ᐅᒥᐅᔭᖅ, ᓄᓇᕕᒃ, ᑯᐯᒃ (ᒫᑦᓯ 25, 2014) ᑲᓇᑕᒥ ᐊᓂᕐᓂᖃᖕᖏᑐᓕᐊᕐᑏᑦ ᐱᓇᓱᕝᕕᖓᓂᑦ ᐱᓯᒪᔪᖅ David Saint-Jacques ᐅᒥᐅᔭᕐᒧᑦ ᑎᑭᒋᐊᖃᓛᕐᑐᖅ ᖃᐅᑉᐸᑦ, ᑭᓘᑕᕐᒧᑦ ᐃᓕᓴᕐᕕᒧᑦ ᐳᓛᕆᐊᓛᕐᓱᓂ.

ᐅᒥᐅᔭᕐᒥ, 130ᒦᑦᑐᓴᐅᔪᓄᑦ ᐃᓕᓵᓄᑦ ᕿᓚᓈᕆᔭᐅᖃᑦᑕᑐᖅ ᐊᓂᕐᓂᖃᖕᖏᑐᒦᑦᓱᓂ ᐱᓇᓱᐊᓲᖏᓐᓂᒃ ᐅᓂᒃᑳᕕᐅᓛᕋᒥᒃ.

ᐋᓐᓂᐊᓯᐅᑎᒻᒪᕆᐅᓯᒪᒐᒥ ᐊᓐᓂᐊᓯᐅᑎᒻᒪᕆᓐᓄᓗ ᐊᖓᔪᕐᖄᕆᔭᐅᓯᒪᑦᓱᓂ ᐃᓅᓕᑦᓯᕕᒻᒥ ᐋᓐᓂᐊᕕᒻᒥ ᐳᕕᕐᓂᑐᒦᑦᑐᒥ, ᖃᐅᔨᒻᒫᕆᔭᐅᑦᓯᐊᑐᖅ Saint-Jacques ᐅᒥᐅᔭᕐᒥᐅᓄᑦ. “ᓄᓇᓕᒻᒥᐅᑦ ᐊᐅᓚᔨᒐᑦᓴᖃᑦᓯᐊᑐᑦ ᐅᒥᐅᔭᕐᒥ ᐋᓐᓂᐊᓯᐅᑎᒻᒪᕆᐅᑎᓪᓗᒍ,” ᐅᖃᕐᑐᕕᓂᖅ ᓂᑯᓚ ᐯᐋᑦ, ᑭᓘᑕᕐᒥ ᐃᓕᓴᕐᕕᒥ ᐃᓕᓭᔩᑦ ᐊᖓᔪᕐᖄᖓ.

ᖃᐅᔨᒻᒫᕆᑦᓯᐊᑕᒥᓂᒃ ᐅᐱᒋᔭᖃᑦᓯᐊᑐᑦ ᐃᓕᓵᑦ ᐃᓕᑦᓯᕕᑦᓴᖃᕆᐊᓪᓚᓛᕋᒥᒃ ᓱᑯᐃᔦᓂᕐᒨᓕᖓᔪᓂᒃ. ᓄᓇᓕᒻᒥ ᓱᑯᐃᔭᕐᑕᕕᓂᕐᒥᓂᒃ ᑕᑯᑦᓴᐅᑎᑦᓯᓂᖃᓚᐅᔪᑎᓪᓗᒋᑦ ᓄᓇᓕᓕᒫᓂᓪᓗ ᐱᓯᒪᔪᑦ ᑕᑯᑦᓴᐅᑎᑦᓯᓚᐅᔪᒻᒥᑎᓪᓗᒋᑦ ᓄᓇᕕᒻᒥ ᐃᓕᓴᕐᕕᓂᑦ ᐱᓯᒪᔪᑦ, ᐃᓕᓵᑦ ᓱᑯᐃᔦᖃᑦᑕᓕᕇᕐᑐᑦ ᐅᑦᑐᕋᖃᑦᑕᓕᕇᕐᓱᑎᓪᓗ.

“ᑕᒪᓐᓇ ᑫᓪᓚᑐᐃᒋᐊᓪᓚᕈᑎᐅᒐᓱᐊᕐᑐᖅ ᓱᑯᐃᔦᓂᕐᒨᓕᖓᔪᓂᒃ,” ᐅᖃᕐᑐᖅ ᓂᑯᓚ ᐯᐋᑦ. ”ᐃᓚᐅᔪᓂᒃ ᑐᓱᓕᕐᑎᓯᒍᒪᒐᓗᐊᕐᒥᓱᑕ ᓯᕗᓂᕐᒥ ᐱᓇᓱᒐᕆᒍᒪᒐᔭᕐᑕᒥᓂᒃ ᐃᓱᒪᑦᓴᓯᐅᕈᑎᖃᕐᑎᓗᒋᑦ ᓱᓇᓂᓪᓗ ᐃᓕᓴᕈᒪᒐᔭᕐᒪᖔᕐᒥᒃ ᓱᑯᐃᔦᓂᕐᒨᓕᖓᔪᓂᒃ,” ᐅᖃᕐᓂᒥᔪᖅ.

David Saint-Jacques ᑭᓘᑕᕐᒥ ᐃᓕᓴᕐᕕᒦᓛᕐᑐᖅ ᒫᑦᓯ 26ᒥᑦ 31ᒧᑦ, 2014. ᑌᒪ ᐃᓄᒃᔪᐊᓕᐊᕐᓂᐊᓕᕋᒥ, ᐃᓐᓇᓕᒻᒥ ᐃᓕᓴᕐᕕᒥ ᐃᓕᓵᓂᒃ ᐅᖄᕕᖃᕆᐊᕐᑐᓗᓂ, ᐁᕆᓕ 1ᒥ ᕿᑎᕋᕇᕐᐸᑦ. ᐳᓛᕆᐊᕈᓐᓇᓯᑎᑕᐅᔪᖅ ᑲᑐᑦᔨᓂᕐᒪᑕ ᑲᑎᕕᒃ ᐃᓕᓐᓂᐊᓂᓕᕆᓂᕐᓗ ᐊᒻᒪᓗ ᑲᓇᑕᒥ ᐊᓂᕐᓂᖃᖕᖏᑐᓕᐊᕐᑏᑦ ᐱᓇᓱᕝᕕᖓ.

ᑲᑎᕕᒃ ᐃᓕᓐᓂᐊᓂᓕᕆᓂᖅ:

ᑲᑎᕕᒃ ᐃᓕᓐᓂᐊᓂᓕᕆᓂᖅ ᐱᒍᑦᔨᕕᑦᓴᑖᕕᓂᖅ 1975ᒥ, ᔦᒥᓯ ᐯᒥ ᑯᐯᓪᓗ ᑕᕐᕋᖓᓂ ᐊᖏᖃᑎᒌᒍᑎᑎᒍᑦ. 1978ᒥᓂᑦ, ᐃᓕᓐᓂᐊᓂᕐᒥᒃ ᐱᒍᑦᔨᔨᐅᓯᒪᔪᖅ ᓄᓇᕕᒻᒥᐅᓂᒃ. ᐃᓕᓐᓂᐊᕈᑎᑦᓴᓕᐊᒍᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᓂᑎᒍᑦ ᐃᓕᓭᒍᑎᐅᓲᑦ ᑯᓕᓪᓗ ᓯᑕᒪᓪᓗᓂ ᐃᓕᓴᕐᕕᓂ ᓄᓇᕕᒻᒥ ᓄᓇᓕᓐᓂ. ᐃᓄᒃᑎᑐᑦ ᐅᖃᐅᓯᖅ ᐅᖃᐅᓯᕐᖄᕆᔭᐅᔪᖅ ᖃᓪᓗᓈᑎᑑᕐᑐᓗ ᐅᐃᒍᐃᑎᑑᕐᑐᓗ ᐁᑉᐱᐅᑎᒋᔭᐅᑎᓪᓗᒋᑦ. ᑐᑭᓯᒋᐊᓪᓚᕈᒪᔪᑦ, ᑕᑯᒋᐊᕈᓐᓇᑐᑦ ᖃᕆᑕᐅᔭᒃᑯᑦ ᑐᕌᕈᑎᑦᑎᒍᑦ: www.kativik.qc.ca

— 30 —

ᑐᑭᓯᒋᐊᓪᓚᕈᒪᔪᑦ, ᖃᐅᔨᒋᐊᕐᕕᖃᕈᓐᓇᑐᑦ:

ᔮᑦ ᑐᔅᓅ ᐱᐊᕐᓃ                              
ᑐᓴᕋᑦᓴᓂᐊᕐᑎ
ᑲᑎᕕᒃ ᐃᓕᓐᓂᐊᓂᓕᕆᓂᖅ
514-482-8220