ᐊᐱᕐᓱᓂᖅ ᐅᓛᔪ ᐱᓗᕐᑑᒥᒃ

PHOTO: JADE DUCHESNEAU BERNIER
2018 | 03 | 7
ᐅᓂᒃᑳᑦ

ᑭᓇᒃᑯᑐᐃᓐᓇᓂᒃ ᑐᓴᐅᒪᖃᑎᒌᑦᑎᓯᔩᑦ ᐱᓇᓱᖃᒌᑦ ᐊᓕᐊᓱᑦᓱᑎᒃ ᑲᑎᓯᓂᖃᓚᐅᔪᕗᑦ ᐅᖄᖃᑎᖃᕐᓱᑎᓪᓗ ᐅᓛᔪ ᐱᓗᕐᑑᒥᒃ. ᐱᔭᕇᕈᑎᑖᕐᑐᕕᓂᖅ ᑏᓯᒻᐱᕆᒥ ᒪᑭᐅᓪ ᐃᓕᓐᓂᐊᕕᕐᔪᐊᖓᓂ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓄ ᐱᓇᓱᐊᕐᑕᐅᔪᒧᑦ ᐊᑐᐃᓐᓇᐅᑎᑕᐅᑦᓱᓂ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. ᐱᓇᓱᐊᕐᑕᐅᔪᖅ ᑐᕌᒐᖃᑦᓱᓂ ᐱᑖᕋᓱᐊᕐᓂᒥᒃ, ᐃᓄᐃᓄᓐᓄᑦ ᐃᓕᓐᓂᐊᑎᑦᓯᔨᓄᑦ, ᐃᓕᓐᓂᐊᑎᑦᓯᒍᑎᒥᒃ ᐃᓕᑕᕆᔭᐅᒍᑎᒥᒃ ᐃᓕᑕᕆᔭᐅᓂᓕᒻᒥᒃ ᑯᐯᒃᑯᑦ ᐃᓕᓐᓂᐊᓂᓕᕆᓂᕐᒥᒃ ᑐᕐᖃᑕᕐᕕᖓᓄᑦ ᐊᒻᒪᓗ ᐳᕐᑐᓂᕐᓴᒥᒃ ᐃᓕᓐᓂᐊᑎᑕᐅᓂᕐᒧᑦ. ᐅᖄᖃᑎᒌᓐᓂᑎᓐᓂ, ᖃᐅᔨᓚᐅᕐᖁᒍᒃ ᓱᓇᒥᒃ ᐱᔭᕆᐊᑐᓂᕐᐹᑰᕐᓂᖃᓚᐅᕐᒪᖔᑦ ᐃᓕᓐᓂᐊᓂᕐᒥᓂ, ᐃᒪᐃᓕᒋᐊᕐᓂᒍᑎᒋᒍᒪᔭᖓᓗ ᐃᓕᓐᓂᐊᑎᐅᒍᒪᔪᓄᑦ ᐊᒻᒪᓗ ᓱᓇᒥᒃ ᐊᖏᓂᕐᐹᒥᒃ ᐱᒋᐅᕐᓂᕆᓯᒪᔭᖓ (ᖃᐅᔨᑎᑦᓯᒍᑎ: ᐱᓱᓐᓂᖅ ᑕᑯᑦᓴᐅᕕᒻᒥ)! ᐊᓪᓚᓂᐊᕆᐊᓪᓚᕆᑦ ᐊᐱᕐᓱᑲᑦᑕᓂᕕᓂᕗᓐᓂᒃ ᐊᒻᒪᓗ ᐅᐱᒍᓲᑦᔨᖃᑎᒌᑦᑕ ᐅᓛᔪ ᐱᓗᕐᑑᒥᒃ ᐊᒻᒪᓗ ᔩᓂ ᐹᓕᓴᒥᒃ (ᐊᐱᕈᒍᓐᓇᓯᓚᐅᖕᖏᑕᕗᑦ ᑕᒃᑲᓂ ᐅᖄᖃᑎᒋᒍᓐᓇᓯᓚᐅᕋᑕᖕᖏᓇᑦᑎᒍ) ᖄᖏᐅᑎᓂᖏᓐᓄᑦ ᑖᑦᓱᒧᖓ!

ᑐᓴᕋᑦᓴᓂᐊᕐᑎ (ᑐᓴ): ᓯᕗᓪᓕᐹᒥ, ᐅᐱᒍᓲᑦᔨᖄᕈᒪᕗᒍᑦ ᐱᔭᕇᕐᓂᕆᓚᐅᕐᑕᓄᑦ. ᐅᐱᒍᓱᒻᒪᕆᑉᐳᒍᑦ ᐱᓇᓱᐊᕐᓂᓄᑦ.

