ᐃᓕᓐᓂᑎᐅᖃᑎᒌᑦ ᐊᔭᒍᑕᖅ ᐃᓕᓐᓂᐊᕕᒻᒥ ᑕᓯᐅᔭᒥ ᐃᓚᐅᓯᓚᐅᔪᔪᑦ ᐊᑦᔨᐅᖏᑦᑐᒧᑦ ᐊᔪᐃᓐᓇᕈᑎᑦᓴᒧᑦ: ᑖᓂᓯᕐᓂᖅ ᑐᕌᕐᓗᓂ ᐃᓕᓐᓂᐊᕕᒻᒥ ᐃᓚᐅᑦᓯᐊᓂᕐᒧᑦ, ᐱᔭᖃᕐᓂᒧᑦ ᐊᒻᒪᓗ ᓯᕗᓕᕐᑎᐅᓂᕐᒧᑦ.
“ᐊᑐᕋᑦᓴᐅᑎᑦᓯᔪᒍᑦ ᓄᓇᓕᓐᓂ ᑖᓂᓯᕐᓂᒧᑦ ᐃᓕᓐᓂᐊᕈᑎᑦᑎᓂᒃ, ᓯᕗᓂᕐᒥ ᓯᕗᓕᕐᑎᓴᓕᐅᕈᑎᒥᒃ ᐃᓚᐅᑦᓯᐅᑎᓪᓗᒍ ᐃᓕᓐᓂᐊᕕᒻᒥ ᐃᓕᑦᓯᒍᑏᑦ ᑭᓯᑕᐅᒍᑎᖏᓐᓄᑦ, ᐊᒻᒪᓗ ᐃᓱᒻᒪᓭᒍᑎᒥᒃ ᐱᓂᐊᕈᑎᖃᕐᒥᓱᑕ ᐃᑲᔪᕐᑐᒥᒃ ᐃᓕᓐᓂᐊᑎᓂᒃ ᑐᑭᑖᕋᓱᐊᕐᓂᖏᓐᓂ ᓱᓇᓐᓂᐊᕈᒪᒻᒪᖔᕐᒥᒃ ᐃᓕᓐᓂᐊᕕᐅᑉ ᑭᖑᓂᖓᓂ.”
ᐊᕐᕌᒎᓚᐅᔪᔪᖅ ᐱᒋᐊᕋᑖᕐᓂᖓᓂ, ᐃᓕᓐᓂᐊᑎᐅᖃᑎᒌᑦ ᐊᔭᒍᑕᖅ ᐃᓕᓐᓂᐊᕕᒻᒥ ᑕᓯᐅᔭᒥ ᐱᓪᓗᑯᓚᐅᔪᔪᑦ ᐃᓅᓯᓕᒫᖅ ᐱᔪᓐᓇᓯᑐᐊᓪᓕᒍᑎᒥᒃ: ᐃᓚᐅᓂᕐᒥᒃ ᑲᔪᓯᓕᕐᑐᒧᑦ ᐃᓕᓐᓂᐊᕈᑎᓂᒃ ᐱᔭᖃᕈᑎᓂᒃ ᐱᓇᓱᐊᕈᑎᒧᑦ ᐊᑐᕐᑐᒧᑦ ᑖᓂᓯᕐᓂᒥᒃ, ᐃᓱᓕᒍᑎᖃᕐᑎᓗᒍ ᒪᕐᕉᓂᒃ-ᐱᓇᓱᐊᕈᓰᓐᓂᒃ ᐊᐅᓪᓚᓯᒪᒍᑎᒥᒃ ᐱᖕᖑᐊᕆᐊᕐᑐᓯᒪᑦᓱᑎᒃ ᐊᕐᕌᒍᑕᒫᑦ ᑖᓂᓯᕐᑎᓂᒃ ᑕᑯᓐᓇᑎᑦᓯᒍᑕᐅᓲᓂ ᑐᕌᓐᑐᒥ.
