ᑲᑎᕕᒃ ᐃᓕᓴᕐᓂᓕᕆᓂᖅ ᓴᕐᕿᑎᑦᓯᕗᖅ ᐊᓪᓚᓯᒪᔪᑎᒍᑦ ᐊᓯᑦᔨᓂᕐᒥᒃ ᑐᓴᕐᑎᓯᒍᑎᒥᒃ ᓄᓇᕕᒻᒥᐅᑉ ᓯᕗᓂᕐᒧᑦ ᑕᑯᓐᓇᑕᖓᓄᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᕐᒧᑦ ᓄᓇᒥᓂ

ᑰᑦᔪᐊᖅ (ᑯᐯᒃ) ᐆᒃᑑᐱᕆ 21, 2025 – ᑲᑎᕕᒃ ᐃᓕᓴᕐᓂᓕᕆᓂᖅ ᐅᐱᒍᓱᒃᑯᖅ ᑐᓴᕐᑎᓯᒋᐊᒥᒃ ᓄᐃᑕᐅᓂᖓᓂᒃ ᓱᓇᒥᑦᓯᔫᑉ ᑐᓴᕐᑎᓯᒍᑎᐅᑉ, 2023-2024-ᒥ ᑭᓇᒃᑯᓕᒫᓂᒃ ᖃᐅᔨᒋᐊᕐᕕᖃᕐᓂᕕᓃᑦ ᐃᓘᓐᓇᖏᓐᓂ 14-ᓂ ᓄᓇᕕᒻᒥ ᓄᓇᓕᓐᓂ ᑭᖑᓂᖓᒍᑦ ᓄᐃᔪᒥᒃ. ᑖᓐᓇ ᑐᓴᕐᑎᓯᒍᑎ ᓴᕐᕿᑎᑦᓯᔪᖅ ᓴᐳᑦᔭᐅᓚᕆᓐᓂᖓᓂᒃ ᓄᐃᑦᓯᓂᖅ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᒻᒥᒃ ᓄᓇᕕᒻᒥ—ᑐᖕᖓᕕᓕᒻᒥᒃ ᐃᓄᑐᐃᓐᓀᑦ ᐃᓪᓕᕆᔭᖏᓐᓂᒃ, ᐅᖃᐅᓯᖓᓂᒃ, ᐊᒻᒪᓗ ᐃᓗᕐᖁᓯᖓᓂᒃ ᐊᒻᒪᓗ ᐃᓕᑕᕆᔭᐅᒍᑎᑖᕐᑎᓯᒍᓐᓇᓱᓂ ᐃᓕᑕᕆᔭᐅᔪᓂᒃ ᑕᒪᖏᓐᓂ ᓄᓇᕕᒻᒥ ᐊᒻᒪᓗ ᓯᓚᑖᓂ.

ᖃᐅᔨᒋᐊᕐᕕᖃᕐᓂᓂ ᐃᓚᐅᓚᐅᔪᑦ 400 ᐅᖓᑖᓄᑦ ᓄᓇᕕᒻᒥᐅᑦ ᐊᐱᕐᓱᓂᒃᑯᑦ ᖃᐅᔨᓴᕐᓂᑯᑦ, ᑐᓴᐅᑎᒃᑰᓂᒃᑯᑦ, ᐊᒻᒪᓗ ᑕᒃᑯᒧᑦ ᑲᑎᖕᖓᖃᑎᒌᓐᓂᑯᑦ. ᐃᓚᐅᖃᑕᐅᔪᑦ ᐃᑉᐱᒋᔭᐅᖁᔨᓗᐊᖕᖑᐊᓚᐅᔪᑦ ᐱᑕᖃᕆᐊᖃᕐᓂᖏᓐᓂᒃ ᐃᓗᕐᖁᓯᕐᒥᒃ ᑐᖕᖓᕕᓕᒃ ᐃᓕᓐᓂᐊᓂᖅ, ᓄᓇᒥ ᐃᓕᓐᓂᐊᓂᖅ, ᐊᒻᒪᓗ ᐃᓕᓐᓂᐊᒉᑦ ᑕᒪᖏᓐᓅᓕᖓᔪᑦ ᐃᓄᑐᐃᓐᓀᑦ ᖃᐅᔨᒪᐅᓯᖏᓐᓄᑦ ᐊᒻᒪᓗ ᖃᓪᓗᓈᑦ ᐃᓕᓐᓂᐊᑎᑦᓯᒍᓯᖏᓐᓄᑦ.

