ᐃᙯᓕᓴᕐᓂᖅ, ᓄᒃᑭᓴᕐᓂᑐᐃᓐᓇᐅᖏᓪᓚᖅ. ᐃᑲᔪᑦᓯᐊᑐᖅ ᐊᑑᑎᑎᑦᓯᓂᕐᒧᑦ ᐊᑑᑎᔭᐅᒋᐊᓕᓐᓂᒃ, ᐃᓕᑦᓯᑎᑦᓯᒍᓐᓇᑐᖅ ᓲᖑᓂᖃᑦᓯᐊᓂᕐᒥᒃ ᐊᒻᒪᓗ ᐃᓅᖃᑎᒌᑦᓯᐊᕈᓐᓇᑎᑦᓯᓱᓂ. ᐃᓕᓐᓂᐊᑎᑦᓯᔨᓄᑦ ᐊᓕᒋᔭᖃᑦᓯᐊᑐᓂᒃ, ᑕᒪᓐᓇ ᐃᑲᔪᑦᓯᐊᑐᖅ ᐱᕙᓪᓕᑎᑦᓯᓂᕐᒧᑦ ᐃᓄᐃᑦ ᐃᓅᓂᖏᓐᓂᒃ ᐊᒻᒪᓗ ᐊᓕᐊᒋᔭᖃᑦᓯᐊᓂᖏᓐᓂᒃ.
ᐃᓕᓐᓂᐊᕕᒻᒥ ᐳᕐᑐᓂᕐᓴᓂᒃ, ᐃᙯᓕᓴᕐᓂᖅ ᐱᖕᖑᐊᓂᑐᐊᓐᓇᐅᖏᓪᓚᖅ ᐱᕙᓪᓕᓯᐊᕐᓂᒧᑦ : ᐃᓕᓐᓂᐊᑎᑦᓯᒍᑎᑦᓯᐊᓲᖑᕗᖅ ᐃᒻᒥᓂᒃ ᐊᐅᓚᑦᓯᓯᐊᕐᓂᒥᒃ, ᓲᖑᓂᖃᑦᓯᐊᓂᕐᒥᒃ ᐊᑑᑎᑦᓯᐊᓂᕐᒥᓗ ᐱᒻᒪᕆᐅᔪᓂᒃ. ᑖᒃᑯᐊ ᐱᒻᒪᕆᐅᔪᑦ ᐊᑑᑎᖃᑦᓯᐊᑐᑦ ᐃᙯᓕᓴᕐᕕᒥ, ᖃᓄᐃᑦᑐᑐᐃᓐᓇᓄᑦ ᐃᙯᓕᓴᕈᑎᓄᑦ. ᑌᒣᒐᓗᐊᕐᑎᓗᒍ, ᑖᒃᑯᐊ ᑲᑎᑦᓱᒋᑦ, ᓲᖑᓯᒋᐊᓪᓛᑎᑦᓯᔪᖅ ᐅᕕᒐᕐᑐᓂᒃ ᐊᓂᒎᑎᑦᓯᐊᑎᑦᓯᒍᓐᓇᓯᐊᕐᓂᒧᑦ ᐅᖁᒣᑦᑐᑰᓕᑐᐊᕋᒥᒃ ᐃᓅᓯᕐᒥ. ᓚᒍᓐᓇᓚᕿᕗᒍᑦ ᐃᙯᓕᓴᕐᓂᖅ ᐱᒻᒪᕆᐅᑦᓯᐊᓗᑐᕐᒪᑦ ᐱᐅᓯᐅᒥᑎᑦᓯᓂᕐᒧᑦ ᐱᕙᓪᓕᑎᑦᓯᓂᕐᒧᓗ ᐅᕕᒐᕐᑐᓂᒃ ᓲᖑᓯᒋᐊᕈᒪᔪᓂᒃ ᐃᓅᓂᖏᓐᓂᒃ ᐱᐅᓯᖏᓐᓂᓗ? ᕇᑕ ᐃᓂᓂᐊᑉ — ᖃᐅᔨᒋᐊᕐᕕᒃ ᐃᙯᓕᓴᕐᓂᒧᑦ — ᓂᓪᓕᐅᑎᖃᕈᒪᔪᕕᓂᖅ ᑕᒪᑐᒪᐅᑉ ᒥᑦᓵᓄᑦ:
