ᑲᑎᕕᒃ ᐃᓕᓴᕐᓂᓕᕆᓂᐅᑉ ᐃᓅᖃᑎᒌᓄᑦ ᐃᓚᐅᓂᕐᒧᑦ ᐃᓕᓭᒍᑎᒃ ᐊᓯᑦᔨᑐᐃᔪᖅ ᐃᓅᓯᕆᔭᐅᔪᓂᒃ, ᐊᑕᐅᓯᐊᕐᑕᓱᓂ ᐃᓕᓐᓂᐊᑎᓂᒃ
ᐅᐸᑲᓪᓚᓇᖕᖏᑐᓄᑦ ᓄᓇᓕᓐᓄᑦ ᓄᓇᕕᒻᒥ, ᓂᐱᑭᑦᑐᒥᒃ ᐊᓯᑦᔨᕙᓪᓕᐊᓂᕐᑕᓕᒃ-ᐃᑲᔪᕐᑐᖅ ᐃᓄᒻᒪᕆᓐᓂᒃ ᐃᓱᒪᑐᔫᓂᖏᓐᓂᒃ, ᐃᓱᒪᒍᓯᖏᓐᓂᒃ, ᐊᒻᒪᓗ ᑎᒥᒥᒍᑦ ᐊᑦᓱᕉᑎᒋᔭᖏᓐᓂᒃ ᐱᕈᐃᓂᒃᑯᑦ ᑲᑦᓱᙰᓐᓂᒥᒃ, ᐃᒻᒥᓂᕐᓱᕈᓐᓇᓂᕐᒥᒃ, ᐊᒻᒪᓗ ᐃᓚᒋᔭᐅᔪᕆᑦᓯᐊᓂᕐᒥᒃ. ᑕᒪᑦᓱᒪᐅᑉ ᐆᒻᒪᑎᑕᖓ ᓱᕙᓪᓕᐊᓂᐅᔫᑉ ᐃᓅᖃᑎᒌᓄᑦ ᐃᓚᐅᓂᕐᒧᖅ ᐃᓕᓭᒍᑎᖓ (SPP).
ᐊᕐᕌᒍᖓᓂ 2019, ᑲᑎᕕᒃ ᐃᓕᓴᕐᓂᓕᕆᓂᖅ ᐱᒋᐊᕐᑎᓯᔪᕕᓂᖅ ᐃᓅᖃᑎᒌᓄᑦ ᐃᓚᐅᓂᕐᒧᑦ ᐃᓕᓭᒍᑎᒥᑦ, ᐋᕐᕿᓱᕐᑕᐅᓯᒪᔪᖅ ᑯᐯᒃ ᑐᕐᖃᑕᕐᕕᖓᓄᑦ ᐃᓕᓐᓂᐊᓂᓕᕆᓂᕐᒥᒃ (MEQ) ᐃᓄᒻᒪᕆᐅᓕᕐᑐᓄᑦ ᐃᓕᓐᓂᐊᑎᓄᑦ ᐅᑭᐅᓕᓐᓄᑦ 16-ᒥ ᐱᒋᐊᕐᓱᒍ ᑕᑉᐸᐅᖓᓕᒫᖅ ᓵᖓᑦᓯᔪᓄᑦ ᓄᕐᖃᖓᐅᑎᑦᓴᓂᒃ ᐱᐅᓯᑐᖃᕐᑎᒍᑦ ᐃᓕᓴᕈᓐᓇᓂᕐᒥᒃ. ᐃᓕᓭᒍᑎᓂᒃ ᒪᓕᑦᑐᓂᒃ MEQ-ᑯᑦ ᒪᓕᒐᖏᓐᓂᒃ, ᐃᓕᓭᒍᑎ ᐋᕐᕿᓱᕐᑕᐅᓯᒪᔪᑦ ᐊᑦᔨᐅᖏᑦᑐᓂᒃ ᑭᖕᖒᒪᒋᔭᓕᓐᓄᑦ ᓄᓇᕕᒻᒥᐅᑦ ᐃᓄᖏᓐᓄᑦ, ᐅᐊᕈᑦᓯᓱᒋᑦ ᐊᑑᑎᓂᒃᑯᑦ ᐃᓕᓐᓂᐊᓃᑦ ᐃᓅᓯᕐᒧᓗ ᐱᒍᓐᓇᓂᐅᔪᓂᒃ ᐃᓕᓭᒍᑎᖃᕐᓱᑎᒃ ᑐᓴᐅᒪᖃᑎᒌᓐᓂᓕᕆᓂᕐᒥᒃ ᐊᒻᒪᓗ ᐃᓗᓯᓕᕆᓂᕐᒥᒃ ᑭᓯᑦᓯᒍᑎᓐᓂᐊᓂᕐᒧᑦ ᐊᒻᒪᓗ ᓄᓇᓕᒻᒥ ᐃᓚᐅᑎᑦᓯᓂᕐᒧᑦ. ᑐᕌᒐᖓ? ᐃᑲᔪᕐᓯᓂᖅ ᐃᓕᓐᓂᐊᑎᓂᒃ ᐃᒻᒥᓂᕐᓱᒍᓐᓇᓯᑎᑦᓯᓕᐅᒥᓂᕐᒥᒃ ᐊᒻᒪᓗ ᐃᓚᐅᖃᑕᐅᒍᓐᓇᓯᐊᕐᓂᒥᒃ ᓄᓇᓕᒋᔭᕐᒥᓄᑦ.
