ᒪᓐᑐᕆᐊᓪ, ᑯᐯᒃ (ᒫᑦᔨ 17, 2022) – ᓄᑕᐅᓯᓕᕐᑕᐅᒍᑎᖏᓐᓂ ᐱᓇᓱᐊᕐᓂᒧᑦ ᐊᖏᖃᑎᒌᒍᑏᑦ 2015-2020 ᐱᓇᓱᑦᑎᓕᒫᓄᑦ ᑲᑐᑦᔨᖃᑎᒌᓐᓂᖃᕐᑐᓄᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐊᑑᑎᔭᐅᓚᐅᕐᓯᒪᖕᖏᓯᐊᕐᑐᒥᒃ ᐱᒍᓐᓇᓯᓯᒪᕗᖅ ᐊᖏᖃᑎᒌᒍᑎᓕᐅᖃᑎᖃᕐᓱᓂ ᐃᓕᓐᓂᐊᑎᑦᓯᔩᑦ ᑲᑐᑦᔨᖃᑎᒌᓐᓂᖓᓂᒃ. ᑖᒃᑯᐊ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᒍᑎᖏᑦ ᓱᓕᓕᕐᑎᑕᐅᒋᐊᖃᓚᖓᔪᑦ ᑲᑐᑦᔨᖃᑎᒌᓐᓂᒧᑦ ᐃᓚᐅᔪᓄᑦ.

“ᐊᕐᕌᒍᓂ 20-ᓂ ᐊᓂᒍᕐᑐᓂ ᑲᑎᕕᒃ ᐃᓕᓴᕐᓂᓕᕆᓂᖅ ᐱᓇᓱᑦᑏᑦ ᐱᕙᓪᓕᖁᑎᑖᕆᓲᖏᓐᓂᒃ ᓇᓪᓕᖁᐊᕇᓕᕐᑎᓯᒐᓱᐊᓲᖑᒻᒪᑦ ᐊᑦᔨᒌᑦᓯᐊᒥᒃ ᐱᒍᓐᓇᓯᔭᐅᑎᑦᓯᒐᓱᐊᕐᓱᓂ ᐱᓇᓱᑦᑎᓕᒫᓄᑦ. ᐅᓪᓗᒥ ᐱᒍᓐᓇᓯᔪᒍᑦ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᒍᑎᖓᓂᒃ, ᐊᐅᓚᑦᓯᓂᓕᕆᓂᕐᑎᒍᑦ ᐱᒍᓐᓇᕈᑎᑖᕐᑐᑦ ᓯᕗᓂᖓᒍᑦ ᐊᑑᑎᔭᐅᒍᓐᓇᖃᑦᑕᓯᒪᖕᖏᑐᓂᒃ. “ᓄᓇᕕᒻᒥ ᐃᓕᓐᓂᐊᓂᕐᒥ ᐊᑑᑎᓚᐅᕐᓯᒪᖕᖏᓯᐊᕐᑐᒥᒃ ᐊᑑᑎᒋᐅᕐᐳᒍᑦ” ᐅᖃᕐᑐᖅ ᓯᐊᔭ ᐋᓗᐸ, ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᖓᔪᕐᖃᖓ.

