ᐱᓇᓱᑦᑎᖁᑎᕗᑦ ᓄᐃᑦᓯᑎᒐᓱᐊᕐᓱᒋᑦ ᐱᓇᓱᐊᕋᑦᓴᓂᒃ, ᐱᓇᓱᐊᕐᓯᒪᒥᓂᒃ ᐊᓂᒎᑎᓯᒪᔪᓂᒃ ᐊᒻᒪᓗ ᐱᔪᒪᓂᕐᒥᓂᒃ, ᑕᒻᒪᓯᒪᔪᕐᓂᐅᑏᑦ ᓄᑖᓂᒃ ᐅᓂᒃᑲᐅᓯᓂᒃ ᐋᕐᕿᓯᒪᒍᓯᓕᐅᓲᑦ: ᓀᑦᑐᓂᒃ ᐊᓪᓚᓯᒪᔪᓂᒃ ᑐᕌᖓᔪᓂᒃ ᐃᓕᓐᓂᐊᑎᑦᓯᔨᐅᓂᐅᑉ ᒥᑦᓵᓅᓕᖓᔪᒥᒃ, ᐱᓇᓱᕝᕕᒥ ᐅᕝᕙᓘᓐᓃᑦ ᓇᓃᓐᓂᖓ ᐱᑦᔪᑎᒋᑦᓱᒍ ᐊᑐᐊᕐᓯᔪᐃᑦ ᑐᑭᓯᓕᐅᒥᖁᓪᓗᒋᑦ ᐃᓗᓕᒋᔭᖏᓐᓂᒃ.
ᑖᓐᓇ ᐊᓪᓚᓯᒪᔪᖅ ᑐᑭᓯᓇᕐᑎᓯᔪᖅ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ ᒥᑦᓵᓄᑦ!
ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ
ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ ᐃᓂᖓᑦ ᐅᕝᕙᓘᓐᓃᑦ ᑌᔭᐅᓲᖅ “ped counsellor” ᖃᐅᔨᒪᔪᓄᑦ, ᐱᓇᓱᒐᐅᕗᖅ ᐊᑦᔨᐅᖏᑦᑑᓱᓂ ᑯᐯᒃᒥ:
“ᑌᑦᓱᒪᓂ ᑯᐯᒃᒥ, ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ ᒥᓂᔅᑕᒃᑯᑦ ᑐᑭᒧᐊᕈᑎᖏᓐᓂᒃ ᑲᔪᓯᑎᑦᓯᒐᓱᐊᓲᖑᓯᒪᖕᖏᑐᑦ. ᑯᐯᒃᒥ, ᐃᓕᓐᓂᐊᑎᑦᓯᔩᑦ ᐃᒻᒥᓂᕿᒍᓐᓇᓱᑎᒃ ᐱᔪᓐᓇᐅᑎᓖᑦ ᐊᒻᒪᓗ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ ᐃᑲᔪᕐᓯᒐᓱᐊᓲᑦ ᐃᓕᓐᓂᐊᑎᑦᓯᔨᓂᒃ.”
ᔪᐊᓇ ᕋᐅ – ᐃᓄᑦ ᐃᑲᔪᕐᓯᒋᐊᕈᒪᑦᓱᓂ ᑐᑭᑖᕐᓯᒪᔪᖅ ᑐᑭᓯᑎᑦᓯᒋᐊᕈᒪᑦᓱᓂ – ᐱᓇᓱᕝᕕᖃᓯᓚᐅᕐᓯᒪᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᓂ ᐳᕐᑐᓂᕐᓴᒥ 4 ᐊᒻᒪᓗ 5-ᒥ ᐃᓕᓐᓂᐊᑎᑦᓯᔨᒋᔭᐅᑦᓱᓂ ᑰᑦᔪᐊᒥ ᐱᖓᓲᓕᕐᑐᐃᑦ ᐊᕐᕌᒍᐃᑦ. ᐃᓕᓐᓂᐊᑎᑦᓯᔨᐅᓚᐅᕋᓂ, ᓄᓇᑦᓯᐊᒦᓚᐅᕐᓯᒪᔪᖅ ᐱᓇᓱᐊᕐᓱᓂ, ᓄᓇᓕᐊᕈᒻᒥᒃ ᐊᑎᓕᒻᒥᒃ ᐸᐅᓚᑦᑐᒥ. ᒫᓐᓇ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᖃᐅᔨᒋᐊᕕᐅᓕᕐᑐᖅ ᖃᓪᓗᓈᑎᑑᕐᑐᓄᑦ ᐊᒻᒪᓗ ᐃᓅᑦᔪᓯᓕᕆᓂᕐᒥᒃ ᐳᕐᑐᓂᕐᓴᓃᑦᑐᓄᑦ ᐃᓕᓐᓂᐊᑎᓄᑦ ᓄᓇᕕᒻᒥ.
