ᐊᑐᐃᓐᓇᕈᕐᑎᐸᓪᓕᐊᓕᕐᓱᑕ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᓐᓄᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒧᑦ, ᐃᑦᓯᕙᖃᑕᐅᒋᑦ ᐅᕙᑦᑎᓄᑦ ᐃᓚᖏᓪᓗ ᐃᓕᓐᓂᐊᑎᑦᓯᔨᐅᓚᐅᔪᑦ ᐊᕐᕌᓂ ᐃᓕᓐᓂᐊᑕᐅᔪᓂ. ᔪᓓ 2018-ᒥ, ᐊᐱᕆᓚᐅᔪᔪᒍᑦ ᕉᑕ ᐃᔨᑭᐅᓪᒥᒃ, ᕕᓂ ᐹᕋᓐᒥᒃ, ᓕᓯ ᑑᒪᓯᒥᒃ, ᖂᑉᐱᐊ ᑫᑦᑕᖅ ᐊᒻᒪᓗ ᑳᓓ ᐃᓄᑉᐸᖅ. ᐅᕙᑦᑎᓂᒃ ᐅᖃᐅᑦᔩᓚᐅᔪᑦ ᓱᓇᓂᒃ ᐃᓕᓐᓂᐊᑎᑦᓯᒍᑎᖃᓛᕐᓂᒥᓂᒃ, ᐊᒻᒪᓗ ᐅᖄᕐᓱᑎᒃ ᐃᓱᒪᒋᔭᒥᓂᒃ ᖃᓄᖅ ᐱᒻᒪᕆᐅᓂᕕᓂᖏᓐᓂᒃ ᐃᓄᐃᑦ ᐃᓕᓐᓂᐊᑎᑦᓯᔨᐅᖃᑎᒌᑦ ᐊᕐᕌᒍᓂ ᐊᓂᒍᕐᑐᓂ. ᐅᓪᓗᒥ ᑲᑎᓯᓚᖓᕗᒍᑦ ᓗᐃᓴ ᑑᒪᓯᒥᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐅᖃᐅᑎᓚᐅᕐᑎᒍᑦ ᑭᓇᐅᓂᕐᓂᒃ ᐊᒻᒪᓗ ᓇᓂᒥᐅᔭᐅᓂᕐᓂᒃ…
ᓗᐃᓴ ᑑᒪᓯ: ᓗᐃᓴ ᑑᒪᓯᐅᕗᖓ ᑲᖏᕐᓱᒥᐅᔭᐅᑦᓱᖓ. ᐃᓕᓐᓂᐊᑐᓕᕆᕕᒻᒥ ᐱᓇᓱᐊᓲᖑᔪᖓ, ᐃᓕᓐᓂᐊᕈᑎᑦᓴᓕᐅᕐᑎᐅᓱᖓ. ᑲᒪᒋᔭᖃᕐᑐᖓ ᐳᐅᕐᑐᓂᕐᓴᒥ ᐃᓕᓐᓂᐊᑕᐅᓲᓂ ᐊᑑᑎᔪᕕᓂᕐᓄᑦ ᐃᓕᓐᓂᐊᕈᑎᖏᓐᓄᑦ. ᐱᓇᓱᒐᕆᓗᐊᖕᖑᐊᑕᕋ ᐃᓚᐅᓕᕐᑎᓯᓂᕐᒧᑦ ᓄᓇᖃᕐᖄᓯᒪᔪᐃᑦ ᐊᑑᑎᓯᒪᔭᖏᓐᓂᒃ ᐃᓗᓕᖏᓐᓅᔦᑦᓱᖓ ᑯᐯᒻᒥ ᐊᑑᑎᔭᐅᓯᒪᔪᓂᒃ ᐃᓕᓐᓂᐊᑎᑦᓯᒍᑎᖏᓐᓄᑦ. ᐱᓇᓱᐊᕐᒥᓱᖓᓗ ᐱᕙᓪᓕᐊᔭᐅᓂᖓᓄᑦ ᓄᓇᕕᒻᒥ ᐊᑑᑎᔭᐅᓯᒪᔪᓂᒃ ᕿᒥᕐᕈᐊᓕᐅᕐᓂᖅ, ᐱᓇᓱᐊᖃᑎᖃᕐᓱᑕ ᐊᕙᑕᖅ ᐱᐅᓯᑐᖃᓕᕆᕕᖓᓂᒃ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐃᓕᓐᓂᐊᑎᑦᓯᓯᒪᕕᑦ ᐅᐱᕐᖔᒥ ᐃᓕᓐᓂᐊᑎᑦᓯᓂᕐᒥ?
