Publications

ᐅᓄᒃᑳᖅ ᐃᓄᐃᑦ ᕿᓚᐅᑦᔭᑎᓄᐊᖓᔪᖅ

Photo: Martin Maheu
2022 | 08 | 31
ᐅᓂᒃᑳᑦ

ᐊᑕᓂᐊᓘᑉ ᑭᒡᒐᑐᕐᑎᖓ ᑲᓇᑕᒥ ᓄᓇᕕᓂᕐᒥᓄᑦ ᐃᓐᓂᐊᓚᐅᔪᕗᖅ ᒣᒍᓕᓚᐅᔪᒻᒪᓗ ᑐᓴᕋᑦᓴᓂᐊᕐᑎᑰᖃᑦᑕᓱᓂ, ᑕᒻᒪᓐᓇᓗ ᐱᒻᒪᕆᐊᓘᑦᓱᓂ ᓄᓇᕕᒻᒥᐅᓄᑦ! ᑭᓯᐊᓂ ᑖᓐᓇ ᐅᓂᒃᑳᖅ ᑕᒪᑐᒧᐊᖓᖕᖏᑐᖅ.

ᑖᓐᓇ ᐅᓂᒃᑳᖅ ᐅᓂᒃᑳᑐᖅ ᐃᓕᓐᓂᐊᕕᒻᒥᒃ ᑐᖕᖓᓱᑦᑎᓯᔪᒥᒃ ᒥᐊᔨ ᓭᒪᒥᒃ ᑐᓴᕐᓂᔮᕐᑎᓯᓂᕐᒥᒃ ᑐᖕᖓᓱᑦᑎᓯᒍᑎᒥᓄᑦ. ᐱᐅᔪᒋᐊᓪᓚᐅᒥᔪᖅ ᑖᓐᓇ ᐅᓂᒃᑳᑐᖅ ᐃᓄᐊᐱᓐᓂᒃ ᐊᑦᓴᑕᕐᑎᐊᐱᓐᓂᒃ.

ᐊᑯᓂᒐᓚᐅᓕᕐᑐᖅ, ᐅᓂᒃᑳᓕᐅᕈᒪᕙᓕᕐᖁᖓ ᑐᓴᕐᓂᔮᕐᓂᒥᒃ ᐃᓕᓐᓂᐊᑐᓂᒃ ᔮᓂᒻᒪᕆᐅᑉ ᐃᓕᓐᓂᐊᕕᖓᓂ, ᑐᓂᔭᐅᓗᔨᑎᓪᓗᒋᑦ ᑮᓇᐅᔭᓂᒃ  MusiCounts-ᑯᑦ ᑮᓇᐅᔭᖁᑎᖏᓐᓂ 2021-ᒥ. ᑖᒪᓐᓇ ᐊᓕᐊᓇᕈᓇᐅᕙᑦᑐᖅ ᐊᑯᓂᓂ… ᓯᐊᔭ ᕋᓱᓪᒥᒃ ᑲᑎᓯᒐᓱᐊᕆᐊᑭᑦᑑᓚᐅᔪᕗᖅ, ᐃᓕᓐᓂᐊᑎᑦᓯᔨᒥ ᑐᓴᕐᓂᔮᕐᓂᒥᒃ, ᑭᓯᐊᓂ ᐊᐱᕐᓱᕈᒪᓂᕋ ᓯᐊᔭᒥᒃ ᐃᓕᓐᓂᐊᑎᖏᓐᓂᓗ ᐱᐅᔫᓚᐅᔪᕗᖅ ᐊᑦᔨᐅᒐᓂᓗ. ᖃᓂᒻᒪᓯᐅᑉ-19 ᑲᑎᖃᑎᒌᒍᓐᓇᖏᐅᒪᑎᑦᓯᓚᐅᔪᕗᖅ ᐃᒣᓪᓗᐊᑐᖑᕋᑕᕐᓱᒍ…

ᐊᐱᕐᓱᑎ: ᐁ ᐃᓘᓐᓰ! ᑐᓵᑦᓯᐸᒻᒪ?

