ᐊᑐᐃᓐᓇᕈᕐᑎᐸᓪᓕᐊᓕᕐᓱᑕ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒧᑦ, ᐃᑦᓯᕙᖃᑕᐅᒋᑦ ᐅᕙᑦᑎᓄᑦ ᐃᓚᖏᓪᓗ ᐃᓕᓐᓂᐊᑎᑦᓯᔨᐅᓚᐅᔪᑦ ᐊᕐᕌᓂ ᐃᓕᓐᓂᐊᑕᐅᔪᓂ. ᔪᓓ 2018-ᒥ, ᐊᐱᕆᓚᐅᔪᔪᒍᑦ ᕉᑕ ᐃᔨᑭᐅᓪᒥᒃ, ᕕᓂ ᐹᕋᓐᒥᒃ, ᓕᓯ ᑑᒪᓯᒥᒃ, ᖂᑉᐱᐊ ᑫᑦᑕᖅ ᐊᒻᒪᓗ ᑳᓓ ᐃᓄᑉᐸᖅ. ᐅᕙᑦᑎᓂᒃ ᐅᖃᐅᑦᔩᓚᐅᔪᑦ ᓱᓇᓂᒃ ᐃᓕᓐᓂᐊᑎᑦᓯᒍᑎᖃᓛᕐᓂᒥᓂᒃ, ᐊᒻᒪᓗ ᐅᖄᕐᓱᑎᒃ ᐃᓱᒪᒋᔭᒥᓂᒃ ᖃᓄᖅ ᐱᒻᒪᕆᐅᓂᕕᓂᖏᓐᓂᒃ ᐃᓄᐃᑦ ᐃᓕᓐᓂᐊᑎᑦᓯᔨᐅᖃᑎᒌᑦ ᐊᕐᕌᒍᓂ ᐊᓂᒍᕐᑐᓂ. ᐅᓪᓗᒥ ᑲᑎᓯᓚᖓᕗᒍᑦ ᑰᕐᐱᐊ ᑫᑦᑕᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐅᖄᕕᒋᒐᓛᐱᓚᐅᕐᑎᒍᑦ ᐃᕝᕕᑦ ᒥᑦᓵᓄᑦ…
ᖂᑉᐱᐊ ᑫᑦᑕᖅ: ᖂᑉᐱᐊ ᑫᑦᑕᐅᕗᖓ ᓴᓪᓗᒥᐅᖑᑦᓱᖓ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᓱᓇᒦᒃ ᐱᓇᓱᑦᑎᐅᕕᑦ ᐃᓕᓴᕐᓂᓕᕆᓂᕐᒥ?
ᖂᑉᐱᐊ ᑫᑦᑕᖅ: ᐃᓕᓴᕐᓂᓕᕆᓂᕐᒦᓕᕐᖁᖓ 19-ᓂ ᐊᕐᕌᒍᓂ. ᐃᕐᓂᕋ ᐅᑭᐅᑭᓐᓂᓴᖅ ᐱᓇᓱᐊᕐᓂᕆᓕᕐᑕᑲᓂ ᐃᓕᓐᓂᐊᓂᓕᕆᓂᕐᒥ! ᐊᓕᐊᒋᔭᖃᕐᑐᖓ ᐱᓇᓱᒋᐊᒥᒃ ᐱᐊᕋᕐᓂᒃ ᐊᒻᒪᓗ ᐃᓕᓐᓂᐊᑎᑦᓯᓯᒪᑦᓱᖓ ᐳᕐᑐᓂᓕᓐᓂᒃ 1-ᒥᑦ 4-ᒧᑦ. ᐱᓇᓱᐊᕐᓯᒪᒻᒥᓱᖓ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᓂᖏᓐᓄᑦ ᐃᓱᐊᕐᑌᔨᐅᑦᓱᖓ ᐊᑯᓂᒐᓚᒃ. ᕕᕈᐊᕆ 2018-ᒥ, ᐱᓇᓱᒐᕐᑖᓯᒪᔪᖓ ᐃᓕᓐᓂᐊᑎᑦᓯᔩᑦ ᐊᖓᔪᕐᖄᖏᑦᑕ ᑐᖓᓕᖓᓄᑦ, ᓴᓪᓗᓂ. ᐱᓇᓱᒐᖅ ᐊᓕᐊᒋᓪᓚᕆᑦᑕᕋ !