ᐱᕙᓪᓕᖁᑎᑖᕈᑏᑦ ᐊᑦᔨᒌᖕᖏᑐᑦ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᓃᑦᑐᑦ ᐃᓕᓐᓂᐊᑎᑦᓯᔨᓄᑦ, ᐃᓚᐅᑎᓪᓗᒍ ᓂᕿᓂᒃ ᐅᓯᔭᐅᑎᑦᓯᒍᑏᑦ ᑮᓇᐅᔭᐅᑎᓪᓗᒍ ᐊᑭᓕᕐᑕᐅᒍᓐᓇᖃᑦᑕᓂᐊᓕᕐᓂᖓ. ᐊᐅᓚᑦᓯᓂᓕᕆᓂᕐᑎᒍᑦ ᐱᓇᓱᐊᕈᑏᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᑑᑎᔭᐅᑎᑕᖏᑦ ᐱᕙᓪᓕᖁᑎᐅᒌᕐᑐᓂᒃ ᐃᓚᒋᐊᕆᓚᖓᔪᑦ ᓄᓇᕕᒻᒥ ᐱᓇᓱᑦᑎᑖᖑᓲᓄᑦ. ᐱᓇᓱᒐᕐᒥᒃ ᓄᕐᙯᓇᕐᑎᓯᑦᑌᓕᒍᑏᑦ, ᐊᐅᓪᓚᕈᓐᓇᐅᑏᑦ ᐊᒻᒪᓗ ᓄᓇᓕᒻᒥ ᐱᓇᓱᑦᑎᑖᖑᓯᒪᓂᕐᒥᓄᑦ ᐱᕙᓪᓕᖁᑎᑖᕈᑎᑦ. ᑖᒃᑯᐊᓗ ᐊᐅᓚᑦᓯᓂᕐᒧᑦ ᐱᒍᓐᓇᐅᑎᑖᕆᔭᐅᔪᑦ ᐊᕐᕌᒍᑕᒫᑦ ᑮᓇᐅᔭᖃᕐᑎᑕᐅᒍᓐᓇᓂᐊᓕᕐᓱᑎᒃ.

“ᐃᓕᓐᓂᐊᕖᑦ ᑭᒡᒐᑐᕐᑎᖏᑦ ᐅᐱᒍᓱᑉᐳᑦ ᐊᔪᐃᓐᓇᓂᕆᖃᑦᑕᓚᐅᕐᑕᖓᓂᒃ ᑲᔪᓯᒃᑫᔨᐅᑉ ᖄᔨᐊ ᑭᓕᐅᑕᐅᑉ ᐱᓇᓱᖃᑎᖏᑦᑕᓗ, ᑖᒃᑯᐊ ᑲᔪᓯᑎᑦᓯᖃᑦᑕᓚᐅᕐᒪᑕ 2016-ᖑᑎᓪᓗᒍ ᑲᔪᓯᒃᑫᔨᐅᖃᑦᑕᓚᐅᔫᑉ ᐋᓂ ᐴᐳᑦ ᐊᒻᒪᓗ ᐃᓕᓐᓂᐊᕖᑦ ᑭᒡᒐᑐᕐᑎᒋᖃᑦᑕᓚᐅᔪᔭᖏᑦᑕ ᐱᓇᓱᐊᖃᑦᑕᓚᐅᔪᒻᒥᔭᖏᓐᓂᒃ. ᑖᒃᑯᐊ ᓴᐱᓕᖃᑦᑕᕋᑎᒃ ᐊᖏᖃᑎᒌᒐᓱᐊᕐᓱᑎᒃ ᐱᔭᖃᕈᓐᓇᓯᓚᐅᕐᑐᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᕐᕌᒍᓂᒃ ᐊᒥᓱᓂᒃ ᐱᒐᓱᐊᓲᖏᓐᓂᒃ. ‘ ᐅᖃᕐᓱᓂ ᓯᐊᔭ ᐋᓗᐸ.