ᐅᓛᔪ ᐱᓗᕐᑑᑦ: ᓇᑯᕐᒦᒃ! ᐊᓕᐊᓇᕐᑐᕋᑕᖅ ᐱᔭᕇᕐᓯᒪᒋᐊᒥᒃ.

(ᑐᓴ): ᖃᓄᐃᑦᑐᒦᒃ ᐳᕐᑐᓂᕐᓭᑦ ᐱᖓᔪᖓᓂᒃ ᐱᑖᓚᐅᕐᕿᑦ?

ᐅᐱ: ᐳᕐᑐᓂᕐᓴᐅᑉ ᐊᓪᓕᖓᓂ ᐃᓕᓐᓂᐊᓂᕐᒨᓕᖓᔪᓂ ᓄᓇᖃᕐᖄᓯᒪᔪᑦ ᐊᒻᒪᓗ ᐃᓄᐃᑦ ᐃᓕᓐᓂᐊᓂᓕᕆᓂᕐᒧᑦ ᐃᓕᑕᕆᔭᐅᒍᑎᑖᕐᓂᒧᑦ.

(ᑐᓴ): ᐱᓇᓱᐊᕐᑕᐅᔫᖅ ᖃᓄᐃᑦᑐᓂᒃ ᐱᓇᓱᐊᕐᓂᖃᖃᑦᑕᓚᐅᕐᖃ?

ᐅᐱ: ᑖᓐᓇ ᐱᓇᓱᐊᕐᑕᐅᔪᖅ ᐱᓇᓱᐊᖃᑎᒌᓐᓂᖃᕐᖁᖅ ᒪᑭᐅᓪ ᐃᓕᓐᓂᐊᕕᕐᔪᐊᖓᓂᒃ. ᐃᓕᓐᓂᐊᑎᑦᓯᓂᖅ ᐃᓄᑦᑎᑑᕐᖁᖅ, ᐊᓯᖏᓐᓄᑦ ᐃᓄᓐᓄᑦ ᐱᓇᓱᐊᖃᑎᓕᓐᓄᑦ ᐃᓕᓐᓂᐊᑎᑦᓯᔨᓂᒃ ᒪᑭᐅᓪ ᐃᓕᓐᓂᐊᕕᕐᔪᐊᖓᓂ. ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᓴᑕᐅᓂᖓᓄᑦ ᐱᓇᓱᐊᕐᑕᐅᔪᖅ ᓄᓇᕕᒻᒥ ᐱᓇᓱᐊᕐᑕᐅᕗᖅ ᐊᒻᒪᓗ ᐊᑐᐃᓐᓇᐅᑎᑕᐅᑦᓱᓂ ᐊᕐᕌᒍᓕᒫᒥ, ᐃᓚᖓ ᐱᓇᓱᐊᕐᓂᒪᕆᒻᒦᓱᖑᕗᖅ ᐱᓇᓱᐊᕈᓰᓐᓂ ᒪᕐᕉᓂ  ᒪᑭᐅᓪ ᐃᓕᓐᓂᐊᕕᕐᔪᐊᖓᓂ. ᐱᔭᕇᕋᓱᐊᓚᐅᕐᑕᕋ ᐃᓕᓐᓂᐊᑎᑦᓯᓱᖓ. ᐊᑯᓂᐊᓗᒃ ᐱᔭᕇᕋᓱᐊᓚᐅᕐᑕᕋ, ᑭᓯᐊᓂ ᐱᔭᕇᕋᓱᐊᕐᓂᖅ ᐊᑐᕐᓂᖃᑦᓯᐊᓚᐅᕐᑐᖅ.

(ᑐᓴ): ᖃᐅᔨᒪᑦᓱᑎᑦ ᐃᓚᑎᓐᓂᒃ ᑲᒪᑦᓯᐊᕆᐊᖃᕐᓃᓗ, ᐱᓇᓱᐊᕐᓂᓗ ᖃᐅᑕᒫᑦ ᐊᒻᒪᓗ ᓄᑖᒥᒃ ᐱᓇᓱᐊᕐᓂᒧᑦ ᐱᒐᑦᓴᑖᕆᐊᓪᓚᓱᑎᑦ, ᓱᒨᑦ ᑖᑦᓱᒧᖓ ᐱᓇᓱᐊᕐᑕᐅᔪᒧᑦ ᐃᓕᓐᓂᕿᑦ?