ᓄᓇᓕᐅᑉ ᑖᓂᓯᕐᓂᒧᑦ ᐃᓕᓐᓂᐊᕈᑎᖓ ᐊᐅᓚᑕᐅᔪᖅ ᓯᓚᒥᒃ ᐃᓗᒻᒧᑦ ᐃᑦᓱᐊᖓᓂᕐᒥᒃ ᐊᑎᓕᓐᓄᑦ (OLI), ᓄᓇᖃᕐᖄᓯᒪᔪᑎᒍᑦ, ᖄᖏᕐᓂᑯᓕᐅᕐᑎᒐᓂ ᑎᒥᒧᑦ ᐊᑐᕐᑐᒧᑦ ᑖᓂᓯᕐᓂᒥᒃ ᑲᔪᖏᕐᓭᒍᑎᒋᑦᓱᒍ ᐊᒻᒪᓗ ᐅᓐᓂᒍᑕᐅᑎᑦᓱᒍ ᐱᕙᓪᓕᕈᑎᓄᑦ ᐃᓕᓐᓂᐊᕈᑎᓂᒃ ᐱᑦᓯᐊᓂᒃᑯᑦ ᐊᒻᒪᓗ ᐱᕙᓪᓕᐊᒍᑕᐅᒻᒥᑎᓪᓗᒍ ᓲᖑᓂᕐᓴᒥᒃ ᐃᒻᒥᓂᒃ-ᐱᐅᒋᓂᕐᒥᒃ, ᐃᒻᒥᓂᒃ-ᑕᑎᒋᓂᕐᒥᒃ, ᐊᒻᒪᓗ ᐃᒻᒥᓂᒃ-ᐅᖑᒪᓂᕐᒥᒃ.
“ᑎᒥᐅᔫᑦᓱᑕ ᐊᓕᐊᒋᔭᖃᕐᖁᒍᑦ ᒪᑭᑎᕆᓂᕐᒥᒃ ᑲᒪᒋᐅᑎᑦᓯᐊᓂᕐᒥᒃ ᐊᒻᒪᓗ ᐅᑎᕈᑎᓂᒃ ᓄᓇᓕᓐᓄᑦ. ᐊᑦᔨᒌᖕᖏᑐᑦ ᐃᓕᓐᓂᐊᕈᑎᕗᑦ ᐊᕐᖁᑕᐅᑎᓪᓗᒋᑦ ᐃᑲᔪᕈᓐᓇᓲᖑᕗᒍᑦ ᐃᓕᓐᓂᐊᑎᓂᒃ ᐱᕈᕐᐸᓕᐊᓂᖏᓐᓂ. ᐊᑐᕋᑦᓴᐅᑎᑦᓯᔪᒍᑦ ᓄᓇᓕᓐᓂ ᑖᓂᓯᕐᓂᒧᑦ ᐃᓕᓐᓂᐊᕈᑎᑦᑎᓂᒃ, ᓯᕗᓂᕐᒥ ᓯᕗᓕᕐᑎᓴᓕᐅᕈᑎᒥᒃ ᐃᓚᐅᑦᓯᐅᑎᓪᓗᒍ ᐃᓕᓐᓂᐊᕕᒻᒥ ᐃᓕᑦᓯᒍᑏᑦ ᑭᓯᑕᐅᒍᑎᖏᓐᓄᑦ, ᐊᒻᒪᓗ ᐃᓱᒻᒪᓭᒍᑎᒥᒃ ᐱᓂᐊᕈᑎᖃᕐᒥᓱᑕ ᐃᑲᔪᕐᑐᒥᒃ ᐃᓕᓐᓂᐊᑎᓂᒃ ᑐᑭᑖᕋᓱᐊᕐᓂᖏᓐᓂ ᓱᓇᓐᓂᐊᕈᒪᒻᒪᖔᕐᒥᒃ ᐃᓕᓐᓂᐊᕕᐅᑉ ᑭᖑᓂᖓᓂ.” ᐅᖃᕐᑐᖅ ᑯᐃᓂ ᓯᑯᐱᓐ, OLI-ᑯᑦ ᐃᓕᓐᓂᐊᕈᑎᓂᒃ ᑲᒪᔨᒻᒪᕆᖓ.