ᐃᓚᖃᕐᒥᑎᓪᓗᒍ, ᑲᑎᕕᒃ ᐃᓕᓴᕐᓂᓕᕆᓂᖅ ᐋᕐᕿᒋᐊᕐᓯᒪᔪᓂᒃ ᓄᑕᐅᓯᓕᕐᑐᓂᒃ ᐊᖏᖃᑎᒌᒐᓱᐊᕐᓂᐅᑉ ᒪᓕᒐᕐᑕᕆᓂᐊᕐᑕᖏᓐᓂᒃ ᐊᖏᖃᑎᒌᒍᑎᖃᕐᓱᓂᓘᓚᐅᕐᑐᖅ ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓᓂᒃ ᑲᕙᒪᒃᑯᓗ ᑮᓇᐅᔭᖃᕐᑎᓯᔨᖏᓐᓂᒃ, ᑖᓐᓇ ᐊᖏᖃᑎᒌᒍᑎ ᐊᑐᕐᑕᐅᖃᑦᑕᓲᖅ ᐊᖏᖃᑎᒌᒐᓱᐊᕐᓂᓂᒃ ᐊᐅᓚᑦᓯᔨᐅᔪᓄᑦ ᒪᓕᒐᖃᕈᑎᐅᑦᓱᓂ ᑲᑎᕕᒃ ᐃᓕᓴᕐᓂᓕᕆᓂᖅ ᐊᖏᖃᑎᒌᒐᓱᐊᕈᑎᖃᓕᑐᐊᕐᒪᑦ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᓂᒃ. ᑖᒃᑯᐊ ᓄᑖᑦ ᒪᓕᒉᑦ 1986-ᒥ ᐃᓂᓪᓚᑕᐅᓚᐅᕐᓯᒪᔪᓄᑦ ᑕᐅᕐᑎᒋᔭᐅᔪᑦ ᑭᖑᓪᓕᐹᒥ ᓄᑕᐅᓯᓕᕐᑕᐅᓚᐅᕐᓯᒪᔪᑦ
1991-ᖑᑎᓪᓗᒍ. ᐱᒍᓐᓇᓯᒍᑎᐅᒻᒥᓱᓂᓗ ᐊᐅᓚᑦᓯᓂᓕᕆᓂᕐᑎᒍᑦ ᐱᓇᓱᐊᕈᑎᐅᖃᑦᑕᓂᐊᓕᕐᑐᓂᒃ ᐱᓇᓱᑦᑎᓂᒃ ᓄᕐᙯᓇᕐᑎᓯᑦᑌᓕᓂᕐᒧᑦ  ᑲᑎᕕᒃ ᐃᓕᓴᕐᓂᓕᕆᓂᐅᓪᓗ ᐱᓇᓱᑦᑎᖃᕐᓂᖓᓄᑦ ᐱᕙᓪᓕᒋᐊᕈᑎᑦᓴᓂᒃ.

ᐊᖏᕐᓂᒥᒍᑦ ᐊᖏᖃᑎᒌᒐᓱᐊᕐᓂᐅᑉ ᒪᓕᒐᕐᑕᕆᓂᐊᕐᑕᖏᓐᓂᒃ, ᐃᓕᓐᓂᐊᕖᑦ ᑭᒡᖓᑐᕐᑎᖏᑦ ᐃᓱᓕᑎᑦᓯᓚᐅᕐᑐᑦ ᑯᐯᑉ ᐃᕐᖃᑐᐃᕕᕐᔪᐊᖓᑎᒎᕈᑎᐅᓯᒪᔪᓂᒃ 2016-ᒥ ᐱᒋᐊᓚᐅᕐᓯᒪᔪᓂᒃ.

“ᑲᑎᕕᒃ ᐃᓕᓴᕐᓂᓕᕆᓂᖅ ᑭᖕᖒᒪᒋᔭᒥᓂᒃ ᐱᓇᓱᐊᖏᓐᓇᓂᐊᕐᑐᖅ ᓯᕗᓪᓕᐅᔭᐅᒋᐊᓕᓐᓂᓗ ᐱᓇᓱᑦᑏᑦ ᒪᓕᒐᑦᓴᖏᓐᓂᒃ ᐱᓇᓱᑦᑎᓂᓪᓗ ᓄᕐᙯᓇᕐᑎᓯᑦᑌᓕᒌᒃᑯᑎᑦᓴᓂᒃ. ᐃᓕᓐᓂᐊᕖᑦ ᑭᒡᒐᑐᕐᑎᖏᑦ ᐳᕿᐊᓱᖕᖏᓯᐊᕐᑐᑦ ᐱᒍᓐᓇᐅᑎᑖᕆᔭᐅᓯᒪᔪᑦ 1975-ᖑᑎᓪᓗᒍ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (17.0.68-ᒦᑦᑐᑦ) ᐊᑑᑎᒍᓐᓇᓯᐊᓛᓕᕐᓂᖏᓐᓂᒃ ᑭᖑᓪᓕᒥ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑏᑦ ᐱᓇᓱᐊᕐᑕᐅᓯᒻᒥᐸᑕ ᐊᕐᕌᒍ,” ᐅᖃᕐᓱᓂ ᓯᐊᔭ ᐋᓗᐸ.