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᐅᐱᕐᖔᑯᑦ ᐃᓕᓐᓂᐊᑎᑕᐅᒍᑎᖓᓂ, ᐃᓕᓐᓂᐊᑎᑦᓯᖃᑕᐅᓛᕋᕕᑦ ᐃᓕᓐᓂᐊᒐᕐᒥᒃ EDEE 325 ᐱᐊᕃᑦ ᐊᓪᓚᓯᒪᔪᖁᑎᖏᓐᓂᒃ, ᓗᐃᓴ ᑑᒪᓯᓗ ᒪᑭᐅᓪ ᐃᓕᓐᓂᐊᕕᕐᔪᐊᖓᓂ ᖃᐅᔨᒋᐊᕐᕕᖓᓗ. ᓱᓇᒨᓕᖓᕚ ᑖᓐᓇ ᐃᓕᓐᓂᐊᒐᖅ?
ᖂᑉᐱᐊ ᑫᑦᑕᖅ: ᕿᒥᕐᕈᓛᕐᑐᒍᑦ ᐱᐊᕃᑦ ᕿᒥᕐᕈᐊᖏᓐᓂᒃ ᑐᑭᓯᓴᕐᓗᑕ ᖃᓄᖅ ᐅᓂᒃᑳᑐᐊᑦ ᓴᓇᔭᐅᓲᖑᒻᒪᖔᑕ, ᐃᓕᓐᓂᐊᑎᑦᓯᔩᑦ ᐱᓇᓱᐊᕋᑦᓴᓕᐅᖃᑦᑕᓂᐊᕐᒪᑕ ᐃᓕᓐᓂᐊᑎᒥᓄᑦ. ᑲᔅᑖᕝ ᕗᔩᑖᒃ ᐃᑦᔭᕋᑦᓴᓕᐊᕕᓂᖓᓂᒃ ᐊᑐᕐᓗᑕ, ᑕᓪᓕᒪᐅᓕᖓᑦᓱᑎᒃ ᖁᓕᐊᕇᓂᒃ, ᕿᒥᕐᕈᓗᑕ ᐅᓂᒃᑳᑐᐊᓂᒃ ᐊᒻᒪᓗ ᓇᓗᓀᕐᓗᒋᑦ ᓱᓇᓂᒃ ᐅᖄᓂᖏᑦ ᐅᕝᕙᓘᓐᓃᑦ ᑐᑭᖏᓐᓂᒃ ᐃᓕᓐᓂᐊᑎᑦᓯᔩᑦ ᐊᑐᕈᓐᓇᑕᖏᓐᓂᒃ ᑐᖕᖓᕕᒋᓗᒋᑦ ᐃᓕᓐᓂᐊᓂᕐᒧᑦ ᐱᓇᓱᐊᕐᑎᓯᒍᑎᒋᓗᒋᑦ. ᐃᓄᑦᑎᑐᕐᑐᑦ ᕿᒥᕐᕈᐊᑦ ᐊᑐᓲᕗᑦ ᐊᕕᑦᑐᓯᒪᔪᓃᖕᖏᑐᑦ ᐊᑐᕐᑕᐅᖁᔭᐅᔪᓂ ᐊᓪᓕᓂᐊᕈᓐᓇᑐᓄᑦ ᐅᕝᕙᓘᓐᓃᑦ ᐳᕐᑐᓂᖏᓐᓄᑦ. ᐃᓕᓐᓂᐊᑎᓪᓗᒋᑦ, ᒪᓂᔨᓯᒪᔪᒍᑦ ᐋᕐᕿᓱᕐᓯᒪᔪᓂᒃ ᐱᓇᓱᐊᕐᑕᐅᒋᐊᓕᓐᓂᒃ ᐃᓕᓐᓂᐊᑎᑦᓯᔩᑦ ᐊᑐᕈᓐᓇᑕᖏᓐᓂᒃ ᓇᓗᓀᕐᓯᓗᑎᒃ ᐱᐅᔫᓂᕐᐹᓂᒃ ᐊᓪᓚᓂᐊᒐᕐᓂᒃ ᐃᓕᓐᓂᐊᑎᒥᓄᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᓱᓇᓃᒃ ᐃᓕᓐᓂᐊᑎᑦᓯᔨᓂᒃ ᐱᑖᖁᔨᕕᑦ ᑕᒃᑲᖓᑦ ᐃᓕᓐᓂᐊᒐᕐᒥᑦ?