«ᐃᑎᕆᐊᕐᓂᒧᑐᐃᓐᓇᐅᖏᑦᑐᖅ, ᒫᓐᓇᓕ ᐃᓚᐅᓂᕐᒥᖔᖅ ᑐᑭᖃᓕᕐᑐᖅ – ᐃᓕᓴᕐᑐᖅ ᐃᓚᐅᖃᑕᐅᑦᓯᐊᕋᓱᐊᑐᐃᓐᓇᕈᓐᓀᑐᖅ ᐃᓅᖃᑎᒌᓄᑦ ᑭᓯᐊᓂ ᐱᓇᓱᐊᕐᓂᑯᑦ ᐊᓯᑦᔨᑐᐃᒍᓐᓇᓕᕐᑐᑦ. ᑐᑭᖓ ᐃᒻᒥᓂᕐᓱᓂᕐᒧᐊᖓᔪᖅ ᐃᓚᐅᖃᑕᐅᑦᓯᐊᓂᕐᒧᓗ ᓄᓇᕐᖃᑎᒋᔭᕐᒥᓄᑦ »
ᖃᒻᒥᑯᑦ ᐃᓱᒋᔭᐅᒋᐊᓪᓚᓯᒪᓂᕐᒥᒃ, ᑖᑦᓱᒪᐅᑉ ᐊᑯᓂᐅᓕᕐᑐᖅ ᐱᒋᐊᕐᑎᓯᒍᑎᐅᔪᕕᓂᖅ ᐊᓯᑦᔨᑐᕐᓯᒪᓕᕐᑐᖅ ᒫᓐᓇ ᑌᔭᐅᒍᓯᖃᓕᕐᑐᖅ ᐃᓅᖃᑎᒌᓄᑦ ᐃᓚᐅᓂᖅ ᐃᓕᓭᒍᑎ. ᑕᒪᓐᓇ ᓇᓗᓀᕐᓱᔪᖅ ᐊᑎᑐᐃᓐᓇᐅᖏᑦᑐᒥᒃ ᑭᓯᐊᓂ ᐃᑎᔪᒥᒃ ᐊᓯᑦᔨᓯᒪᓂᕐᒥᒃ ᐱᑦᔪᑎᒥᓄᑦ ᐊᒻᒪᓗ ᖃᓄᐃᓪᓗᐊᓂᕆᔭᖓᓄᑦ ᓇᓗᓀᕐᓯᑎᓪᓗᒋᑦ ᓴᖑᒋᐊᕐᓯᒪᓕᕐᓂᖓᓂᒃ ᐃᓕᓐᓂᐊᓂᓕᕆᓂᐅᑉ ᐃᓱᒪᒍᓯᖓᓂᒃ-ᑕᐅᕐᓰᓯᒪᑦᓱᑎᑦ ᐃᒻᒥᓂᕐᓱᒍᓐᓇᓂᕐᒥᒃ, ᐃᓚᐅᑦᓯᐊᓂᕐᒧᑦ ᓄᓇᕐᖃᑎᒋᔭᕐᒥᓄᑦ, ᐊᒻᒪᓗ ᐃᓕᕐᖁᓯᕐᒥᑕ ᑭᓇᐅᓂᕐᒥᓂᒃ ᐃᓗᓕᑕᕆᔭᖏᑦ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓂᒃ.