« ᐃᓕᓐᓂᐊᑎᑦᓯᑲᐱᒐᔭᕈᑦᑕ ᐃᙯᓕᓴᕐᓂᐅᑉ ᐱᒻᒪᕆᐅᑎᑕᖏᓐᓂᒃ ᐃᓕᓐᓂᐊᕕᒻᒥ ᐳᕐᑐᓂᓕᓐᓂᒃ, ᑕᑕᒥᓐᓇᕋᔭᖕᖏᑐᖅ ᑕᑯᒋᐊᒥᒃ, ᐳᕐᑐᓂᕐᓴᒦᓕᕈᑎᒃ, ᓱᐴᕐᑐᖃᑦᑕᕈᓐᓀᓗᑎᒃ, ᐅᓇᒻᒥᒍᓱᓐᓂᓴᐅᓕᕐᓗᑎᒃ ᖃᓄᐃᑦᑐᑐᐃᓐᓇᓂᒃ ᐃᙯᓕᓴᕐᓂᒨᓕᖓᔪᓂᒃ ᓂᕆᑦᓯᐊᓂᕐᓴᐅᓕᕐᓗᑎᓗ ᓂᕿᑦᓯᐊᖑᓂᕐᓴᓂᒃ ᐊᒻᒪᓗ ᐊᑑᑎᑦᓯᐊᓂᕐᓴᐅᓕᕐᓗᑎᒃ ᐊᑑᑎᔭᐅᒋᐊᓕᓐᓂᒃ ᖃᓄᐃᖕᖏᓯᐊᕐᓂᖏᓐᓄᑦ », ᐅᖃᕐᑐᖅ.
ᐃᓕᓐᓂᐊᑎᑦᓯᔨᒋᓯᒪᔭᖏᑦ ᒪᓕᓪᓗᒋᑦ, ᕇᑕ ᐱᒻᒪᕆᐅᑎᑦᓯᔪᖅ ᐃᓕᓐᓂᐊᑎᑦᓯᓂᕐᒥᒃ ᓇᒻᒥᓂᖅ ᐊᐅᓚᑦᓯᓯᐊᕈᓐᓇᓂᕐᒥᒃ ᐊᔪᐃᓐᓇᓯᐊᕐᓂᒥᓪᓗ. ᐃᑲᔪᕈᒪᑦᓯᐊᑐᖅ ᐅᕕᒐᕐᑐᓂᒃ ᐊᑑᑎᒍᒪᔭᕐᒥᓂᒃ, ᐃᑲᔪᕐᓗᒋᑦ ᐊᓂᒎᑎᑦᓯᐊᓂᕐᒥᒃ ᐊᑦᓱᕈᕐᓇᑑᔪᓂᒃ ᐊᒻᒪᓗ ᐅᐱᒍᓱᓐᓂᒥᒃ ᓵᓚᖃᓕᕋᒥᒃ ᐃᙯᓕᓴᓕᑐᐊᕋᒥᒃ. ᓱᓇᒥᒃ ᑐᕌᒐᖃᕐᓂᒧᑦ? ᓯᕗᓪᓕᐅᑎᓗᒍ, ᓱᖑᓯᒋᐊᓪᓛᓂᕐᒧᑦ ᐃᓱᒪᒥᓂᒃ.
ᐊᐅᓚᑦᓯᓯᐊᕐᓂᖅ ᐃᓕᓐᓂᐊᑎᐅᑉ ᐃᙯᓕᓴᕐᓂᖏᓐᓂᒃ ᐱᔪᓐᓇᑎᑦᓯᔪᖅ ᐱᔪᓐᓇᐅᑎᑦᓯᐊᓂᒃ. ᐅᕕᒐᕐᑐᓕᒫᑦ ᐱᔪᓐᓇᓯᐊᕐᑐᓴᐅᔪᑦ ᑖᒃᑯᓂᖓ ᐱᔪᓐᓇᐅᑎᓂᒃ, ᐊᒻᒪᓗ ᐅᕕᒐᕐᑐᐃᑦ ᓄᓇᕕᒻᒥ ᐱᔪᒪᔪᑦᓴᐅᒥᔪᑦ ᐱᔪᓐᓇᐅᑎᑦᓭᓇᓂᒃ ᐅᕕᒐᕐᑐᓂᒃ ᑯᐯᒃ ᓄᓇᓕᒋᐊᓪᓚᖏᑦᑎᑐᑦ.