ᓗᐃᓴ ᑑᒪᓯ: ᐃᓕᓐᓂᐊᑎᑦᓯᓯᒪᔪᖓ ᐱᐊᕋᕐᓄᑦ ᐊᓪᓚᓕᕆᓂᕐᒥᒃ ᐃᓕᓐᓂᐊᒐᕐᒥᒃ. ᑐᕌᒐᖓ ᐃᓕᓐᓂᐊᑕᐅᔫᑉ ᐃᓕᓐᓂᐊᑎᑦᓯᔨᓂᒃ ᐃᓕᑕᕆᔭᖃᓕᕐᑎᓯᓂᕐᒥᒃ ᐊᑦᔨᒌᖕᖏᑐᓂᒃ ᐳᕐᑐᓂᓕᓐᓂᒃ ᐊᒻᒪᓗ ᐊᑦᔨᒌᖕᖏᓂᑐᒃ ᐊᓪᓚᓂᐊᒐᑦᓴᓂᒃ ᐃᓕᓐᓂᐊᑏᑦ ᐃᓕᑦᓯᕕᒋᒍᓐᓇᑕᖏᓐᓂᒃ. ᒪᓕᓪᓗᒍ ᐱᐊᕋᐅᑉ ᐃᑉᐱᒍᓱᓐᓂᖓ ᐃᓕᑦᓯᒍᓐᓇᑕᒥᓂᒃ, ᐊᑦᔨᒌᖕᖏᑐᓂᒃ ᐃᓕᓐᓂᐊᑏᑦ ᐃᓕᓐᓂᐊᓂᕐᒧᑦ ᐱᓇᓱᐊᕈᑏᑦ ᓇᓗᓀᕐᑕᐅᓯᒪᔪᑦ ᐊᑐᕐᑕᐅᒍᓐᓇᑐᑦ ᐃᓕᓐᓂᐊᑎᑦᓯᔨᓄᑦ. ᐆᑦᑐᑎᒋᓗᒍ, ᐊᑕᐅᓯᖅ ᐃᓕᓐᓂᐊᑎ ᐃᓕᑦᓯᒍᓐᓇᑐᖅ ᓱᓕᔫᖕᖏᑐᓂᒃ ᐊᓪᓚᓂᐊᕐᓗᓂ, ᐊᑕᐅᓯᖅ ᐃᓕᑦᓯᒍᓐᓇᑎᓪᓗᒍ ᐃᔪᕐᓇᑐᓂᒃ ᐊᓪᓚᓂᐊᕐᓗᓂ. ᐃᓕᓐᓂᐊᑎᓪᓗᒋᑦ, ᐃᓕᓐᓂᐊᑎᑦᓯᔩᑦ ᕿᒥᕐᕈᒍᓐᓇᓯᓚᐅᔪᑦ, ᓇᓗᓀᕐᓯᓗᑎᒃ ᓱᓀᑦ ᐱᐅᔫᒻᒪᖔᑕ ᐃᓕᓐᓂᐊᑎᒧᑦ ᐅᕝᕙᓘᓐᓃᑦ ᐅᑭᐅᓕᓐᓄᑦ ᐊᑦᔨᒌᖕᖏᑐᓂᒃ. ᐊᒥᓱᓂᒃ ᐱᓇᓱᐊᕈᑎᖃᕈᓐᓇᑐᑦ ᐋᕐᕿᓱᕐᑕᐅᒍᓐᓇᑐᓂᒃ ᐊᓪᓚᓂᐊᒐᖅ ᐅᓂᒃᑳᑐᐊᖏᑦ ᒪᓕᓪᓗᒋᑦ. ᑖᒃᑯᓂᖓ ᐱᓇᓱᐊᓚᐅᔪᒻᒥᔪᒍᑦ ᐃᓕᓐᓂᐊᑎᑦᓯᔩᓪᓗ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓃᒃ ᐃᓕᓐᓂᐊᑎᑦᓯᔨᓂᒃ ᐱᒍᓐᓇᓯᖁᔨᓚᐅᔪᕕᑦ ᑕᒃᑲᖓᑦ ᐃᓕᓐᓂᐊᑎᑦᓯᒍᑎᒥᑦ?
