ᑕᕐᓴᑲᓪᓚᒃ ᐃᓕᓐᓂᐊᕕᐅᑉ ᐊᐅᐸᓗᒻᒥ ᓴᓇᔭᐅᒋᐊᓪᓚᒍᑎᑦᓴᖏᑦ ᐊᖏᕐᑕᐅᔪᑦ
ᑰᑦᔪᐊᖅ, ᑯᐯᒃ (ᓯᑦᑎᒻᐱᕆ 4, 2015) – ᑲᑎᕕᒃ ᐃᓕᓐᓂᐊᓂᓕᕆᓂᖅ ᓇᑯᕐᓴᐳᖅ ᑯᐯᒻᒥ ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓᑕ ᑐᓴᕐᑎᓯᒍᑎᖓᓂᒃ ᐅᓪᓗᒥ ᓯᑦᑎᒻᐱᕆ 4-ᖑᑎᓪᓗᒍ, ᑮᓇᐅᔭᖃᕐᑎᓯᓛᕐᓂᕋᕐᓱᑎᒃ ᑕᕐᓴᑲᓪᓚᒃ ᐃᓕᓐᓂᐊᕕᐅᑉ ᐊᐅᐸᓗᒻᒥ ᓴᓇᔭᐅᒋᐊᓪᓚᒍᑎᖏᓐᓂᒃ.
“ᑕᒪᓐᓇ ᑐᓴᕋᑦᓴᓯᐊᒻᒪᕆᐊᓗᒃ ᑲᑎᕕᒃ ᐃᓕᓐᓂᐊᓂᓕᕆᓂᕐᒧᑦ, ᐃᓕᓐᓂᐊᑎᑦᑎᓄᑦ ᐊᖓᔪᕐᖄᖏᓐᓄᓗ ᐊᐅᐸᓗᒻᒥᐅᓕᒫᓄᓪᓗ.” ᐋᓚᓯ ᓈᓚᑦᑑᔭᖅ ᐅᖃᓚᐅᕐᑐᖅ ᑲᑎᕕᒃ ᐃᓕᓐᓂᐊᓂᓕᕆᓂᐅᑉ ᐊᖓᔪᕐᖄᖓ. “ᓇᑯᕐᒦᓱᖓᓗ ᐊᐅᐸᓗᒻᒥᐅᓂᒃ ᑕᒪᑐᒥᖓ ᐱᓇᓱᐊᖃᑎᐅᑦᓯᐊᓯᒪᒻᒪᑕ ᑐᑭᓯᒪᑦᓯᐊᓱᑎᓪᓗ ᐊᖏᖃᑎᒌᒐᓱᐊᕐᓂᑕ ᐃᓱᓕᒍᑎᖏᓐᓂᒃ ᑕᕐᓴᑲᓪᓚᒃ ᐃᓕᓐᓂᐊᕕᐅᑉ ᐊᐅᐸᓗᒻᒥ ᓴᓇᔭᐅᒋᐊᓪᓚᒍᑎᑦᓴᖓᓄᑦ ᐊᖏᖃᑎᐅᓚᐅᔪᒻᒪᑕ ᒣ 2015-ᖑᑎᓪᓗᒍ ᐳᕐᑐᓂᕐᓭᑦ ᑲᑎᖕᖓᔨᖏᓐᓄᑦ.” ᐅᖃᕆᐊᓪᓚᒥᑦᓱᓂ.
ᑖᒃᑯᐊ ᓄᑖᒥᒃ ᐃᓕᓐᓂᐊᕕᓕᐅᓚᖓᔪᑦ ᐱᔭᕇᕐᓯᒪᓛᕈᓇᐅᔪᑦ ᐊᐅᒡᒍᓯ 2016-ᖑᓕᕐᐸᑦ. ᓴᓇᔪᑦ ᐱᒋᐊᓚᐅᔪᑦ ᔪᓓ 2015-ᒥ.
ᑖᑦᓱᒪ ᓴᓇᔭᐅᒍᑎᖏᑦ ᐃᓘᓐᓇᖓ ᑲᑎᑦᓱᒍ ᒥᑦᓴᐅᓴᕐᓱᒍ ᐊᑭᖃᕐᓂᕋᕐᑕᐅᓯᒪᔪᖅ $16,807,377-ᓂᒃ. ᑯᐯᑉ ᑲᕙᒪᖓ ᑮᓇᐅᔭᖃᕐᑎᓯᓛᕐᑐᖅ $12,043,033-ᓂᒃ, ᑲᕙᒪᑐᖃᒃᑯᑦ $4,014,344-ᓂᒃ ᐊᒻᒪᓗ $750,000 ᐊᐅᐸᓘᑉ ᓄᓇᓕᖓᑕ ᑲᕙᒫᐱᖓ.