ᓯᐊᔭᒥᒃ ᑲᓲᑎᒍᓐᓇᓯᓚᐅᕐᖁᖓ ᐃᓕᓐᓂᐊᑎᖏᓐᓂᓗ ᐱᖓᓱᓂᒃ ᒣ 10, 2022-ᒥ – ᐊᑕᓂᐊᓘᑉ ᑭᒡᒐᑐᕐᑎᖓ ᐃᓐᓂᐊᑐᕕᓂᐅᑎᓪᓗᒍ ᓄᓇᖓᓄᑦ ᐃᑉᐸᓴᖓᓂ. ᖃᐅᔨᒪᑦᔭᓇᖓ ᖁᐊᕐᓵᓇᕐᑐᓯᐊᖕᖑᖓᓕᒻᒥᒃ ᐊᒥᓱᓂᒃ.

ᐊᐱᕐᓱᑎ: ᑕᒐ, ᐊᑦᔨᖑᐊᓂᑦ ᑕᑯᕐᖃᒥᐅᒐᒪ Facebook-ᒥ. ᖃᐅᔨᓚᐅᕐᑐᖓ ᐊᑕᓂᐊᓘᑉ ᑭᒡᒐᑐᕐᑎᖓ ᒥᐊᔨ ᓭᒪ ᐃᓕᓐᓂᐊᕕᑦᓯᓐᓄᑦ ᑕᑯᓂᐊᕐᑐᕕᓂᐅᑎᓪᓗᒍ ᐃᑉᐸᓴᖅ. ᐁ? ᑐᖕᖓᓱᑦᑎᓚᐅᕐᑕᓯ ᑐᓴᕐᓂᔮᕐᑎᓱᒍ—

ᐃᓕᓐᓂᐊᑏᑦ: ᐋᐋ!!

ᐊᓕᐊᑦᑐᓚᕆᐊᓘᓚᐅᔪᔪᑦ ᐃᑉᐱᓂᐊᕐᓇᓱᓂᓗ ᐊᓕᐊᓐᓂᖓ. ᐅᖄᖃᑎᒌᓐᓂᕗᑦ ᐅᖄᓚᐅᑎᒃᑯᑦ ᓂᐯᑦᑐᒐᒪᐅᕐᖄᓱᓂ ᐊᓯᑦᔨᓴᐅᑎᒋᓚᐅᔪᔪᖅ ᐅᖄᔭᐅᓯᑐᐊᕐᒪᑕ ᐱᓇᓱᐊᕐᑕᕕᓃᑦ.

ᐃᓗᒥᐅᑕᖏᓐᓂᒃ ᑐᓴᕐᑎᒐᓛᐱᒍᒪᕙᒋᑦ. ᐋᓐᑐᔫ, ᔨᐊᓯ, ᕕᒃᑕᓗ ᐳᒃᑭᓂᕐᓴᒥ ᐃᓕᓐᓂᐊᑏᑦ. ᓯᐊᔭᒧᑦ ᐃᓕᓐᓂᐊᑎᑕᐅᑦᓱᑎᒃ, ᐃᓕᓐᓂᐊᓱᑎᒃ ᐱᖕᖑᐊᓂᕐᒥᒃ ᔫᑭᓕᓕ, ᓃᓂᒐᐅᑎᒃ, ᐊᑦᓴᑕᐅᑎᒃ RAV ᐊᒻᒪᓗ ᐃᓄᐃᑦ ᕿᓚᐅᑦᔭᐅᑎᖓᓄᒃ. ᑐᓴᕐᓂᔮᕐᓂᒧᑦ ᐃᓕᓐᓂᐊᕋᑦᓭᑦ ᒪᓕᑦᑕᐅᒋᐊᓖᑦ ᐳᒃᑭᓂᕐᓴᖅ 4, 5, ᐊᒻᒪᓗ 6 ᐃᓕᓐᓂᐊᑎᓄᑦ ᔮᓂᒻᒪᕆᐅᑉ ᐃᓕᓐᓂᐊᕕᖓᓂ, ᐅᕕᒃᑫᑦ ᑐᓴᕐᓂᔮᕐᑎᓯᔩᑦ ᑕᑯᒋᐅᓚᐅᕐᑕᑲ ᐅᐱᒋᓪᓚᕆᑦᓱᒋᓪᓗᔭ.