ᓗᐃᓴ ᑑᒪᓯ: ᐃᓕᓐᓂᐊᑎᑦᓯᔨᓂᒃ ᐃᓕᑦᓯᖁᔨᓚᐅᔪᕗᖓ ᐃᓕᑕᕐᓯᒍᓐᓇᓯᓗᑎᒃ ᐊᑐᕐᓂᖃᕐᓂᐹᒥᒃ ᐃᓕᓐᓂᐊᑎᑦᓯᒍᓯᕐᒥᒃ ᐊᑐᕈᓐᓇᑕᖓᓂᒃ ᐃᓕᓐᓂᐊᑎᓄᑦ ᐅᕝᕙᓘᓐᓃᑦ ᐳᕐᑐᓂᖏᓐᓄᑦ. ᐱᒻᒪᕆᐅᒻᒪᑦ ᐃᓕᓐᓂᐊᑎᑦᓯᔨᓄᑦ ᐊᑐᕐᓂᖃᑦᓯᐊᓂᖓ ᓇᓗᓀᕐᓯᒍᓐᓇᓂᖓᓄᑦ ᐃᓕᓐᓂᐊᑎᖏᑦ ᓴᖕᖏᑑᑉᐸᑕ, ᐃᓕᑦᓯᕙᓪᓕᐊᓂᖏᑦ ᓈᒻᒪᓈᕐᑐᑦ ᐊᒻᒪᓗ ᐃᓕᑦᓯᒍᐊᕐᑐᐃᑦ ᐊᒻᒪᓗ ᖃᐅᔨᒪᓗᑎᒃ ᓱᓀᑦ ᐊᑐᕐᓂᖃᕐᒪᖔᑕ ᐊᒻᒪᓗ ᓱᓀᑦ ᐊᑐᕐᓂᖃᖕᖏᑑᒻᒪᖔᑖ ᐃᓕᓐᓂᐊᑎᖏᓐᓄᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᓪᓗᑐᕐᒦᒃ ᐊᐅᓚᔨᕕᑦ ᑖᑦᓱᒧᖓ ᐃᓕᓐᓂᐊᒐᕐᒧᑦ?
ᓗᐃᓴ ᑑᒪᓯ: ᐃᓕᓐᓂᐊᑎᖃᓚᐅᔪᒍᑦ ᐃᓕᓐᓂᐊᑎᑦᓯᔨᐅᓯᒪᔪᓂᒃ ᐃᓕᓐᓂᐊᑎᑦᓯᔨᓂᒃ. ᐃᑉᐱᒋᓚᐅᔭᕗᑦ ᓲᖑᔪᒥᒃ ᐃᓕᓐᓂᐊᕕᒻᒥ ᑲᒪᒍᓐᓇᓂᖃᑦᓯᐊᓂᖏᑦ. ᐊᑦᔨᒌᖕᖏᓂᖏᓐᓂᒃ ᐳᕐᑐᓂᖏᑦᑕ ᖃᐅᔨᒍᓐᓇᑐᓂᒃ. ᐃᓕᑦᓯᓂᖏᓐᓂᒃ ᐱᑕᖃᓪᓚᕆᓚᐅᔪᖅ. ᐊᓕᐊᒋᓚᐅᔭᕋ ᐃᓘᓐᓇᖏᑦ ᐱᒐᓱᐊᒻᒪᕆᒐᓗᐊᕐᑎᓗᒋᑦ ᐊᓕᓱᖕᖑᐊᕈᓐᓇᖏᓐᓇᓚᐅᔪᒐᑦᑕ. ᐃᔪᕐᓇᓚᕆᖃᑦᑕᓚᐅᔪᖅ ᑖᒃᑯᐊᓗ ᐃᓕᓐᓂᐊᑎᑦᓯᔩᑦ. ᐊᐅᓚᔨᔪᖓ ᕿᑎᕋᓕᕇᒥ ᐃᓕᓐᓂᐊᑎᑦᓯᔪᕕᓂᐅᑦᓱᑕ ᐱᒻᒪᕆᐅᓂᖓᓂᒃ ᐊᑐᐃᓐᓇᐅᒋᐊᖃᕐᓂᒥᒃ ᐊᒻᒪᓗ ᐱᑦᓯᐊᕆᐊᖃᕐᓂᒥᒃ, ᐅᓂᒃᑳᑐᐊᕐᒥᒃ ᐊᑐᓚᐅᔪᖓ ᑕᑯᓐᓇᑎᑦᓯᓱᖓ ᐅᖄᔪᓂᒃ. ᑭᓯᐊᓂ ᕿᒥᕐᕈᐊᑦ ᑕᒻᒪᑲᑦᑕᓯᒪᑦᓱᑎᒃ ᑐᖓᓕᕇᓐᓂᖏᑦ ᑐᑭᓯᓂᕐᓗᓂᖃᓪᓚᕆᓚᐅᔪᑦ! ᑕᒪᓐᓇ ᐃᔪᕐᓇᓚᕆᓚᐅᔪᖅ! 