ᒫᓐᓇ, ᐅᑎᓚᐅᕐᒥᑕ: ᖃᓄᖅ ᐃᓕᓐᓂᐊᕈᑎᑦᓴᓕᐅᕐᓂᓄᑦ ᐃᓱᐊᕐᓭᔩᑦ ᐃᑲᔪᕐᓯᓲᑦ ᐃᓕᓐᓂᐊᑎᑦᓯᔨᓂᒃ? ᐱᒋᐊᖕᖓᐅᑎᒋᓗᒍ, ᔪᐊᓇᐅᑉ ᑕᑯᓐᓇᕈᓯᖓᑎᒍᑦ, ᐱᒻᒪᕆᐅᕗᖅ ᐃᓕᓐᓂᐊᑎᑦᓯᔩᑦ ᑕᑯᑦᓱᒋᑦ ᖃᕆᐊᑉ ᐃᓗᐊᓃᑎᓪᓗᒋᑦ ᑐᑭᓯᖁᓪᓗᑕ ᐃᓕᓐᓂᐊᑏᑦ ᖃᓄᐃᑦᑐᐃᑦ ᖃᕆᐊᒦᒻᒪᖔᑕ ᐊᒻᒪᓗ ᓱᓇᓂᒃ ᐊᓕᐊᒋᔭᖃᕐᒪᖔᑕ. ᑌᒫᑭᓯᐊᓂ ᐃᓕᓐᓂᐊᑎᑦᓯᔨᒥᒃ ᐱᓇᓱᐊᖃᑎᖃᕈᓐᓇᑐᑦ ᓱᓇᓂᒃ ᓲᖑᓂᖃᕐᒪᖔᑕ ᖃᐅᔨᖁᓪᓗᒋᑦ.
ᐃᓕᓐᓂᐊᑎᑦᓯᔨᓕᒫᑦ ᐃᒻᒥᒎᕐᑎᑐᓂᒃ ᐊᑦᔨᐅᖏᑦᑐᓂᒃ ᐱᔪᓐᓇᐅᑎᓖᑦ, ᐊᑐᕈᓯᓖᑦ, ᐱᓇᓱᐊᕐᓯᒪᓂᓖᑦ ᐊᒻᒪᓗ ᐱᔪᓐᓇᐅᑎᖃᕐᓂᑯᑦ ᐃᓱᒪᑦᓴᓯᐅᕈᓐᓇᓱᑎᒃ ᐊᑐᓕᕐᑎᒍᒪᔭᒥᓂᒃ. ᐱᓇᓱᒐᕋ ᐃᓕᓐᓂᐊᑎᑦᓯᔨᓂᒃ ᐃᑲᔪᕐᓯᒐᓱᐊᕐᓂᐅᓲᖅ ᐃᓕᑕᕐᓯᖁᓪᓗᒋᑦ ᐊᒻᒪᓗ ᐱᕙᓪᓕᐊᖁᓪᓗᒋᓪᓗ ᓲᖑᓂᕐᒥᓂᒃ ᐊᒻᒪᓗ ᒪᓂᔨᒐᓱᐊᕐᓂᐅᓱᓂ ᖃᓄᐃᓘᕈᑎᑦᓴᓂᒃ ᖃᓄᖅ ᓲᖑᓂᕐᒥᓂᒃ ᑐᑭᓯᒪᓕᒐᓱᐊᖁᓪᓗᒋᑦ ᑎᑭᐅᑎᕕᒋᒍᒪᔭᒥᓄᑦ ᑎᑭᐅᑎᖁᓪᓗᒋᑦ ᐊᒻᒪᓗ ᐱᕕᑦᓴᖃᑦᓯᐊᒍᓐᓇᓯᖁᓪᓗᒋᑦ ᐊᑐᕐᓂᖃᑦᓯᐊᑐᒥᒃ.
ᔪᐊᓇ ᕋᐅ, ᐃᓕᓐᓂᐊᕈᑎᑦᓴᓕᐅᕐᓂᓄᑦ ᖃᐅᔨᒋᐊᕐᕕᒃ ᖃᓪᓗᓈᑎᑐᑦ ᐊᒻᒪᓗ ᐃᓅᑦᔪᓯᓕᕆᓂᕐᒥᒃ ᐳᕐᑐᓂᕐᓴᓃᑦᑐᓄᑦ ᐃᓕᓐᓂᐊᑎᓄᑦ ᓄᓇᕕᒻᒥ.