ᐊᐱᕐᓱᑎ: ᑕᒐ, ᖃᓄᐃᓚᐅᕐᖃ? ᐱᖕᖑᐊᓂᓯ ᖃᓄᐃᓚᐅᕐᖃ?

ᐃᓕᓐᓂᐊᑎ: ᐆ, ᐱᐅᔫᓚᐅᕐᑐᖅ. 

ᐊᐱᕐᓱᑎ: ᐊᑐᐃᓐᓇᕈᑦᑎᒐᓱᐊᒻᒪᕆᓐᓂᕿᓯ ᑕᒪᑐᒧᖓ ᓇᓪᓕᐅᑎᓂᕐᒧᑦ? ᐊᕐᓱᕈᓐᓇᓛᐅᕐᖄ?

ᐃᓕᓐᓂᐊᑎ: ᐊᐅᑲ, ᑌᒣᒪᐅᖕᖏᑐᖅ, ᐊᕐᓱᕈᓐᓇᓚᐅᖕᖏᑐᖅ. ᐊᓕᐊᓇᓚᐅᕐᑐᖅ, ᐊᓕᐊᓇᕐᑐᐊᓘᓚᐅᕐᑐᖅ.

ᓯᐊᔭ ᕋᓱᓪ: ᐊᑐᐃᓐᓇᕈᑦᑎᓚᕆᓚᐅᕐᖁᓰ?

ᐃᓕᓐᓂᐊᑎ: ᐊᐅᑲ, ᐊᐅᑲ, ᐊᐅᑲ, ᑌᒫᕋᓘᖕᖏᑐᖅ.

ᓯᐊᔭ ᕋᓱᓪ: Sᑕᒐ, ᐅᖃᐅᑎᒋᐊᖃᕐᖃᒋᒃ… ᐃᓄᐃᑦ ᕿᓚᐅᑦᔭᐅᑎᖏᓐᓄᑦ, ᐃᓕᓐᓂᐊᑏᑦ ᐊᓯᖏᑦ ᐱᖕᖑᐊᖔᕆ ᐊᖃᓚᐅᔪᔪᑦ ᐊᑕᓂᐊᓘᑉ ᑭᒡᒐᑐᕐᑎᖓᓂᒃ ᑐᓵᕐᓂᔮᕐᑎᓯᓗᑎᒃ. ᐱᒋᐅᕐᓴᕋᓱᐊᒻᒪᕆᖃᑦᑕᓚᐅᔪᔪᒍᑦ. ᑭᓯᐊᓂ, ᐃᓕᓐᓂᐊᓂᖅ ᑖᓐᓇ ᐅᒃᑯᐊᓯᒪᓚᐅᕐᑐᖅ ᐃᑉᐸᓴᖅ ᐃᓕᓐᓂᐊᑎᑦᓯᔨ ᓄᐃᑕᓚᐅᖕᖏᒪᑦ… ᑕᒐ ᐋᓐᑐᔫᓕᐊᕐᓱᖓ, ᐱᒃᑐᒧᑦ ᔨᐊᓯᒧᓪᓗ ᐃᓕᓐᓂᐊᑐᓄᑦ ᓚᓚᐅᕐᑕᑲ “ᐅᐃᒪᓇᕐᑐᒥᒃ ᐱᓇᓱᐊᒻᒪᕆᖁᔨᓕᕐᖁᖓ ᐃᓕᑦᓯᓂᒃ. ᒫᓐᓇ ᐱᒋᐅᕐᓴᕆᐊᖃᓕᕐᖁᓯ ᐅᓪᓗᒥ ᐱᓇᓱᐊᕆᐊᓕᑦᓯᓂᒃ”. ᐱᒋᐊᕐᓱᑦᓪᓗ ᐃᓕᑦᓯᓴᐅᑎᒋᑦᓱᑎᓪᓗ. ᐃᓘᓐᓇᖓᓂᒃ ᐱᔭᕇᓚᐅᕐᑐᑦ ᐱᓯᑎᐊᓘᑦᓱᑎᓪᓗ. ᐱᒻᒪᕆᐊᓘᓚᐅᕐᑐᖅ ᐃᑉᐱᓂᐊᕐᓇᔪᐊᕐᓱᓂ!