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓯᕗᓪᓕᐹᒥ ᐃᓕᓐᓂᐊᑎᑦᓯᓚᐅᔪᕕᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖏᑦᑕ ᐃᓕᓐᓂᐊᑎᑦᓯᒍᑎᖏᓐᓂ ᐊᒻᒪᓗ ᓱᒐᒥ ᐃᓚᐅᒍᒪᓐᓂᕿᑦ?
ᓗᐃᓴ ᑑᒪᓯ: ᐊᐊ, ᑖᓐᓇ ᓯᕗᓪᓕᐹᒥ ᐊᑑᑎᓚᐅᔭᕋ ᐃᓕᓐᓂᐊᑎᑦᓯᓱᖓ ᐃᓕᓐᓂᐊᑎᑦᓯᒍᑎᖏᓐᓂ. ᐃᓚᐅᑎᑦᓯᓗᐊᖕᖑᐊᕈᒪᓚᐅᔪᖓ ᑯᐯᒻᒥ ᐃᓕᓐᓂᐊᓂᓕᕆᒍᑎᖏᓐᓂᒃ. ᑌᒣᒻᒪᑦ ᐃᓚᐅᑎᑦᓯᓚᐅᔪᖓ ᐱᒍᓐᓇᓂᖏᓐᓄᑦ ᐊᓪᓚᓂᐊᕐᓂᒨᓕᖓᔪᓂᒃ ᐊᒻᒪᓗ ᐊᓪᓚᓂᕐᒧᑦ, ᑐᕌᒐᖃᕐᓱᑎᒃ ᐃᓕᓐᓂᐊᑎᑦᓯᔩᑦ ᐊᑐᕈᓐᓇᕋᔭᕐᑕᖏᓐᓂᒃ ᐸᕐᓀᓕᕈᑎᒃ ᐃᓕᓐᓂᐊᑎᑦᓯᒍᑎᒋᒐᔭᕐᑕᒥᓂᒃ. ᐃᓕᓐᓂᐊᑎᑦᓯᓚᐅᔪᒻᒥᔪᖓ ᐃᓄᑦᑎᑐᑦ ᐊᓪᓚᒍᓯᕐᒥᒃ 13-ᓂᒃ ᐅᑭᐅᓕᓐᓄᑦ ᐊᒻᒪᓗ ᐃᓕᓐᓂᐊᑎᓪᓗᖓ ᒪᑭᐅᓪᒥ ᖃᓪᓗᓈᑎᑐᑦ ᐊᓪᓚᓯᒪᔪᓕᕆᓂᕐᒥᒃ ᐃᓕᓐᓂᐊᓯᒪᔭᕋ ᓯᑕᒪᓂᒃ ᐊᕐᕌᒍᓂ. ᑖᓐᓇ ᐊᑑᑎᓯᒪᔭᕋ ᐃᓕᓐᓂᐊᑎᑦᓯᔨᓅᕈᒪᓚᐊᔭᕋ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓄᑦ ᐊᒻᒪᓗ ᐃᓕᑦᓯᓗᖓ ᐊᓯᖏᓐᓂᒃ ᐃᓕᓐᓂᐊᑎᑦᓯᔨᓂᑦ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᐱᔭᕇᕈᑎᑖᕐᓯᒪᔪᑎᑦ ᒪᑭᐅᓪ ᐃᓕᓐᓂᐊᕕᕐᔪᐊᖓᓂᑦ ᐃᓕᓐᓂᐊᓂᓕᕆᓂᕐᒥᒃ ᐳᕐᑐᓂᕐᓴᒋᐊᓪᓚᐅᑉ ᐊᓪᓕᖓᓂ 2017-ᒥ, ᐃᓓ?
