ᐊᐱᕆᔭᐅᓂᖓ ᑳᓓ ᐃᓄᑉᐸᐅᑉ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᑕ ᒥᑦᓵᓄᑦ

2019 | 06 | 5
ᐅᓂᒃᑳᑦ

ᐊᑐᐃᓐᓇᕈᕐᑎᐸᓪᓕᐊᓕᕐᓱᑕ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒧᑦ, ᐃᑦᓯᕙᖃᑕᐅᒋᑦ ᐅᕙᑦᑎᓄᑦ ᐃᓚᖏᓪᓗ ᐃᓕᓐᓂᐊᑎᑦᓯᔨᐅᓚᐅᔪᑦ ᐊᕐᕌᓂ ᐃᓕᓐᓂᐊᑕᐅᔪᓂ. ᔪᓓ 2018-ᒥ, ᐊᐱᕆᓚᐅᔪᔪᒍᑦ ᕉᑕ ᐃᔨᑭᐅᓪᒥᒃ, ᕕᓂ ᐹᕋᓐᒥᒃ, ᓕᓯ ᑑᒪᓯᒥᒃ, ᖂᑉᐱᐊ ᑫᑦᑕᖅ ᐊᒻᒪᓗ ᑳᓓ ᐃᓄᑉᐸᖅ. ᐅᕙᑦᑎᓂᒃ ᐅᖃᐅᑦᔩᓚᐅᔪᑦ ᓱᓇᓂᒃ ᐃᓕᓐᓂᐊᑎᑦᓯᒍᑎᖃᓛᕐᓂᒥᓂᒃ, ᐊᒻᒪᓗ ᐅᖄᕐᓱᑎᒃ ᐃᓱᒪᒋᔭᒥᓂᒃ ᖃᓄᖅ ᐱᒻᒪᕆᐅᓂᕕᓂᖏᓐᓂᒃ ᐃᓄᐃᑦ ᐃᓕᓐᓂᐊᑎᑦᓯᔨᐅᖃᑎᒌᑦ ᐊᕐᕌᒍᓂ ᐊᓂᒍᕐᑐᓂ. ᐅᓪᓗᒥ ᑲᑎᓯᓚᖓᕗᒍᑦ ᑳᓓ ᐃᓄᑉᐸᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐅᖃᐅᑎᓚᐅᕐᑎᒍᑦ ᐃᕝᕕᑦ ᒥᑦᓵᓄᑦ ᐊᒻᒪᓗ ᓇᓂᒥᐅᔭᐅᒻᒪᖔᕐᐱᑦ…
ᑳᓓ ᐃᓄᑉᐸᖅ: ᑳᓓ ᐃᓄᑉᐸᐅᕗᖓ ᐃᓄᑦᔪᐊᒥᐅᔭᐅᑦᓱᖓ. ᐃᓕᓴᕐᓂᓕᕆᓂᕐᒥ ᐱᓇᓱᐊᓚᐅᕐᓇᖓ, ᓂᐅᕕᕐᓂᐊᑎᑦᓯᔨᐅᖃᑦᑕᓯᒪᕗᖓ The Bay-ᒥ Northern-ᖑᓚᐅᕐᑎᓇᒍ. ᑕᐃᒪ ᐱᓇᓱᐊᓯᓯᒪᒻᒥᔪᖓ ᑐᓵᔨᐅᑦᓱᖓ ᑐᓵᖕᖏᑐᓄᑦ ᐃᓕᓐᓂᐊᑎᓄᑦ ᐊᕐᕌᒍᓐᓂ ᒪᕐᕉᓂ. ᑕᐃᒪ ᐃᓕᓐᓂᐊᑎᑦᓯᔨᕈᕐᓂᐊᓕᕋᒪ. ᐃᓕᓐᓂᐊᑎᑦᓯᓯᒪᔪᖓ ᐳᕐᑐᓂᓕᓐᓂᒃ 2-ᓂᒃ ᐊᑯᓂᐊᓗᒃ ᑕᐃᒪ ᐳᕐᑐᓂᓕᓐᓂᒃ 4, 5 ᐊᒻᒪᓗ 6-ᓂᒃ. ᐱᓇᓱᐊᕐᓯᒪᒻᒥᔪᖓ ᐃᓕᓐᓂᐊᑎᑦᓯᔨᓂᒃ ᐱᒋᐅᕐᓴᑎᑦᓯᓂᕐᒧᑦ ᐃᓱᐊᕐᓭᔨᐅᑦᓱᖓ. ᐅᑎᕋᒪ ᐃᓕᓐᓂᐊᑎᑦᓯᔨᐅᓂᕐᒧᑦ, ᐃᓕᓐᓂᐊᑎᑦᓯᓯᒪᔪᖓ ᐃᓄᑦᑎᑐᑦ ᐳᕐᑐᓂᕐᓴᒥ 1-ᒥ ᓯᕗᓪᓕᒥ ᐃᓕᓐᓂᐊᓂᖏᓐᓂ ᐃᓕᓐᓂᐊᑐᓂᒃ. ᒫᓐᓇᐅᔪᖅ, ᐱᓇᓱᐊᕐᑐᖓ ᐃᓄᑦᑎᑐᑦ ᐃᓕᓐᓂᐊᑎᑦᓯᔨᐅᑦᓱᖓ ᐳᕐᑐᓂᕐᓴᒥ 2-ᒥ ᑐᖓᓕᖓᓂᒃ ᐃᓕᓐᓂᐊᑐᓂᒃ. ᖃᐅᔨᒪᑦᓯᐊᓚᕐᔭᒃᑲ ᐃᓘᓐᓇᑎᒃ ᐃᓕᓐᓂᐊᑏᑦ!