ᐃᓕᓐᓂᐊᑎ: ᐅᓪᓗᒥ ᐊᑕᐅᓯᑐᐃᓐᓇᒦ!

ᑕᑕᒥᓚᐅᔪᕗᖓ. ᐱᒐᓱᐊᒻᒪᕆᓐᓇᑐᒃᑯᑦ ᐊᓂᒎᑎᓂᖅ- ᑕᑯᓐᓇᑕᐅᓂᖅ ᓇᓪᓕᐅᑎᕐᓂᒥ, ᐅᐸᓗᐃᔭᐅᑦᓱᓂ ᐆᑦᑑᑎᒋᓗᐊ ᐊᒻᒪᓗ ᐊᑕᓂᐊᓘᑉ ᑭᒡᒐᑐᕐᑎᖓᑕ ᓵᖓᓃᑦᓱᓂᓗ, ᓴᐱᕐᓇᕋᓱᐊᕐᑎᓗᒍ! ᑕᑕᒥᓚᐅᔪᕗᖓ. ᑕᑕᒥᒍᑎᒋᓗᐊᖕᖑᐊᓚᐅᔪᔭᕋ ᐱᖕᖑᐊᕈᓐᓇᕆᐊᒥᒃ ᐊᕐᓱᕈᓐᓇᑐᒃᑰᓱᖓ ᐱᒐᓱᐊᒻᒪᕆᓐᓇᖏᑦᑐᑑᒻᒪᑦ. ᑕᒪᑐᒧᖓ, ᐅᑉᐱᕆᔭᖃᑎᒌᑦᓯᐊᓂᖅ ᐃᓕᓐᓂᐊᑎᓄᑦ ᐃᓕᓐᓂᐊᑎᑦᓯᔨᒧᓪᓗ ᑭᖕᖒᒪᓇᓚᐅᔪᕗᖅ.

ᓴᓇᓱᐊᓛᓕᕆᕚᑦ ᐃᓕᓐᓂᐊᑏᑦ ᑐᓴᕐᓂᔮᕐᑎᓯᓂᕐᒥᒃ ᐊᓕᐊᒋᔭᖃᕐᔪᐊᓕᕋᒥᒃ, ᐃᓱᒪᐅᒐᕐᖂᑐᑎᑦ? ᑲᔪᓯᒍᓐᓇᓛᕐᑐᑦ ᑐᓴᕐᓂᔮᕐᑎᓯᓂᕐᒥᒃ ᐃᓕᓐᓂᐊᓂᕐᒥᓂᒃ ᐳᒃᑭᓂᕐᓴᖅ 6 ᐊᒻᒪᓗ ᐃᓱᒪᓇᕐᑐᖅ – ᐃᓱᒪᓇᒍᓗᑐᐃᓐᓇᑐᖅ – ᑐᓴᕐᓂᔮᕐᑎᓯᓂᕐᒥᒃ ᐃᓕᓐᓂᐊᕆᐊᓪᓚᓗᑎᒃ ᓄᑖᒥᒃ ᒪᓂᔭᐅᒪᓛᕐᖁᑐᑦ ᐳᕐᑐᓂᕐᓴᖅ 3-ᒧᑦ ᑎᑭᐅᑎᑐᐊᕈᑎᒃ. ᐅᕙᓐᓄᓕ, ᑲᔪᓯᑦᓴᓚᐅᕐᐸᑕ ᑐᓴᕐᓂᔮᕐᑎᓯᓂᕐᒥ ᐃᓱᒪᒋᔭᒃᑲ.