ᓗᐃᓴ ᑑᒪᓯ: ᐊᐊ.

ᑭᓇᒃᑯᑐᐃᓐᓇᓄᑦ ᑐᓴᐅᒪᖃᑎᒌᑦᑎᓯᔨ: ᓱᓇᒦᒃ ᐃᒣᓕᒋᐊᕈᑎᖃᕈᒪᕕᑦ ᐅᕕᒐᕐᑐᓄᑦ ᓄᓇᕕᒻᒥᐅᓄᑦ ᐃᓕᓐᓂᐊᑎᑦᓯᔨᐅᕐᓂᒨᓕᖓᔪᓂᒃ ᐱᓇᓱᒐᕐᑖᓂᕐᒧᑦ?
ᓗᐃᓴ ᑑᒪᓯ: ᐃᓕᓐᓂᐊᓂᓕᕆᓂᖅ ᐱᐅᓂᕐᐸᐅᔪᕆᔭᕋ ᐱᔭᐅᒐᓱᐊᑐᐊᕐᐸᑦ. ᐅᖃᖏᓐᓇᓲᖑᔪᖓ ᐃᓕᑦᓯᓂᖅ ᐃᓱᓕᒍᓐᓇᖏᒻᒪᑦ. ᐃᓕᑦᓯᒍᓐᓇᑐᒍᑦ ᐳᐃᒍᕐᓯᒪᓕᕐᑎᑕᓐᓂᒃ, ᐃᓚᐅᓕᕐᑎᓯᒍᓐᓇᒥᔪᒍᑦ ᐱᐅᓯᑐᖃᑦᑎᓄᑦ ᖃᐅᔨᒪᐅᓯᕗᓐᓂᒃ ᐊᒻᒪᓗ ᖁᕝᕙᕆᐊᕐᓗᑕ ᐃᓕᓐᓂᐊᓂᕐᑎᒍᑦ. ᐊᑦᔨᒌᖕᖏᑐᓂᒃ ᐱᓇᓱᒐᑦᓴᖃᕐᒥᔪᖅ ᐃᓕᓐᓂᐊᓂᓕᕆᓂᕐᒥ. ᐃᓘᓐᓇᑎᒃ ᐃᓕᓐᓂᐊᑎᑦᓯᔨᐅᒍᓐᓇᖏᑦᑐᑦ, ᖃᐅᔨᒪᑦᓯᐊᕆᐊᖃᕐᑐᑎᑦ ᐃᒻᒥᓂᒃ ᐃᓅᓂᕐᓂᒃ ᐊᒻᒪᓗ ᐊᓯᑎᓐᓂᒃ ᐱᒍᓐᓇᓯᐊᕐᓗᑎᑦ ᖃᓄᐃᑦᑑᒐᓗᐊᕐᐸᑕ ᐃᑲᔪᕐᓗᒋᑦ ᐱᒍᓐᓇᓯᑎᓗᒋᑦ. ᐃᓱᒪᒋᒻᒥᔭᕋ ᐊᓕᓱᖕᖏᑯᑦᑕ ᐃᓕᓐᓂᐊᓂᓕᕆᓂᕗᓐᓂᒃ, ᑕᑯᓐᓇᑐᐃᓐᓇᕆᐊᖃᖕᖏᓇᑦᑕ. ᐃᓚᐅᒋᐊᖃᕋᑦᑕ ᐊᒻᒪᓗ ᖃᐅᔨᓗᑕ ᖃᓄᖅ ᐃᑲᔪᕈᓐᓇᒪᖔᑦᑕ ᐱᐅᓯᐅᒥᑎᑦᓯᒐᓱᐊᕐᓗᑕ. ᐃᓚᐅᒋᐊᖃᕐᑐᒍᑦ ᐃᓕᓐᓂᐊᑎᓄᑦ, ᓄᓇᓕᐅᓗᑕ ᐊᕕᑦᑐᓯᒪᒍᓐᓀᓗᑕ. ᑕᑯᓐᓇᑕᕋᒍᑦ, ᐃᓚᐅᓯᓗᑎᑦ ᐃᓕᓐᓂᐊᓂᓕᕆᓂᕐᒧᑦ ᐱᐅᓂᕐᐸᐅᔪᕆᔭᕋ ᐃᓅᑉ ᐊᑐᕈᓐᓇᑕᖓᓂ!