ᐅᐱ: ᐱᓇᓱᒐᑦᓴᑖᕈᓐᓇᓂᕋ ᐊᖏᓕᐅᒥᒍᓐᓇᒪᑦ. ᐊᓕᐊᒋᔭᖃᕐᑐᖓ ᐱᓇᓱᒋᐊᒥᒃ ᐱᐊᕋᕐᓄᑦ ᐊᒻᒪᓗ ᐃᓕᓐᓂᐊᑎᑦᓯᒋᐊᒥᒃ.

(ᑐᓴ): ᖃᓄᐃᑦᑐᓃᒃ ᐃᑲᔪᕐᑕᐅᓂᖃᓲᖑᕙᑦ ᐃᓕᓐᓂᑏᑦ ᑕᒃᑲᓂ ᐱᓇᓱᐊᕐᑕᐅᔪᒥ ᐃᓚᐅᔪᑦ?

ᐅᐱ: ᐃᑲᔪᕐᑕᐅᓂᖃᓲᖑᕗᒍᑦ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓂ ᐃᓱᐊᕐᓭᔨᓄᑦ. ᐃᑲᔪᕐᓯᓲᑦ ᑐᑭᓯᑎᑦᓯᓱᑎᒃ ᖃᓄᐃᑦᑑᒪᖔᑦ ᐃᓕᓐᓂᐊᑎᑦᓯᓂᖅ. ᐱᑕᖃᕐᒥᔪᖅ ᐃᑲᔪᕐᑎᓂᒃ ᐃᓕᓐᓂᐊᑎᑦᓯᔨᓂᒃ ᐃᑲᔪᓲᓂᒃ ᐱᓇᓱᐊᕐᑕᐅᔪᒥ. ᐃᑲᔪᕐᑕᐅᓯᐊᖃᑦᑕᓚᐅᕐᑐᖓ ᐊᒻᒪᓗ ᐃᑲᔪᕐᓯᓂᖃᑦᓯᐊᖃᑦᑕᓱᑎᒃ.

(ᑐᓴ): ᖃᓅᖅ ᐊᑯᓂ ᐃᓕᓐᓂᐊᑎᑦᓯᔨᐅᓕᕐᕿᑦ?

ᐅᐱ: ᐃᓕᓐᓂᐊᑎᑦᓯᔨᐅᓕᕐᖁᖓ ᐊᕐᕌᒍᓂ 25-ᓂ.

(ᑐᓴ): ᐊᑯᓂᐊᓗᒃ. ᖃᑦᓯᓃᒃ ᐳᕐᑐᓂᓕᓐᓂᒃ ᐃᓕᓐᓂᐊᑎᑦᓯᖃᑦᑕᓯᒪᓕᕐᕿᑦ?

ᐅᐱ: ᐳᕐᑐᓂᓕᒫᓂ, ᐃᓕᓐᓂᐊᕆᐊᖕᖓᑐᓂᑦ ᐳᕐᑐᓂᕐᓴᓄᑦ 5-ᒧᑦ ᑎᑭᑦᑐᓂᒃ. ᐆᑦᑐᕈᒪᖃᑦᑕᓯᒪᒐᒪ ᐊᑦᔨᒌᖕᖏᑐᓂ ᐳᕐᑐᓂᓕᓐᓂ ᐊᑦᔨᒌᖕᖏᑐᐹᓘᒻᒪᑕ ᐃᓘᓐᓇᑎᒃ.

(ᑐᓴ): ᖃᑦᓯᓃᒃ ᐳᕐᑐᓂᓕᓐᓂᒃ ᐃᓕᓐᓂᐊᑎᑦᓯᒋᐊᒥᒃ ᐊᓕᐊᒋᔭᖃᕐᕿᑦ ?

ᐅᐱ: ᐳᕐᑐᓂᓕᓐᓂᒃ 3-ᓂᒃ (ᐅᑭᐅᓕᓐᓂᒃ 8-ᒥᑦ 10-ᒧᑦ).

(ᑐᓴ): ᓱᒨᑦ ᐳᕐᑐᓂᓕᓐᓂᒃ 3-ᓂᒃ?

ᐅᐱ: ᐊᓪᓚᓂᐊᕈᓐᓇᓕᕐᒪᑕ ᐊᓪᓚᒍᓐᓇᓕᕐᓱᑎᓪᓗ ᑌᑲᓂ ᐳᕐᑐᓂᕐᒥ. ᐅᕝᕙᓘᓐᓃᑦ ᐱᓯᑎᖕᖑᓕᕐᓱᑎᒃ. ᐃᑲᔪᕈᓐᓇᕋᒃᑭᑦ ᐱᓯᑎᖕᖑᓕᐅᒥᑎᓗᒋᑦ. ᐱᓇᓱᕆᐊᒥ ᐊᒡᒐᒥᓄᑦ ᐊᓕᐊᓱᑦᑐᑦ ᐊᒻᒪᓗ ᐃᓕᑦᓯᒍᒪᓂᖃᑦᓯᐊᓱᑎᒃ ᓄᑖᓂᒃ ᐊᒻᒪᓗ ᑐᑭᓯᒍᒪᓂᖃᕉᑕᕆᑦᓱᑎᒃ ᐊᕙᑎᒥᓂ.

(ᑐᓴ): ᓱᓈ ᐱᔭᕆᐊᑐᔫᕙ ᐃᓕᓐᓂᐊᑎᑦᓯᓱᓂ?

ᐅᐱ: ᐃᓕᓐᓂᑎᑦᓯᒋᐊᒥ ᐃᓄᑦᑎᑐᑦ ᐊᓪᓚᒋᐅᕐᓴᓂᕐᒥᒃ ᐊᒻᒪᓗ ᑐᑭᓯᒪᓂᕐᒥᒃ ᐅᖃᐅᓯᕐᒥᒃ. ᐱᓇᓲᑎᑦᓴᖃᑦᓯᐊᖏᑦᑐᖅ ᓱᑯᐃᔦᓂᕐᒧᑦ ᐊᒻᒪᓗ ᓴᓇᑦᑐᓴᐅᑎᓕᕆᓂᕐᒧᑦ. ᐃᓕᓐᓂᐊᑎᑦᓯᒍᓐᓇᓂᕐᒧᑦ ᐳᕐᑐᓂᕐᓴᒋᐊᖑᓕᕐᑎᓗᒍ.

(ᑐᓴ): ᖃᓅᖅ ᐱᒍᓐᓇᓯᒪᕙᑎᑦ ᑕᒪᒃᑯᐊ ᐱᔭᕆᐊᑐᓃᑦ?

ᐅᐱ: ᐃᓗᕐᖁᓯᕗᓐᓄᑦ ᐊᑦᔨᐅᑎᓲᕆᕙᕋ ᕈᓐᓇᕕᓕᒫᕋᓄᑦ. ᓱᑯᐃᔦᓂᖃᕋᑦᑕ ᑕᐃᒪᖕᖓᑦ ᐃᓅᓯᕗᓐᓂ. ᓄᓇᕗᓐᓂ ᓯᕗᓕᕈᓐᓇᖃᑦᑕᓯᒪᒻᒪᑕ. ᐊᕙᑎᕗᑦ ᐅᖄᒍᑎᒋᓗᒍ ᓱᑯᐃᔦᓂᕐᒧᑦ ᐱᐅᔪᓪᓚᕆᐅᒋᕗᖅ.

(ᑐᓴ): ᓱᓈ ᐃᑲᔪᕐᓯᒪᕙ ᑖᒃᑯᓄᖓ ᐊᓯᑦᔨᓂᕐᓄᑦ?

ᐅᐱ: ᓄᑖ ᐃᓕᓐᓂᐊᕈᑎ ᐃᑲᔪᕐᓯᓯᒪᔪᖅ. ᐊᒻᒪᓗ ᐊᑐᕈᓐᓇᕆᐊᓪᓚᓂᕐᒧᑦ ᐊᒡᒐᓂᒃ ᐊᑐᕐᓂᒥᒃ ᓴᓇᑦᑐᓴᐅᑎᒥ ᐊᒻᒪᓗ ᓱᑯᐃᔦᓂᕐᒧᑦ. ᐱᓇᓱᐊᕈᑎᑦᓴᒋᐊᓪᓚᓂᒃ ᑎᑭᑕᐅᓯᒪᒻᒥᔪᒍᑦ ᐃᑲᔪᕐᓯᓯᒪᔪᓂᒃ ᐃᓕᓐᓂᐊᑎᑦᓯᓯᐊᕐᓂᒧᑦ ᐃᓕᓐᓂᐊᕕᒻᒥ ᖃᕆᐊᒥ. ᐆᑦᑐᑎᒋᓗᒋᑦ ᓴᓇᑦᑐᓴᐅᑎᓐᓂᐊᓂᕐᒧᑦ ᐊᐅᓚᔨᒋᐅᕐᓴᕈᑏᑦ ᐊᓪᓓᑦ, ᐃᑲᔪᕐᓯᓯᒪᔪᑦ ᐃᓕᓐᓂᐊᑎᓂᒃ ᑭᓯᑦᓯᓂᕐᒧᑦ ᐃᓱᒪᒃᑯᑦ.