“ᐊᖏᖃᑎᒌᒐᓱᐊᕐᓃᑦ ᑲᔪᓯᒻᒪᑕ ᐱᓇᓱᑦᑎᑐᐃᓐᓇᓂᒃ ᐱᒍᓐᓇᐅᑎᓕᓐᓂᓗ ᑲᑐᑦᔨᖃᑎᒌᓐᓂᓂ ᑭᒡᒐᑐᕐᑐᓂ. ᓂᕆᐅᑦᑐᒍᑦ ᑖᒃᑯᐊ ᐊᖏᖃᑎᐅᓚᖓᓂᖏᓐᓂᒃ ᖃᒻᒥᑯᑦ ᐅᓪᓗᓂ ᙯᔪᓂ,” ᐅᖃᕆᐊᓪᓚᓱᓂ ᓯᐊᔭ ᐋᓗᐸ.

ᐃᓕᓴᕐᓂᓕᕆᓂᖅ:

ᑲᑎᕕᒃ ᐃᓕᓴᕐᓂᓕᕆᓂᖅ, ᐃᓕᓐᓂᐊᓂᓕᕆᔨᒃᑯᑦ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᖑᑎᓪᓗᒍ, ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ (ᐊᖏᖃᑎᒌᓐᓂᖅ). 1978-ᒥᓂᑦ ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑐᐊᖑᑦᓱᓂ ᐱᑕᖃᕐᑎᓯᔪᖅ ᐃᓕᓐᓂᐊᓂᕐᒨᓕᖓᔪᓂᒃ ᐱᒍᑦᔨᐅᑎᓂᒃ ᓄᓇᕕᒻᒥᐅᓄᑦ.  ᐃᓕᓐᓂᐊᓂᕐᒨᓕᖓᔪᑦ ᐱᓇᓱᐊᕐᑕᐅᔪᑦ ᐱᕙᓪᓕᐊᑎᓯᒪᔭᖏᑦ ᐃᓕᓐᓂᐊᓂᓕᕆᓂᐅᑉ ᐊᑐᐃᓐᓇᐅᑎᑕᐅᕗᑦ ᐃᓘᓐᓇᖏᓐᓂᑦ ᐃᓕᓐᓂᐊᕕᖏᓐᓂᑦ 14-ᓂᑦ ᓄᓇᕕᒻᒥ ᓄᓇᓕᓐᓂ, ᐃᓄᒃᑎᑑᕐᖄᓱᑎᒃ ᐅᖃᐅᓯᕐᖄᒥᓂᒃ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐁᑉᐱᐅᑎᖃᕐᑎᓪᓗᒍ ᐅᖃᐅᓯᖓ.  ᐃᓕᓐᓂᐊᓂᓕᕆᓂᖅ ᐊᐅᓚᑦᓯᔪᖅ 17-ᓂᒃ ᐃᓕᓐᓂᐊᕕᓐᓂᒃ ᐳᒃᑭᓂᕐᓴᓂᒃ ᐳᕐᑐᓂᕐᓴᓂᓪᓗ ᐊᒻᒪᓗᑦᑕᐅ 6-ᓂᒃ ᐃᓄᒻᒪᕇᑦ ᐃᓕᓐᓂᐊᕕᖏᓐᓂᒃ. ᑐᑭᓯᒋᐊᑦᓯᐊᕕᑦᓴᖅ ᖃᕆᑕᐅᔭᒃᑯᑦ: kativik.qc.ca.

— 30 —

ᑐᑭᓯᒋᐊᕐᕕᓴᖅ:

ᔮᑦ ᑐᓯᓅ-ᐱᕐᓀ
ᑐᓴᕋᑦᓴᓕᕆᕕᒻᒥ ᐊᑕᐅᑦᓯᑰᕐᑎᓯᔨ
514 797-8220
publicrelations@kativik.qc.ca