ᖂᑉᐱᐊ ᑫᑦᑕᖅ: ᐱᒍᓐᓇᓂᕐᒥᓂᒃ ᐃᑉᐱᒍᓱᖁᔭᒃᑲ ᐃᓕᑦᓯᒪᓂᕐᒥᒃ ᐱᔭᒥᓂᒃ ᐱᓇᓱᐊᕈᓰᓐᓂ ᒪᕐᕉᓂ. ᐅᓂᒃᖄᑐᐊᑦ ᐊᓕᐊᓇᕐᑐᒪᑕ ᐊᒻᒪᓗ ᐱᒍᓐᓇᓂᖃᕐᓱᑎᒃ ᐃᓕᓐᓂᐊᑎᑦᓯᒍᑎᐅᓗᑎᒃ. ᐃᓕᓐᓂᐊᑎᑦᓯᔨᓂᒃ ᐊᓕᐊᓱᖁᔨᔪᖓ ᐃᓕᑦᑕᒥᓂᒃ, ᐃᓱᐊᕐᓴᓗᑎᒃ ᐆᑦᑐᕋᕐᓂᒥᒃ ᓄᑖᓂᒃ ᐃᓕᓐᓂᐊᕕᒻᒥ

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᖃᓅᖅ ᐃᓚᐅᓯᓐᓂᕿᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑦᓯᓂᕐᒥᒃ ᐃᓕᓐᓂᐊᑎᑦᓯᓂᖓᓄᑦ?
ᖂᑉᐱᐊ ᑫᑦᑕᖅ: ᐃᓕᓐᓂᐊᑎᑦᓯᔨᐅᑦᓱᖓ, ᐱᕙᓪᓕᔭᐅᓂᖃᓪᓚᕆᑦᓯᒪᔪᖓ ᐃᓕᓐᓂᐊᑎᑦᓯᒍᑎᖏᓐᓄᑦ ᐃᓕᓐᓂᐊᓱᖓ ᓇᓗᓀᕐᑕᐅᒍᑎᑖᕆᐊᖃᕐᓯᒪᒐᒪ ᐃᓕᓐᓂᐊᑎᑦᓯᔨᐅᓂᕐᒧᑦ, ᐱᑖᕆᓚᐅᕐᓯᒪᔭᕋ 2003-ᒥ, ᓇᓗᓀᕐᑕᐅᒍᑎᑖᕐᓱᖓᓗ ᐃᓕᓐᓂᐊᓂᓕᕆᓂᕐᒥᒃ ᒪᑭᐅᓪ ᐃᓕᓐᓂᐊᕕᕐᔪᐊᖓᓂ. ᐃᓚᐅᓲᖑᒻᒥᔪᖓ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐃᓕᓐᓂᐊᑎᑦᓯᔨᐅᑦᓱᖓ. ᒫᓐᓇᒧᑦ, ᐃᓕᓐᓂᐊᑎᑦᓯᓯᒪᔪᖓ ᐱᖓᓱᓂ ᐃᓕᓐᓂᐊᑎᑦᓯᒍᑎᓂ. ᑕᒃᑲᓂ ᐃᓕᓐᓂᐊᓇᕐᒥ, ᐃᓕᓐᓂᐊᑎᑦᓯᒍᒪᖔᕐᓯᒪᔪᖓ ᐃᓚᐅᖕᖏᖔᕐᓗᖓ ᐃᓕᓐᓂᐊᑐᓄᑦ. ᐱᒍᒪᓯᒪᔪᖓ ᓯᕗᓕᕐᑎᐅᓂᕐᒧᑦ ᐃᓕᓐᓂᐊᓂᕐᒥᒃ, ᑭᓯᐊᓂ ᐊᓕᐊᒋᔭᖃᓪᓚᕆᑦᑐᖓ ᐱᐊᕃᑦ ᕿᒥᕐᕈᐊᖏᓐᓂᒃ. ᑲᐅᔨᒋᐊᕐᕕᒋᓯᒪᔭᒃᑲ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐱᓇᓱᖃᑎᒌᑦ ᑕᑯᑦᓱᖓ ᕿᓂᕐᓂᖏᓐᓂᒃ ᐃᓕᓐᓂᐊᑎᑦᓯᔨᑦᓴᓂᒃ ᐱᐊᕃᑦ ᐊᓪᓚᓂᐊᒐᖏᓐᓄᑦ ᐃᓕᓐᓂᐊᓂᕐᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᓇᓪᓕᑳᕐᓯᒪᔪᑎᑦ ᐃᓕᓐᓂᐊᑎᑦᓯᒋᐊᒥᒃ ᐱᔭᕇᒐᓱᐊᖕᖏᖔᕐᓱᑎᑦ ᐃᓕᓐᓂᐊᕕᕐᔪᐊᒥ ᐊᓪᓕᖓᓂᒃ ᐃᓕᓐᓂᐊᓂᕐᒨᓕᖓᔪᓂᒃ ᐃᓕᓐᓂᐊᓂᕐᒧᑦ?
ᖂᑉᐱᐊ ᑫᑦᑕᖅ: ᐊᐊ! ᐱᐊᕃᑦ ᐅᓂᒃᑲᐅᓯᖏᑦ ᐊᒻᒪᓗ ᐱᐊᕃᑦ ᕿᒥᕐᕈᐊᖏᑦ ᐊᓕᐊᒋᓪᓚᕆᑦᑕᑲ, ᒻᒪᓗ ᑭᖑᕙᕈᒪᓚᐅᔪᖕᖏᑕᕋ ᑖᑦᓱᒥᖓ ᐊᓕᐊᓇᕐᑐᒥᒃ ᐃᓗᓕᓕᒻᒥᒃ ᐃᓕᓐᓂᐊᑎᑦᓯᒋᐊᒥᒃ. ᐃᓕᓐᓂᐊᑎᑦᓯᓂᖅ ᐃᓕᑦᓯᒪᔭᑎᓐᓂᒃ ᐃᓕᓐᓂᐊᑎᑦᓯᓂᐅᕗᖅ, ᐃᓕᓐᓂᒃ ᐱᕈᕐᑎᓯᓂᐅᒻᒥᔪᖅ ᐃᓅᓂᕐᓂᒃ. ᐃᓕᑦᓯᒪᔭᒃᑲ ᑐᖕᖓᕕᖃᑦᓯᐊᑐᑦ ᐊᓕᐊᓱᓐᓂᕋᓂᒃ ᐃᓕᓐᓂᐊᓂᓕᕆᓂᕐᒥᒃ ᑌᒣᒻᒪᑦ ᑖᓐᓇ ᐱᑦᔪᑎᒋᑦᓱᒍ ᐃᓕᓐᓂᐊᑎᑦᓯᔨᐅᒍᒪᓚᐅᕐᑐᖓ ᑕᒃᑲᓂ ᐅᐱᕐᖔᒥ. ᐱᒻᒪᕆᐅᔪᕆᒻᒥᒐᒃᑯ ᐊᓕᐊᒋᔭᑦᑎᓂᒃ ᐱᒍᓐᓇᓯᐊᕐᓂᑎᓐᓂᒃ ᐃᓕᓐᓂᐊᑎᑦᓯᔨᐅᓂᕐᒧᑦ ᐱᕙᓪᓕᐊᑎᑦᓯᒋᐊᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᓱᓇᐅᕚ ᐊᓕᐊᒋᓂᕐᐹᕆᓯᒪᔦᑦ ᐃᓕᓐᓂᐊᑎᑦᓯᓱᑎᑦ ᐅᐱᕐᖔᖑᓚᐅᕐᑐᒥ?