(ᑐᓴ): ᖃᓅᖅ ᐅᖃᐅᑦᔩᕋᔭᕐᕿᑦ ᑭᓇᑐᐃᓐᓇᒥᒃ ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑕᐅᓂᖓᓄᑦ ᐱᓇᓱᐊᕐᓂᒧᑦ ᐃᓚᐅᒍᒪᔪᓂᒃ? 

ᐅᐱ: ᐱᓇᓱᒐᑦᓴᓯᐊᓪᓚᕆᐊᓗᒃ. ᐃᓕᓐᓂᐊᑎᑦᓯᓲᖑᕗᒍᑦ ᐃᓄᑦᑎᑐᑦ, ᐃᓱᐊᕐᑐᕈᑎᓕᐅᒥᑦᓱᒍ ᐃᓕᑦᓯᒋᐊᒥᒃ. ᐃᓕᑦᓯᑎᑕᐅᓲᖑᒻᒥᔪᒍᑦ ᐱᐊᕋᕐᓄᑦ. ᑐᓂᒪᑦᓯᐊᕆᐊᖃᕐᑐᑎᑦ. ᐱᔭᕆᐊᑐᔫᓲᖑᒻᒥᔪᖅ ᐃᓚᖓᓂ. ᐱᐊᕋᕐᓂᒃ ᐊᓕᐊᒋᔭᖃᕆᐊᖃᕐᑐᑎᑦ ᐊᒻᒪᓗ ᐃᑲᔪᕈᒪᓂᖃᕐᓗᑎᑦ ᐃᓕᓐᓂᐊᑎᑦᓯᐊᖑᒍᒪᓕᕐᑎᓗᒋᑦ. ᐱᓇᓱᒐᑐᐃᓐᓇᐅᖏᑦᑐᖅ, ᐊᓕᐊᓱᓐᓂᒥᒃ ᐃᑉᐱᒋᔭᖃᕐᓂᐅᒋᕗᖅ ᐃᓕᓐᓂᐊᑎᑦᓯᓕᑐᐊᕋᕕᑦ ᐃᓕᓐᓂᐊᑎᓂᒃ.

(ᑐᓴ): ᓱᓇᒦᒃ ᐅᐱᒋᔭᖃᕐᓂᐸᐅᕕᑦ?

ᐅᐱ: ᐱᔭᕆᐊᑐᔫᖃᑦᑕᓚᐅᕐᑐᖅ, ᐱᔭᕆᐊᑭᑦᑐᑐᐃᓐᓇᐅᓚᐅᖕᖏᓚᖅ ᕿᒣᒋᐊᒥᒃ ᐃᓚᒋᔭᓂᒃ ᐊᒻᒪᓗ ᐱᐊᕋᕆᔭᕐᓂᒃ. ᐊᑯᓂᐊᓗᒃ ᐱᔭᕇᒐᓱᐊᕐᓇᑐᖅ ᐊᒻᒪᓗ ᐱᓇᓱᐊᒻᒪᕆᓐᓇᓱᓂ. ᑭᓯᐊᓂ ᐊᑐᕐᓂᖃᑦᓯᐊᑐᖅ ᑕᒪᓐᓇ. ᐅᐱᒍᓱᒃᑯᖓ ᐱᔭᕇᑦᓯᒪᒋᐊᒥᒃ ᐱᓇᓱᐊᕐᑕᐅᔪᒥᒃ ᐊᒻᒪᓗ ᐱᓱᓐᓂᕆᓚᐅᕐᑕᕋᓂᒃ ᐊᑭᐊᓄᑦ ᑕᑯᓐᓇᑕᐅᕕᒻᒥ ᐱᑖᕆᐊᕐᑐᓱᖓ ᐃᓕᑕᕆᔭᐅᒍᑎᒐᓂᒃ.

(ᑐᓴ): ᐅᖃᕆᐊᓪᓚᓗᖓ, ᐅᐱᒍᓱᑉᐳᖓ ᐊᒻᒪᓗ ᑕᑯᓵᕈᒪᕗᒍᑦ ᓱᓚᖓᓂᕐᓂᒃ ᑭᖑᓪᓕᒥ. ᓇᑯᕐᒦᒃ ᐱᕕᖃᕐᑎᑫᓐᓇᕋᑦᑎᒍᑦ ᐅᖄᖃᑎᖃᕐᓱᑎᑦ ᐅᕙᑦᑎᓂᒃ ᐅᓪᓗᒥ.