ᐊᓯᐊᒍᑦ ᐅᖃᐅᓯᕐᑎᒍᑦ, ᑌᒪᖓᑲᓵᖅ ᐃᓕᓐᓂᐊᑎᑦᓯᔨᒥᒃ ᐅᑎᒧᐊᕆᐊᖃᑎᖃᕐᓂᐅᓲᖅ ᐱᕙᓪᓕᐊᓚᕆᓕᕐᑎᓗᒋᑦ ᐱᓇᓱᐊᕐᑕᒥᓂᒃ.
“ᐃᓕᓐᓂᐊᕕᒐᓂ, ᐳᕐᑐᓂᕐᓴᒥ ᐃᓕᓐᓂᐊᑎᑦᓯᔨᑑᕗᖓ ᖃᓪᓗᓈᑎᑐᑦ. ᑌᒣᒻᒪᑦ, ᐱᓇᓱᐊᖃᑎᑦᓴᖃᖕᖏᓚᖓ ᐅᖄᖃᑎᒋᔭᑦᓴᑲᓂᒃ ᓱᓇᑐᐃᓐᓀᑦ ᒥᑦᓵᓄᑦ”, ᐅᖄᔪᕕᓂᖅ ᑭᐊᕈᓓᓐ ᒍᐃᓪᓴᓐ, ᐳᕐᑐᓂᕐᓴᒥ ᖃᓪᓗᓈᑎᑐᑦ ᐃᓕᓐᓂᐊᑎᑦᓯᔨ ᐱᓇᓱᐊᖃᑎᖃᕋᑖᕐᖃᒥᐅᑦᓱᓂ ᔪᐊᓇᒥᒃ. “ᐅᖄᕕᖃᕈᓐᓇᓂᖅ ᐃᓄᒻᒥᒃ ᐅᖄᕕᖃᓲᒥᒃ ᖃᓪᓗᓈᑎᑐᑦ ᐃᓕᓐᓂᐊᑎᑦᓯᔨᐅᔪᓂᒃ, ᐃᓅᑦᔪᓯᓕᕆᓂᕐᒥᒃ ᐃᓕᓐᓂᐊᑎᑦᓯᔨᐅᒻᒥᔪᓂᒃ, ᐃᑲᔪᕐᓯᒪᓪᓚᕆᑦᑐᖅ ᐃᓕᓐᓂᐊᑎᑦᓯᔩᑦ ᐊᑦᔨᐸᓱᖏᓐᓂ ᐊᑑᑎᓯᒪᔭᖏᓐᓂᒃ ᐊᑑᑎᓲᖑᒐᒪ ᐊᒻᒪᓗ ᐅᓐᓂᑑᑎᓂᒃ ᑐᓂᔨᒍᓐᓇᓱᖓ ᐃᑲᔪᕐᓯᒪᓂᕃᓲᖑᑦᓱᑎᓪᓗ”.
ᑌᒪ ᐅᖃᕈᓐᓇᖁᒍᑦ, ᐃᓕᓐᓂᐊᕈᑎᑦᓴᓕᐅᕐᑎᓄᑦ ᐃᓱᐊᕐᓭᔩᑦ ᐃᓕᓐᓂᐊᑎᑦᓯᔨᓂᓪᓗ ᐃᓕᓐᓂᐊᑎᓂᓪᓗ ᖃᓂᑕᕇᓕᕐᑎᓯᑐᐃᓐᓇᖏᓪᓚᖅ, ᑭᓯᐊᓂᓕ ᖃᓂᑕᕇᓕᕐᑎᓯᑦᓱᓂ ᐃᓕᓐᓂᐊᑎᑦᓯᔨᐅᖃᑎᒌᑦᑐᓄᑦ ᐊᒻᒪᓗ ᐊᓯᖏᓐᓄᑦ ᐱᓇᓱᑦᑎᐅᔪᓄᑦ ᐃᓕᓴᕐᓂᓕᕆᓂᐅᑉ ᐃᓗᐊᓂ.