ᖂᑉᐱᐊ ᑫᑦᑕᖅ: ᐊᓕᐊᒋᔭᖃᕐᑐᖓ ᐃᓕᓐᓂᐊᑎᑦᓯᒍᑎᕗᓐᓂᒃ ᐃᓕᖃᑎᒌᒋᐊᒥᒃ. ᐃᓕᓐᓂᐊᕕᒃ ᐊᑦᑕᓇᖕᖏᑑᓕᑐᐊᕐᒪᑦ ᐊᒻᒪᓗ ᐃᓕᓐᓂᐊᑏᑦ ᐅᑉᐱᕈᓲᑎᑦᓯᐊᓕᑐᐊᕐᒪᑕ, ᑕᐃᒪ ᐃᓕᑦᓯᖃᑎᒌᒍᓐᓇᓯᓲᖑᔪᒍᑦ. ᐊᓕᐊᒋᔭᖃᕐᑐᖓ ᐃᓘᓐᓇᑎᒃ ᐃᓱᕐᕆᐅᑎᓕᑐᐊᕐᒪᑕ ᐅᖄᖃᑎᒌᒋᐊᒥᒃ, ᐅᖃᐅᑎᔭᐅᒋᐊᕈᓐᓇᓱᑎᒃ, ᐱᓇᓱᐊᕈᑎᒥᓂᒃ ᐃᓱᒪᒋᔭᖃᑦᓯᐊᓯᑐᐊᕐᒪᑕ ᐊᒻᒪᓗ ᐋᕐᕿᒋᐊᕆᑦᓱᑎᒃ. ᐃᓅᓯ ᑌᒣᑦᑑᒪᑦ, ᑲᔪᓯᔪᒥᒃ ᐃᓕᓐᓂᐊᓂᐅᑦᓱᓂ!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᐃᓕᓐᓂᐊᑎᑦᓯᔨᐅᑦᓱᑏᑦ ᓱᓇᓂᒃ ᐊᑐᐃᓐᓇᕈᕐᑎᒋᐊᖃᕐᓯᒪᕕᑦ ᐃᓕᓐᓂᐊᑎᑦᓯᒋᐊᖕᖓᓚᐅᕐᓇᒃ?
ᖂᑉᐱᐊ ᑫᑦᑕᖅ: ᐊᑐᐃᓐᓇᕈᕐᑎᓱᓂ ᐃᓕᓐᓂᐊᒐᕐᓂᒃ ᐃᓕᑦᑕᕕᓂᑎᓐᓂᒃ ᐃᓕᑦᓯᒋᐊᓪᓚᓇᕐᑐᖅ. ᐊᓪᓚᓯᒪᔪᓂᒃ ᖃᐅᔨᒪᔭᑎᓐᓂᒃ ᐱᒋᐊᓪᓚᓇᕐᑐᖅ ᐊᑐᓲᕆᖕᖏᑕᑎᓐᓂᒃ ᖃᐅᑕᒫᑦ ᐃᓕᓐᓂᐊᑎᑦᓯᓱᑎᑦ. ᐊᓕᐊᒋᔭᕋ ᐅᕙᓐᓂᒃ ᐃᓱᒪᓕᕐᑎᓯᓲᖑᒻᒪᑦ ᐃᓕᓐᓂᐊᑎᑦᓯᒍᑎᒃᑲᓂᒃ. ᐱᒻᒪᕆᐅᑦᓱᓂ ᑭᓯᐊᓂ ᐱᒍᓐᓇᓯᓲᕆᖕᖏᑕᒃᑲ ᐅᓪᓗ ᑕᒫᑦ ᐱᓇᓱᑦᓱᖓ. ᐱᓇᓱᐊᖃᑎᖃᕐᓂᖅ ᐃᓕᓐᓂᐊᑎᑦᓯᔨᓂᒃ ᐊᓯᖏᓐᓂ ᐊᒻᒪᓗ ᒪᑭᐅᓪᒥ ᖃᐅᔨᒋᐊᕐᕕᓂᒃ ᐊᓕᐊᓇᕐᑑᒥᔪᖅ ᐊᑑᑎᑦᓱᒍ. ᐊᑐᓂᑦ ᐱᓇᓱᐊᕈᓯᖃᕐᑐᒍᑦ ᐊᒻᒪᓗ ᑕᑯᓐᓇᓂᖃᕐᓱᑕ; ᐱᓇᓱᒍᑎᒋᒍᓐᓇᑕᕗᓐᓂᒃ ᖃᐅᔨᓴᕆᐊᒥᒃ ᐊᖏᖃᑎᒌᓪᓗᑕ ᐊᓕᐊᒋᔭᕋ ᐊᑑᑎᒋᐊᖓ. ᐅᖃᐅᑦᔩᒋᐊᕋᔭᕐᑐᖓ ᐃᓕᓐᓂᐊᑎᑦᓯᔨᓕᒫᓂᒃ ᖃᐅᔨᒋᐊᕐᕕᖃᖃᑦᑕᖁᓗᒋᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓂᒃ ᐱᓇᓱᖃᑎᒌᓂᒃ ᑕᑯᑐᐊᕈᑎᒃ ᐃᓕᓐᓂᐊᑎᑦᓯᒍᑎᒋᒍᒪᔭᒥᓂᒃ. ᑲᔪᓯᖃᑦᑕᖁᔭᒃᑲ, ᐱᑖᕆᐊᓪᓚᓇᕐᑑᒪᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᐃᓚᐅᖃᑦᑕᓯᒪᑦᓱᑏᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓂ ᐃᓕᓐᓂᐊᑎᑦᓯᒍᑎᓂᒃ ᐊᕐᕌᒍᓂ ᐊᒥᓱᓂ, ᓱᓇᓅᑦ ᐱᕙᓪᓕᔭᐅᓂᕐᐸᐅᓯᒪᕕᑦ?