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓇᓪᓕᐊᓃᒃ ᐃᓕᓐᓂᐊᑎᑦᓯᓯᒪᕕᑦ ᑕᒃᑲᓂ ᐅᐱᕐᖔᒥ?
ᑳᓓ ᐃᓄᑉᐸᖅ: ᐃᓕᓐᓂᐊᑎᑦᓯᓯᒪᕗᖓ ᐅᖃᐅᓯᕐᒧᑦ ᑕᑯᒥᓇᕐᑐᓕᐅᕐᓂᒥᒃ. ᑕᒃᑲᓂ ᐃᓕᓐᓂᐊᒐᕐᒥ, ᐃᓕᓐᓂᐊᑎᑦᓯᔩᑦ ᐆᑦᑐᑎᒋᓗᒍ ᐃᓕᓐᓂᐊᓚᐅᔪᑦ ᖃᓄᐃᓘᕐᓗᑎᒃ ᐊᓪᓚᓂᐊᒐᓕᐅᕈᓐᓇᒪᖔᑖ ᐅᓂᒃᑰᑐᐊᕐᑐᓂᒃ, ᐃᑲᔪᕐᓯᒍᓐᓇᑐᓂᒃ ᐃᓕᓐᓂᐊᑎᓂᒃ ᐅᖄᒍᓯᖏᓐᓂᒃ ᐱᕙᓪᓕᐊᑎᑦᓯᒍᓐᓇᑐᒥᒃ. ᖃᐅᔨᑎᑦᓯᓚᐅᔪᒍᑦ ᐊᑦᔨᒌᖕᖏᑐᓂᒃ ᖃᕆᑕᐅᔭᑎᕈᑎᓂᒃ ᐊᒻᒪᓗ ᐃᑲᔪᕐᓯᒍᓐᓇᑐᓂᒃ ᑖᒃᑯᓄᖕᖓᓕᖓᔪᓂᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᒦᒃ ᐊᐅᓚᔨᔭᖃᓗᐊᖕᖑᐊᓚᖓᕕᑦ ᑖᑦᓱᒪᖕᖓᑦ ᐃᓕᓐᓂᐊᑕᐅᔪᕕᓂᕐᒥᒃ ᐊᒻᒪᓗ ᑕᒃᑲᓂ ᐃᓕᓐᓂᐊᑐᕕᓂᕐᓂᒃ?
ᑳᓓ ᐃᓄᑉᐸᖅ: ᐊᓕᐊᒋᓂᕐᐹᕆᓚᐅᔭᕋ ᐃᓕᓐᓂᐊᑎᑦᓯᔩᑦ ᐱᓇᓱᐊᕈᑎᓂᒃ ᐃᓕᓐᓂᐊᑎᓚᐅᔭᕗᓐᓂᒃ ᐊᑐᕋᓱᐊᕐᑎᓗᒋᑦ. ᐆᑦᑐᕋᑐᐊᕋᒥᒃ, ᐃᑲᔪᕐᓯᓚᕆᓲᖅ ᐃᓕᑦᓯᓂᖏᓐᓂᒃ ᐊᒻᒪᓗ ᐊᑐᓛᕐᑐᓴᕆᔭᖏᑦ ᐃᓕᓐᓂᐊᕕᖏᓐᓂᒃ. ᑕᒃᑲᓂ ᐃᓕᓐᓂᐊᒐᕐᒥ, ᐊᐅᓚᔨᓚᖓᔭᒃᑲ ᐃᔪᕿᑕᕐᓂᕆᖃᑦᑕᓚᐅᔭᕗᑦ ᑐᓵᑦᓱᑕ ᐃᖕᖏᕈᓯᕐᓂᒃ ᐃᓕᓐᓂᐊᓱᑕ. ᑐᑭᓯᓂᕐᓗᖃᑦᑕᓚᐅᔪᒻᒪᑕ ᐃᖏᕐᕈᓯᐅᑉ ᐅᖃᐅᓯᖏᓐᓂᒃ…

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐃᓕᓐᓂᑎᑦᓯᔨᓂᒃ ᐱᑖᖁᔨᕕᑦ ᑕᒃᑲᖓᑦ ᐃᓕᓐᓂᐊᑕᐅᔪᒥᑦ?