ᐃᓚᐅᓂᖅ ᑖᓂᓯᕐᓂᒧᑦ ᐃᓕᓐᓂᐊᕈᑎᒥ ᐱᑦᓯᐊᑐᓄᑦ ᐱᓪᓗᑯᒍᑕᐅᕗᖅ ᐊᒻᒪᓗ ᐅᖃᕐᓯᒪᑦᓯᐊᑐᓂᒃ ᓂᐳᕐᑎᒋᐊᓕᓐᓂᒃ ᐱᑕᖃᕐᖁᑦ ᐊᑐᕐᑐᓂᒃ ᐃᓕᓐᓂᐊᑎᓄᑦ ᐃᓚᐅᔪᓄᑦ. ᐃᓕᓐᓂᐊᑏᑦ ᐁᖃᑦᑕᕆᐊᓖᑦ ᐃᓕᓐᓂᐊᕕᒻᒧᑦ, ᒪᑭᑕᑦᓯᓯᐊᕐᓗᑎᓪᓗ ᐅᖃᕐᑕᐅᓯᒪᔪᒥᒃ ᐃᓕᑦᓯᕙᓪᓕᐊᓂᖓᑕ ᖃᑦᓯᕌᕐᓂᖓᓂᒃ, ᐱᐅᓯᖃᕐᓗᑎᓪᓗ ᐃᑦᔪᐊᕋᑦᓴᓯᐊᓂᒃ ᐃᓕᓐᓂᐊᖃᑎᒥᓄᑦ. ᐱᒋᐅᕐᓴᓂᕐᓄᑦ ᐁᖃᑦᑕᕆᐊᖃᕐᒥᔪᑦ, ᐊᓪᓕᕇᕐᑐᓂᒃ ᐱᒋᐊᕐᓱᒍ ᓂᕿᑦᓯᑐᓄᑦ ᑎᑭᑦᓱᒍ ᐅᓪᓗᑕᒫᑦ ᒪᕐᕈᕕᖃᑦᑕᓗᑎᒃ, ᐃᓕᓐᓂᐊᑎᑕᐅᓗᑎᒃ ᐱᔪᓐᓇᐅᑎᓕᒻᒧᑦ ᑖᓂᓯᕆᐅᑦᓴᑎᑦᓯᔨᒧᑦ OLI-ᑯᓂᒃ ᐱᓯᒪᔪᒧᑦ ᑖᓐᓇ ᐊᐅᓪᓚᖃᑦᑕᑎᓪᓗᒍ ᓄᓇᓕᓐᓄᑦ ᐃᓚᐅᖃᑕᐅᔪᓄᑦ.
ᕗᕌᓐᓯᔅ ᐋᒃᕈ, ᐊᔭᒍᑕᕐᒥ ᐊᖓᔪᕐᖄᖅ, ᑕᑯᑦᓴᐅᑎᒋᓚᐅᔪᔪᖅ ᓱᕙᓪᓕᕈᑎᓂᒃ ᐃᓕᓐᓂᐊᑎᓂ. “ᑕᒪᓐᓇ ᑲᑦᓱᙰᓕᑎᑦᓯᔪᖅ ᐊᓯᖏᓐᓂᒃ ᐱᐊᕋᕐᓂᒃ ᐃᓕᓐᓂᐊᕆᐊᕈᒪᑎᑦᓱᒋᑦ. ᐃᓕᓐᓂᐊᑏᑦ ᐃᓚᐅᔪᑦᓴᕈᕐᑎᑕᐅᔪᑦ ᐱᐅᓯᖃᕐᐸᑐᑦ ᓯᕗᓕᕐᓂᑯᑦ ᐆᑦᑑᑎᑦᓴᐅᓱᑎᒃ ᐃᓚᐅᓂᑯᒥᓄᑦ ᑕᒡᒐᓂ ᐃᓕᓐᓂᐊᕈᑎᒥ, ᑲᑦᓱᙰᓕᑎᑦᓯᔪᑦ ᐊᓯᒥᓂᒃ ᑕᑯᓂᐊᕈᒪᑎᑦᓱᒋᑦ ᓱᒻᒪᖔᑕ ᐃᓚᐅᒍᒪᓕᕐᑎᓱᒋᓪᓗ. ᐊᒻᒪᓗ ᑕᒪᑐᒧᖓ ᖁᕕᐊᒍᑎᖃᑐᐃᓐᓇᒥᒐᑕ ᐃᓕᓐᓂᐊᑎᓂᒃ, ᖁᕕᐊᒍᑎᖃᕋᑦᑕ ᓄᓇᓕᒻᒥᒃ, ᖁᕕᐊᒍᑎᑕᕋᑦᑕ ᑕᓯᐅᔭᒥᒃ.”