ᓱᓇᑐᐃᓐᓇᒨᓕᖓᔪᓂᒃ [ᐃᓕᓐᓂᐊᕈᑎᑦᓴᓕᐅᕐᑎᓄᑦ ᐃᓱᐊᕐᓭᔨ] ᐃᑲᔪᕐᓯᕈᓐᓇᓲᖅ. ᐆᑦᑑᑎᒋᓗᒍ ᐱᑐᑦᓯᒪᖃᑎᒌᑦᑎᓯᑦᓱᓂ ᐃᓕᓐᓂᐊᑎᑦᓯᔨᐅᖃᑎᒌᑦᑐᓂᒃ, ᐱᕕᑦᓴᖃᕐᑎᓯᑦᓱᓂ ᐃᑲᔪᕐᓯᐅᑎᑦᓴᕆᐊᓪᓚᓂᒃ, ᑐᑭᓯᓇᕐᑎᓯᑦᓱᓂ ᐱᒻᒪᕆᐊᓗᓐᓂᒃ, ᖃᓄᐃᓘᕆᐊᕈᑎᓂᒃ ᐃᑲᔪᕐᓯᓯᒪᒻᒥᔪᓂᒃ ᐊᓯᖏᓐᓄᑦ ᐊᑐᓪᓚᕆᑦᓯᒪᔪᓂᒃ… ᐃᓱᐊᕐᑐᓚᕆᒃ ᐃᓄᒻᒧᑦ ᓴᖑᒍᓐᓇᕕᖃᕋᑦᑕ ᐊᐱᕐᓲᑎᑦᓴᖃᓕᑐᐊᕋᑦᑕ ᓱᓇᑐᐃᓐᓇᐅᑉ ᒥᑦᓵᓄᑦ.
ᑲᑎᕕᒃ ᐃᓕᓴᕐᓂᓕᕆᓂᒃᑯᓂ, ᐃᓕᓐᓂᐊᕈᑎᑦᓴᓕᐅᕐᑎᓄᑦ ᐃᓱᐊᕐᓭᔨ, ᔪᐊᓇᑎᑐᑦ, ᓄᓇᓕᓐᓄᑦ ᐊᕐᕕᑕᓲᑦ ᐊᑕᐅᓯᕕᑦᓱᑎᒃ ᐊᕐᕌᒎᑉ ᐃᓗᐊᓂ ᐱᓇᓱᐊᖃᑎᖃᕐᓱᑎᒃ ᐃᓕᓐᓂᐊᕕᓐᓂ. ᑲᑐᑦᔨᖃᑎᖃᓲᖑᒻᒥᔪᖅ ᐊᓯᖏᓐᓂᒃ ᐃᓕᓐᓂᐊᕈᑎᑦᓴᓕᐅᕐᑎᓄᑦ ᐃᓱᐊᕐᓭᔨᐅᒻᒥᔪᓂᒃ ᐃᓕᓐᓂᐊᕈᑎᑦᓴᓕᐅᕐᓱᑎᒃ.
ᐃᓚᖓᓂ ᑲᑎᓯᓲᖑᒻᒥᔪᖅ ᐱᓇᓱᑦᑎᐅᖃᑎᒥᓂᒃ ᐃᓄᑦᑎᑑᕐᑐᓂᒃ ᐊᒻᒪᓗ ᒍᐃᒍᐃᑎᑑᕐᑐᓂᒃ ᐃᓕᓐᓂᐊᑎᑦᓯᔨᓂᒃ ᐅᖄᕈᑎᖃᖃᑎᒌᑦᓱᑎᒃ ᓱᓀᑦ ᐱᑦᔪᑏᑦ ᐱᐅᔫᒻᒪᖔᑕ ᐃᓚᐅᑎᓪᓗᒋᑦ ᐅᖃᐅᓯᐅᑉ ᐱᖁᔭᖓᑦ, ᑕᒪᓐᓇᓗ ᐋᕐᖀᓯᒪᓪᓚᕆᓲᖅ ᐃᓕᓐᓂᐊᕕᓐᓂ ᐱᓇᓱᑦᑏᑦ ᖃᓄᖅ ᐊᐅᓚᑦᓯᓂᖃᓛᕐᒪᖔᑕ ᓯᕗᓂᕐᒥ.
ᑖᑦᓱᒪ ᐱᑦᔪᑎᐅᑉ ᒥᑦᓵᓅᓕᖓᔪᓂᒃ ᓄᐃᑦᓯᓗᐊᕐᑌᓕᑕ. ᐊᓯᐊᓄᑦ ᐊᓪᓚᓯᒪᔪᒨᓚᐅᕐᓚᕗᑦ ᐱᑦᔪᑎᐅᑉ ᒥᑦᓵᓅᓕᖓᔪᖅ, ᐊᑌ?