ᑳᓓ ᐃᓄᑉᐸᖅ: ᐃᓕᓐᓂᐊᑎᑦᓯᔨᓂᒃ ᐊᑐᖁᔨᕗᖓ ᐃᓕᑦᑕᕕᓂᕐᒥᓂᒃ ᑕᒃᑲᓂ ᐱᓇᓱᐊᕈᓰᓐᓂ ᒪᕐᕉᓂ. ᐆᑦᑐᕋᖁᔭᒃᑲ ᐃᓕᓐᓂᐊᕕᒻᒥᓂ. ᐃᓚᖏᑦ ᓛᕐᑐᑦ ᓇᓗᓇᖕᖏᑐᖅ. ᑕᑯᑐᐊᕋᒃᑭᑦ ᐊᓯᖏᓐᓂ ᐃᓕᓐᓂᐊᑕᖏᓐᓂ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑦᓯᓂᕐᒧᑦ ᐃᓕᓐᓂᐊᑎᑦᓯᒍᑎᖏᓐᓂ, ᐃᓚᖏᑦ ᐃᓕᓐᓂᐊᑎᑦᓯᔩᑦ ᐅᖄᓲᑦ ᐅᕙᓐᓄᑦ ᖃᓄᐃᓐᓂᒪᖔᑦ ᐆᑦᑐᕋᕐᑎᓗᒋᑦ ᐃᓕᑦᑕᕕᓂᕐᒥᓂᒃ. ᐊᓕᐊᓇᕐᑑᓲᖅ ᑐᓴᕆᐊᒥᒃ ᐅᖃᐅᓯᑦᓴᖏᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ ᐃᓕᑦᑕᕕᓂᖏᓐᓂᒃ ᐊᒻᒪᓗ ᖃᓄᐃᓘᕐᓂᕕᓂᖏᓐᓂᒃ ᐃᓕᓐᓂᐊᑎᒥᓄᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓯᕗᓪᓕᐹᒥ ᐃᓕᓐᓂᐊᑎᑦᓯᔨᐅᓯᒪᖕᖏᑐᑎᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐃᓕᓐᓂᐊᑎᑦᓯᒍᑎᖏᓐᓄᑦ, ᐃᓚᐃ?
ᑳᓓ ᐃᓄᑉᐸᖅ: ᓱᓕᔪᖅ. ᐊᒥᓱᕕᑦᓱᖓ ᐃᓕᓐᓂᐊᑎᑦᓯᖃᑦᑕᓯᒪᓕᕐᑐᖓ ᐅᐱᕐᖔᒥ ᐃᓕᓐᓂᐊᑐᓄᑦ ᐊᒻᒪᓗ ᐅᑭᐅᒥ ᐃᓕᓐᓂᐊᓂᖓᓐᓄᒐᓴᒃ. ᐃᓕᓐᓂᐊᑎᑦᓯᓲᖑᔪᖓ ᕿᑎᖔᓃᑦᑐᓄᑦ ᐃᓄᑦᑎᑐᑦ ᐊᓪᓚᒍᓯᕐᒥᒃ. ᓯᕗᓪᓕᐹᒥ ᑖᑦᓱᒥᖓ ᐃᓕᓐᓂᐊᑎᑦᓯᓚᐅᔪᖓ. ᐃᓗᓕᖏᑦ ᐊᑦᔨᒋᖕᖏᑕᐹᓗᒋᓚᐅᔭᖏᑦ ᐃᓕᓐᓂᐊᑎᑦᓯᒍᑎᒋᓲᒃᑲᓂᑦ. ᐃᓱᕐᕆᒋᓂᕐᓴᕆᓛᓕᕐᑕᑲ ᐃᓗᓕᖏᑦ ᑭᖑᓪᓕᒥ. ᐊᓕᐊᒋᓚᐅᔭᕋ ᐱᓇᓱᐊᕋᑦᓴᖏᑦ ᑕᒃᑲᓂ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐊᑐᐃᓐᓇᕈᕐᑎᒋᐊᖃᓚᐅᔪᕕᑦ ᑖᑦᓱᒥᖓ ᐃᓕᓐᓂᐊᑎᑦᓯᓚᐅᕐᓇᒃ ᐃᓕᓐᓂᐊᒐᕐᒥᒃ ᐅᐱᕐᖔᒥ ᐃᓕᓐᓂᐊᑎᑦᓯᒍᑎᒥᒃ ?