ᐃᓕᓐᓂᐊᑏᑦ ᓂᐳᕐᑎᓯᑐᐊᕐᒪᑕ ᓂᐳᕐᑎᒋᐊᓕᓐᓂᒃ ᐋᕐᕿᑕᐅᓯᒪᔪᓂᒃ, ᙯᖁᔭᐅᓲᑦ ᐃᓚᐅᖁᑦᓱᒋᑦ ᑲᓇᑕᓕᒫᒥ ᐊᕐᕌᒍᑕᒫᑦ ᑖᓂᓯᓕᐅᕐᑎᑎᑦᓯᓂᕐᒧᑦ ᑐᕌᓐᑐᒥ. ᐱᓇᓱᐊᕈᓰᒃ ᒪᕐᕉᒃ ᓈᑦᓱᒋᒃ, ᐃᓕᓐᓂᐊᑏᑦ ᒪᓕᑦᑎᖃᕐᓗᑎᒃ ᑲᒪᔨᒥᓂᒃ, ᑕᑯᑎᑕᐅᓚᐅᔪᔪᑦ ᑕᑯᓐᓇᐅᒐᕐᑎᓯᕕᐅᑉ-ᐅᖓᑖᓂ ᖃᐅᔨᒍᑎᓂᒃ ᖃᓄᐃᒻᒪᖔᑦ ᑖᓂᓯᕐᑎᓚᕆᐅᑦᓱᓂ. ᐃᓚᐅᖃᑦᑕᓚᐅᔪᔪᑦ ᑖᓂᓯᕐᓂᒥᒃ ᐃᓕᓐᓂᐊᕈᑎᓄᑦ, ᖃᐅᔨᖃᑦᑕᓱᑎᓪᓗ ᐊᓯᒥᓂᒃ ᓄᓇᖃᕐᖄᓯᒪᔪᓂᒃ ᐃᓕᓐᓂᐊᑎᓂᒃ ᓇᑭᑐᐃᓐᓇᖅ ᑳᓇᑕᒥ ᐱᓯᒪᔪᓂᒃ, ᐊᒻᒪᓗ ᐊᑐᐃᓐᓇᕈᑦᑎᕆᓚᐅᔪᑦᓱᑎᒃ ᑕᑯᓐᓇᑎᑦᓯᒍᑎᒥᒃ ᐱᒋᐊᕐᓂᖓᓂᒃ ᐃᓱᐊᓄᑦ ᑎᑭᑎᑦᓯᐊᓱᒍ, ᐃᓚᖃᕐᑎᓗᒍ ᓄᑖᓂᒃ ᑖᓂᓯᕈᓯᕐᓂᒃ, ᓄᔭᓕᕆᐅᓯᕐᓂᒃ, ᐱᐅᓴᐅᑎᓂᒃ, ᑕᑯᓐᓇᐅᒐᕐᑎᓯᕕᐅᑉ ᐃᑯᒪᖏᓐᓂᒃ, ᐊᓯᒋᐊᓪᓚᖏᓐᓂᓗ ᐊᒥᓱᐊᓗᓐᓂᒃ!
ᐱᔪᕆᐅᑎᖃᓪᓗᑐᑦᓯᐊᐳᒍᑦ ᐃᓕᓐᓂᐊᑎᑦᑎᓂᒃ ᐊᔭᒍᑕᖅ ᐃᓕᓐᓂᐊᕕᒻᒥ ᐱᕕᖃᕐᓂᒥᓂᒃ ᐊᒻᒪᓗ ᕿᑦᑌᖓᓂᕐᒥᓂᒃ ᑐᕌᖓᑎᑦᓯᓚᐅᔪᔪᓂᒃ ᐃᓚᐅᓂᕐᒧᑦ ᑕᒪᑐᒧᖓ ᐱᒋᐊᕐᑎᑕᐅᔪᒧᑦ! ᑐᑭᓯᒋᐊᓪᓚᕈᒪᒍᑦᓯ ᑕᒪᑐᒪ ᒥᑦᓵᓄᑦ, ᐳᓛᕐᓗᒍ Outside Looking In ᒪᐱᕕᖓᓂ Facebook-ᒥ.