ᑫᓪᓗᑐᕐᑕᐅᒍᑎᖏᑦ ᓅᓯᒪᓕᕐᑐᖅ ᑎᒍᓯᒋᐊᕐᓯᒪᓂᕐᒧᑦ ᐃᒻᒥᓂᕿᒍᓐᓇᓂᕐᒧᑦ,, ᐸᕐᓇᓂᕐᒥᒃ ᐱᒍᓐᓇᓂᕐᒥᒍᑦ, ᐊᒻᒪᓗ ᑐᑭᖃᑦᓯᐊᑐᒥᒃ ᓄᓇᓕᒻᒧᑦ ᐃᓚᐅᒍᓐᓇᓯᓂᕐᒧᑦ. ᐊᑑᑎᖃᕙᓪᓗᓲᑦ ᐆᑦᑑᑎᒋᓗᒋᑦ ᑮᓇᐅᔭᓕᕆᓂᕐᒥᒃ ᖃᐅᔨᒪᒍᓐᓇᓂᖅ ᐊᑐᐊᕐᓯᓂᒃᑯᑦ, ᐃᓪᓗᖃᕐᓂᖅ, ᐃᓚᖃᕈᓐᓇᓂᖅ, ᖃᓄᐃᖕᖏᓯᐊᕐᓂᖅ, ᐊᒻᒪᓗ ᐊᑦᑕᓇᕐᑐᓂᒃ ᖃᐅᔨᒪᓕᐅᒥᓂᕐᒥᒃ ᓇᓗᓀᕐᑕᐅᓯᐊᕐᓯᒪᓂᕐᓴᐅᓕᕐᑐᑦ ᐃᓂᓪᓚᖓᑦᓯᐊᓂᕐᓴᐅᓱᑎᓪᓗ ᐊᑖᒎᕐᑎᓗᒋᑦ ᐋᕐᕿᒋᐊᕐᓯᒪᔪᓂᒃ ᐃᓕᓭᒍᑏᑦ ᓇᓗᓀᒃᑯᓯᕐᓯᒪᓂᖏᓐᓄᑦ. ᐃᓕᕐᖁᓯᕐᑎᒍᑦ ᑭᓇᐅᓃᑦ, ᓄᓇᕐᖃᑎᒋᔭᕐᒥᓂᒃ ᐃᓚᐅᓂᕐᒧᑦ, ᐊᒻᒪᓗ ᐃᑯᒪᐅᑎᒨᕐᑐᔭᓂᒃ ᖃᐅᔨᒪᒍᓐᓇᓯᓂᕐᒧᑦ ᐃᓚᐅᑎᑕᐅᓯᒪᓕᕐᑐᑦ ᐃᓕᓭᒍᑎᓄᑦ – ᓄᑭᓕᐹᓗᕈᕐᓇᑐᑦ ᐱᕙᓪᓕᐊᔭᐅᒍᑎᖏᑦ ᐅᑭᐅᕐᑕᑐᒥᐅᓄᑦ ᐋᕐᕿᓱᕐᓯᒪᑦᓱᑎᑦ.
« ᐃᓄᒻᒪᕇᑦ ᙯᓲᑦ ᐊᑦᔨᒌᖕᖏᑐᓂᒃ ᐊᑦᓱᕉᑎᖃᕐᓱᑎᑦ. ᐅᖃᓕᒪᖃᑎᒋᓲᒃᑲ, ᐊᓕᐊᒋᔭᖃᕐᓯᑎᐅᓲᑦ. ᖃᓄᖅ ᐅᖃᓕᒪᖃᑎᒌᓐᓂᕆᓲᕗᑦ, ᐱᔪᕆᓐᓇᑐᕋᑕᖅ »
ᐃᒻᒪᖄ ᐃᓚᖓᑦ ᐃᓕᓭᒍᑎᐅᑉ ᓲᖑᓂᕐᐹᖁᑎᒋᔭᖓ ᐋᕐᕿᒋᐊᕈᓐᓇᕕᖃᕐᓂᖓ. ᕕᓐᓴᓐᑦ ᐅᖃᐅᓯᖏᑎᒍᑦ, ᐃᓕᓭᒍᑏᑦ ᐃᓗᓕᖏᑦ ᐊᑦᔨᐅᖏᑦᑐᑎᒍᑦ ᐋᕐᕿᓱᕆᐊᕈᓐᓇᕕᓖᑦ ᐃᓕᓵᑦ ᑭᖕᖒᒪᒋᔭᖏᑦ ᒪᓕᑦᓱᒋᑦ. ᐆᑦᑑᑎᒋᓗᒍ, ᐃᓕᓐᓂᐊᓂᖅ ‘’ᐃᓅᓯᖓ ᐊᓂᕐᕋᓕᐅᔫᑉ’’ ᖃᓪᓗᓈᓂ ᑐᑭᖃᑐᐃᓐᓇᕆᐊᓕᒃ ᑐᑭᓯᒪᓂᕐᒥᒃ ᐊᑦᑕᑐᐊᑦ ᐊᖏᖃᑎᒌᒍᑎᖏᓐᓂᒃ ᐊᒻᒪᓗ ᐃᑦᓯᒥᑦᑎᑕᕇᓂᒃ ᐃᓪᓗᖃᕈᓐᓇᓂᕐᒥᒃ. ᓄᓇᕕᒻᒥ, ᑖᒃᑯᐊᓭᓐᓀᑦ ᐋᕐᕿᓱᒋᐊᕐᑕᐅᒍᓐᓇᕕᖃᕐᒥᔪᑦ ᐃᓅᓯᕐᓄᑦ ᑐᑭᒧᐊᑦᑎᓯᔨᕐᑕᓕᒻᒧᑦ ᐃᓪᓗᒥᓂᒃ, ᐅᖁᒣᑦᓴᑐᓕᕆᕕᓐᓂᒃ, ᐅᕝᕙᓘᓐᓀᑦ ᐊᒥᓱᐃᑎᒍᑦ-ᐅᑭᐅᖃᑎᒌᖕᖏᑐᑦ ᐊᓂᕐᕋᕆᔭᖏᓐᓂᒃ. ᑕᒪᑦᓱᒪᐅᑉ ᐋᕐᕿᒋᐊᕈᓐᓇᕕᖃᕐᓂᖓ ᐱᕕᑦᓴᖃᕐᑎᓯᑦᓯᐊᓚᖓᔪᖅ ᐊᑑᑎᓂᖃᕐᓂᖏᓐᓂᒃ ᐃᓚᐅᔪᓕᒫᓄᑦ, ᐃᑉᐱᒋᑦᔭᕈᓐᓀᓗᒋᑦ ᑭᖑᓂᕆᔭᖏᑦ ᐊᑑᑎᓯᒪᔭᖏᓪᓘᓃᑦ.
ᐃᓚᒋᐊᕈᑎᒋᖕᖑᓱᑦᓱᒍ ᐃᓅᖃᑎᒌᓄᑦ ᐃᓚᐅᓂᕐᒧᑦ ᐃᓕᓭᒍᑎ, ᑲᑎᕕᒃ ᐃᓕᓴᕐᓂᓕᕆᓂᖅ ᐸᕐᓇᓯᒪᓕᕐᒥᔪᖅ ᐱᒋᐊᕐᑎᖑᓱᑦᑕᒥᓂᒃ ᖃᒻᒥᑯᑦ ᐃᓅᖃᑎᒌᑦ-ᐃᓕᓴᕈᒪᔭᕐᒥᓂᒃ ᐃᓕᕙᓪᓕᐊᑎᑦᓯᓂᕐᒧᑦ ᐃᓕᓭᒍᑎ ᐱᓇᓱᒐᕐᓂᒃ-ᐃᑉᐱᒋᔭᖃᓗᐊᖕᖑᐊᑐᖅ ᐱᒋᐊᕐᑎᓯᒍᑎᐅᑦᓱᓂ ᐋᕐᕿᓱᕐᓯᒪᔪᖅ ᐃᑲᔪᕐᓯᒐᔭᕐᓂᒥᒃ ᐃᓄᓐᓂ ᐃᓕᒃᑯᑦ ᐃᓕᑦᓯᐊᕈᓐᓇᕕᖃᕐᓂᒥᓂᒃ ᐱᓇᓱᐊᕐᕕᐅᔪᓄᑦ. ᐃᓕᓭᒍᑏᑦ ᓴᓇᔭᐅᒪᑦᓱᑎᑦ ᐱᓇᓱᒐᕐᑖᕆᒍᒪᔭᕐᒥᓂᒃ ᑐᑭᑖᕆᓂᕐᒥᒃ, ᐱᓇᓱᒐᕐᒥ ᕿᓂᕐᓂᓄᑦ ᖃᓄᕐᑑᓃᑦ, ᐊᒻᒪᓗ ᐱᓇᓱᕝᕕᒥ ᐱᒍᓐᓇᓂᐅᔪᓂᒃ, ᑖᓐᓇ ᐃᓕᓭᒍᑎ ᓄᐃᑦᓯᒍᓐᓇᑐᖅ ᐱᒋᐅᕐᓴᔭᐅᓯᒪᓂᕐᒥᒃ ᐃᓕᑕᕐᓯᐅᑎᒥᒃ ᐱᒍᓐᓇᓂᖃᓪᓗᐊᒐᓚᓐᓂᒧᑦ ᐱᓇᓱᒐᕐᒥᓂᒃ. ᑕᒪᑦᓱᒪᐅᑉ ᐃᖃᔪᖃᑎᒌᒍᑕᐅᓂᖓ ᓄᓇᓕᐅᑉ ᐱᓇᓱᑦᑎᖏᓐᓂᒃ ᐃᑲᔪᕐᓯᓂᖃᕐᑐᖅ ᓇᒻᒥᓂᖅ ᐱᕈᕈᓐᓇᓯᓂᕐᒥᒃ ᐊᒻᒪᓗ ᐃᑲᔪᕈᓐᓇᓱᓂ ᓲᖑᓯᑎᑦᓯᓕᐅᒥᓂᕐᒥᒃ, ᐃᓚᐅᒍᓐᓇᓂᕐᓴᐅᓂᕐᒥᒃ ᓄᓇᓖᑦ ᐱᓇᓱᐊᕐᕕᖏᓐᓄᑦ-ᓄᐃᑕᑎᑦᓯᓂᖃᕐᑐᒥᒃ ᐊᒥᓱᐃᖑᓂᖏᓐᓂᒃ ᓴᐱᓕᑦᓯᕇᑦᑐᔭᐅᓂᖏᓐᓂᓗ ᓄᓇᕕᒻᒥᐅᑦ ᓄᓇᓕᖏᑦ.
ᑲᔪᓯᔪᒥᒃ ᑲᑐᑦᔨᖃᑎᒌᓐᓂᖅ ᐃᓕᓐᓂᐊᕖᑦ ᑲᑎᒪᔨᖏᓗ, ᐃᑎᕆᐊᓪᓛᓂᕐᒧᑦ ᐱᓇᓱᐅᕐᕕᓄᑦ, ᐱᓇᓱᑦᑎᓯᔨᓄᓪᓗ, ᓄᑕᐅᓯᓕᕐᓯᒪᔪᖅ ᐃᓅᖃᑎᒌᓄᑦ ᐃᓚᐅᓂᕐᒧᑦ ᐃᓕᓭᒍᑎᒃ ᐊᒻᒪᓗ ᐃᓕᓐᓂᐊᕈᒪᔭᕐᒥᓂᒃ ᐱᕕᖃᕐᑎᓯᓂᖅ ᐃᑲᔪᕐᓯᖏᕖᕐᑐᑦ ᐃᑲᔪᕐᓯᓚᖓᓂᕐᒥᒃ ᓄᑖᓂᒃ ᐃᓕᓵᓂᒃ ᐃᓄᒻᒪᕆᓐᓂᒃ ᓂᐱᒥᓂᒃ ᓇᕝᕚᓂᑯᑐᐃᓐᓇᐅᖏᑦᑐᖅ ᑭᓯᐊᓂ ᐊᑐᕈᓐᓇᓯᑎᑕᐅᓂᒃᑯᑦ ᓄᑭᖃᒻᒪᕆᑦᑐᒥᒃ ᓄᓇᓕᒋᔭᕐᒥᓂᒃ. ᐃᓕᓐᓂᐊᑎᑦᓯᓃᑦ ᑐᓂᔭᐅᔪᑦ ᐳᕕᕐᓂᑐᒥ, ᐃᓄᒃᔪᐊᒥ, ᑰᑦᔪᐊᒥᓗ ᐊᒻᒪᓗ ᐃᓕᓭᒍᑕᐅᓲᖑᑦᓱᑎᑦ ᐃᓕᓭᔨᓄᑦ ᐱᒋᐅᕐᓴᔭᐅᓯᒪᔪᓄᑦ ᐊᑦᔨᒌᖕᖏᓕᕐᑎᓯᒪᔪᓂᒃ ᐃᓕᓭᓂᕐᓂᒃ ᐊᒻᒪᓗ ᐱᓪᓗᑯᒋᐊᓕᑎᒍᑦ ᐃᓕᓴᕐᓂᒥᒃ. ᖃᐅᔨᒋᐊᓪᓛᕈᒪᒍᕕᑦ, ᐳᓛᕆᐊᕐᓗᒍ ᖃᕆᑕᐅᔭᒃᑯᑦ ᐅᐸᑦᑕᐅᑲᑦᑕᕕᕗᑦ.