ᑐᓴᕐᑎᓯᒍᑎ ᓄᐃᑦᓯᔪᖅ ᖃᐅᔨᓴᐅᑎᕕᓂᕐᓂᒃ ᓄᓇᕕᒻᒥᐅᑦ ᓯᕗᓂᕐᒧᑦ ᑕᑯᓐᓇᑕᖓᓂᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᒻᒧᑦ, ᐅᖃᕐᑕᐅᓯᒪᑦᓯᐊᑐᓂᒃ ᓯᑕᒪᐅᓕᕿᖓᑦᓱᑎᒃ: ᐃᓄᑐᐃᓐᓀᑦ ᐃᓕᓪᕆᔭᖏᑦ ᐊᒻᒪᓗ ᐃᓄᑐᐃᓐᓀᑦ ᖃᐅᔨᒪᐅᓯᖏᑦ, ᐃᓕᓐᓂᐊᕈᑏᑦ ᐊᒻᒪᓗ ᐃᓕᓐᓂᐊᑎᑦᓯᓃᑦ, ᓇᓃᓐᓂᖓ, ᐊᒻᒪᓗ ᐊᐅᓚᑕᐅᓂᖓ. ᑕᒃᑲᖓᑦ ᑕᑯᓐᓇᓱᒍ, ᕿᒥᕐᕈᓱᒋᑦ ᐃᓕᓐᓂᐊᕖᑦ ᖃᓄᐃᓕᖓᓂᕆᒐᔭᕐᑕᖏᑦ, ᑐᓴᕐᑎᓯᒍᑎ ᓱᕐᖁᐃᓯᔪᖅ ᓄᓇᕕᒻᒥ ᐃᓕᓐᓂᐊᕕᒃ ᐱᒍᓐᓇᓯᑎᑦᓯᒐᔭᕆᐊᖓ ᓄᓇᕕᒻᒥᐅᑦ ᐃᓱᒪᒋᔭᖏᓐᓂᒃ ᑐᓴᕐᑕᐅᑎᑦᓯᓂᕐᒥᒃ. 2023-ᒥ, ᐃᓕᓐᓂᐊᓂᓕᕆᓂᕐᒧᑦ ᑐᕐᖃᑕᕐᕕᐅᑉ ᑎᓕᔨᒍᑎᕕᓂᖓ ᑲᔪᓯᒍᓇᐅᒻᒪᖔᑦ ᖃᐅᔨᓴᓂᒥᒃ ᕿᒥᕐᕈᔪᕕᓂᖅ ᑕᓪᓕᒪᓂᒃ ᐊᑦᔨᒌᖕᖏᑐᓂᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕖᑦ ᖃᓄᐃᓕᖓᓂᖏᓐᓂᒃ. ᐃᓕᓐᓂᐊᕕᓕᐅᖁᔨᓐᓂᒥᔪᖅ ᓄᓇᕕᒻᒥ ᐃᓕᓐᓂᐊᕕᑦᓴᒥᒃ.