ᖃᓄᐃᓘᕈᑎᐅᓯᒪᓂᖓ:
ᑕᕐᓴᑲᓪᓚᒃ ᐃᑯᐊᓪᓚᓚᐅᔪᖅ ᒫᑦᔨ 15, 2014-ᖑᑎᓪᓗᒍ. ᒫᑦᔨ 31-ᖑᓕᕐᑎᓗᒍ ᐃᓕᓐᓂᐊᑏᑦ ᐃᓕᓐᓂᐊᕕᑦᑖᑫᓐᓇᓯᓚᐅᔪᑦ. ᑌᑲᖕᖓᓂᓂᑦ ᐅᓪᓗᒥᑦ, ᐊᐅᐸᓗᒻᒥ ᐃᓕᓐᓂᐊᑎᑦᓯᓂᖅ ᐊᑑᑎᖃᑦᑕᑐᖅ ᐱᖓᓱᓂ ᐃᓂᓂ. ᒪᕐᕉᒃ ᐃᓕᓐᓂᐊᑎᑦᓯᕖᒃ ᓴᕐᓕᐊᑎ ᐯᕆᑦᓯᕕᒻᒦᑑᒃ. ᑕᓪᓕᒪᓪᓗ ᐃᓕᓐᓂᐊᑎᑦᓯᕖᑦ ᐊᐅᐸᓘᑉ ᓄᓇᓕᖓᑕ ᑲᕙᒫᐱᖓᑕ ᐊᓪᓚᕕᕕᓂᖓᓃᑦᓱᑎᒃ (ᓄᑕᐅᓯᓕᕐᑕᐅᓚᐅᔪᒥ ᐱᐅᓯᓴᕐᑕᐅᓱᓂ ᑲᑎᕕᒃ ᐃᓕᓐᓂᐊᓂᓕᓂᕐᒧᑦ). ᓯᑕᒪᓪᓗ ᐃᓕᓐᓂᐊᑎᑦᓯᕕᒋᐊᓪᓓᑦ ᐃᙯᓕᓴᕐᕕᐅᓚᐅᕐᑐᑐᕐᓗ ᓴᓇᔭᐅᓚᐅᔪᑦ ᐊᐅᐸᓗᒻᒥ, ᑮᓇᐅᔭᖃᕐᑎᑕᐅᑦᓱᑎᒃ ᑯᐯᒻᒥ ᐃᓕᓐᓂᐊᓂᓕᕆᓂᐅᑉ ᑐᕐᖃᑕᕐᕕᖓᓄᑦ. ᑖᑦᓱᒪ ᓴᓇᔭᐅᓂᖓ ᓅᕕᒻᐱᕆ 2014-ᒥ ᐱᔭᕇᓚᐅᔪᖅ. ᑖᒃᑯᐊ ᐃᓕᓐᓂᐊᑎᑦᓯᕕᐅᓚᐅᕐᑐᑐᑦ ᐃᙯᓕᓴᕐᕕᐅᓚᐅᕐᑐᑐᓪᓗ ᑲᑎᖕᖓᔨᒃᑯᑦ ᐊᓪᓚᕕᒋᖃᑦᑕᓚᐅᔪᔭᖓᑕ ᓴᓂᐊᓃᑦᑐᑦ.
ᑭᓇᒃᑰᓂᕗᑦ:
ᑲᑎᕕᒃ ᐃᓕᓐᓂᐊᓂᓕᕆᓂᖅ ᓴᕐᕿᑎᑕᐅᓯᒪᔪᖅ 1975-ᖑᑎᓪᓗᒍ, ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ. 1978-ᒥᓂᑦ ᐃᓕᓐᓂᐊᑎᑦᓯᔨᑑᕙᑦᑐᖅ ᓄᓇᕕᒻᒥᐅᓂᒃ. ᐃᓕᓐᓂᐊᕈᑎᑦᓴᓕᐅᕐᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᕐᒥ ᐃᓕᓐᓂᐊᑎᑦᓯᓲᖑᑦᓱᓂ ᓄᓇᓕᓐᓂ 14-ᓂ ᓄᓇᕕᒻᒥ, ᐃᓄᒃᑎᑐᑦ, ᒍᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᓐᓂᒃ. ᑐᑭᓯᒋᐊᓪᓚᒍᒪᒍᕕᑦ ᐅᕙᓂ ᕿᒥᕐᕈᒍᓐᓇᑐᑎᑦ:www.kativik.qc.ca
— 30 —
ᑐᑭᓯᒋᐊᕈᒪᒍᕕᑦ ᐅᕗᖓ ᐅᖃᓕᒪᓗᑎᑦ:
Jade Duchesneau Bernier
Public Relations Officer
(514) 482-8220