ᐱᐅᓯᒋᐊᕐᓯᒪᓂᖅ ᓇᒻᒥᓂᖅ ᐊᓱᐃᓛ ᐱᖃᑎᓕᐅᕐᓂᖅ
ᕇᑕ ᐅᓂᒃᑳᑐᖅ ᐊᑑᑎᔭᐅᓯᒪᔪᒥᒃ ᐃᑉᐱᓂᐊᕐᓇᑐᒥᒃ ᓴᓪᓗᐃᑦ ᒥᕝᕕᖓᓂ, ᐃᓕᓐᓂᐊᑎ ᐃᒍᐊᕐᓯᕕᐅᑉ ᐃᓕᓐᓂᐊᕕᖓᓂᒃ ᑐᖕᖓᓱᑦᑎᑕᐅᑦᓯᐊᓯᒪᔪᒥᒃ ᓂᕕᐊᕐᓯᐊᓄᑦ ᐃᓕᓐᓂᐊᑎᓄᑦ ᐃᑯᓯᐅᑉ ᐃᓕᓐᓂᐊᕕᖓᓂᒃ ᐳᕐᑐᓂᕐᓴᓂᒃ. ᐊᔫᕐᑕᓂᕐᒧᑦ ᓵᓚᖃᐅᑎᒥᒃ ᓄᓇᓖᑦ ᐊᓯᐊᓂᒃ ᓄᓇᓕᓐᓂᒃ ᐱᖕᖑᐊᖃᑎᖃᕐᓱᑎᒃ, ᑲᑐᑦᔨᖃᑎᒌᓐᓂᒪᑕ ᑕᒪᓐᓇ ᐱᖃᑎᑖᕐᑎᓯᔪᕕᓂᖅ ᓯᕕᑐᔪᒧᑦ — ᐱᖃᑎᑖᕋᔭᕐᖂᖏᑦᓱᑎᒃ ᐊᑑᑎᓐᓂᖏᑐᐊᕐᐸᑕ ᐊᔫᕐᑕᓂᕐᒥᒃ ᓵᓚᖃᐅᑎᓂᒃ — ᖃᐅᔨᑎᑦᓯᔪᑦ ᖃᓄᖅ ᐃᙯᓕᓴᐅᑏᑦ ᑲᑐᑦᔨᖃᑎᒌᒋᐊᓖᑦ ᐃᑲᔪᑦᓯᐊᕈᓐᓇᒪᑕ ᓇᒻᒥᓂᖅ ᐱᕙᓪᓕᓯᐊᕐᓂᒥᒃ ᐱᖃᑎᓕᐅᕐᓂᒥᓪᓗ.
« ᑲᓇᑕᒧᑦ ᑎᑭᓚᐅᕐᓯᒪᑎᓪᓗᖓ, ᐃᓕᓐᓂᐊᕕᒻᒥ ᐳᕐᑐᓂᕐᓴᒥ, ᑲᖕᖑᓱᖃᑦᑕᓯᒪᔪᖓ ᐃᓚᐅᖃᑕᐅᑦᓯᐊᖃᑦᑕᓯᒪᖕᖏᓱᖓᓗ. ᐊᓱᐃᓛ, ᐊᓕᐊᒋᑦᓯᐊᑕᕋ ᐊᔫᕐᑕᕆᐊᒥᒃ ᓵᓚᖃᐅᑎᓂᒃ ᐊᒥᓱᐹᓗᓐᓂᒃ ᐊᓯᑦᔨᑎᑦᓯᓯᒪᓕᕐᑐᖅ. ᖃᓂᓪᓕᒋᐊᕐᑎᓯᔪᕕᓂᖅ ᐃᓅᖃᑎᒃᑲᓂᒃ, ᐃᓅᑦᔪᓯᒃᑯᓗ, ᐱᖃᑎᓕᐅᕐᓂᒥᒃ. ᑖᑦᓱᒥᖓ ᐃᙯᓕᓴᕐᓂᒥᒃ ᑲᑐᑦᔨᖃᑎᒌᑦᑐᒥᒃ, ᐊᓂᒎᑎᑦᓯᐊᓂᕐᒧᑦ ᐱᖕᖑᐊᑏᑦ ᐊᖏᖃᑎᒌᑦᓯᐊᕆᐊᓖᑦ », ᑐᑭᓯᓇᕐᑎᓯᔪᖅ ᑮ.