ᖂᑉᐱᐊ ᑫᑦᑕᖅ: ᐊᒥᓱᓂᒃ ᐅᖄᒍᓐᓇᑐᖓ, ᑕᒪᖏᓐᓂᒃ ᐃᒻᒥᓄᑦ ᐊᒻᒪᓗ ᐱᓇᓱᒐᕋᓅᓕᖓᔪᓂᒃ, ᐃᓱᒪᒋᔭᕋ ᐃᓕᓐᓂᐊᒉᑦ, ᐃᓄᐃᑦ ᑭᓇᐅᓂᖏᑦ ᐊᒻᒪᓗ ᐅᕕᒃᑲᕈᕐᐸᓕᐊᔪᑦ ᐊᒻᒪᓗ ᐃᓕᓐᓂᐊᓂᓕᕆᓂᖅ, ᐱᒻᒪᕆᒻᒥᒃ ᐊᑦᑐᐃᓂᖃᕐᓯᒪᔪᖅ ᐅᕙᓐᓂᒃ ᐃᓕᓐᓂᐊᓱᒋᑦ. ᓈᒻᒪᓈᑦᓯᐊᓯᒪᔪᖅ ᐃᓅᓯᕋᓂ. ᐃᑲᔪᕐᓯᓯᒪᔪᑦ ᐃᒻᒥᓂᒃ ᐱᒍᓐᓇᓂᕋᓂᒃ, ᖃᐅᔨᑎᑦᓯᓱᑎᒃ ᑭᓇᐅᓂᕋᓂᒃ ᐊᒻᒪᓗ ᑌᑲᖕᖓᓂᑦ ᓯᕗᓂᕐᒧᑦ ᐃᖏᕐᕋᓯᒋᐊᕈᓐᓇᓯᒪᔪᖓ ᐃᓗᐃᑦᑑᓗᖓ ᐃᓅᓗᖓ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᐊᑕᑎᒍᓐᓇᓯᒪᕓᑦ ᐱᒍᒪᓃᑦ ᐃᓕᓐᓂᐊᑎᑦᓯᔨᐅᑦᓱᑎᑦ?
ᖂᑉᐱᐊ ᑫᑦᑕᖅ: ᐱᓇᓱᐊᓕᑐᐊᕋᒪ ᐃᓕᓐᓂᐊᓂᕐᒥᒃ, ᐃᑉᐱᒋᔭᖃᓲᖑᔪᖓ ᐃᓂᒋᒋᐊᓕᒐᓃᒋᐊᒥᒃ. ᑲᔪᓯᒍᒪᔪᖓ ᐃᓕᑦᓯᒪᓂᕐᒥᒃ ᐱᑖᕆᖃᑦᑕᑕᒃᑲᓂᒃ ᐱᓇᓱᖃᑎᒃᑲᓂᒃ, ᐊᐅᓪᓚᑲᑕᓐᓂᖅ ᐊᒻᒪᓗ ᐃᓕᑦᓯᓂᖅ ᐊᓯᒃᑲᓂᒃ. ᐃᓕᓐᓂᐊᓂᖅ ᐱᕙᓪᓕᐊᓂᐅᒻᒪᑦ ᓅᑦᑕᓱᓂ ᑕᐃᒪᖕᖓᑦ. ᐱᒋᔭᑐᐊᕆᖕᖏᓇᒃᑯ ᐃᓕᑦᑕᕋ. ᑖᓐᓇ ᐃᓕᑦᓯᔭᕋ ᐅᕙᒍᑎᒎᕐᒪᑦ ᐃᓕᓐᓂᐊᑎᓅᔭᕆᐊᖃᕐᓱᒍ, ᓄᓇᓕᒐᓄᑦ, ᑖᓐᓇ ᐃᓕᑦᓯᒪᓂᖅ ᐱᕈᕐᐸᓕᐊᑐᐃᓐᓇᓂᐊᕐᑎᓗᖑ ᐊᓯᖏᑎᒍᑦ ᐃᓄᑦᑎᒍᑦ. ᓯᕗᓕᕐᑎᐅᒐᒪ; ᐊᕐᖁᑎᒐᓂᒃ ᐃᒻᒥᓂᒃ ᓴᓇᕗᖓ. ᐊᓯᒃᑲ ᐊᕐᖁᑎᒃᑲᓂ ᐊᑐᕈᓐᓇᑐᑦ ᐅᕝᕙᓘᓐᓃᑦ ᐃᒻᒥᓂᒃ ᐊᕐᖁᓯᐅᕐᓗᑎᒃ. ᓂᕆᐅᒋᔭᕋ ᐱᒍᒪᓕᕐᑎᓯᓂᖅ ᐊᓯᒃᑲᓂᒃ ᐅᖓᓯᓐᓂᓴᒨᕐᓗᑎᒃ ᐊᒻᒪᓗ ᑐᕌᕈᒪᔭᒥᓅᕐᓗᑎᒃ. ᐊᓯᒃᑲ ᐅᕙᓐᓂᒃ ᑕᑯᓐᓇᑐᐊᕐᒪᑕ, ᐃᓱᒪᖁᔭᒃᑲ “ᐱᒍᓐᓇᑐᐊᕐᐸᑦ ᕈᓐᓇᕆᕗᖓ” ᐃᓅᖃᑎᒃᑲᓂᒃ ᓂᑯᕐᕋᖁᔨᕗᖓ ᓲᖑᔫᓗᑎᒃ ᐊᒻᒪᓗ ᐱᒍᒪᔭᒥᓂᒃ ᐱᒍᓐᓇᓯᓗᑎᒃ. ᑖᓐᓇᑕᒐ ᐅᕙᓐᓂᒃ ᐊᔪᐃᓐᓇᑎᑦᓯᔪᖅ!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ:  ᓱᓇᓃᒃ ᐅᖃᐅᑦᔩᒋᐊᕈᑎᖃᕋᔭᕐᕿᑦ ᑭᖑᕙᖑᓚᖓᔪᓄᑦ ᓄᓇᕕᒻᒥᐅᓄᑦ ᐃᓕᓐᓂᐊᑎᑦᓯᔨᐅᓂᕐᒥᒃ ᐱᓇᓱᒐᕐᑖᓚᖓᔪᓄᑦ ᐱᓇᓱᒐᕐᑖᕆᓗᒍ?
ᖂᑉᐱᐊ ᑫᑦᑕᖅ: ᐱᐅᔪᓪᓚᕆᓐᓂᒃ ᐱᓇᓱᓐᓂᒧᑦ ᖃᓄᐃᓕᖓᐅᑎᐅᔪᓂᒃ ᐱᑕᖃᕐᑐᒍᑦ, ᐊᑯᓂ ᐅᐱᕐᖔᒥ ᕿᑲᕐᓇᖃᕐᓱᑕ! ᐱᓇᓱᐊᓪᓚᕆᓲᖑᔪᒍᑦ, ᑭᓯᐊᓂ ᐱᐅᔫᓂᖃᓲᖅ: ᑕᑯᑦᓱᓂ ᐱᐊᕋᕐᓂᒃ ᐃᓕᑦᓯᔪᓂᒃ ᐊᒻᒪᓗ ᐱᕈᕐᐸᓕᐊᔪᓂᒃ ᑖᓐᓇ ᐱᐅᓂᕐᐹᖅ. ᓱᓇᓘᓐᓃᑦ ᐱᐅᓂᕐᓴᐅᔪᕆᖕᖏᑕᕋ !

Back to News