᑭᑦᑑᓱᓂ ᐊᑐᕐᑕᐅᓲᖅ ᓴᓇᖕᖑᐊᓯᒪᔪᓕᐅᕐᓂᒧᑦ ᐊᑦᔨᑲᓴᑦᓯᐊᖓ ᓴᓇᐅᒐᑦᓴᔭᒧᑦ ᐊᑦᔨᖑᐊᓕᐅᕐᓂᒥᒃ, ᐊᑐᕐᑕᐅᕙᓪᓗᓲᖅ ᓇᓂᓕᒫᖅ ᐊᒥᓱᓄᑦ ᐃᓄᓐᓄᑦ ᓴᓇᖕᖑᐊᑎᓄᑦ. ᕿᔪᒻᒥᒃ ᐊᑐᕐᓱᓂ ᑕᑯᒥᓇᕐᑐᓕᐅᕐᓂᖅ, ᐊᓪᓚᖑᐊᕐᑕᒥᓂᒃ ᐊᓯᐊᓅᕆᓂᐅᕗᖅ ᐊᕿᑦᑐᒧᑦ ᐃᓪᓚᐃᒍᑎᑦᓴᔭᒧᑦ ᐊᓪᓚᐅᑎᑦᓴᔮᕐᓯᒪᔪᒧᑦ ᐊᓪᓚᕕᑦᓴᒨᕐᑕᐅᓚᐅᕋᓂ ᐊᓪᓚᖑᐊᕐᓯᒪᔪᖅ. ᐊᓪᓚᖑᐊᕐᓂᖅ ᑭᓇᒃᑯᑐᐃᓐᓇᓄᑦ ᐊᑐᐃᓐᓇᐅᑎᑕᐅᔪᖅ ᐅᑭᐅᖏᑦ 16-ᓂᒃ ᐅᖓᑖᓄᓪᓗ ᐅᑭᐅᓕᓐᓄᑦ.
ᐃᓚᐅᔪᑦ ᐱᓇᓱᐊᕐᑎᑕᐅᓂᖃᓲᖑᕗᑦ ᓴᓇᖕᖑᐊᓯᒪᔭᒥᓂᒃ ᐊᒻᒪᓗ ᓴᓇᖕᖑᐊ ᐃᓱᒪᒋᔭᕐᒥᓂᒃ ᓴᓇᖕᖑᐊᑎᑕᐅᑦᓱᑎᒃ. ᑕᑯᒋᐊᓪᓛᕈᒪᒍᕕᑦ ᐊᑦᔨᖑᐊᖏᓐᓂᒃ ᓴᓇᖕᖑᓯᒪᔪᑦ, ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖓ ᐊᒻᒪᓗ ᐱᓇᓱᒐᕐᒧᑦ ᐱᒋᐅᕐᓴᑎᑕᐅᓂᖓᑕ Facebook-ᖓᓂ ᓄᐃᑕᑎᑦᓯᕕᖓᓂᒃ ᐃᓚᐅᓕᕐᓗᑎᑦ ᑕᑯᒍᓐᓇᑕᑎᑦ, ᓄᐃᑕᑎᑦᓯᑲᑦᑕᓲᑦ ᓴᓇᖕᖑᐊᑕᐅᓯᒪᔪᓂᒃ ᐃᓕᓐᓂᐊᑎᓄᑦ. ᖃᐅᔨᒋᐊᓪᓚᕈᒪᒍᕕᑦ ᐱᓇᓱᐊᕐᑕᖏᓐᓂᒃ ᓕᓐ ᐹᔅᑎᐊᓐ ᐅᕝᕙᓘᓐᓃᑦ ᐃᓕᓐᓂᐊᕋᑦᓴᓂᒃ ᐊᑐᐃᓐᓇᐅᑎᑕᐅᔪᓂᒃ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖓᓄᑦ ᐱᓇᓱᕝᕕᒧᑦ ᖃᐅᔨᒋᐊᕐᕕᒋᓗᒍ ᓴᒫᓐᑕ ᐳᐊᕆᔩ.