“ᐃᒻᒥᒎᕐᑐᑎᑐᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᑦᑎᑐᑦ, ᑖᓐᓇ ᐃᓕᓐᓂᐊᕕᒃ ᑲᑎᑎᑦᓯᒐᔭᕐᑐᖅ ᓲᖑᓂᖏᓐᓂᒃ ᓄᓇᓕᓐᓂ ᐊᐅᓚᑦᓯᓃᑦ, ᐃᓗᕐᖁᓯᕐᒨᓕᖓᔪᓂᒃ ᐃᓕᓐᓂᐊᑎᑦᓯᓂᕐᓂᒃ, ᑭᓇᒃᑯᓕᒫᓅᓕᖓᔪᓂᒃ ᑮᓇᐅᔭᖃᕐᑎᓯᒍᑎᓂᒃ, ᐊᒻᒪᓗ ᐃᓕᑕᕆᔭᐅᔪᓂᒃ ᐃᓕᑕᕆᔭᐅᒍᑎᑖᕐᑎᓯᓂᕐᓂᒃ. ᐊᑐᐃᓐᓇᐅᑎᑦᓯᒍᓐᓇᕋᔭᕐᑐᖅ ᑕᒪᖏᓐᓂᒃ ᐳᕐᑐᓂᕐᓴᒋᐊᓪᓚᒥ ᐊᒻᒪᓗ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᑦᓯᒍᑎᓂᒃ ᐊᑕᐅᓯᕐᒥ ᐃᓕᓐᓂᐊᕕᒻᒥ—ᑲᒪᒋᔭᖃᕈᓯᖅ ᐊᒥᓱᑦ ᖃᐅᔨᒋᐊᕐᕕᖃᕐᓂᒥ ᐃᓚᐅᖃᑕᐅᔪᑦ ᐃᓱᒪᒋᓯᒪᔭᖓ ᓈᒻᒪᓈᕋᔭᕆᐊᖓ ᑭᖕᖒᒪᑦᓯᓂᕐᒧᑦ ᐊᑕᐅᓯᖕᖑᑎᓯᒪᓂᕐᓴᒥᒃ ᐊᒻᒪᓗ ᐊᓯᑦᔨᑕᕈᓐᓇᓂᕐᓴᒥᒃ ᐃᓕᓐᓂᐊᓂᕐᒧᑦ ᐊᕐᖁᑎᒥᒃ,” ᐅᖃᕐᑐᕕᓂᖅ ᕖᐱ ᐱᐊᓐᑦᓕ, ᑐᑭᒧᐊᑦᑎᓯᔨᖓ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᓕᕆᓂᕐᒥᒃ ᐱᒍᑦᔨᕕᐅᑉ ᑲᑎᕕᒃ ᐃᓕᓴᕐᓂᓕᕆᓂᕐᒥ.

“ᑖᓐᓇ ᑐᓴᕐᑎᓯᒍᑎ ᓇᓗᓀᕐᓯᔪᖅ ᐊᑯᓂᒻᒪᕆᐊᓗᒃ ᖃᐅᔨᒪᓯᒪᔭᑐᖃᑦᑎᓂᒃ: ᓄᓇᕕᒻᒥᐅᑦ ᐊᑐᐃᓐᓇᐅᓕᕐᑐᑦ ᓯᕗᓕᕐᓂᒥᒃ ᓇᒻᒥᓂᖅ ᐃᓕᓐᓂᐊᓂᕐᒧᑦ ᓯᕗᓂᑦᓴᒥᓂᒃ,” ᐅᖃᕐᑐᕕᓂᖅ ᓯᐊᔭ ᐋᓗᐸ, ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᖓᔪᕐᖄᖓ. “ᐅᓪᓗᒥ, ᖃᓄᐃᓘᕆᐊᒃᑲᓂᕈᑎᖃᕐᓱᑎᒃ ᑐᑭᑖᕈᑎᒥᒃ ᐊᖏᕐᑕᐅᔪᕕᓂᕐᒥᒃ ᒫᑦᔨ 2025-ᒥ, ᐃᓕᓐᓂᐊᕖᑦ ᑭᒃᒐᑐᕐᑎᖏᑦ ᐅᖃᕆᐊᓪᓚᑐᕕᓃᑦ ᓴᐳᑦᔨᓂᕐᒥᓂᒃ ᓄᐃᑕᐅᓂᖓᓂᒃ ᓄᓇᕕᒻᒥ ᐃᓕᓐᓂᐊᕕᐅᑉ, ᐃᒻᒥᒎᕐᑑᑉ ᑲᕙᒪᓅᓕᖓᖕᖏᑑᑉ ᐃᓄᑐᐃᓐᓀᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕕᖓᑕ ᓯᕗᓕᕐᑕᐅᔫᑉ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. ᑖᓐᓇ ᐊᐅᓚᑦᔭᒋᐊᕐᓂᖅ ᓈᒻᒪᓈᕐᑐᖅ ᐃᓕᓐᓂᐊᕖᑦ ᑭᒃᒐᑐᕐᑎᖏᑦᑕ ᐃᓱᒪᒋᔭᖓᓄᑦ ᐅᕕᒃᑫᑦ ᒪᓂᒪᕕᐅᒋᐊᖃᕐᓂᖓᓂᒃ—ᓄᓇᒥᓂ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒥᒃ ᓄᐃᑕᑎᑦᓯᔪᒥᒃ ᑭᓇᐅᓂᖏᓐᓂᒃ, ᓇᑭᖕᖔᓯᒪᓂᖏᓐᓂᒃ, ᐊᒻᒪᓗ ᓇᒧᖕᖓᕈᒪᓂᖏᓐᓂᒃ.”

ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᐊᖃᑎᖃᖏᓐᓇᓚᖓᔪᖅ ᒪᑭᕝᕕᒥᒃ ᐱᕙᓪᓕᐊᑎᑦᓯᒐᓱᓪᓗᑎᒃ ᐱᖁᔭᑎᒎᑦᓯᐊᑐᒥᒃ ᐊᒻᒪᓗ ᑎᒥᖕᖑᑎᑕᐅᓯᒪᔪᒥᒃ ᐃᓂᓪᓚᖓᔪᒥᒃ ᓈᒻᒪᓈᕐᑐᒥᒃ ᐱᒍᒪᔭᐅᔪᓄᑦ ᐅᖃᕐᑕᐅᓯᒪᔪᓄᑦ ᑭᓇᒃᑯᓕᒫᓂᒃ ᖃᐅᔨᒋᐊᕐᕕᖃᕐᓂᓂ. ᐱᓇᓱᐊᖃᑎᖃᕐᓂᖅ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓᓂᒃ ᑯᐯᒃᒥ ᑲᔪᓯᒻᒥᔪᖅ, ᑐᕌᒐᖃᕐᓱᓂ ᕿᒥᕐᕈᓂᕐᒥᒃ, ᐊᓯᖃᕋᓗᐊᕐᒥᑎᓪᓗᒋᑦ, ᐱᕙᓪᓕᐊᑎᑕᐅᓂᖏᓐᓂᒃ ᐳᕐᑐᓂᕐᓴᒋᐊᓪᓚᒨᓕᖓᔪᑦ ᐊᒻᒪᓗ ᐃᓕᓐᓂᐊᕕᕐᔪᐊᒨᓕᖓᔪᑦ ᐃᓕᓐᓂᐊᒉᑦ ᐊᒻᒪᓗ ᐃᓕᓐᓂᐊᓃᑦ, ᑕᒃᑰᓇ ᐋᕐᖀᓱᑎᒃ ᑐᖕᖓᕕᐅᔪᓂᒃ ᐃᓕᓐᓂᐊᕕᐅᑉ ᓄᐃᑕᐅᕕᒋᒍᓐᓇᑕᖏᓐᓂᒃ.

ᑐᓴᕐᑎᓯᒍᑎᓕᒫᖅ ᐊᑐᐊᕈᒪᒍᕕᐅᒃ ᐅᕗᖕᖓᓗᑎᑦ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 18-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220 | 1 800 360-2244 ᓵᖓᓃᑦᑐᖅ ᑭᓯᑦᔪᑎᖓ 309
publicrelations@kativik.qc.ca