ᐳᐃᒍᓚᐅᕐᓯᒪᓛᖕᖏᓚᖓ ᐃᓕᓐᓂᐊᑎᑦᓯᔨᒋᓯᒪᔭᕋᓂᒃ, ᐃᓕᓐᓂᐊᑎᑦᓯᔨᒋᓯᒪᑦᓱᒍ ᐃᙯᓕᓴᕐᑎᓯᓂᕐᒧᑦ ᑌᑦᓱᒪᓂ ᐱᓯᑎᐹᓘᓯᒪᑦᓱᓂᓗ ᐱᖕᖑᐊᑎᐅᑎᓪᓗᒍ ᐸᑦᑕᒥᒃ. ᐱᒋᐅᕐᓴᑎᑕᐅᑎᓪᓗᑕ ᐊᑕᐅᓯᕐᒥᒃ ᑫᕙᓪᓚᕈᓯᕐᒥᒃ, ᑲᒪᒐᓛᖃᑦᑕᓯᒪᖕᖏᓚᒍᑦ ᐸᑦᑕᒥᒃ— ᐃᓘᓐᓇᑎᒍᑦ ᐱᒻᒪᕆᐅᑎᑦᓯᖃᑦᑕᑐᕕᓂᖅ ᐱᓇᓱᓐᓂᒥᒃ ᑎᒥᒻᒥᒍᑦ, ᐊᑑᑎᓂᕐᒥᓗ ᐊᑑᑎᒍᑎᑦᓯᐊᓂᒃ ᖃᓄᐃᖕᖏᓯᐊᕐᓂᒧᑦ ᐃᓅᓯᕐᒥ ᐊᒻᒪᓗ ᐃᒪᑐᐃᓐᓇᑐᖁᔨᑦᓯᐊᖃᑦᑕᓯᒪᔪᖅ ᐃᒪᐅᑉ ᖃᓄᐃᓪᓗᐊᓂᖓ ᑐᑭᑖᕆᔭᐅᓯᒪᑦᓱᓂ.
ᓯᐹᔅᑎᐊ ᐅᖃᕆᐊᓪᓚᕈᒪᓚᐅᔪᖅ ᐃᙯᓕᓴᕈᑏᑦ « ᐃᙯᓕᓴᕈᑎᐅᕗᑦ ᑲᑐᑦᔨᖃᑎᒌᑦᑎᒍᑦ ᑭᖕᖒᒪᑦᓯᑎᑦᓯᔪᑦ ᐊᒥᓱᓂᒃ ᐃᓄᓐᓂᒃ ᐃᓚᐅᓗᑎᒃ ᓄᐃᑦᓯᒋᐊᓪᓛᑎᑦᓯᒍᓐᓇᓱᑎᓗ ᖃᓄᐃᑦᑐᑐᐃᓐᓇᓂᒃ ᐱᔪᓐᓇᐅᑎᑦᓯᐊᓂᒃ ᐃᓅᑦᔪᓯᑎᒍᑦ / ᐃᓅᖃᑎᒌᑦᓯᐊᓂᕐᒥᒃ. »
ᐃᓱᒪᒋᒋᐊᓪᓚᓗᒍ ᐃᙯᓕᓴᕐᓂᐅᑉ ᐊᑑᑎᖃᑦᓯᐊᓂᖓ ᐃᓕᓐᓂᐊᕕᒻᒥᒃ ᐳᕐᑐᓂᕐᓴᒥᒃ, ᕇᑕ, ᑮ, ᓯᐹᔅᑎᐊᓗ , ᑲᔪᓯᖁᔨᑦᓯᐊᑐᑦ ᐃᓅᓱᑦᑐᓂᒃ ᐊᓂᒎᑎᑦᓯᐊᕋᓱᐊᕐᓂᒥᒃ ᐊᑦᓱᕈᕐᓇᑐᒃᑰᓕᕋᒥᒃ ᑐᕌᒐᓕᐅᕐᓂᒥᓗ ᐱᔪᒥᓇᑦᓯᐊᑐᓂᒃ, ᐱᓇᓱᐊᑦᓯᐊᖃᑦᑕᓗᑎᒃ ᐃᒻᒥᓂᒃ ᓲᓱᑦᓴᓯᐊᕐᓂᒥᒃ ᐊᒻᒪᓗ ᐊᔪᐃᓐᓇᓯᐊᕐᓂᒥᒃ. ᐃᙯᓕᓴᕐᓂᖅ ᐃᓕᓐᓂᐊᕕᒻᒥ ᐱᒻᒪᕆᐅᑦᓯᐊᑐᖅ ᐃᑲᔪᕐᒪᑦ ᐱᕙᓪᓕᓂᕐᒧᑦ, ᐅᕕᒐᕐᑐᓂᒃ ᐊᓕᐊᓱᑦᓯᐊᖁᔨᑦᓱᑎᒃ ᑎᑭᐅᑎᖁᔨᑦᓱᒋᓪᓗ ᐱᔪᓐᓇᑕᓕᒫᕐᒥᓂᒃ. ᑕᒪᓐᓇ ᐊᑑᑎᖁᔭᐅᔪᖅ ᐱᒻᒪᕆᐅᑦᓯᐊᑐᖅ ᑐᑭᑖᕆᐊᓪᓚᑎᑦᓯᔪᖅ ᐃᙯᓕᓴᕐᓂᐅᑉ ᐊᑑᑎᖃᕐᓂᖓᓂᒃ ᐃᓕᓐᓂᐊᕕᓐᓂ, ᖃᓄᐃᑦᑐᑐᐃᓐᓇᓂᒃ ᐱᔪᓐᓇᐅᑎᑖᕐᑎᓯᒍᓐᓇᑐᖅ ᑎᒥᒻᒥᒍᑐᐊᖑᖕᖏᑐᖅ : ᐱᔪᓐᓇᐅᑎᑦᓯᐊᒋᐊᓪᓚᑖᕐᑎᓯᓲᖅ ᐃᓅᖃᑎᒌᑦᓯᐊᑎᒍᑦ.
ᐃᑲᔪᖃᑎᒌᑦᓯᐊᓂᖅ, ᐱᓇᓱᖃᑎᒌᑦᓯᐊᓂᖅ, ᐅᖄᖃᑎᒌᑦᓯᐊᓂᖅ ᓲᓱᑦᓴᓯᐊᕐᓂᓗ ᐃᓅᖃᑎᒥᓂᒃ ᐱᐅᓯᑦᓯᐊᖑᕗᑦ ᓄᐃᒋᐊᓪᓛᑕᕕᓂᒃᑲᓂᒃ ᐃᙯᓕᓴᕐᓂᒧᑦ ᐊᒻᒪᓗ ᐱᐅᓯᒋᒍᓐᓇᓕᕐᓱᒋᑦ ᐃᓕᓐᓂᐊᑎᓄᑦ.
ᐃᓕᓐᓂᐊᑎᑦᓯᔨᐅᑦᓱᓂ ᐅᐱᓐᓇᑐᑦ ᐊᒻᒪᓗ ᑫᓪᓗᑐᕐᑕᐅᓇᕐᓱᓂ.
ᐃᓚᐅᒍᒪᑦᓴᓂᕈᕕᑦ, ᓄᓇᓕᓐᓂ ᐃᓕᓐᓂᐊᕕᑦᓯᓄᑦ ᐅᖄᕕᖃᕈᓐᓇᖁᑎᑦ!
ᐃᓕᓐᓂᐊᑎᑦᓯᔨᖕᖑᖃᒻᒦᑦ ᓴᐳᒻᒥᔭᐅᑦᓯᐊᓲᑦ ᐱᓇᓱᑦᑎᐅᖃᑎᒌᑦᑐᓄᑦ. ᐱᕕᑦᓴᖃᕐᑎᑕᐅᒍᓐᓇᒥᑦᓱᑎᒃ ᐱᒋᐅᕐᓴᑎᑕᐅᓂᕐᓄᑦ.
ᐱᕚᓪᓕᕈᑎᑦᓴᓂᒃ ᐱᐅᔪᓂᒃ ᒪᓂᔨᔪᒍᑦ.