ᐃᓕᓐᓂᐊᑎᑦᓯᔨᒋᔭᐅᑦᓱᓂ ᓯᐊᔭ ᐅᖃᓚᐅᕐᑐᖅ ᑲᑎᓚᐅᕋᑕ, “ᑐᓴᕐᓂᔮᕐᑎᓯᓂᕐᒥᒃ ᐃᓕᓐᓂᐊᓃᑦ ᒪᓂᔨᕗᑦ ᖃᓄᐃᖕᖏᓯᐊᕐᓂᒥᒃ ᐊᑑᑎᒐᓱᐊᕐᓂᒥᒃ ᐃᓚᒋᔭᐅᓂᕐᒥᓗ ᐃᑉᐱᓂᐊᕐᓂᒥᒃ. ᓄᓇᕕᒻᒥᐅᓄᑦ, ᐃᓗᕐᕈᓯᒥᓄᑦ ᐱᑐᑦᓯᒪᐅᑕᐅᒍᓐᓇᒥᑦᓱᓂ, ᐊᒻᒪᓗ ᓂᐱᓂᒃ ᓄᑖᓂᒃ ᖃᐅᔨᓴᕐᓂᓂ ᐃᓱᒫᒧᑦ ᓴᓇᒋᐅᕐᓴᓂᕐᓂᒃ.”

ᐅᖄᔭᕗᑦ ᑐᓴᕐᓂᔮᕐᓂᒧᑦ ᐃᓕᓐᓂᐊᓂᕐᒨᓕᖓᓚᐅᔪᒐᓗᐊᕐᑎᓗᒋᑦ, ᐃᑉᐱᒍᓱᓐᓂᕋ ᓱᖑᑦᓴᐅᑎᒋᓚᐅᔪᕗᖅ ᐃᓕᓐᓂᐊᑎᓄᑦ. ᖃᓄᖅ ᐃᑉᐱᓂᐊᓚᐅᔪᒻᒪᖔᑕ ᐱᖕᖑᐊᓱᑎᒃ ᑐᓴᕐᓂᔮᕐᑎᓯᐅᑎᒥᒃ, ᐱᒻᒪᕆᐅᓂᖓ ᐅᖄᒍᓐᓇᓂᖓᑕ ᓇᒻᒥᓂᕐᓗ ᐅᖄᒍᓐᓇᓂᖓ ᐊᒥᓱᕕᑦᓱᓂ ᐅᖃᕐᑕᐅᖃᑦᑕᓚᐅᔪᕗᖅ. “ᕿᓚᒍᑦᔮᑐᔫᔮᓚᐅᔪᕗᖓ ᑐᓴᕐᓂᔮᕐᑎᓯᓕᑐᐊᕋᒪ,” ᐃᓚᖓ ᐊᓕᑦᓱᓂ ᐅᖃᓚᐅᔪᔪᖅ.

ᐊᐱᕐᓱᒋᐊᖕᖓᓯᓚᐅᔪᕗᖓ ᐃᓱᒪᑦᓱᖓ ᑐᓴᕐᓂᔮᕐᓂᒥᒃ ᑐᑭᓯᔭᐅᑎᑦᓯᓂᐊᕐᑐᕆᑦᓯᓱᖓ ᑐᓴᕐᓂᔮᕐᓂᒥᒃ ᐃᓕᓐᓂᐊᓂᕐᒥ ᔮᓂᒻᒪᕆᒻᒥ, ᐱᕙᓪᓕᐊᓂᖓᓂᓪᓗ. ᑐᑭᓯᓚᐅᔪᑦᓱᖓᓗ ᑕᒪᒃᑯᐊ ᐅᕕᒃᑫᑦ ᐃᓄᐃᑦ ᐊᑦᓴᑕᕐᑏᑦ ᑌᒪᖕᖓᓂᐊᓗᒃ ᖃᐅᒪᔪᐊᐱᕕᓂᐅᑎᓪᓗᒋᑦ.

ᐋᓐᑐᔫ, ᔨᐊᓯ ᐊᒻᒪᓗ ᕕᒃᑐ, ᐃᑦᔭᕋᑦᓴᓯᐊᒍᕗᓯ!