ᑳᓓ ᐃᓄᑉᐸᖅ: ᐱᓇᓱᐊᕈᓯᓕᒫᒥ ᐊᑐᐃᓐᓇᕈᕐᑎᒋᐊᖃᓲᖑᔪᒍᑦ, ᒪᕐᕉᒃ ᐃᓕᓐᓂᐊᑎᑦᓯᔩᓪᓗ ᐊᒻᒪᓗ ᖃᐅᔨᒋᐊᕐᕕ ᐃᑲᔪᕐᓯᒍᑎᓂᒃ ᐱᑕᖃᕐᑎᓯᓚᖓᔪᖅ. ᑖᓐᓇ ᐊᑐᐃᓐᓇᕈᕐᑎᓂᒃ ᐊᑐᕐᓂᖃᓪᓚᕆᓚᐅᔪᖅ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐱᔭᕇᕈᑎᑖᕐᓯᒪᒻᒥᔪᑎᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐃᓕᓐᓂᐊᑎᑦᓯᒍᑎᖏᓐᓄᑦ ᐃᓓ?
ᑳᓓ ᐃᓄᑉᐸᖅ: ᐊᐊ, ᐃᓕᓐᓂᐊᕕᕐᔪᐊᒥ ᐳᕐᑐᓂᕐᓴᐅᑉ ᐊᓪᓕᖓᓂ ᐃᓕᓐᓂᐊᓂᓕᕆᓂᕐᒥ ᐱᔭᕇᕈᑎᑖᕐᓯᒪᕗᖓ. ᐱᔭᕇᕐᓯᒪᔪᖓ 2014-ᒥ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᐅᕚ ᐃᓕᓐᓄᑦ ᐱᒻᒪᕆᐅᓂᕐᐸᐅᓯᒪᔪᖅ ᐱᒍᓐᓇᓯᓯᒪᔦᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐃᓕᓐᓂᐊᑎᑦᓯᒍᑎᖏᓐᓂ?
ᑳᓓ ᐃᓄᑉᐸᖅ: ᐅᕙᓐᓅᑦ? ᐃᓕᓐᓂᐊᑎᑦᓯᔨᐅᑦᓱᖓ ᐃᓐᓇᓕᒻᒥ, ᐃᓕᓐᓂᐊᑎᓂᒃ ᖃᓂᑕᖃᓪᓚᕆᑦᑐᖓ. ᑲᔪᓯᑦᓯᐊᖁᔭᒃᑲ. ᐊᑦᔨᒌᖕᖏᑐᓂᒃ ᐱᒍᓐᓇᓂᖃᑦᓯᐊᒪᑕ. ᐱᒍᓐᓇᓯᑎᒍᒪᔭᒃᑲ ᑖᒃᑯᓂᖓ ᐱᒍᓐᓇᑕᖏᓐᓂᒃ ᑕᑯᑎᓗᒋᑦ, ᐱᕙᓪᓕᐊᑎᑦᓯᒍᓐᓇᓯᖁᓗᒋᑦ. ᑌᒣᒻᒪᑦ ᓯᕗᓪᓕᐹᒥ ᐃᓕᓐᓂᐊᑎᑦᓯᔨᐅᑦᓱᖓ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓂ ᐃᓕᓐᓂᐊᓂᕐᒧᑦ, ᑕᒃᑲᖓᑦ ᐱᓯᒪᔪᖓ. ᐃᓱᒪᓯᒪᔪᖓ ᐱᔭᕆᐊᑐᔫᓚᖓᒋᐊᖓᓂᒃ ᐃᓕᓐᓂᐊᑎᑦᓯᓗᓂ ᐃᓕᓐᓂᐊᑎᑦᓯᔨᓂᒃ, ᐃᓱᒪᑦᓱᖓ ᐅᕙᓐᓂ ᖃᐅᔨᒪᓂᕐᓴᐅᓚᖓᓂᖏᓐᓂᒃ. ᑭᓯᐊᓂ ᕿᑎᖓᓃᑦᑐᒥᒃ ᐃᓄᑦᑎᑐᑦ ᐃᓕᓐᓂᐊᑎᑦᓯᓱᖓ ᐊᒻᒪᓗ ᐅᖄᒍᓯᕐᒧᑦ ᐃᓕᓐᓂᐊᑎᑦᓯᓂᕐᒥᒃ, ᐃᓄᒻᒪᕇᑦ ᑌᒪᑦᓭᓇ ᐅᕕᒐᕐᑐᑎᓄᑦ ᑌᒣᑦᑐᒥᔪᑦ ᐃᓕᓐᓂᐊᓕᕋᒥᒃ! ᐊᓕᐊᓇᕐᑐᓚᕆᐊᓗᒃ! ᑐᑭᓯᑐᐊᕐᒪᑕ ᐃᓕᓐᓂᐊᑎᑦᓯᒍᑎᑎᓐᓂᒃ, ᑐᑭᓯᑦᓯᐊᑐᐊᕐᒪᑕ, ᐊᓕᐊᓱᓕᓪᓚᕆᓲᑦ, ᐊᓕᐊᓇᕐᓂᐹᖅ ᑕᒪᓐᓇ! ᐊᓕᐊᒋᓯᒪᔭᕋ ᖃᐅᔨᒋᐊᖓ ᐃᓄᒻᒪᕇᑦ ᐊᒻᒪᓗ ᐅᕕᒐᕐᑐᐃᑦ ᐊᑦᔨᒌᒥᒃ ᐃᓕᑦᓯᒍᓯᖃᓲᖑᒻᒪᑕ. ᑐᑭᓯᒪᓂᕐᑖᕆᓯᒪᔭᕋ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᑦᑕ ᐃᓕᓐᓂᐊᑎᑦᓯᒍᑎᖏᓐᓂ. ᐊᓯᒋᐊᓪᓚᖓ ᐃᓕᑦᓯᒍᑎᒋᓯᒪᔭᕋ ᐃᓚᒌᓐᓂᖅ. ᖃᓂᑕᖃᓪᓚᕆᑦᑐᖓ ᐊᓯᖏᓐᓂᒃ ᐃᓕᓐᓂᐊᑎᑦᓯᔨᓂᒃ, ᐱᖃᑎᒋᔮᕐᑕᑲ ᐊᒻᒪᓗ ᐃᓚᒋᔮᕐᓱᒋᑦ. ᐊᑯᓂᐅᓕᕐᑐᖅ ᖃᐅᔨᒻᒫᕆᓕᕐᑕᑲ ᐊᒻᒪᓗ ᐊᓕᐊᓇᕐᑐᑰᓱᖑᔪᒍᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᕐᒧᑦ ᐃᓕᓐᓂᐊᑎᑕᐅᑎᓪᓗᒋᑦ. ᖃᐅᔨᒻᒫᑖᕐᓯᒪᔪᖓ ᐃᓕᓐᓂᐊᑎᑦᓯᔨᓂᒃ ᓄᓇᕕᓕᒫᒥ ᐱᓯᒪᔪᓂᒃ, ᐅᕙᓐᓄᑦ ᐆᒻᒪᑎᒐᓄᑦ ᑲᓂᑦᑐᓚᕆᓐᓂᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐅᖃᐅᑎᒐᔭᕐᑕᑎᑦ ᐅᕕᒐᕐᓂᓭᑦ ᓄᓇᕕᒻᒥᐅᑦ ᐃᓕᓐᓂᐊᑐᑦᓯᔨᐅᓂᕐᒥᒃ ᐱᓇᓱᒐᕐᑖᕈᒪᓚᖓᔪᑦ?
ᑳᓓ ᐃᓄᑉᐸᖅ: ᐅᖃᐅᑎᓲᒃᑲ ᐃᓕᓐᓂᐊᑎᒃᑲ ᓱᓇᑐᐃᓐᓇᕈᒍᓐᓇᓂᖏᓐᓂᒃ. ᑭᓇᑐᐃᓐᓇᖅ ᓱᓇᑐᐃᓐᓇᒥᒃ ᐃᓕᓐᓂᐊᕈᒪᒍᓂ ᐱᒍᓐᓇᓂᖏᓐᓂᒃ. ᐃᓕᓐᓂᐊᑎᑦᓯᔨᐅᒍᒪᑦᓴᓂᕈᕕᑦ ᑲᔪᓯᖁᒐᔭᕐᖃᒋᑦ!